Pene 15

Te semeio matamua a Iesu

HOÊ aore ra e piti noa mahana na mua ˈtu to Anederea, Petero, Ioane, Philipa, Nataniela, e oia atoa paha o Iakobo, riroraa mai ei mau pǐpǐ matamua a Iesu. I teie nei, te hoˈi ra ratou i to ratou mataeinaa i Galilea, no reira mai hoi ratou paatoa. Te haere tia ˈtura ratou i Kana, te oire tumu o Nataniela, e vai ra i nia i te mau aivi aita i atea roa ia Nazareta, i reira to Iesu paariraa. Ua titau-manihini-hia ratou i te hoê oroa faaipoiporaa i Kana.

Ua haere atoa mai te metua vahine o Iesu i te faaipoiporaa. No te mea e e hoa oia no te fetii o na feia faaipoipo apî, e au ra e ua anihia o Maria ia tauturu mai no te haapao i te mau manihini e rave rahi. Oioi noa ˈtura oia i te ite e te erehia ra te tahi mea, e ua faaite atura oia ia Iesu e: “Aita a ratou uaina.”

Inaha, te ani atura o Maria ia Iesu ia rave oia i te tahi ohipa no te mea te erehia ra i te uaina, aita râ o Iesu i farii oioi noa. Ua ani atura oia: “Eaha ta oe ia ˈu nei, e teie nei vahine?” Na nia i to ˈna tiaraa Arii maitihia a te Atua, eita e tia i te tahi fetii aore ra te tahi hoa no ˈna ra ia faaue mai ia ˈna no nia i ta ˈna ohipa. No reira, ua faaite o Maria i to ˈna paari i te vaiihoraa ˈtu i teie ohipa i roto i te rima o ta ˈna tamaiti, e ua parau noa ˈtura oia i te mau tavini e: “Ta ˈna e faaue mai ia outou na, e na reira outou.”

E ono farii ofai rahi i reira, e nehenehe e faaîhia fatata e maha ahuru litera pape i roto i te farii hoê. Ua faaue atura o Iesu i te mau tavini e: “A faaî na i te mau hue i te pape.” Ua faaî ihora ratou e tae roa aˈera i te auvaha. Ua na ô atura Iesu e: “A faatahe na, e hopoi atu i te tavana o te oroa nei ra.”

Ua maere roa te tavana o te oroa i te maitai o te uaina, aita râ o ˈna i ite e ua noaa mai na roto i te hoê semeio. Ma te pii i te tane faaipoipo, ua na ô atura oia: “O te uaina maitai ta te taata atoa e tuu mai i te matamua ra, e ia inu te taata e ia rahi, ei reira te mea ino aˈe; vaiiho iho nei râ oe i te uaina maitai, e i teie nei i hopoihia mai ai.”

Tera te semeio matamua a Iesu, e i to ratou iteraa i te reira, ua itoito atura te faaroo o ta ˈna mau pǐpǐ apî. I muri aˈe, na muri iho i to ˈna metua vahine e to ˈna mau taeae, ua reva ˈtura ratou i te oire no Kaperenaumi, i pihai iho i te Miti o Galilea. Ioane 2:1-12.

▪ I teihea taime i roto i te taviniraa a Iesu, te faaipoiporaa no Kana i te tupuraa?

▪ No te aha Iesu i patoi ai i te parau a to ˈna metua vahine?

▪ Eaha te semeio ta Iesu i rave, e eaha ta te reira i faatupu i nia i te tahi pae?