Pene 45

Te hoê pǐpǐ huru ê roa

AUÊ hoi te ohipa mehameha e tiai maira ia Iesu i to ˈna pouraa i raro i te pahi! Te haere maira e piti taata taehae ino roa mai te menema tapiri mai e te horo maira ia ˈna ra. Ua uruhia raua e te demoni. Ua tâuˈa-noa-hia râ te hoê o raua, peneiaˈe mea rahi aˈe to ˈna puai i te ino i te tahi iho e mea maoro aˈe to ˈna vairaa i raro aˈe i te haavîraa a te demoni.

Mea maoro to taua taata ra ora-noa-raa i roto i te menema ma te ahu ore. Ma te tuutuu ore, i te rui e te ao, e auê noa oia ma te otioti ia ˈna iho i te ofai. No to ˈna taehae, aore roa e taata e tae na taua eˈa ra. Ua tamatahia i te tapea ia ˈna, ua motu râ te fifi e ua fatifati te auri ia ˈna i nia i to ˈna nau avae. Aore roa e taata e rata ˈi oia.

A haafatata ˈtu ai taua taata ra ia Iesu e te tahopuraa ˈtu ia ˈna, ua turai te mau demoni e haavî ra ia ˈna ia pii hua e: “Eaha ta oe ia ˈu nei, e Iesu e, te Tamaiti a te Atua teitei ra? Te parau atu nei au ia oe i te iˈoa o te Atua e eiaha oe e haamauiui mai ia ˈu.”

“A haere oe i rapae au, e tena na varua faufau,” ta Iesu ïa i parau onoono atu. Ua ui aturâ oia e: “O vai to oe iˈoa?”

“O Legeona to ˈu iˈoa, e rave rahi hoi matou,” o ta ˈna ïa i pahono atu. Mea au roa na te mau demoni e hiˈo i te mau mauiui o te feia i haavîhia e ratou e, mea au roa na ratou ia tahoê e e rave rahi atu â varua ino no te aro atu i te hoê taata. Tera râ, i mua ia Iesu, ua taparu maira ratou ia ˈna eiaha oia e faaue ia ratou ia haere i roto i te abuso. Te haapapu faahou maira te reira e e mana rahi to Iesu; e nehenehe ta ˈna e upootia mai i nia i te mau demoni iino. Te faaite atoa maira te reira e ua ite te mau demoni i te faautuaraa hopea ta te Atua e faataa ra no ratou, oia hoi te huriraa ia ratou i roto i te abuso e to ratou arii, o te Diabolo ra o Satani.

I pihai atu, te amu ra te hoê nǎnǎ fatata e 2 000 puaa i te aihere i nia i te mouˈa. Ua na ô maira te mau demoni e: “E tuu oe ia matou i tera ra mau puaa ia tomo atu matou i roto.” Mea papu maitai e mea au roa na te mau demoni i te ohipa taehae e te haamauiui, no te tomo atu i roto i te tino oraora. A faatia ˈi o Iesu ia ratou ia tomo i roto i te puaa, horo atura na puaa e 2 000 na nia i te mato e ua paremo aˈera i roto i te moana.

I mua i taua ohipa ra, horo atura te feia tiai, faaite haere atura i te ohipa i tupu i roto i te oire e te fenua taatoa. I taua taime ra, ua haere maira te feia e hiˈo e eaha te ohipa i tupu. I to ratou taeraa ˈtu i reira, ua ite atura ratou i te taata tei ora i te demoni. Inaha, ua oomo oia i te ahu e mea papu maitai to ˈna feruriraa, e te parahi noa ra oia i te pae avae o Iesu!

Ua faaite atura te feia i ite i taua ohipa ra e mea nafea to ˈna faaoraraahia. Ua faatia atoa ratou i te taata i te pohe huru ê roa o te mau puaa. A faaroo ai te taata i te reira, ua roohia ratou i te mǎtaˈu rahi, e ua taparu maira ratou ia Iesu ia faarue i to ratou fenua. Ua farii aˈera Iesu i ta ratou aniraa e haere atura i nia i te pahi. Ua ani maira te taata i uruhia na i te demoni ia rave atoa o Iesu ia ˈna. Ua na ô atura râ Iesu ia ˈna e: “A haere i te utuafare i to oe ra fetii, a faaite atu ai ia ratou i taua mea rahi a te Fatu i rave iho nei i te aroha ia oe.”

Mea pinepine o Iesu i te faaue i te feia o ta ˈna e faaora eiaha roa e faaite i te taata, no te mea eita oia e hinaaro ia huti te taata i te mau faahopearaa i niuhia i nia i te mau aamu faahiahia. Tera râ, mea tano maitai taua faaueraa nei, no te mea e haere atu te taata i faaorahia i te demoni, e faaite i te mau taata ta Iesu paha e ore e nehenehe e paraparau atu. Hau atu, e riro taua taata nei ei haapapuraa i te mana o Iesu no te rave i te ohipa maitai, ma te faaore i te mau parau hape atoa e faatiahia no nia i te moeraa te mau puaa.

Ia au i te faaueraa a Iesu, haere atura te taata i uruhia i te demoni. Ua parau haere atura i te Dekapoli atoa ra i te mau mea atoa ta Iesu i rave no ˈna, e ua maere anaˈe ihora te taata atoa. Mataio 8:28-34; Mareko 5:1-20; Luka 8:26-39; Apokalupo 20:1-3.

▪ No te aha paha i haapao-noa-hia ˈi te hoê anaˈe taata i uruhia i te demoni, e piti hoi taata e parahi ra i reira?

▪ Na te aha e faaite ra e ua ite te mau demoni i te haavaraa e tiai maira ia ratou i roto i te abuso?

▪ No te aha râ mea au na te mau demoni ia haavî i te mau taata e te mau animala?

▪ No te aha o Iesu i taui ai i ta ˈna huru raveraa e te taata i uruhia na i te demoni, ma te parau atu ia ˈna ia faaite i te taata no nia i te ohipa o Ta ˈna i rave no ˈna?