Pene 35

Te Aˈoraa tuiroo roa ˈˈe tei ore aˈenei i faahitihia

TEIE te hoê o te mau hohoˈa haamanaˈo-rahi-roa ˈˈe-hia o te aamu o te Bibilia: Te parahi noa ra o Iesu i nia i te tupuai o te hoê mouˈa, a horoa noa ˈi i ta ˈna Aˈoraa tuiroo roa i nia i te Mouˈa. Ua tupu te reira i pihai iho i te Miti o Galilea, i pihai noa ˈtu paha ia Kaperenaumi. I muri aˈe i to ˈna pureraa i te po taatoa, ua maiti atura o Iesu i ta ˈna na pǐpǐ 12 o te riro mai ei mau aposetolo. I muri iho, ua pou maira ratou paatoa i taua vahi papu o te mouˈa ra.

E manaˈo paha outou e, i teie nei, ua rohirohi roa o Iesu e te hinaaro ra oia e taotooto rii. E rave rahi râ tiaa taata tei haere mai, vetahi mai Iudea mai e mai Ierusalema roa mai, tau 100 aore ra 110 kilometera te atearaa. Ua haere mai vetahi mai te pae miti o Turia e o Sidona mai i te pae apatoerau. Ua haere mai ratou no te faaroo ia Iesu e ia faaorahia to ratou mau maˈi. Te vai atoa ra te feia i haamauiuihia e te mau demoni, te mau melahi iino a Satani.

A pou mai ai o Iesu, ua haafatata maira te feia maˈi no te tapea ia ˈna, e ua faaora aˈera oia ia ratou paatoa. I muri iho, e au ra e ua paiuma ˈtu o Iesu i nia i te hoê vahi teitei o te mouˈa. I reira, ua parahi ihora oia e ua haamata ˈtura i te haapii i te mau tiaa rahi taata tei purara haere i te hoê vahi papu i mua ia ˈna. A hiˈo na râ! I teie nei, aita hoê noa ˈˈe melo o taua mau taata e faaroo maira e mauiui faahou ra!

Te hinaaro rahi ra te mau taata e faaroo i te orometua o te nehenehe e faatupu i teie mau semeio maere mau. Na mua roa ˈˈe, ua faahiti o Iesu i ta ˈna aˈoraa no ta ˈna mau pǐpǐ, o tei haaputuputu paha i pihai iho ia ˈna. Ia nehenehe atoa râ tatou e fanaˈo i te reira, ua papai roa o Mataio raua o Luka i teie aˈoraa.

Fatata e maha taime roa ˈˈe te faataaraa parau a Mataio no nia i te aˈoraa i ta Luka. Hau atu, te vauvau maira o Luka i te mau tuhaa ta Mataio e faatia ra, mai te huru ra ïa e ua faahiti o Iesu i te reira i te tahi atu taime i roto i ta ˈna taviniraa, mai ta tatou e ite ia faaau tatou i te Mataio 6:9-13 e te Luka 11:1-4, te Mataio 6:25-34 e te Luka 12:22-31. Eita râ tatou e maere i te reira. Mea papu maitai e ua haapii o Iesu i taua mau mea noa nei â hau atu i te hoê taime, e ua maiti o Luka e faatia vetahi o taua mau haapiiraa ra i roto i te tahi mau huru tupuraa.

Te mea e haafaufaa ra i te aˈoraa a Iesu, e ere noa te hohonu o te mau manaˈo i te pae varua e vai ra i roto, o te ohie e te maramarama atoa râ o ta ˈna huru faataaraa i teie mau parau mau. Ua rave mai oia i te mau huru tupuraa matauhia e ua faahiti oia i te mau mea ta te taata i ite, ia nehenehe te feia atoa e imi ra i te hoê oraraa maitai aˈe ia au i te hinaaro o te Atua ia taa maitai i to ˈna mau manaˈo.

O vai ma te Feia oaoa roa?

