Pene 61

Te faaoraraahia te hoê tamaiti i uruhia i te demoni

I TE taime a haere ai o Iesu, peneiaˈe paha i nia i te Mouˈa o Heremona e o Petero, o Iakobo e o Ioane, ua farerei ihora te tahi atu mau pǐpǐ i te fifi. I to ˈna hoˈiraa mai, ua ite oioi noa o Iesu e ua tupu te hoê peapea. Ua haaatihia ta ˈna mau pǐpǐ e te nahoa taata e te mârô ra te mau papai parau ia ratou. I to ratou iteraa ˈtu ia Iesu, ua hitimaue atura ratou e ua horo atura e aroha ia ˈna. Ua ui atura Iesu e: “Eaha ta outou i mârô ia ratou nei?”

Ua haere maira te hoê taata no taua tiaa rahi ra, ua tuu ihora i to ˈna turi i raro i mua ia Iesu e ua na ô maira: “E Rabi, i aratai mai nei au i tau tamaiti ia oe nei, e varua vava to ˈna; e i te vahi e rave mai ai oia ia ˈna, ua taora noa ia ˈna i raro i te repo; e haaehia ihora oia i reira ra, e auau hoi i te niho, e hope noa ˈˈe to ˈna puai: i parau na hoi au i te mau pǐpǐ na oe e tiavaru i te demoni, aita râ i tia ia ratou.”

E au ra e te faaohipa ra te mau papai parau i te manuïa ore o te mau pǐpǐ i te faaoraraa i teie tamaiti; te haavahavaha atoa ra paha ratou i ta ratou mau tutavaraa. I taua taime fifi ra, ua tia maira o Iesu. Ua parau atura: “Auê ïa ui faaroo ore e, mai te aha ra te maoro o to ˈu parahiraa i ǒ outou nei? mai te aha hoi te maoro o to ˈu faaoromairaa ia outou?”

E au ra e te faatae atura o Iesu i teie mau parau i te mau taata atoa e faaroo ra ia ˈna, tera râ, mea papu roa e te parau atura oia i te mau papai parau tei haapeapea ˈtu i ta ˈna mau pǐpǐ. No taua tamaiti ra, ua na ô atura oia e: “A aratai mai ia ˈna ia ˈu nei.” A haere atu ai oia ia Iesu ra, ua taorahia maira oia i raro i te repo e te demoni i rave ia ˈna ra e taaviriviri ihora ma te iriti puai. Taaviriviri ihora ma te haae i te vaha.

Ua ui atura o Iesu e: “Mai te aha mai â to ˈna roohiaraahia i teie nei pohe?”

Ua parau maira te metua tane e: “Mai to ˈna itiraa mai â; a tai rau aˈenei huriraahia [oia e te demoni] i roto i te auahi, e i raro i te pape ia pohe oia.” E ua taparu oia ia ˈna e: “E i tia ia oe ia rave ra, aroha mai oe ia matou, e e tauturu mai.”

E rave rahi paha matahiti to taua metua tane ra imiraa i te tauturu. E i teie nei, i mua i te manuia-ore-raa o te mau pǐpǐ, ua peapea rahi roa oia. Ma te farii i ta ˈna aniraa peapea mau ra, ua faaitoito ihora Iesu ia ˈna i te na ôraa ˈtu e: “I tia ia oe ia faaroo ra, e tia te mau mea atoa nei i te taata i faaroo.”

Ua pii oioi atura te metua tane e: “Ua faaroo vau” e ma te roimata atoa e: “E turu mai oe i tau faaroo paruparu nei.”

Ua hiˈo atura Iesu i te nahoa taata i te hororaa mai ia ratou ra; no reira ua pii hua ˈtura oia i te demoni e: “E tera ra varua vava e te turi, e haere oe i rapae au, te faaue atu nei au ia oe, e eiaha roa e tomo faahou i roto ia ˈna.” I to ˈna faarueraa i te tamaiti, ua rave atura te demoni ia tuô oia ma te iriti rahi. E ua vaiiho maira ia ˈna ia tarava noa i nia i te repo, no reira, ua parau aˈera te rahiraa o te feia ite e: “Ua pohe roa.” Ua rave mairâ Iesu i te rima o te tamaiti e tia aˈera oia i nia.

Tau taime na mua ˈtu, a tono ai oia i ta ˈna mau pǐpǐ no te poro haere, ua tiavaru ê na ratou i te demoni. No reira, i to ratou putuputuraa i roto i te hoê fare, ua ani atura ratou ia ˈna e: “Eaha i ore i tae ai ia matou te demoni i rapae?”

Ma te haapapu e no to ratou ereraa i te faaroo, ua pahono atura Iesu e: “E ore teie huru demoni e tae noa i rapae maori râ i te pure.” Oia, ua titauhia i te hoê faaineineraa taa ê no te tiavaru i teie demoni puai mau ra. E titauhia te hoê faaroo puai mau e te taparuraa ˈtu i te Atua ia horoa mai oia i te mana.

E ua parau faahou atura Iesu e: “Oia mau hoi teie ta ˈu e parau atu ia outou nei, ahiri e faaroo to outou, e mai te hoê huero sinapi noa iho te rahi, e tia ïa ia outou ia parau noa ˈtu i teie nei mouˈa, A haere i ǒ atu, e na ˈna ïa e haere noa; e aita roa e mea e ore te tia ia outou.” Auê ïa puai rahi to te faaroo e!

E riro paha te mau fifi e rave rahi e faataupupu ra i ta tatou mau tutavaraa i roto i te taviniraa a Iehova mai te mouˈa rahi ra te huru. Tera râ, te faaite ra o Iesu e, ia faahotu tatou i te faaroo i roto i to tatou mafatu, ia atuatu tatou e ia faarahi atu â tatou i taua faaroo ra, e tupu ïa oia e tae roa ˈtu i te paari e e tauturu te reira ia tatou ia faaruru i te mau fifi e nehenehe e faaauhia i te mau mouˈa ra. Mareko 9:14-29; Mataio 17:19, 20; Luka 9:37-43.

▪ I to ˈna hoˈiraa mai mai te Mouˈa Heremona ra, eaha te huru tupuraa ta Iesu i ite?

▪ Eaha te faaitoitoraa ta Iesu i horoa i te metua tane o te tamaiti i uruhia i te demoni?

▪ No te aha aita te mau pǐpǐ i manuïa i te tiavaru i te demoni?

▪ Ia au i te faaiteraa a Iesu, eaha mau na te rahi o te puai o te faaroo?