Pene 12

Te bapetizoraa o Iesu

FATATA e ono avaˈe i muri aˈe i to Ioane haamataraa i te poro, ua haere maira o Iesu, tei naeahia i te 30 matahiti i teie nei, ia ˈna ra i Ioridana. Eaha te tumu? No te farerei noa anei ia ˈna? Te anaanatae noa ra anei o Iesu i te tupuraa o te ohipa a Ioane? Aita, ua ani o Iesu e ia bapetizo o Ioane ia ˈna.

Ua oioi aˈera o Ioane i te parau atu e: “O vau hoi ta oe e bapetizo e tia ˈi, e te haere mai na oe ia ˈu nei?” Ua ite o Ioane e to ˈna taeae fetii, o te Tamaiti iho ïa a te Atua. Inaha, ua ouˈa o Ioane i te oaoa i roto i te opu o to ˈna metua vahine i to Maria, tei hapu hoi ia Iesu, haereraa mai e hiˈo ia ratou! Eita e ore e ua faaite atu o Elisabeta, te metua vahine o Ioane, i teie ohipa ia ˈna. E ua faaite atoa oia i te parau a te melahi no nia i te fanauraa o Iesu e te faraa mai te mau melahi i te mau tiai mamoe i te po a fanauhia mai ai o Iesu.

No reira, ua matau maitai o Ioane ia Iesu. E ua ite atoa o Ioane e eita ta ˈna bapetizoraa e tano no Iesu. Ua faataahia hoi te reira no te feia e tatarahapa i ta ratou mau hara, aita râ ta Iesu e hara. Teie râ, noa ˈtu te patoiraa a Ioane, ua ani faahou atu o Iesu e: “A tuu noa mai na; e na reira hoi tatou i te faatia i te mau parau-tia atoa e au ai.”

No te aha e tia ˈi ia bapetizohia Iesu? No te mea ua riro te bapetizoraa o Iesu ei taipe, eiaha no te tatarahaparaa i te mau hara, no to ˈna râ tiaraa mai no te rave i te hinaaro o to ˈna Metua. E tamuta o Iesu, ua tae râ i te taime no ˈna ia haamata i te taviniraa no reira te Atua ra o Iehova i tono mai ai ia ˈna i nia i te fenua nei. E manaˈo anei outou e ua ite Ioane e e tupu te hoê ohipa huru ê i te taime e bapetizo ai oia ia Iesu?

Ua faatia o Ioane i muri iho e: ‘Auaa tei tono mai ia ˈu e bapetizo i te pape nei i parau mai ia ˈu e, O ta oe e hiˈo i te varua i te pouraa mai, e te faaearaa i nia iho ia ˈna ra, oia ïa, o tei bapetizo ïa ma te varua moˈa.’ No reira, ua ite o Ioane e e pou mai te varua o te Atua i nia i te hoê o ta ˈna e bapetizo. Aita paha o ˈna i maere, i to Iesu haereraa mai i rapae i te pape, e ua ite atura o Ioane “i te varua i te pouraa mai, . . . mai te uupa ra, e ua faaea ihora i nia iho ia ˈna.”

Tera râ, ua tupu te tahi mea ê atu â i te bapetizoraa o Iesu. ‘Ua vetea aˈera te raˈi’ ia Iesu. Eaha ïa te auraa? Oia hoi te auraa e, a bapetizohia ˈi o ˈna, ua hoˈi faahou mai to ˈna ite no nia i to ˈna oraraa i nia i te raˈi hou oia i riro mai ai ei taata. I teie nei, te haamanaˈo ra o Iesu i te taatoaraa o to ˈna oraraa ei tamaiti varua a te Atua ra o Iehova, e tae noa ˈtu i te mau mea atoa ta te Atua i parau atu ia ˈna i nia i te raˈi i roto i to ˈna oraraa hou oia e riro mai ai ei taata.

Hau atu, i te taime o to ˈna bapetizoraa, ua na ô maira te hoê reo mai te raˈi mai e: “Tau Tamaiti here teie, ua mauruuru roa vau ia ˈna.” No vai taua reo ra? No Iesu anei? Eita ïa! No te Atua râ. Oia mau, e Tamaiti o Iesu na te Atua, eiaha râ o te Atua iho, mai ta vetahi e parau nei.

Teie râ, e tamaiti taata o Iesu na te Atua, mai te taata matamua ra o Adamu. Teie ta te pǐpǐ ra o Luka i papai, i muri aˈe i to ˈna faataaraa i te bapetizoraa o Iesu: “Ua tae aˈera i te toru o te ahuru o to Iesu matahiti ra, e (mai tei manaˈohia ra hoi) e tamaiti oia na Iosepha, na Heli, . . . na Davida, . . . na Aberahama, . . . na Noa, . . . na Adamu, na te Atua.”

Mai ia Adamu tei riro ei ‘tamaiti taata na te Atua,’ mai te reira atoa o Iesu. O Iesu te taata rahi roa ˈˈe i ora aˈenei, mea papu maitai hoi te reira ia hiˈopoa anaˈe tatou i te oraraa o Iesu. Teie râ, i to ˈna bapetizoraa, ua faatupu o Iesu i te hoê taairaa apî e te Atua, e ua riro atoa mai oia ei Tamaiti varua na te Atua. I teie nei, mai te mea ra e ua pii faahou te Atua ia ˈna i te raˈi ra na roto i te tuuraa ia ˈna i nia i te hoê eˈa o te aratai ia ˈna ia haapae roa i to ˈna oraraa taata e a muri noa ˈtu ei tusia no te huitaata i faautuahia ra. Mataio 3:13-17; Luka 3:21-38; 1:34-36, 44; 2:10-14; Ioane 1:32-34; Hebera 10:5-9.

▪ No te aha e ere o Iesu i te hoê taata matau-ore-hia e Ioane?

▪ I te mea hoi e aita ta Iesu e hara, no te aha ïa oia i bapetizohia ˈi?

▪ Ia au i ta Ioane i ite no nia ia Iesu, no te aha aita paha o ˈna i maere i to te varua o te Atua tauraa mai i nia ia Iesu?