Te hinaaro nei te mau taata atoa e oaoa. Ma te papu maitai i te reira, ua haamata aˈera Iesu i ta ˈna Aˈoraa i nia i te Mouˈa ma te faataa mai i te feia e oaoa mau ra. Te taa ra ia tatou e ua huti mau â te reira i te ara-maite-raa o teie feia rahi roa. Teie râ, e rave ahi paha o te manaˈo e te patoi ra ta ˈna mau parau matamua te tahi e te tahi.

Ua haamata ˈtura o Iesu ma te parau atu i ta ˈna mau pǐpǐ e: ‘E oaoa outou, e tei haehaa, no outou hoi te basileia o te Atua ra. E oaoa outou, e tei poia i teie nei, e faaîhia hoi outou. E oaoa outou, e tei oto i teie nei, e ata hoi outou. E oaoa outou ia riri mai te taata ia outou . . . E oaoa i te reira mahana, e ouˈouˈa noa i te oaoa; ua ite hoi outou e e utua rahi ta outou tei te ao.’

O te faatiaraa teie a Luka no nia i te omuaraa o te aˈoraa a Iesu. Ia au râ i te faatiaraa a Mataio, ua parau atoa o Iesu e e oaoa atoa te feia mǎrû, te feia aroha, te feia mafatu viivii ore, e te feia hau. Te na ô ra o Iesu e e oaoa ratou, no te mea e fanaˈo ratou i te fenua, e arohahia mai ratou, e ite ratou i te Atua, e e parauhia ratou e mau tamarii na te Atua.

Te auraa o te parau a Iesu no nia i te oaoa, e ere noa ïa te riroraa ei taata arearea noa, ia hauti noa anaˈe oia. Mea hohonu roa ˈtu â te oaoaraa mau, inaha, te faahiti ra oia i te manaˈo no te mauruururaa, te iteraa e ua noaa mai te mea i titauhia e te manuïaraa o te oraraa.

Te faaite ra o Iesu e te feia e oaoa mau ra, o te feia ïa o tei farii i to ratou hinaaro i te pae varua, o tei peapea roa no te mea e feia hara ratou, e o tei noaa i te ite e o te tavini i te Atua. No reira, noa ˈtu e e ririhia mai ratou aore ra e hamani-ino-hia ratou no te mea te rave ra ratou i te hinaaro o te Atua, e oaoa ratou no te mea ua ite ratou e te farii maira te Atua ia ratou e e fanaˈo ratou i te haamaitairaa o ta ˈna e horoa mai, oia hoi te ora mure ore.

Teie râ, e rave rahi mau taata i faaroo na ia Iesu, mai vetahi mau taata i teie nei tau, tei tiaturi e e oaoa te hoê taata ia ruperupe oia i te pae materia e ia fanaˈo oia i te mau mea e navenave ai ra. Ua ite hoi o Iesu i te reira. Ma te haamau i te hoê taa-ê-raa o te faahitimahuta paha i te rahiraa o te feia e faaroo maira ia ˈna, ua parau atura oia:

“E ati râ to outou, e te feia taoˈa rahi! ua noaa hoi to outou oaoaraa. E ati to outou, e te feia i î na! E poia hoi outou. E ati to outou, e te feia i ata i teie nei! E mihi hoi outou e e oto. E ati to outou ia haamaitai mai te taata atoa ia outou! i na reira hoi to ratou hui tupuna i te mau peropheta haavare ra.”

