Pene 82

Te tere faahou ra o Iesu i Ierusalema

I MURI aˈe, ua haere faahou atura o Iesu ma te haapii i tera e tera oire e tera e tera oire rii. E au ra e, tei roto oia i te mataeinaa no Perea, i te tahi pae no Ioridana ia faaauhia ia Iudea. Te haere atura râ oia i Ierusalema.

Peneiaˈe no te haapiiraa philosopho ati Iuda e na ô ra e hoê anaˈe numera taotiahia o te fanaˈo i te faaoraraa, i ani ai te hoê taata e: “E te Fatu, e iti anei te ora?” Na roto i ta ˈna pahonoraa, ua aratai Iesu i te taata ia feruri i te ohipa e titauhia ia noaa te ora: “E faaitoito hua [oia hoi, e aro, aore ra e mauiui rahi] i te tomo na te uputa pirihao.”

Mea rû mau â ia rave i teie tutavaraa puai no te mea, te na ô ra Iesu, “e rave rahi te tamata noa i te tomo i reira, e e ore roa e ô.” Eaha te tumu? Ua faataa aˈera oia e ‘ia tia anaˈe te taata utuafare i nia e a tamau ai i te uputa, e ua tia mai te taata i rapae au mai, patoto mai ai i te uputa, a na ô mai ai e, E te Fatu, iriti mai na ia matou; e na ô mai oia e, Aore au i ite ia outou e to outou ra vahi. Ia atea ê atu outou, e te mau rave ohipa ino ra.’

E au ra e ua haere mai te feia i vaiihohia i rapae au i te taime tei au ia ratou anaˈe ra. Tera râ, ua opani-ê-na-hia e ua tamauhia te uputa o te taime tano ra. E tomo atu ratou, ahiri e ua tae oioi mai ratou, noa ˈtu e aita ratou i au maitai i taua hora ra. No reira, e farerei te feia o te ore e faariro i te haamoriraa a Iehova ei tapao matamua i roto i to ratou oraraa, i te faahopearaa peapea mau!

Aita te rahiraa o te mau ati Iuda no ratou hoi Iesu i tonohia mai ai no te rave i ta ˈna taviniraa, i faaohipa i teie ravea faahiahia mau no te fariiraa i te faanahoraa a te Atua no te ora. No reira Iesu i parau ai e e oto ratou e e auau i te niho ia tauehia ratou i rapae. I te tahi aˈe pae, “e tae mai â to te hitia o te râ, e to te tooa o te râ; to apatoerau, e to apatoa,” oia mau no te mau nunaa atoa, “ei manihini i te basileia o te Atua.”

Ua parau faahou ihora Iesu e: “E riro to muri ra [te feia e ere i te ati Iuda tei haavahavahahia e te mau ati Iuda atoa tei haavîhia] no mua, e to mua ra [te mau ati Iuda fanaˈo i te pae materia e i te pae faaroo] no muri.” Ia riro ratou no muri, oia hoi te auraa, eita roa ˈtu teie feia hupehupe e te mauruuru ore e tomo i roto i te Basileia o te Atua.

I teie nei, te haere maira te mau Pharisea ia Iesu ra, na ô atura: “E haere ê oe, e faarue mai i teie vahi, te opua ra hoi Heroda [Anitipa] e taparahi ia oe.” Peneiaˈe paha o Heroda iho te tumu o taua parau ra ia faarue o Iesu i te fenua. Ua mǎtaˈu paha oia ia parauhia e o ˈna atoa te tumu o te pohe o te tahi atu peropheta a te Atua, mai ta ˈna hoi i rave i te haapoheraahia o Ioane Bapetizo. Ua parau atu râ o Iesu i te mau Pharisea e: “A haere a parau atu i taua alope ra, Inaha, e tiavaru vau i te demoni, e e faaora vau i te maˈi auanei, e ananahi, e ia tae i te rui toru ra, ua oti roa ta ˈu ohipa.”

I muri aˈe i to ˈna faaotiraa i ta ˈna ohipa i taua vahi ra, tere atura o Iesu i Ierusalema, no te mea mai ta ˈna e parau ra, “eita e pohe ê atu te peropheta, maori râ ei Ierusalema.” No te aha hoi e tia ˈi ia haapohehia o Iesu i Ierusalema? No te mea o Ierusalema te oire pu, tei reira te tiribuna teitei e 71 melo o te Sunederi e i reira te mau tusia animala e pûpûhia ˈi. No reira, eita roa ˈtu e tia ia taparahihia “te Arenio a te Atua” i te tahi atu vahi maori râ i Ierusalema.

Ua oto ihora Iesu i te na ôraa e: “Auê oe, e Ierusalema e! e Ierusalema! i taparahi i te mau peropheta e, e te tui hoi i te ofai i ta te Atua i tono mai ia oe na e; mau to ˈu hinaaro i te haaputu mai i to mau tamarii mai te moa i haaputu i to ˈna fanauˈa i raro aˈe i to ˈna pererau ra! e aitâ i tia ia outou! Ei teie nei to outou parahiraa e faarirohia ei medebara.” No to ˈna patoiraa i te Tamaiti a te Atua, ua faautuahia ihora te nunaa!

A tamau noa ˈi Iesu i to ˈna tere i Ierusalema, ua titauhia aˈera oia i te fare o te hoê raatira o te mau Pharisea. E mahana Sabati teie e te hiˈopoa maite ra te taata ia ˈna no te mea te vai ra te hoê taata i reira tei roohia i te maˈi hopue, oia hoi ua rahi te pape i roto paha i to ˈna rima e to ˈna avae. Ua ani atura o Iesu i te mau Pharisea e te mau haapii ture i reira e: “E faaorahia anei te maˈi i te sabati?”

Aita te taata i parau noa mai. Ua faaora ihora Iesu i teie taata e ua faahoˈi atura ia ˈna. Ua ani atura oia: “O vai to outou e ore e ume mai i nia i tana [tamaiti] e tana puaatoro ia mairi i roto i te apoo i te mahana sabati?” I reira atoa, aita hoê aˈe taata i pahono atu ia ˈna. Luka 13:22–14:6; Ioane 1:29.

▪ Ia au i te parau a Iesu, eaha te mea e titauhia ia roaa te ora, e no te aha e rave rahi tei vaiihohia i rapae au?

▪ O vai te feia no “muri” o tei riro no mua, e to “mua” no muri?

▪ Eaha paha te tumu i parauhia ˈi e ua imi o Heroda i te taparahi ia Iesu?

▪ No te aha eita e tia ia haapohehia te hoê peropheta i rapae au ia Ierusalema?