Pene 80

Te mau aua mamoe e te Tiai mamoe

TEI Ierusalema o Iesu no te oroa o te Faahouraa, aore ra Hanukkah, o te faahaamanaˈo ra i te pûpû-faahou-raahia te hiero ia Iehova. Fatata e 200 matahiti na mua ˈtu, i te matahiti 168 hou to tatou nei tau, ua haru aˈera o Antiochus IV Epiphane ia Ierusalema e ua haaviivii ihora oia i te hiero e to ˈna fata. Teie râ, e toru matahiti i muri iho, ua haru-faahou-hia o Ierusalema e ua pûpû-faahou-hia ˈtura te hiero. Ua riro atura ïa te oroa o te Faahouraa ei oroa tamatahiti.

E tupu teie oroa o te Faahouraa i te 25 no Chislev, te avae ati Iuda e tano i te tuhaa hopea no novema e te tuhaa matamua o titema i roto i ta tatou nei kalena. Te toe noa ra ïa tau hanere mahana na mua ˈˈe i te Pasa rahi o te matahiti 33. E tau toetoe hoi, no reira ïa te aposetolo Ioane i parau ai e e tau “vero.”

Te rave nei o Iesu i teie nei i te hoê parabole i reira to ˈna parauraa no na aua mamoe e toru e te ohipa ta ˈna e rave ei Tiai mamoe maitai roa. Ua haapapuhia te aua mamoe matamua na roto i te faanahoraa o te faufaa a te Ture a Mose. Ua riro te Ture mai te hoê aua parururaa, e faataa ê ra i te mau ati Iuda i te mau peu viivii a te feia aita i fariihia i roto i taua faufaa taa ê ra e o te Atua. Ua faataa ihora Iesu e: “Amene, amene, e parau atu vau ia outou, O te ore e na te uputa i te tomo i roto i te aua mamoe ra, o te paiuma na te tahi eˈa ê ra, e eiâ ïa e te haru. E na te uputa â te tiai mamoe i te tomo.”

Ua haere mai vetahi ma te faahua parau e o ratou te Mesia, e ere râ ratou te tiai mamoe mau ta Iesu i faataa na roto i teie mau parau: “E iriti mai ïa te tiai opani ra ia ˈna, e e faaroo mai te mamoe i to ˈna reo, e tao atu â oia i tana iho mamoe ma te faahiti atu i te iˈoa, e e aratai oia ia ratou i rapae au. . . . E ore ratou e pee i te taata ê, e horo ê ratou i reira, aore hoi ratou i ite i to te taata ěê reo.”

O Ioane Bapetizo te “tiai opani” o te aua mamoe matamua. Na nia i to ˈna tiaraa tiai opani, ua “iriti mai” oia ia Iesu na roto i te faaiteraa ia ˈna i te mau mamoe taipe o ta ˈna e aratai no te faaamu. Taua mau mamoe ra ta Iesu e faahiti atu i te iˈoa e ta ˈna e aratai i rapae au, e faaôhia ˈtu ïa i roto i te hoê aua ê atu, mai ta ˈna e faataa ra: “Amene, amene, e parau atu vau ia outou, O vau te uputa o te aua mamoe,” oia hoi, te uputa o te hoê aua mamoe apî. I to Iesu haamauraa i te faufaa apî e ta ˈna mau pǐpǐ e mai te raˈi mai, ua ninii maira i te varua moˈa i nia ia ratou i te Penetekose i muri iho, i reira to ratou fariiraahia i roto i teie aua mamoe apî.

Ma te haapapu atu â i to ˈna tiaraa, ua na ô atura Iesu e: “O vau te uputa; o te na o nei mai ia ˈu nei i te tomo ra, e ora ïa, e haere ratou i roto e i rapae, e noaa hoi te maa. . . . i haere mai nei au ia noaa to ratou ora, e ia rahi atu â te ora. . . . O vau te tiai mamoe maitai ra, ua ite au i ta ˈu iho, e ua itehia vau e ratou, mai te Metua i ite ia ˈu nei ra, e o vau hoi i ite i te Metua ra; e e horoa hoi au i to ˈu ora no te mamoe.”

Na mua noa ˈtu, ua faaitoito aˈera Iesu i ta ˈna mau pǐpǐ na roto i teie mau parau: “Eiaha e mǎtaˈu, e tau nǎnǎ iti e; e mea hinaaro na to outou Metua i te horoa mai i te basileia no outou.” E tomo taua nǎnǎ iti ra, e naeahia e 144 000 melo paatoa, i roto i taua aua mamoe apî ra aore ra te piti o te aua. Ua tapao râ o Iesu e: “E mamoe ê atu â ta ˈu, e ere i to teie nei aua, e aratai atoa mai au ia ratou e tia ˈi, e faaroo mai hoi ratou i to ˈu reo, ia hoê aˈe nǎnǎ, e hoê hoi tiai.”

I te mea e e ere te mau “mamoe ê atu” “i to teie nei aua,” no roto mai ïa i te tahi aua ê atu, te toruraa ïa. E hopea taa ê to teie na aua, aore ra vahi haaputuraa, toopiti nei. E faatere mai te “nǎnǎ iti” i roto i te hoê aua e te Mesia i nia i te raˈi, area te mau “mamoe ê atu” i roto i te tahi atu aua ra, e ora ïa ratou i roto i te paradaiso i nia i te fenua nei. Teie râ, noa ˈtu e te faaea ra ratou i roto e piti aua taa ê, eita te mau mamoe e pohehae aore ra e manaˈo e ua faataa-ê-hia ratou, inaha, mai ta Iesu i parau, e riro ratou ei “hoê aˈe nǎnǎ” i raro aˈe i te aratairaa a te “hoê hoi tiai.”

Ua ineine o Iesu Mesia, te Tiai mamoe maitai ra, i te pûpû i to ˈna ora no te mau mamoe o na aua e piti. Te parau ra oia: “Na ˈu iho râ e horoa noa ˈtu. E tia ia ˈu ia horoa, e e tia hoi ia ˈu ia rave faahou. O ta tau Metua ïa i faaue mai ia ˈu.” Ua faatupu aˈera taua mau parau a Iesu ra i te amahamaharaa i rotopu i te mau ati Iuda.

E rave rahi i rotopu i te nahoa taata tei parau e: “E demoni to ˈna, e ua maamaahia, eaha outou i faaroo atu ai ia ˈna?” Ua pahono aˈera te tahi pae e: “E ere teie parau i ta te taata demoni.” I muri iho, ma te faahaamanaˈo e ua faaora o Iesu i te hoê taata matapo tau avae na mua ˈtu, ua parau faahou aˈera ratou e: “E ora anei te matapo i te demoni?” Ioane 10:1-22; 9:1-7; Luka 12:32; Apokalupo 14:1, 3; 21:3, 4; Salamo 37:29.

▪ Eaha te oroa o te Faahouraa, e afea râ te reira e faatupuhia ˈi?

▪ Eaha te aua mamoe matamua, e o vai te tiai opani?

▪ Mea nafea te tiai opani ia iriti atu i te Tiai mamoe ra, e i hea te mau mamoe e fariihia ˈi i muri iho?

▪ O vai te feia i roto i na aua e piti a te Tiai mamoe maitai ra, e e hia ïa nǎnǎ?