Eaha ta Iesu e hinaaro ra e parau? No te aha te haapueraa i te faufaa, te maimi-noa-raa i te mau mea e navenave ai ra e te fanaˈoraa i te hanahana a te taata, e faatupu ai i te ati? No te mea ia noaa i te hoê taata teie mau taoˈa e ia poihere oia i te reira, e tuu oia i te taviniraa i te Atua, o te reira anaˈe hoi te nehenehe e faatupu i te oaoaraa mau, i te hiti o to ˈna oraraa. Oia atoa, aita o Iesu e hinaaro ra e parau e e oaoa te hoê taata no te mea noa ïa e e taata veve oia, te pohe ra oia i te poia aore ra te oto ra oia. Mea pinepine râ teie mau taata e roohia ra i te ati, i te farii i te mau haapiiraa a Iesu e e fanaˈo atu ai i te haamaitairaa o te oaoaraa mau.

I muri iho, ua parau atura o Iesu i ta ˈna mau pǐpǐ e: “O outou te miti no te fenua.” Parau mau, aita o ˈna e hinaaro ra e parau e e miti mau ratou. E nehenehe râ te miti e faaherehere. Te vai ra te tahi miti i pihai iho i te fata, i te hiero o Iehova, ta te mau tahuˈa e ohipa na i reira e rave na no te tamiti i te mau taoˈa ta ratou e pûpû.

Ua riro te mau pǐpǐ a Iesu ei “miti no te fenua” i te mea e e mana to ratou no te faaherehere i te taata. Oia mau, e faaora te parau ta ratou e hopoi atu i te mau taata atoa e farii i te reira. E faaô oia i roto i to ratou oraraa i te tahi mau huru mai te mau-papu-raa, te taiva ore e te faaroo, ia ore ratou ia viivii i te pae varua e i te pae morare.

“O outou te maramarama o teie nei ao,” ta Iesu ïa i parau i ta ˈna mau pǐpǐ. Eita te hoê lamepa e tuuhia i raro aˈe i te hoê farii, i nia râ i te vairaa, no reira Iesu i parau ai e: “Oia atoa to outou maramarama, ia anaana ïa i mua i te aro o te taata nei.” E na reira te mau pǐpǐ a Iesu ia haere ratou e poro i te taata e ia riro ratou ei mau hiˈoraa faahiahia mau i te pae no te haerea o te tano maitai i te mau faaueraa tumu a te Bibilia.

Te hoê haapiiraa teitei na ta ˈna mau pǐpǐ

Ua faariro te mau upoo faatere haapaoraa ia Iesu mai te hoê taata ofati i te Ture a te Atua e aita i maoro aˈenei, ua opua ratou e taparahi pohe roa ia ˈna. A tamau noa ˈi Iesu i ta ˈna Aˈoraa i nia i te Mouˈa, ua faataa aˈera oia e: “Eiaha e manaˈo e i haere mai au e faaore i te ture e te mau peropheta; aore au i haere mai e faaore, e faatia râ.”

Mea faatura roa o Iesu i te Ture a te Atua e ua faaitoito oia ia vetahi ê ia na reira atoa. Ua na ô aˈera oia e: “O te faahapa e o te haapii ia vetahi ê ia faahapa i te parau iti haihai roa i teie nei mau ture, e parauhia oia i te iti roa i teie nei mau ture, e parauhia oia i te iti roa i te basileia o te [raˈi],” oia hoi e eita roa ˈtu taua taata nei e ô i roto i te Basileia.

Maoti hoi i te faahapa i te Ture a te Atua, ua faautua Iesu i te mau haerea o te aratai i te hoê taata ia ofati i te reira. I muri aˈe i to ˈna faahaamanaˈoraa e te na ô ra te Ture e, “Eiaha oe e taparahi i te taata,” te na ô râ o Iesu e: “Te parau atu nei râ vau ia outou, O te taata i riri noa i to ˈna taeae, e au atoa ia ˈna i te haavaraa.”

I te mea e mea ino roa ia tamau â i te riri i to ˈna hoa, e riro hoi te reira i te aratai roa ˈtu i te ohipa taparahi taata, ua faataa mai o Iesu e eaha te tia ia rave ia tupu te hau. Teie ta ˈna e faaue ra: “E teie nei ia hopoi oe i ta oe taoˈa horoa [tusia] noa i te fata ra, e ua manaˈo ihora oe i reira, e e hara ta to taeae ia oe na; e vaiiho atu i to taoˈa i mua i te fata ra, e mata na i te haere e faaite i te taeae, a haere a hopoi ai i ta oe taoˈa.”

