Pene 27

Te titauraa ia Mataio

I MURI noa ˈˈe i to ˈna faaoraraa i te hoê hapepa, ua faarue maira Iesu ia Kaperenaumi no te haere atu i te Miti o Galilea. I reirâ, ua haere faahou maira te mau tiaa taata ia ˈna ra, e ua haapii atura oia ia ratou. A haere noa ˈi o Iesu, ua ite atura oia ia Mataio, tei parau-atoa-hia o Levi, te parahi noa ra i te vahi aufauraa tute. Ua parau atura Iesu ia ˈna e: “A pee mai ia ˈu.”

Eita e ore e ua ite maitai o Mataio i te mau haapiiraa a Iesu, mai ia Petero, Anederea, Iakobo e o Ioane a titau mai ai Iesu ia ratou ia pee mai ia ˈna. E mai ia ratou ra, ua farii oioi atura o Mataio i teie titauraa. Ua tia maira oia, faarue ihora i ta ˈna mau hopoia telona, e ua pee atura ia Iesu.

I muri aˈe, peneiaˈe paha ei haamanaˈoraa i teie titauraa, ua faaineine aˈera o Mataio i te tahi oroa rahi i roto i to ˈna fare. Taa ê atu ia Iesu e Ta ˈna mau pǐpǐ, e rave rahi mau hoa tahito to Mataio tei tae mai. Mea pinepine teie mau taata i te hiˈo-ino-hia e te tahi atu mau ati Iuda no te mea e e titau ratou i te tute na te mau tia mana roma tei ore i auhia. Hau atu, e pinepine ratou i te eiâ na roto i te titauraa ˈtu i te nunaa hau aˈe i ta te tute i faataa.

I to ratou iteraa ˈtu ia Iesu i te oroa e taua mau huru taata nei, ua ani atura te mau Pharisea i ta ˈna mau pǐpǐ: “Eaha i amu atoa ˈi ta outou orometua i te mau telona e te feia hara?” Ua faaroo aˈera râ Iesu i teie uiraa e ua pahono atura oia i te mau Pharisea e: “E ere to te feia ora te tahuˈa, no te feia maˈi râ. E tena na, a haere, a haapii i te auraa i te maa parau ra e, o te aroha ta ˈu hinaaro, eiaha te tusia; aore hoi au i haere mai e parau i te feia parau-tia i te feia hara râ ia tatarahapa.”

E au ra e ua titau o Mataio i teie mau telona i to ˈna fare ia nehenehe ratou e faaroo ia Iesu e ia faaorahia ratou i te pae varua. No reira, ua amui atu ïa Iesu ia ratou no te tauturu ia ratou ia taai i te mau auraa maitatai e te Atua. Aita o Iesu i hiˈo ino atu ia ratou, mai te mau Pharisea e faahua parau-tia ra. Teie râ, na roto i to ˈna aroha, ua riro aˈera oia mai te hoê taote i te pae varua no ratou.

Teie râ, noa ˈtu e ua faaite o Iesu i te aroha i te feia rave hara, e ere ïa te auraa e te tapo ra o ˈna i to ˈna mata i nia i ta ratou mau hara, hoê â râ manaˈo to ˈna no ratou e no te feia tei maˈihia i te pae tino. Ei hiˈoraa, ia haamanaˈo na outou i to ˈna tororaa ˈtu i to ˈna rima ma te aroha i te hoê lepera e ua tapea ˈtura ia ˈna i te na ôraa ˈtu e: “Ua tia ia ˈu, ia mâ oe.” Ia faaite atoa na tatou i te aroha na roto i te tautururaa ˈtu i te feia e hinaaro mau ra, i te pae varua iho â râ. Mataio 8:3; 9:9-13; Mareko 2:13-17; Luka 5:27-32.

▪ Teihea roa o Mataio i to Iesu iteraa ˈtu ia ˈna?

▪ Eaha te toroa o Mataio, e no te aha te mau ati Iuda e hiˈo ino ai i teie mau huru taata?

▪ Eaha te faahaparaa i faahapahia ˈtu ia Iesu, e eaha ta ˈna i pahono atu?

▪ No te aha Iesu i amui atu ai i roto i te feia hara?