Pene 73

Te hoê taata Samaria aau maitai

TEI pihai iho paha o Iesu i te oire no Betania, te hoê oire rii o tei atea ê e 3 kilometera ia Ierusalema. Ua tia maira te hoê taata o tei au rahi i te ture a Mose, ua na ô maira oia e: ‘E te orometua, eaha ta ˈu e rave e noaa ˈi te ora mure ore?’

Ua ite o Iesu e aita taua taata ra, te hoê haapii ture, i ui mai no te haamaramarama noa ia ˈna, no te tamata râ ia ˈna. Peneiaˈe, ua hinaaro oia ia horoa ˈtu o Iesu i te hoê pahonoraa o te nehenehe e faahapa ia ˈna i mua i te aro o te mau ati Iuda. No reira ˈtura Iesu i opua ˈi e tamata i taua haapii ture ra, ua na ô maira ia ˈna e: “Eaha tei papaihia i roto i te ture ra? Te nahea ra ta oe taioraa?”

Ma te faaohipa i te hoê maramarama taa ê, ua taio maira te haapii ture i te Ture a te Atua tei papaihia i roto i te Deuteronomi 6:5 e te Levitiko 19:18, o tei parau hoi e: “E hinaaro oe i to Atua ia Iehova ma to aau atoa e ma to varua atoa, e ma to puai atoa, e ma to manaˈo atoa ia hope, e aroha hoi oe i to taata-tupu mai te aroha ia oe iho na.”

Ua parau atura Iesu ia ˈna e: “Ua tia ta oe i parau mai na, e ora oe ia na reira.”

Teie râ, aita te haapii ture i mauruuru roa. E ere ta Iesu pahonoraa i te mea papu roa i to ˈna hiˈoraa. Ua hinaaro oia ia haapapu atu o Iesu e e manaˈo tano to ˈna e ua tia ïa oia i roto i ta ˈna huru faaohiparaa i nia ia vetahi ê. No reira oia i ui atu ai ia Iesu e: “O vai hoi to ˈu taata-tupu?”

Te manaˈo ra te mau ati Iuda e te parau ra “taata-tupu,” e faaohipahia ïa i nia anaˈe i to ratou mau hoa ati Iuda, ia au rii hoi i te parau i papaihia i roto i te Levitiko 19:18. Oia nei, i muri aˈe, e parau atoa te aposetolo ra o Petero e: “Ua ite hoi outou e, e ore te taata ati Iuda e amui atu, e e ore hoi e tomo i te fare o te taata o te hoê fenua ê ra.” No reira ˈtura te haapii ture, e peneiaˈe atoa paha te mau pǐpǐ a Iesu, i manaˈo ai e ua tano ratou ia hiˈo maitai i te mau ati Iuda anaˈe, no te mea i roto i to ratou feruriraa, te taata e ere i te ati Iuda, e ere oia i to ratou taata-tupu mau.

Mea nafea ïa Iesu, ma te ore e faaturori i te manaˈo o te feia e faaroo maira ia ˈna, i te faatitiaifaroraa i to ratou feruriraa? Ua faatia ˈtura oia ia ratou i te hoê aamu, ta ˈna i huti mai paha mai roto mai i te hoê ohipa i tupu na. Ua hohora maira Iesu e: “Te hoê taata [ati Iuda] no Ierusalema i te haereraa i Ieriko, roohia ihora i te nǎnǎ eiâ haru, taratarahia ihora tana ahu e ratou, e paruparu ihora oia, haere atura, faarue ihora ia ˈna, ua fatata i te pohe.”

Ua tamau noa Iesu i te faatia i ta ˈna aamu: “Ua haere noa maira te hoê tahuˈa na taua eˈa ra, e ite atura oia ia ˈna, faahahau ê aturâ, na te tahi pae eˈa ˈtura i te haere. E te hoê ati Levi hoi i te haerea na taua eˈa ra, e fatata maira taua vahi ra, e ite atura ia ˈna, ohipa ê atura na te tahi pae eˈa. Te hoê taata râ no Samaria i haere noa i to ˈna haerea, e tae atura i taua vahi ra, e ite atura oia ia ˈna, aroha ˈtura.”

E rave rahi mau tahuˈa e ta ratou mau tauturu ati Levi i te hiero, o te noho ra i Ieriko i te hoê atearaa e 23 kilometera na nia i te hoê purumu atâata roa o te pou atu e 900 kilometera mai te vahi mai i reira ratou e tavini ai i te hiero i Ierusalema. E manaˈo iho â ïa tatou e e tauturu te tahuˈa e te ati Levi i te hoê o to ratou mau taeae ati Iuda i roohia i te ati. Aita roa raua i na reira. O te hoê râ taata Samaria o tei na reira ˈtu. Mea riri roa na te mau ati Iuda te mau ati Samaria e ua tae roa ratou i te faaino ia Iesu na roto i te mau parau etaeta roa i te piiraa ˈtu ia ˈna e “e taata Samaria.”

Mea nafea ïa te taata Samaria i te tautururaa ˈtu i te ati Iuda? Ua parau maira Iesu e: “Haere atura i pihai iho, ua ninii ihora i te hinu e te uaina i roto i te mau puta no ˈna ra; vehî ihora, e haaparahi atura ia ˈna i nia i tana iho puaa, aratai atura ia ˈna i te fare tipaeraa, utuutu atura ia ˈna. E ao aˈera, ia haere ê oia ra, ua rave aˈera oia i e piti moni veo [no e piti mahana ohipa], tuu atura i te taata fare ra, na ô atura ia ˈna, E utuutu oe i teie nei taata, e ia riro atoa ta oe ra moni, na ˈu ïa e hopoi atu i te hoo ia oe ia hoˈi mai au ra.”

Ia oti ta ˈna aamu i te faatia, ua ui atura Iesu i taua haapii ture ra: “O vai te taata-tupu i to oe manaˈoraa i taua na taata tootoru ra, i te taata i roohia i te nǎnǎ eiâ hara ra?”

Ua huru ê aˈera taua haapii ture ra ia farii e ua tano te taata Samaria ra, ua pahono noa ˈtura e: “O tei aroha ia ˈna ra.”

Ua faaoti aˈera Iesu e, na ô atura: “E haere oe, e na reira atoa.”

Ahiri o Iesu i parau taue atu i te haapii ture e o to ˈna atoa taata-tupu te taata e ere i te ati Iuda ra, eita taua haapii ture ra e farii i te reira, e e riro atoa te feia e faaroo ra i te turu atu i to ˈna pae i roto i teie aimârôraa e o Iesu. Tera râ, ua riro taua aamu o tei orahia ra ei haapapuraa e e ite-atoa-hia to tatou taata-tupu i rotopu i te feia êě atu i te feia no to tatou iho nunaa e no to tatou iho aiˈa. Mea faahiahia mau te huru haapiiraa a Iesu! Luka 10:25-37; Ohipa 10:28; Ioane 4:9; 8:48.

▪ Eaha te mau uiraa ta te haapii ture i tuu atu ia Iesu, e eaha hoi ta ˈna e opua ra e faatupu?

▪ I roto i te feruriraa o te mau ati Iuda, o vai to ratou taata-tupu, e eaha te mau tumu e haapapu maira e o te manaˈo atoa ïa o te mau pǐpǐ?

▪ Mea nafea to Iesu horoaraa i te hoê haaferuriraa maitai ia ore hoi te haapii ture ia patoi mai ia ˈna?