Ma te faahiti i te hitu o te Ture Ahuru, ua parau faahou o Iesu e: “Ua faaroo hoi outou, e i parauhia mai te feia tahito ra e, Eiaha oe e faaturi.” Teie râ, ua faautua atoa Iesu i te haerea o te riro i te aratai tia ˈtu i te faaturi. “Te parau nei râ vau ia outou, O te hiˈo noa ˈtu i te vetahi ê ra vahine ei faatupu i te hinaaro, ua faaturi ïa ia ˈna i to ˈna ihora aau.”

Aita o Iesu e parau ra i ǒ nei no te hoê manaˈo tia ore e morohi noa, ua parau râ oia e ‘o te hiˈo noa ˈtu.’ E faaara teie huru hiˈoraa tamau i te hinaaro uˈana, o te aratai tia ˈtu i te faaturi. Nafea te hoê taata ia ape i te reira? Ua rave o Iesu i te hoê hohoˈa no te haapapu i te ravea etaeta te tia ia rave, i te na ôraa e: “E te hapa na oe i to mata atau, e ohiti e faarue ê atu . . . E te hapa ra oe i to rima atau, e tâpû e a faarue ê atu.”

E pinepine te taata i te haapae i te hoê melo maˈi no te faaora ia ratou. Ia au râ i te parau a Iesu, mea faufaa roa ˈtu â ia “faarue ê atu” noa ˈtu eaha te ohipa, e tae noa ˈtu te hoê taoˈa faufaa roa mai te hoê mata aore ra te hoê rima, no te ape i te tahi manaˈo aore ra te tahi ohipa tia ore. Ahiri aita ra, mai ta Iesu e faataa ra, e faaruehia teie mau huru taata i roto i te Gehena (te hoê vahi tutuiraa pehu i pihai noa ˈtu ia Ierusalema), te taipe o te haamouraa mure ore ra.

Ua faaite atoa o Iesu e eaha râ to tatou huru i mua i te feia e hamani ino mai aore ra e faaino mai ia tatou. Teie ta ˈna aˈoraa: “Eiaha e patoi atu i te taata hamani ino: o te moto mai i to papariˈa atau na, e fariu atoa ˈtu i te tahi.” Aita o Iesu e hinaaro ra e parau e ia hamani-ino-hia mai tatou, eiaha ïa tatou e paruru ia tatou iho aore ra i to tatou utuafare. Eita te hoê poˈara e horoahia no te haapepe i te pae tino, no te faaino râ. No reira, te parau ra o Iesu e ia tamata te hoê taata i te faatupu i te hoê taputôraa aore ra te hoê tatamaˈiraa, na roto i te poˈararaa mai aore ra i te taoraraa mai i te tahi mau parau faaino, mea ino roa ïa ia faahoˈi atu.

I muri aˈe i to ˈna faahaamanaˈoraa i te Ture a te Atua no nia i te aroha taata-tupu, ua aˈo maira o Iesu e: “Te parau atu nei râ vau ia outou, E aroha ˈtu i to outou mau enemi; . . . e pure hoi i te feia i parau ino mai e tei hamani ino mai ia outou.” Ma te horoa mai i te hoê tumu faahiahia roa no te na reira, ua na ô maira oia e: ‘Ia riro outou ei tamarii na to outou Metua i te raˈi ra, te faahiti nei hoi oia i to ˈna mahana i nia i te ino e te feia maitai.’

