Pene 131

Te mau faraa mai hopea, e te Penetekose o te matahiti 33

I TE HOÊ taime, ua faanaho aˈera o Iesu ia farerei na aposetolo e 11 ia ˈna i nia i te hoê mouˈa no Galilea. Ua faaarahia paha te tahi atu mau pǐpǐ no nia i teie farereiraa, e ua hau atu i te 500 taata tei haaputuputu mai. Auê ïa tairururaa oaoa e a fa mai ai Iesu e a haapii mai ai oia ia ratou!

Taa ê atu i te tahi atu mau mea, ua faataa ˈtu o Iesu i mua i te nahoa taata rahi e ua horoa mai te Atua na ˈna i te mana taatoa i roto i te raˈi e i nia i te fenua nei. Ua aˈo atura oia: “E teie nei, e haere outou e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti, e no te [varua moˈa]; ma te haapii atu ia ratou i te haapao i te mau mea atoa ta ˈu i parau atu ia outou na.”

A feruri na! Ua horoahia ˈtu na te mau tane, te mau vahine, e te mau tamarii, te hoê â hopoia no te raveraa i te tahi tuhaa i roto i te ohipa faariroraa i te taata ei pǐpǐ. E tamata te mau enemi i te tapea i ta ratou ohipa pororaa e ta ratou ohipa haapiiraa, teie râ, ua tamahanahana ˈtura o Iesu ia ratou i te na ôraa ˈtu e: “E inaha, tei pihai atoa iho ïa vau ia outou, e tae noa ˈtu i te hopea o teie nei ao.” E vai noa mai o Iesu i pihai iho i ta ˈna mau pǐpǐ na roto i te arai o te varua moˈa, no te tauturu ia ratou ia faatupu i ta ratou taviniraa.

Ia taio-pauroa-hia, ua fa ora mai o Iesu i mua i ta ˈna mau pǐpǐ i roto i te hoê area taime e 40 mahana i muri aˈe i to ˈna tia-faahou-raa. I roto i taua mau faraa mai no ˈna ra, ua haapii oia ia ratou no nia i te Basileia o te Atua, e ua haapapu maitai oia e eaha ta ratou mau hopoia ei mau pǐpǐ na ˈna. I te hoê taime, ua fa atoa mai oia i to ˈna taeae ra o Iakobo e ua rave ihora oia ia tiaturi teie taata faaroo ore ra i mutaa iho e O ˈna mau â te Mesia.

A parahi noa mai ai te mau aposetolo i Galilea, e au ra e ua faaue atu o Iesu ia ratou ia hoˈi atu i Ierusalema. I to ˈna farereiraa ia ratou i reira, ua na ô atura oia e: “Eiaha e faarue ia Ierusalema, e tiai râ i ta te Metua i parau maira, o ta outou i ite na ia ˈu ra. Ua bapetizo â hoi Ioane i te pape, e bapetizohia râ outou i te [varua moˈa] i teie nei pue mahana.”

I muri aˈe, ua farerei faahou o Iesu i ta ˈna mau aposetolo e ua aratai aˈera ia ratou i rapaeau i te oire e tae roa ˈtu i Betania, e vai ra i nia i te aivi hitia o te râ o te Mouˈa i Oliveta. Ma te maere mau, noa ˈtu te mau parau atoa o ta ˈna i faaite mai no nia i to ˈna revaraa i nia i te raˈi e fatata maira, te tiaturi noa râ ratou e e haamauhia to ˈna Basileia i nia i te fenua nei. No reira ratou i ani ai e: “E te Fatu, ei teie nei anei oe e faahoˈi mai ai i te hau ia Iseraela?”

Maoti i te tamata faahou i te faaafaro i to ratou manaˈo hape, ua pahono noa ˈtura o Iesu e: “Aore ïa i haapaohia e ia ite outou i te taime e te anotau, i vaiihohia e te Metua ia ˈna ihora.” I muri aˈe, ma te haafaufaa faahou i te ohipa o te tia ia ratou ia rave, ua parau ihora oia e: “E noaa râ to outou mana i te [varua moˈa] ia haere mai i nia iho ia outou: e ei ite hoi outou no ˈu i Ierusalema nei e Iudea atoa hoi e ati noa ˈˈe, e Samaria, e tae noa ˈtu i te hopea o te fenua ra.”

