Pene 85

Te imiraa i tei moe ra

UA IMI hua o Iesu ia itea mai te feia o te hinaaro e tavini i te Atua ma te haehaa. No reira oia i haere ai e paraparau i te mau taata atoa no nia i te Basileia, e tae noa ˈtu i te feia i matauhia no ta ratou mau hara. Ua haafatata maira teie mau huru taata ia ˈna no te faaroo i ta ˈna parau.

I to ratou iteraa i teie ohipa, ua faahapa aˈera te mau Pharisea e te mau papai parau ia Iesu i to ˈna haereraa ˈtu na muri i te feia o ta ratou e faariro ra ei feia faufaa ore. Ua mutamuta ihora ratou e: “Te ite nei teie nei taata i te feia rave hara, e te amu atoa nei i ta ratou amuraa.” Eita hoi e tia ia ratou ia faahaehaa roa ia ratou i nia i teie faito! E faariro na hoi te mau Pharisea e te mau papai parau i te feia o te nunaa mai te repo ra i raro aˈe i to ratou avae. Inaha, te faaohipa ra ratou i te parau hebera ra ‛am ha·’aʹrets, oia hoi “feia no te repo [fenua],” no te haapapu i to ratou vahavaha i teie mau huru taata.

Area o Iesu ra, ua faaite atu oia i te tura, te maitai, e te aroha i te mau huru taata atoa. No reira ˈtura, e rave rahi o taua mau taata haehaa ra, e tae noa ˈtu i te feia o tei matau-maitai-hia no ta ratou peu rave hara ra, o tei hinaaro mau â e faaroo ia ˈna. Teie râ, eaha ˈtura ïa no te faahaparaa a te mau Pharisea ia Iesu i to ˈna tutavaraa i te tauturu i te feia o ta ratou i haafaufaa ore?

Ua pahono aˈera o Iesu i ta ratou patoiraa na roto i te raveraa i te hoê parabole. Ua faahiti oia i te manaˈo iho o te mau Pharisea, mai te mea ra e e feia parau-tia ratou e ua ora ratou i mua i te aro o te Atua, area te feia ‛am ha·’aʹrets faufaa ore ra, ua atea ê ïa e ua moe atoa. A faaroo na ia ˈna ia ani e:

“O vai ïa taata i ǒ outou nei, hoê hanere a ˈna mamoe, ia moe ra te hoê, e ore e vaiiho i te iva ahuru e iva tiahapa i te medebara ra, a haere a imi ai i tei moe ra, e ia itea ˈtu? E itea ˈtura ia ˈna, amo aˈera i nia i te tapono ma te oaoa. E tae maira oia i te utuafare, ua haaputuputu maira i te mau taua e te mau taata-tupu, ua na ô atura ia ratou, E oaoa atoa tatou; ua itea hoi ia ˈu tau mamoe i moe ra.”

Ua faataa ihora o Iesu i te auraa o teie aamu i te na ôraa e: “E faaite atu hoi au ia outou, e oaoa rahi to nia i te raˈi i te taata hara hoê ia tatarahapa, i te feia parau-tia e ia iva noa ˈtu te ahururaa e iva tiahapa te ore e au ia ratou te tatarahapa.”

Te manaˈo ra hoi te mau Pharisea e e feia parau-tia ratou e no reira, aita ˈtura e faufaa no ratou ia tatarahapa. I to vetahi o ratou faahaparaa ia Iesu tau matahiti na mua ˈtu i to ˈna tamaaraa e te mau telona e te feia rave hara, ua parau atura oia ia ratou e: “Aore hoi au i haere mai e parau i te feia parau-tia, i te feia hara râ ia tatarahapa.” Aita te mau Pharisea faahua parau-tia, o tei ore hoi i ite i te faufaaraa ia tatarahapa, e faaoaoa ra i te raˈi. Area te feia rave hara o tei tatarapaha mau ra, oia ïa.

No te haapapu maitai i te manaˈo ra e e faatupu te hoˈiraa mai te feia hara i moe ra i te oaoa rahi, ua faatia ˈtura o Iesu i te tahi atu parabole. Te na ô ra oia e: “O vai hoi ïa vahine, hoê ahuru a ˈna diderama, ia moe ra te hoê, e ore e titia i te lamepa, a purumu ai i te fare, a maimi maite ai e ia itea ˈtu ia ˈna? E itea ihora ua haaputuputu maira i te mau taua, e te mau taata-tupu, ua na ô atura, E oaoa atoa tatou, ua itea hoi ia ˈu te diderama i moe ia ˈu ra.”

Ua horoa ˈtura Iesu i te hoê â tatararaa. Te na ô faahou ra oia e: “E faaite atu vau ia outou, o te huru ïa o to te mau melahi a te Atua ra oaoa, ia tatarahapa te taata hara hoê ra.”

Mea faahiahia mau â teie anaanatae aroha mau o te mau melahi a te Atua ia hoˈi mai te feia hara i moe ra! Mai te peu iho â râ e e riro mai teie feia haehaa, oia hoi te mau ‛am ha·’aʹrets tei hiˈo-ino-hia, ei melo no te Basileia o te Atua i nia i te raˈi. No reira, e naeahia ia ratou i te hoê tiaraa i nia i te raˈi tei hau aˈe i to te mau melahi iho! Teie râ, maoti hoi i te pohehae aore ra i te inoino, ma te haehaa, te oaoa nei te mau melahi i te mea e ua faaruru teie feia hara e ua upootia atoa i nia i te mau huru tupuraa o te oraraa o te faaineine ia ratou no te tavini ei mau arii e ei mau tahuˈa mǎrû e te aroha i nia i te raˈi. Luka 15:1-10; Mataio 9:13; Korinetia 1, 6:2, 3; Apokalupo 20:6.

▪ No te aha o Iesu i amui ai i te feia matauhia no ta ratou mau hara, e eaha te faahaparaa a te mau Pharisea ia ˈna?

▪ Mea nafea to te mau Pharisea hiˈoraa i te feia o te nunaa?

▪ Eaha te mau parabole ta Iesu i faaohipa, e eaha ta tatou e haapii ra na roto i teie mau parabole?

▪ No te aha e mea faahiahia mau ia oaoa anaˈe te mau melahi?