Ua faaoti o Iesu i teie tuhaa o ta ˈna aˈoraa i te na ôraa e: “Ia maitai roa hoi outou mai to outou Metua i te [raˈi] e maitai roa ra.” Aita Iesu e hinaaro ra e parau e e nehenehe tatou e riro ei taata tia roa. Teie râ, ia pee tatou i te Atua, e nehenehe ta tatou e faaaano atu â i to tatou here i nia i to tatou mau enemi. Te faahiti atoa ra o Luka i teie mau parau a Iesu e: “E aroha atoa hoi outou mai to outou Metua e aroha maira.”

Te pure, e te tiaturi i te Atua

A tamau noa ˈi Iesu i ta ˈna aˈoraa, ua faautua aˈera oia i te haavare o te feia e faatiatia ra no to ratou faahua paieti. Te na ô ra oia: ‘Ia horoa outou i te ô, eiaha e na mua i te faaoto i te pu mai ta te feia haavare ra.’

“E ia pure hoi oe ra,” ta Iesu ïa e parau faahou ra, “eiaha mai ta te feia haavare, o te hinaaro i te pure tia noa i te mau sunago, e te poro aroâ ra, ia hiˈohia ratou e te taata.” Teie râ ta ˈna e haapii ra: “Area ia pure oe ra, e haere i roto i to piha, e opani maite i te opani a pure ai i to Metua.” Ua pure o Iesu iho i mua i te aro o te taata, no reira, aita ïa o ˈna e faahapa ra i te reira. Te faahapa nei râ oia i te mau pure e faahitihia ia faahiahia roa mai te taata e ia faahiti ratou i te parau faahanahana.

Teie â te aˈoraa a Iesu: “E ia pure outou ra, eiaha ia rahi te parau rii faufaa ore mai ta te mau Etene ra.” Aita o Iesu e parau ra e mea ino ia na nia iho noa i te parau. Ua na nia iho noa oia i te faahiti i taua nei â “parau” ra i roto i ta ˈna pure. Ta ˈna râ e faahapa ra, o te ‘faahiti-noa-raa’ ïa i te mau parau i tamau-aau-hia, mai te feia e faahiti nei i te mau pure korona.

No te tauturu i te feia e faaroo maira ia ˈna ia pure, ua horoa maira o Iesu i te hoê pure o te riro ei hiˈoraa, e hitu aniraa i roto. Te haafaufaa ra na aniraa matamua e toru, ma te tia mau hoi, i te faatereraa a te Atua e ta ˈna mau opuaraa. E mau aniraa teie no te faaraa i te iˈoa o te Atua, ia tae mai to ˈna Basileia e ia faatupuhia to ˈna hinaaro. Na aniraa e maha i muri mai, e mau aniraa ïa no te taata tataitahi, oia hoi ia noaa mai te maa i te mau mahana atoa, ia faaorehia mai te mau hara, ia ore te faahemaraa ia hau atu i te nehenehe e faaoromaihia, e ia faaorahia i te ino.

I muri iho, ua faahiti o Iesu i te marei o te haafaufaa-rahi-raa i te mau taoˈa materia. Ua aˈo atura oia e: “Eiaha e haapue noa i te taoˈa na outou i teie nei ao, i te vahi e pau ai i te huhu e te pe, i te vahi e tomohia ˈi e e eiâhia ˈi e te eiâ.” Eita noa taua mau taoˈa nei e pau, aita atoa râ to ratou e faufaa i mua i te aro o te Atua.

No reira o Iesu e parau ai e: “E haapue râ i te taoˈa na outou i nia i te raˈi.” E nehenehe tatou e na reira ia tuu tatou i te taviniraa a te Atua i nia i te parahiraa matamua i roto i to tatou oraraa. Aita e taata e nehenehe e eiâ i te faufaa i haaputuhia i pihai iho i te Atua aore ra te haamauruururaa rahi. Te parau râ o Iesu e: “Te vahi hoi i vaiihohia ˈi ta outou taoˈa ra, e riro atoa i reira to outou aau.”

