Pene 17

Te haapiiraa ia Nikodemo

A FAATUPU ai oia i te oroa Pasa o te matahiti 30, ua rave o Iesu i te tahi mau tapao aore ra semeio faahiahia mau. Ua faaitoito atura te reira i te mau taata e rave rahi ia tiaturi ia ˈna. Ua putapû roa o Nikodemo, te hoê melo no te Sunederi, oia hoi te haavaraa rahi ati Iuda, e ua hinaaro oia e ite hau atu â. No reira, ua haere atura oia e farerei ia Iesu i te maororaa po, peneiaˈe paha no te mea te mǎtaˈu ra oia e ia faaino mai te tahi atu mau raatira ati Iuda ia ˈna ahiri e e itehia mai oia.

Ua parau maira oia: “E Rabi, ua ite matou e, e orometua oe mai ǒ mai i te Atua ra; e ore hoi teie nei mau tapao ta oe e rave nei e tia i te taata, auaa te Atua atoa ra.” Ua pahono atura Iesu ia Nikodemo e, no te tomo atu i roto i te Basileia o te Atua, ia ‘fanau-faahou-hia’ te hoê taata e tia ˈi.

Nafea hoi te hoê taata e nehenehe ai e fanau-faahou-hia mai? “E ô faahou anei oia i roto i te opu o tana metua vahine a fanau mai ai?” ta Nikodemo ïa i ani atu.

Eita, e ere te reira te auraa o te fanau-faahou-raa. Ua faataa maira Iesu e: “Ia ore te taata ia fanau i te pape e te [varua], e ore oia e ô i te basileia o te Atua ra.” A bapetizohia ˈi Iesu e a pou mai ai te varua moˈa i nia ia ˈna, i reira to ˈna fanauraahia i “te pape e te varua.” Na roto i te parau no te raˈi mai i faaroohia i taua taime ra, oia hoi, ‘O ta ˈu Tamaiti teie ta ˈu i farii,’ ua faaite mai te Atua e ua faatavai oia i te hoê tamaiti i te pae varua o te nehenehe e ô atu i roto i te Basileia o te raˈi. I muri iho, i te Penetekose o te matahiti 33, e faatavai-atoa-hia te tahi atu feia bapetizohia i te varua moˈa e e fanau-faahou-hia mai ratou ei mau tamarii na te Atua i te pae varua.

Mea faufaa roa râ te ohipa a te Tamaiti taa ê a te Atua ia au i to ˈna tiaraa taata. Ua parau atu o Iesu ia Nikodemo e: “Mai ia Mose i faaiteitei i te ophi i te medebara ra, oia atoa te Tamaiti a te taata, e faateitei-atoa-hia ïa: ia ore ia pohe te faaroo ia ˈna ra, ia roaa râ te ora mure ore.” Oia mau, mai tei titauhia i taua mau Iseraela i hohonihia e te mau ophi taero ra ia hiˈo tia ˈtu i nia i te ophi veo e ora ˈtu ai ratou, e tia atoa i te mau taata ia tuu i to ratou faaroo i roto i te Tamaiti a te Atua ia nehenehe ratou ia tiamâ mai i te pohe.

Ma te tuu i te tapao i nia i te here ta Iehova i faaite i taua taime ra, ua na ô atu o Iesu ia Nikodemo e: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” No reira i Ierusalema, e ono noa avaˈe i muri aˈe i te omuaraa o ta ˈna taviniraa, ua haapapu maitai o Iesu e o ˈna te ravea ta te Atua ra o Iehova i faataa no te faaora i te huitaata nei.

Ua faataa faahou atu o Iesu ia Nikodemo e: “Aore hoi te Atua i tono mai i ta ˈna Tamaiti i te ao nei e faahapa mai i to te ao,” oia hoi, no te haava ia ˈna ma te etaeta, aore ra no te aˈo ia ˈna, ma te faautua i te huitaata nei i te haamouraa. Teie râ, mai ta Iesu i parau, ua tonohia mai oia “ia ora râ to te ao ia ˈna.”

Ua haere mai o Nikodemo ia Iesu ra ma te mǎtaˈu e ma te tapuni i te po. No reira, mea anaanatae roa ia ite e ua faahope o Iesu i ta ˈna tauaparauraa e o ˈna na roto i teie mau parau: “Teie taua faahapa ra, o te maramarama [ta Iesu iho i faatia i roto i to ˈna oraraa e ta ˈna mau haapiiraa] ua tae mai i te ao nei, e hinaaro aˈenei te taata i te pouri, aore te maramarama, no te mea te ino ra ta ratou parau. O tei mau i te parau ino ra, aore oia i hinaaro i te maramarama, e ore hoi oia e haere mai i te maramarama o te itea ta ˈna parau. O tei haapao ra i te parau mau ra, e tae mai ïa i te maramarama ia itea-maitai-hia e, te au ra ta ˈna parau i te Atua.” Ioane 2:23–3:21; Mataio 3:16, 17; Ohipa 2:1-4; Numera 21:9.

▪ Na te aha i turai ia Nikodemo ia haere mai, e no te aha oia i haere mai ai i te po?

▪ Eaha te auraa o te parau ra ‘fanau-faahou-hia’?

▪ Mea nafea to Iesu faahohoˈaraa mai i to ˈna tiaraa no te faaora ia tatou?

▪ Eaha te auraa o te parau ra e aita o Iesu i haere mai no te faahapa i te ao nei?