A hiˈo noa ˈtu ai ratou, ua haamata ihora o Iesu i te reva ˈtu i nia i te raˈi, e ua haamoe maira te hoê ata ia ˈna i mua i to ratou aro. I muri aˈe i to ˈna haapaeraa i to ˈna tino iˈo, ua maue atura oia i nia i te raˈi ei taata varua. A tiatonu noa ˈi na 11 i nia i te raˈi, ua fa maira e piti taata ma te ahu teatea i pihai iho ia ratou. Ua ani maira teie na melahi tei rave mai i te hiˈoraa taata e: “E te mau taata o Galilea nei, eaha outou i tia noa ˈi e i tiatonu mârô ai i nia i te raˈi ra? o Iesu nei â, tei ravehia aˈenei i nia i te raˈi, e hoˈi mai ïa mai te reira atoa ra, mai ta outou i ite atu ia ˈna i te revaraa ˈtu i nia i te raˈi ra.”

I to Iesu faarueraa mai i te fenua, aita o ˈna i faaatutu i te parau na te mau vahi taata atoa, o ta ˈna anaˈe râ mau pǐpǐ haapao maitai o tei ite i te reira. Mea na reira atoa to ˈna hoˈiraa mai—ma te ore e faaatutu i te parau i mua i te taata e o ta ˈna mau pǐpǐ haapao maitai anaˈe te ite e ua hoˈi mai oia e ua haamata to ˈna vairaa mai i roto i te mana o te Basileia.

Ua pou maira te mau aposetolo mai nia mai i te Mouˈa i Oliveta, na roto atu ai i te Peho no Kiderona, e ua tomo faahou atura i Ierusalema. Ua faaea noa ihora ratou i reira ia au i te faaueraa a Iesu. Hoê ahuru mahana i muri aˈe, i te Oroa ati Iuda o te Penetekose o te matahiti 33 o to tatou nei tau, fatata e 120 pǐpǐ o tei tairuru mai i roto i te hoê piha teitei i Ierusalema, ua faaroohia ˈtura te hoê haruru rahi mai te mataˈi rahi uˈana ra i roto i te fare. Ua fa maira te mau arero mai te auahi ra te huru, e ua faaea ihora i nia iho ia ratou tataitahi, e ua haamata ihora te mau pǐpǐ i te paraparau na roto i te mau reo ěê. Teie hoi te niniiraa mai o te varua moˈa o ta Iesu i tǎpǔ mai! Mataio 28:16-20; Luka 24:49-52; Korinetia 1, 15:5-7; Ohipa 1:3-15; 2:1-4.

▪ Ia vai ra to Iesu horoaraa ˈtu i te mau faaueraa hopea i nia i te mouˈa i Galilea, e eaha teie mau faaueraa?

▪ Eaha te tamahanahanaraa ta Iesu i horoa ˈtu na ta ˈna mau pǐpǐ, e mea nafea oia ia faaea noa i pihai iho ia ratou?

▪ Eaha te maororaa i muri aˈe i to ˈna tia-faahou-raa to Iesu faraa mai i ta ˈna mau pǐpǐ, e eaha ta ˈna i haapii atu ia ratou?

▪ Ua fa o Iesu i mua ia vai, o tei ore hoi i riro ei pǐpǐ na mua ˈˈe i to ˈna pohe?

▪ Eaha na tairururaa hopea e piti ta Iesu i faatupu e ta ˈna mau aposetolo, e eaha te ohipa i tupu i taua na taime ra?

▪ Nafea Iesu e hoˈi mai ai mai ta ˈna i reva ˈtu?

▪ Eaha tei tupu i te Penetekose o te matahiti 33?