Ma te faahiti â i te marei o te haapueraa i te taoˈa, teie te parabole ta Iesu i horoa mai: “O te mata to te tino nei lamepa, te maitai ra to mata, e maramarama ïa to tino atoa; ia maˈihia râ to oe mata, e pouri ïa to tino atoa.” E au te mata e ite maitai no te tino i te hoê lamepa tei tutuihia i roto i te vahi poiri. E titauhia i te hoê mata haehaa no te ite maitai, oia hoi, te hoê mata o te hiˈo papu i te hoê anaˈe mea. Ia ore te hoê mata e ite papu maitai, e hape roa ïa to tatou huru hiˈoraa, e e tuu tatou i te mau tapao materia na mua ˈˈe i te taviniraa i te Atua, e i te pae hopea e poiri roa te “tino” taatoa.

Te haafaufaa ra o Iesu i teie tumu parau na roto i te hoê parabole puai mau: “E ore te taata e tia ia faaroo i te fatu toopiti; e riro oia i te au ore atu i te hoê, e te hinaaro atu i te tahi; e aore ra, e riro i te au atu i te hoê, e te faarue taue i te tahi. O outou nei hoi, e ore e tia ia faaroo i te Atua e te Mamona.”

I muri aˈe i to ˈna horoaraa i teie aˈoraa, ua haapapu maira o Iesu i te feia e faaroo maira ia ˈna e, eiaha ratou ia tapitapi no to ratou mau hinaaro i te pae materia, mai te peu e e tuu ratou i te taviniraa a te Atua i mua. Te na ô ra oia: “A hiˈo na i te mau manu o te reva, aore ratou e ueue, aore hoi e ooti, aore a ratou fare pueraa maa; na to outou Metua i te [raˈi] râ e faaamu ia ratou.” Ua ui maira oia e: “E ere anei te maitai rahi to outou i to ratou?”

I muri iho, ua faahiti aˈera o Iesu i te mau lili o te aua e ua parau oia e “e taea noa ˈtu ia Solomona ma to ˈna unauna rahi, e ore â to ˈna ahu e au i te nehenehe i to te hoê o ratou nei.” Te na ô râ oia e: “Ia na reira hoi te Atua i te faaunauna i te raau rii o te fenua nei, . . . a tae ai hoi ia outou, o outou i te faaroo tapetepete e!” Ua faaoti aˈera o Iesu i te na ôraa e: “Eiaha outou e tapitapi noa, a na ô ai ra, Eaha ta matou ia amu? e, Eaha ta matou ia inu? e, Eaha to matou ahu ia ahu? . . . ua ite hoi to outou Metua i te [raˈi] ra, e ia noaa taua mau mea ra ia outou e tia ˈi. E mata na râ outou i te imi i te basileia o te Atua, e te parau-tia na ˈna; e amui-atoa-hia mai taua mau mea ra ia outou.”

Te eˈa o te ora

Teie hoi te eˈa o te ora, ia farii tatou i te mau haapiiraa a Iesu. E ere râ i te mea ohie. Ei hiˈoraa, e haava etaeta na te mau Pharisea ia vetahi ê, e e rave rahi feia e na reira atoa ra. No reira, a tamau noa ˈi o Iesu i ta ˈna Aˈoraa i nia i te Mouˈa, ua horoa o Iesu i teie faaueraa: “Eiaha e faaino, ia ore outou ia faainohia mai. O ta outou hoi e faaino ia vetahi ê ra, e faaino-atoa-hia ïa outou i te reira.”

Mea atâata roa ia pee i te hiˈoraa o te mau Pharisea o tei faaino rahi. Ia au i te faatiaraa a Luka, ua faahohoˈa o Iesu i teie peu atâata i te na ôraa e: “E tia anei i te matapo ia aratai i te matapo? e ore anei e hiˈa apipiti i roto i te apoo?”

