Pene 29

Te raveraa i te mau ohipa maitatai i te mahana Sabati

TEI te tau uaaraa tiare tatou o te matahiti 31. Tau avaˈe tei mairi mai te taime mai â o Iesu i paraparau ai i te vahine i pihai iho i te apoo pape i Samaria, a haere ai oia mai Iudea atu i Galilea.

I muri aˈe i to ˈna haapiiraa ma te tuutuu ore na Galilea taatoa, ua faareva aˈera o Iesu i Iudea, i reira to ˈna pororaa i roto i te mau sunago. Ia faaauhia i te faufaaraa ta te Bibilia e horoa ra no ta ˈna taviniraa i Galilea, aita oia e faahiti rahi ra i te ohipa ta ˈna i rave i Iudea i taua tere no ˈna ra e i roto i te roaraa o te mau avaˈe oia e noho atu ai i reira, i muri aˈe i te Pasa i mairi aˈenei. E au ra e aita ta ˈna taviniraa i farii-maitai-hia i Iudea mai tei fariihia i Galilea.

Fatata roa o Iesu i te reva i Ierusalema, te oire pu o Iudea, no te Pasa o te matahiti 31. I te Uputa Mamoe o te oire ra, te vai ra te hoê pape hopu o Beteseda te iˈoa, i reira e rave rahi feia maˈi, e te matapo e te pirioi o te haere mai. Te manaˈo ra hoi ratou e e nehenehe ratou e ora ia hopu ratou i roto i te mau pape ia arepu anaˈe.

Ua tae i te mahana Sabati, e ua ite aˈera o Iesu i pihai iho i te pape hopu ra i te hoê taata tei pohehia i te maˈi a 38 atura matahiti te maororaa. Ua ite o Iesu i te maororaa o te maˈi o taua taata nei, e ua ani atura oia: “Te hinaaro na oe i te ora?”

Ua pahono atura oia ia Iesu: “E te Fatu, aita e taata i te tuu ia ˈu i raro i te pape, ia arepu te pape ra; te haere atura vau, ua reva ˈtura te tahi na mua ia ˈu.”

Ua parau atura Iesu ia ˈna: “A tia, a rave i to roi a haere.” Na roto i taua mau parau ra, ora roa ˈˈera taua taata ra, rave ihora i ta ˈna roi e haere atura!

Ia ite mai râ te mau ati Iuda ia ˈna, ua na ô aˈera ratou: “E sabati teie; eita e au i te ture ia hopoi oe i to roi.”

Ua parau atura teie taata e: “Na tei faaora ia ˈu nei i parau mai ia ˈu e, A rave i to roi a haere.”

“O vai ïa taata i parau mai ia oe e, A rave i to roi a haere?” o ta ratou ïa i ani atu. Ua haere ê o Iesu no te rahi o te taata, e aore hoi te taata i faaorahia i ite e o vai to ˈna iˈoa. I muri aˈe râ, ua farerei ihora Iesu ia ˈna i roto i te hiero, e ua ite aˈera taua taata ra e o vai tei faaora ia ˈna.

Ua haere atura te taata i faaorahia e farerei i te mau ati Iuda no te faaite atu ia ratou e na Iesu i faaora mai ia ˈna. Ia ite ratou i te reira, ua haere atura te mau ati Iuda e farerei ia Iesu. No te aha hoi? Te hinaaro ra anei ratou e ite e nohea mai to ˈna mana e tupu ai taua mau ohipa faahiahia ra? Aita. No te faahapa râ ia ˈna i te mea e ua rave oia i taua mau ohipa maitatai ra i te mahana Sabati. E ua hamani ino roa ˈtu ratou ia ˈna! Luka 4:44; Ioane 5:1-16.

▪ A hia ˈtura maororaa i teie nei mai te tere hopea mai o Iesu i Iudea?

▪ No te aha te taata e haere rahi ai i te pape hopu ra o Beteseda?

▪ Eaha te semeio ta Iesu i faatupu i te pape hopu, e eaha te huru o te mau ati Iuda?