Pene 62

Te hoê haapiiraa no nia i te haehaa

I MURI aˈe i to ˈna faaoraraa i te tamaiti i uruhia e te demoni i te mau pae ra no Kaisarea Philipi, ua hinaaro Iesu e hoˈi i Kaperenaumi i to ˈna ra vahi. Ua hinaaro râ oia e hoˈi atu e ta ˈna anaˈe ra mau pǐpǐ no te faaineine-maitai-raa ia ratou i to ˈna ra pohe e i te mau hopoia ta ratou e amo atu i muri aˈe. Ua faataa ˈtura oia ia ratou e: “Ua tuuhia te Tamaiti a te taata nei i te rima o te taata, e e taparahi pohe roa ratou ia ˈna; e ia oti i te taparahihia ra, e tia faahou ïa oia i nia i te rui toru ra.”

Ua faahiti aˈenei Iesu i te reira parau, e e toru aposetolo na ˈna ra tei ite mata roa i te taime o to ˈna faahuru-ê-raahia, e ua riro to ˈna “poheraa” i te reira taime ei aparauraa; aita râ ta ˈna mau pǐpǐ i ite i te auraa o taua parau ra. Noa ˈtu â ïa aita hoê aˈe o ratou i patoi, mai ia Petero ra, e e taparahihia oia, ua mǎtaˈu ratou i te ui rahi atu ia ˈna.

Ua tae maira ratou i Kaperenaumi; ua riro taua oire ra ei nohoraa no Iesu i te roaraa o ta ˈna taviniraa, no reira atoa mai o Petero e e rave rahi mau aposetolo. I taua taime ra, ua haere maira te feia i haaputu i te moni no te hiero ia Petero ra e, no te faahapa paha ia Iesu i nia i te hoê ohipa i matarohia, ua ui atura ratou e: “Te horoa nei anei ta outou orometua i te moni aufau?”

Ua pahono atura o Petero e: “Te horoa nei.”

Ua ite Iesu e, i to ˈna tomoraa ˈtu i roto i te fare, tau taime iti i muri aˈe, eaha te ohipa i tupu aˈenei. Aita râ o Petero i oioi atu i te parau, o Iesu na tei parau mai, na ô maira e: “Eaha to oe manaˈo, e Simona? ei ia vai ra te hui arii o teie nei ao titau atu ai i te taoˈa aufau e te moni aufau? ei ta ratou iho tamarii anei, e ia vetahi ê anei?”

Ua parau atura Petero ia ˈna: “Ei te taata ěê.”

Ua na ô maira Iesu e: “Ua tiama maori te tamarii.” I te mea hoi o te Metua o Iesu te Arii o te ao taatoa ra, Oia tei haamorihia i roto i te hiero ra, eita te Tamaiti a te Atua e tia ia faahepohia e te ture ia aufau i te tuhaa o te hiero. Ua parau maira Iesu e: “E haere atu ra oe i te pae roto ra, taora ˈtu ai i te mǎtau, a huti mai ai i te iˈa matamua i amu ra, e ia hahae oe i te vaha ra e ite ai oe i te hoê maa moni [e maha diderama], o ta oe ïa e hopoi atu ia ratou ra na tâua atoa, oi inoino mai ratou ia tatou nei.”

I to ratou hoˈiraa mai i Kaperenaumi, a tahoê ai paha ratou i ǒ Petero, ua ui maira te mau pǐpǐ ia Iesu e: “O vai te rahi i te basileia o te ao ra?” Ua ite na hoi Iesu eaha te mea e haafifi ra ia ratou, ua ite oia i te mârôraa ratou ia ratou iho i te eˈatia ra mai Kaisarea no Philipi mai, ia apee mai ratou ia ˈna. Ua ui atura oia ia ratou, na ô atura e: “Eaha ta outou i mârô noa ia outou iho i te eˈatia ra?” Mamû noa ihora râ ratou, i te mea hoi i mârô na hoi ratou no te ite e o vai tei hau aˈe i rotopu ia ratou.

I muri aˈe i na matahiti e toru to Iesu haapiiraa i ta ˈna mau pǐpǐ, eita e manaˈohia e e tupu mai te hoê aimârôraa mai te reira te huru. E mana rahi mau to te hara e to te mau tumu faaroo i nia i te taata. Ua paari hoi te mau pǐpǐ i roto i te faaroo ati Iuda, faaroo o tei tuu na mua roa i te tiaraa aore ra i te parahiraa i roto i te mau huru taairaa atoa. Hau atu, peneiaˈe ua ô mai i roto ia Petero te manaˈo e ua hau aˈe oia i vetahi i te mea e ua parau Iesu e e horoa oia ia ˈna ra te mau “taviri” o te Basileia. Ua ô atoa paha taua mau manaˈo ra i roto i te feruriraa o Iakobo e o Ioane i te mea e o raua tei ite atu i te faahuru-ê-raahia o Iesu.

Noa ˈtu â ïa te reira, ua horoa Iesu i te hoê faahiˈoraa putapû mau no te faaafaro i to ratou feruriraa. Ua pii oia i te hoê tamaiti iti e ua tuu atura ia ˈna i rotopu ia ratou ra; ua tapea oia ia ˈna e ua parau maira e: “Ia ore outou ia faahuru-ê-hia e ia riro mai te tamarii rii ra, e ore roa outou e ô i te basileia ra o te ao. E teie nei, o tei faahaehaa ia ˈna iho e mai teie nei tamaiti iti, oia te rahi i te basileia o te ao ra. E o te ite atu i te hoê mai teie nei tamaiti iti te huru no to ˈu nei iˈoa, ua ite ïa ia ˈu.”

Auê ïa ravea faahiahia mau no te aˈo atu i ta ˈna mau pǐpǐ e! Aita oia i riri atu ia ratou, aita atoa oia i faahua pari atu ia ratou i te faateitei, te nounou taoˈa aore ra te teoteo. Aita roa, ua horoa râ na ratou i te hoê haapiiraa na roto i te hiˈoraa o te mau tamarii o te vai haehaa noa, e te teoteo ore e o te ore hoi e imi e o vai tei hau aˈe i rotopu ia ratou. Te faaite ra ïa Iesu e e tia i ta ˈna mau pǐpǐ ia apee i te haehaa o taua mau tamarii ra. Ua faaoti oia ma te parau atu e: “O tei iti roa hoi i roto ia outou na, o te hau ïa.” Mataio 17:22-27; 18:1-5; Mareko 9:30-37; Luka 9:43-48.

▪ I nia i te eˈatia mai Kaperenaumi mai, eaha te haapiiraa ta Iesu e faahaamanaˈo ra, e eaha ta ta ˈna mau parau i faatupu?

▪ No te aha e ore ai e tia ia faahepo ia Iesu ia aufau i te tuhaa moni no te hiero, e no te aha râ oia i aufau noa ˈtu ai?

▪ Eaha te tumu i aimârô ai te mau pǐpǐ, e mea nafea to Iesu aˈoraa ˈtu ia ratou?