E hara ino roa ia faaino rahi tatou ia vetahi ê, na roto i te faarahiraa i ta ratou mau hapa aore ra na roto i te onoono-noa-raa i te reira. Ua ani atura o Iesu e: “E eaha hoi oe e tia ˈi ia parau atu i to taeae, Ho mai na ˈu e iriti i te pâpaa i roto i to mata na, e inaha, e raau rahi hoi tei roto i to oe iho mata? E tera ra haavare e! e mata na i te iriti i te raau rahi i roto i to oe iho mata; ei reira oe e ite maitai ai ia iriti i te pâpaa iti i roto i te mata o to oe taeae.”

E ere ïa te auraa e eita te mau pǐpǐ a Iesu e haapao i te huru o te taata, inaha, te na ô ra oia e: “Eiaha te mea moˈa ra e hopoihia ˈtu na te urî, eiaha atoa ta outou poe e paruhia ˈtu i te puaa.” Mea moˈa te mau parau mau i roto i te Parau a te Atua. E faaauhia ratou i te mau poe. Teie nei râ, mai te peu e te vai ra te tahi mau taata, e faaauhia i te urî aore ra i te puaa, o te ore roa ˈtu e farii i teie mau parau mau faufaa roa, e tia ïa i te mau pǐpǐ ia vaiiho atu ia ratou e ia imi i te feia e farii mai.

Noa ˈtu â ïa e ua tauaparau aˈena o Iesu no nia i te pure i roto i ta ˈna Aˈoraa i nia i te Mouˈa, te haapapu nei oia i teie nei i te faufaaraa ia tamau noâ i te pure. “E ani,” o ta ˈna ïa e faaitoito nei, “e horoahia mai ta outou.” Ei haapapuraa e ua ineine noa te Atua i te pahono mai i te mau pure, teie ta Iesu i ani: “O vai ïa i roto ia outou i te taata nei e hopoi i te ofai na ta ˈna tamaiti ia ani mai oia i te pane? . . . E tia na ia outou, ino noa ˈi, ia horoa i te mea maitai na ta outou mau tamarii, a tae ai hoi i to outou Metua i te [raˈi] ra i te horoa i te mea maitai i te feia i ani atu ia ˈna ra?”

I muri iho, ua faahiti o Iesu i te hoê ture tei tui te roo i te pae no te haerea, tei parauhia te Ture Auro. Te na ô ra oia: “E te mau mea atoa ta outou i hinaaro ia vetahi ê ra, e na reira atoa ˈtu outou ia ratou.” Te titau maira te oraraa ia au maite i teie nei ture ia hamani maitai atu i te tahi, ma te rave i nia ia ratou mai ta tatou e hinaaro ia na reirahia mai tatou.

Ua haapapu o Iesu e e ere te eˈa o te ora i te mea ohie, i te na ôraa e: “E tomo na te uputa pirihao; te atea nei hoi te uputa e te aano nei te eˈa e tae atu ai i te pohe; e e rave rahi tei na reira i te tomo. Te apǐapǐ râ o te uputa e te piri hoi o te eˈa e tae atu ai i te ora, e te iti hoi o te feia i ite atu i te reira.”

Mea ohie roa ia atea ê, no reira ïa o Iesu e faaara ˈi e: “E ara râ i te orometua haavare, o tei haere mai ia outou ma te huru o te mamoe ra, area o roto ra, e luko taehae ïa.” E itehia te mau raau maitai e te mau raau iino i to ratou mau hotu, e te parau ra o Iesu e, e ite-atoa-hia te mau peropheta haavare na roto i to ratou haerea e ta ratou mau haapiiraa.

Te faataa faahou ra o Iesu e, e ere noa ta te hoê taata e parau o te faariro ia ˈna ei pǐpǐ Na ˈna, o ta ˈna râ e rave. Te parau nei vetahi e o Iesu to ratou Fatu, ia ore râ ratou e rave i te hinaaro o to ˈna Metua, te na ô ra oia e: “O ta ˈu ïa e parau atu, Aita roâ vau i ite ia outou. E haere ê atu outou, e te feia rave parau ino.”

