Pene 120

Te hunaraa i te parau i roto i te aua

I MURI aˈe i to raua faarueraa ia Iesu i roto i te ô i Getesemane e to raua hororaa ma te mǎtaˈu e te tahi atu mau aposetolo, ua faaea ˈtura o Petero raua o Ioane i te horo. Peneiaˈe paha, ua tapae raua ia Iesu ra i to ˈna taeraa ˈtu i te fare o Ana. I to Ana tonoraa ˈtu ia ˈna i te Tahuˈa Rahi ra o Kaiapha, ua apee noa ˈtu o Petero e o Ioane i te hoê atearaa au noa, e eita e ore e, te feaa noa ra to raua manaˈo i rotopu i te mǎtaˈu no to raua ora e te tapitapiraa no te ohipa e roohia i nia i to raua Fatu.

I to ˈna taeraa ˈtu i te fare rahi o Kaiapha ra, ua nehenehe o Ioane e tomo atu i roto i te aua, no te mea e taata matauhia oia e te tahuˈa rahi. Area o Petero ra, ua tia noa oia i rapae i te pae opani ra. Aita râ i maoro, ua hoˈi maira o Ioane e ua paraparau atura i te tavini vahine e tiai ra i te opani, e ua faatiahia o Petero ia tomo mai.

Mea toetoe i teie nei, e ua faaama te mau tavini e te feia toroa a te tahuˈa rahi i te hoê auahi. Ua tapiri atura o Petero ia ratou no te tamahanahana ia ˈna a tiai noa ˈtu ai ia hope te haavaraa a Iesu. I reira, i roto i te maramarama o te auahi, ua ite maitai atura te tavini tiai opani tei vaiiho ia Petero ia tomo mai, i to ˈna hohoˈa. Ua parau atura oia: “I reira atoa hoi oe ia Iesu o Galilea ra!”

No to ˈna peapea no te mea ua itehia oia, ua haavare ihora o Petero i mua ia ratou paatoa e aita o ˈna i ite ia Iesu. Ua na ô atura oia e: “Aore au i ite; aita atoa hoi au i ite i ta oe e parau mai na.”

E ua haere atura o Petero i pihai iho i te uputa. I reira, ua ite maira te tahi atu vahine ia ˈna e ua parau atoa ˈtura i te feia e tia noa ra i reira e: “Ia Iesu o Nazareta atoa ra teie nei taata.” I reirâ, ua haavare faahou o Petero, ma te tǎpǔ e: “Aore au i ite i tena na taata!”

Ua faaea noa ˈtura o Petero i roto i te aua, ma te tapuni ia ˈna ia ore oia ia itehia mai. Peneiaˈe paha i taua taime ra, ua hitimaue oia i te aaoa a te moa i roto i te poiri o te aahiata ra. I roto i taua area taime ra, te haava-noa-hia ra o Iesu, i roto paha i te hoê piha o te fare i nia noa ˈtu i te aua. Eita e ore e te ite noa ra o Petero e te feia e tiai noa ra i raro i te haereraa o te mau ite i afaihia mai no te faaite i te parau.

Fatata hoê hora i mairi mai te taime hopea mai â i itehia ˈi o Petero mai te hoê hoa o Iesu. I teie nei, ua tapiri maira vetahi e tia noa ra i reira e ua parau maira: “No ratou mau â oe, te itea nei hoi oe i to oe reo.” E fetii hoê o te pǔpǔ no Malako, te taata i tâpûhia te tariˈa e Petero. Ua parau maira oia: “E ere tei ite au ia oe i roto i te ô ra e oia atoa ra hoi?”

“Aore au i ite i tena na taata!” o ta Petero ïa i faaite ma te reo puai. Inaha, te tamata ra oia i te haapapu e ua hape ratou na roto i te tǎpǔraa e te horeoraa i te parau, ma te pii roa i te ino i nia ia ˈna mai te peu aita oia e faaite ra i te parau mau.

A haavare ai o Petero no te toru o te taime, ua aaoa ihora te moa. I reira, ua haere maira o Iesu i rapae i nia i te taupee, ua fariu maira e ua hiˈo atura ia Petero i raro mai i roto i te aua. Ua haamanaˈo ihora o Petero i taua taime ra i te parau ta Iesu i faahiti tau hora na mua ˈtu i roto i te piha teitei ra: “E ore e tae i te piti o te aaoaraa moa, e taitoru ai o oe hunaraa ia ˈu.” Ua peapea roa o Petero no te teimaha o ta ˈna hara, ua haere atura i rapae e ua oto ihora.

Mea nafea hoi te reira i te tupuraa? I muri aˈe i to ˈna haapapuraa i to ˈna puai i te pae varua, mea nafea to Petero neheneheraa e huna i to ˈna Fatu e toru taime i roto i teie area iti haihai roa? Eita e ore e ua hitimahuta o Petero i teie mau huru tupuraa. Ua tavirihia te parau mau, e ua faaitehia mai o Iesu mai te hoê taata ohipa ino roa. Ua faarirohia te parau tia ei ohipa hape, e te taata hapa ore ra ei taata rave hara ra. No reira, ua hiˈa o Petero i raro aˈe i teie mau ohipa teimaha mau. Ua taui taue noa to ˈna iho hinaaro i te parau-tia; ua peapea roa o ˈna i te iteraa e ua roohia oia i te mǎtaˈu i te taata. Ia ore na tatou ia roohia i te reira, e tia ˈi! Mataio 26:57, 58, 69-75; Mareko 14:30, 53, 54, 66-72; Luka 22:54-62; Ioane 18:15-18, 25-27.

▪ Mea nafea to Petero raua o Ioane tomoraa ˈtu i roto i te aua o te tahuˈa rahi?

▪ A vai ai o Petero raua o Ioane i roto i te aua, eaha te ohipa e tupu ra i roto i te fare?

▪ Ehia taime to te moa aaoaraa, e ehia taime to Petero hunaraa e ua ite oia i te Mesia?

▪ Eaha te auraa i te mea e ua tǎpǔ e ua horeo o Petero?

▪ Eaha tei turai ia Petero ia huna e ua ite oia ia Iesu?