Pene 99

Te haapii ra o Iesu i Ieriko

I MURI iho, ua tapae atura o Iesu e te tiaa rahi tei pee mai ia ˈna i Ieriko, te hoê oire fatata hoê mahana te atea ia Ierusalema. E au ra e e piti oire i roto ia Ieriko, oia hoi te oire ati Iuda tahito fatata hoê kilometera e te afa te atea i te oire Roma apî. A faarue ai te tiaa rahi i te oire tahito no te tapiri atu i te oire apî, ua faaroo atura e piti feia matapo i te maniania. O Baretimaio te iˈoa o te hoê o raua.

I to raua iteraa e o Iesu tera e haere maira, ua haamata ˈtura o Baretimaio e to ˈna hoa i te pii: “E te Fatu, e te Tamaiti a Davida, e aroha mai ia mâua.” Ua avau atura te tiaa rahi ia raua ia mamû, tera râ, ua rahi noa ˈtura raua i te piiraa e: “E te Fatu, e te Tamaiti a Davida, e aroha mai ia mâua nei.”

I to ˈna faarooraa i teie tuô, ua faaea ihora o Iesu. Ua ani atura oia i te feia e pee maira ia ˈna ia pii i na taata e tuôtuô noa ra ia haere mai. Ua haere atura ratou i na taata matapo ra e ua parau atura i te hoê o raua e: “A faaitoito, a tia i nia; te parauhia maira oe e ana.” Ma te oaoa rahi, ua faarue ihora te taata matapo i to ˈna ahu, e tia aˈera i nia, e ua haere atura ia Iesu ra.

“Eaha to orua hinaaro ia ˈu?” o ta Iesu ïa i ani atu.

“E te Fatu, ia ara to mâua mata”, o ta te feia matapo ïa i taparu atu.

Aroha ˈtura Iesu ia raua e ua tuu atura i to ˈna rima i nia i to raua mata. Ia au i te faatiaraa parau a Mareko, ua parau atura o Iesu i te hoê o raua e: “A haere; ua ora oe i to faaroo.” I reira iho, ua ora ihora to raua mata, e eita e ore e ua haamata raua toopiti atoa ra i te faahanahana i te Atua. I to te mau taata atoa iteraa i teie ohipa, ua arue atoa ˈtura ratou i te Atua. Ma te ore e haamaoro, ua pee atoa ˈtura o Baretimaio e to ˈna hoa ia Iesu.

I to Iesu tomoraa ˈtu i Ieriko, ua rahi roa te tiaa taata. Te hinaaro ra hoi te feia e ite i te taata o tei faaora i te feia matapo. Ua haere mai te mau taata na te mau vahi atoa no te haaati ia Iesu, e inaha, eita vetahi pae e nehenehe e ite atu ia ˈna. I rotopu i teie mau taata, te vai ra o Zakaio, e raatira oia i nia i te mau telona i Ieriko e na te mau vahi tapiri mai. E taata poto oia e aita oia e ite ra i te ohipa e tupu ra.

No reira, ua horo atura o Zakaio na mua mai e ua paiuma ˈtura i nia i te hoê tumu sukamino na te hiti purumu te na reira maira o Iesu i te haere. Mai teie vahi teitei, e nehenehe ta ˈna e ite i te mau mea atoa. A haafatata mai ai te tiaa, ua pii atura o Iesu ia ˈna i nia i te tumu raau: “E Zakaio, a pou mai i tena na, ei to fare ra hoi au parahi ai auanei.” Ua pou oioi maira o Zakaio i raro ma te oaoa rahi e ua horo atura no te faaineine i to ˈna fare no ta ˈna manihini teitei.

Teie râ, i to te taata iteraa i te ohipa i tupu, ua haamata ˈtura ratou i te ohumu. I to ratou manaˈoraa, eita e tia ia riro o Iesu ei manihini na te hoê taata mai ia Zakaio ra te huru. Inaha, ua monihia o Zakaio maoti i te taviriraa i te moni na roto i ta ˈna ohipa telona.

E rave rahi feia tei pee mai, e i to Iesu tomoraa ˈtu i roto i te fare o Zakaio, ua amuamu ihora ratou: “Te haere atura oia ei manihini na te taata rave hara.” Ua ite o Iesu e te vai ra i roto ia Zakaio i te tahi hinaaro e tatarahapa. E aita o Iesu i hape, inaha ua tia mai o Zakaio i mua i to ˈna aro no te faaite e: “Inaha, e te Fatu, e horoa vau i te afa i ta ˈu nei taoˈa na te taata rii, e i hamani ino na vau i te tahi taata ˈtu i te hoê mea iti aˈe, ia taimaha ïa ta ˈu e faahoˈi atu na ˈna.”

Ua haapapu o Zakaio e ua tatarahapa mau â oia na roto i te horoaraa i te afaraa o ta ˈna mau taoˈa na te feia veve e na roto i te faaohiparaa i te tahi atu afaraa no te faahoˈi i te feia o ta ˈna i taviri. Oia mau, e nehenehe ta ˈna e numera ia au i ta ˈna mau tabula tute ehia moni ta ˈna e faahoˈi atu i teie mau taata. No reira, ua tǎpǔ aˈera oia ia taimaha ta ˈna e faahoˈi atu, ma te pee maite i te ture a te Atua e na ô ra e: ‘Ia eiâ te taata i te mamoe, ia faahoˈi oia e maha mamoe ei hoo i te mamoe hoê ra.’

Ua oaoa roa o Iesu i te parau o ta Zakaio i tǎpǔ no te pûpû i ta ˈna mau taoˈa, no reira Oia i parau ai e: “Ua tae mai te ora i teie nei fare i teie nei mahana, e tamaiti atoa hoi oia na Aberahama. I haere mai nei hoi te Tamaiti a te taata nei e imi i tei moe ra e faaora.”

Na mua ˈtu, ua faahohoˈa o Iesu i te parau no “tei moe ra” na roto i te aamu o te tamaiti o tei haamauˈa i ta ˈna taoˈa. I teie nei râ, te vai ra te hoê taata mau o tei moe ra, o tei itea mai râ. Noa ˈtu e ua ohumu e ua amuamu te mau faatere haapaoraa e te feia e pee ra ia ratou no nia i to Iesu haapaoraa ˈtu i te feia mai ia Zakaio ra, ua tamau noâ o Iesu i te maimi e i te faaora i teie mau tamaiti a Aberahama o tei moe ra. Mataio 20:29-34; Mareko 10:46-52; Luka 18:35–19:10; Exodo 22:1.

▪ Ihea roa paha to Iesu farereiraa i te feia matapo e eaha ta ˈna i rave no raua?

▪ O vai o Zakaio, e no te aha oia i paiuma ˈi i nia i te hoê tumu raau?

▪ Mea nafea to Zakaio faaiteraa i to ˈna tatarahapa?

▪ Eaha te haapiiraa ta tatou e nehenehe e huti mai no nia i te haerea o Iesu i nia ia Zakaio?