I te pae hopea, ua horoa ˈtura o Iesu i te hoê parau faaotiraa faahiahia roa i ta ˈna aˈoraa. Ua na ô atura oia e: “O te faaroo mai i ta ˈu nei mau parau, e haapao atura, e faito vau ia ˈna i te hoê taata paari, o tei faatia i to ˈna fare i nia i te pǎpǎ; e mairi ihora te ûa, e tahe ihora te pape pue, e te mataˈi hoi i te uihiraa mai i nia iho i taua fare ra e aore roa i parari, no te mea e pǎpǎ te tiaraa.”

I te tahi aˈe pae, ua parau atura o Iesu e: “Area tei faaroo noa mai i ta ˈu nei mau parau, e aore i haapao, e faitohia ïa i te maamaa, o tei faatia noa i to ˈna fare i nia i te one; e mairi ihora te ûa, e tahe ihora te pape pue, e te mataˈi hoi i te uihiraa i nia iho i taua fare ra, mairi ihora e e parari rahi to taua fare ra.”

A faaoti ai Iesu i ta ˈna aˈoraa, ua maere anaˈe ihora te taata atoa i te huru o ta ˈna haapiiraa, no te mea te haapii atura oia ia ratou mai te hoê taata mana, eiaha râ mai to ratou mau upoo faatere haapaoraa. Luka 6:12-23; Mataio 5:1-12; Luka 6:24-26; Mataio 5:13-48; 6:1-34; 26:36-45; 7:1-29; Luka 6:27-49.

▪ Teihea roa o Iesu a faahiti ai oia i ta ˈna aˈoraa tuiroo roa, o vai ma to reira, e eaha te ohipa i tupu hou oia i horoa ˈi i te reira?

▪ No te aha e ere i te mea maere ia faatia o Luka i te tahi mau haapiiraa o te aˈoraa ia au i te tahi atu mau huru tupuraa?

▪ Eaha te faufaa mau o te aˈoraa a Iesu?

▪ O vai te feia oaoa mau, e no te aha?

▪ No vai te ati, e no te aha?

▪ Mea nafea te mau pǐpǐ a Iesu i te riroraa ei “miti no te fenua” e ei “maramarama no teie nei ao”?

▪ Mea nafea to Iesu faaiteraa i to ˈna faatura rahi i te Ture a te Atua?

▪ Eaha te faaueraa ta Iesu i horoa no te faaore roa i te mau tumu o te ohipa taparahi taata e te faaturi?

▪ Eaha ta Iesu e hinaaro ra e parau ia ˈna i aˈo atu e ia toro atoa ˈtu i te tahi papariˈa?

▪ Mea nafea tatou ia riro ei taata tia roa mai te Atua ra?

▪ Eaha te mau faaueraa ta Iesu i horoa mai no nia i te pure?

▪ No te aha e mea hau aˈe te mau taoˈa no te raˈi ra, e nafea e noaa mai ai?

▪ Eaha te mau parabole i horoahia no te tauturu i te hoê taata ia haapae i te nounou taoˈa?

▪ No te aha o Iesu e parau ai e eiaha roa ˈtu e tapitapi?

▪ Eaha ta Iesu e parau ra no nia i te haavaraa ia vetahi ê; nafea râ oia i te faaiteraa e e tia i ta ˈna mau pǐpǐ ia haapao atoa i te huru o te taata?

▪ Eaha ta Iesu e parau ra i muri iho no nia i te pure, e eaha te ture no nia i te haerea o ta ˈna i faataa mai?

▪ Nafea to Iesu faaiteraa e e ere te eˈa o te ora i te mea ohie e e nehenehe atoa tatou e atea ê?

▪ Mea nafea to Iesu faaotiraa i ta ˈna aˈoraa, e eaha ïa te faahopearaa?