Pene 67

Te hoê haruraa o tei ore i manuïa

I TE oroa o te patiaraa tiahapa, ua tono maira te mau upoo faatere ati Iuda i te feia toroa no te haru ia Iesu. Aita oia i imi noa ˈˈe i te tapuni, ua tamau noa Iesu i te haapii i te taata, ma te parau e: “No parahirahi aˈe au i ǒ outou nei, e te haere nei au ia ˈna ra i tei tono mai ia ˈu nei ra. E imi outou ia ˈu, e eita râ outou e ite ia ˈu, e te vahi i parahihia e au ra, e ore outou e tae i reira.”

Uiui noa ihora te mau ati Iuda ratou ratou iho, ma te taa ore i taua mau parau ra: “E haere tia ra oia i hea e ore e ite atu ai tatou ia ˈna? e haere tia anei oia i te feia i purara ê i te Heleni ra, a haapii atu ai i te Heleni? Eaha ra teie nei parau ta ˈna i parau mai nei e, E imi outou ia ˈu, e ore râ outou e ite ia ˈu, e te vahi e parahihia e au ra, e ore roa outou e tae i reira?” Mea papu mau e, te faahiti ra Iesu no to ˈna pohe i mua nei e no to ˈna tia-faahou-raa i nia i te raˈi, te vahi e ore ai to ˈna mau enemi e nehenehe e apee ia ˈna.

Ua tae aˈera râ i te hitu o te mahana, mahana hopea atoa o taua oroa ra. I te mau poipoi atoa, e ninii te hoê tahuˈa i te pape i ravehia mai mai roto mai i te anavai o Siloama, i raro i te fata ra. Ma te faahaamanaˈo paha i te feia atoa e faaroo maira i taua oroa ra i te mahana tataitahi, ua pii maira Iesu, na ô maira e: “Te taata i hiaai ra, e haere mai oia ia ˈu nei a inu ai. Tei faaroo mai ia ˈu nei ra, e riro te pape ora i te tahe mai no roto ia ˈna ra, mai tei faaitehia mai e te mau parau i papaihia ra.”

Oia nei, ua hinaaro o Iesu e faaite i te mau ohipa faahiahia e tupu mai i muri aˈe i te niniiraahia mai te varua moˈa, niniiraa e tupu i te Penetekose no te matahiti i muri aˈe. I te taime e haamata ˈi na pǐpǐ 120 i ta ratou taviniraa, e riro ïa te pape ora i te tahe mai. Area râ, i taua taime ra, aitâ ïa te varua i niniihia mai, oia hoi aore â ïa e pǐpǐ i faatavaihia e te varua moˈa ra e, aore â ïa e pǐpǐ i piihia no te ora ˈtu i nia i te raˈi ra.

Ua haamata aˈera vetahi o te feia i au i te mau haapiiraa a Iesu, i te parau e: “O taua peropheta mau ra teie nei,” ma te manaˈo papu e o te peropheta mau teie i tǎpǔhia mai e o tei hau aˈe ia Mose. Ua na ô maira te tahi pae e: “O te Mesia teie.” Ua na ô aˈera te hoê pae e: “E ere, no Galilea hoi te Mesia? Aore anei i na ô mai te parau i papaihia ra e, No te fetii o Davida te Mesia, no Bete-lehema no te oire no reira Davida ra?”

Ua amahamaha ihora te taata. Ua hinaaro aˈera te hoê pae ia haruhia Iesu, aita râ e taata i tuu noa ˈtu i te rima i nia ia ˈna. Ua hoˈi maira taua feia toroa ra i te mau tahuˈa rarahi e i te mau Pharisea ra ma te ore e aratai mai ia Iesu, ua parau maira ratou e: “Eaha outou i ore i aratai mai ai ia ˈna?”

Ua pahono maira ratou e: “Aita roa e taata e au te parau i ta tera aˈera taata.”

E riri rahi hoi to taua mau tahuˈa rarahi ra, ua haamata aˈera ratou i te faaooo, i te faahapa e i te faaino ia ratou. Ua na ô maira e: “Ua vare atoa hoi outou? Ua faaroo anei te hoê o te huiraatira e te mau Pharisea nei ia ˈna? Area teie nei taata tei ore i ite i te ture nei, ua ino roa ïa.”

I te faarooraa o Nikodemo, te hoê taata Pharisea e raatira ati Iuda (melo o te Sunederi), i taua mau parau ra, ua aparau atura oia ia ratou i te iˈoa o Iesu. Peneiaˈe te haamanaˈo ra outou e e piti matahiti e te afa na mua ˈˈe, ua haere mai o Nikodemo ia Iesu ra i te po no te faaite i to ˈna faaroo ia ˈna. I teie taime ra, te parau nei o Nikodemo e: “E au anei i ta tatou ture nei te faahapa noa ˈtu i te taata, aore i mata na i te faaroo atu i ta ˈna parau e ia itea?”

Rahi faahou atura te riri o te mau Pharisea i te faarooraa ratou i te hoê o ratou i te parururaa ia Iesu. Ua pahono maira ratou ia ˈna ma te faaino atoa e: “No Galilea anei oe? A imi na ia ite oe, aore roa hoi e peropheta i tupu i Galilea.”

Noa ˈtu â ïa aita te mau Papai e faaite ra e e matara mai te hoê peropheta mai Galilea mai, te haapapu ra râ ratou e e haere mai te Mesia mai taua fenua ra e i reira e itehia ˈi te hoê “maramarama rahi.” Oia mau, no Betelehema mai o Iesu i te fanauraahia e no roto mai oia i te opu o Davida. E mea papu mau e, ua ite te mau Pharisea i te reira, o ratou hoi te tumu o te mau parau hape e faahitihia ra no nia ia Iesu. Ioane 7:32-52; Isaia 9:1, 2; Mataio 4:13-17.

▪ Eaha te ohipa i tupu i te mau poipoi tataitahi i te tau o taua oroa ra, e mea nafea o Iesu i te haaferuriraa i te taata i nia i taua ohipa ra?

▪ No te aha te feia toroa i ore ai i haru ia Iesu, e eaha te huru o te feia rarahi?

▪ O vai o Nikodemo, eaha to ˈna manaˈo no nia ia Iesu, e mea nafea vetahi mau Pharisea i te raveraa ia ˈna?

▪ Na te aha e faaite mai e e haere mai te Mesia mai Galilea mai?