Pene 28

Te tumu parau o te haapaeraa maa

FATATA hoê atura matahiti to Iesu faatupuraa i te oroa Pasa o te matahiti 30. Tei roto o Ioane Bapetizo i te fare auri a hia ˈtura avaˈe i teie nei. Te hinaaro ra o ˈna e ia pee atu ta ˈna mau pǐpǐ i te Mesia, aita râ hoi te taatoaraa i na reira.

I teie nei, te haere maira vetahi o teie mau pǐpǐ a Ioane tei tapeahia i te fare auri, ia Iesu ra ma te ani atu e: “Te haapae pinepine nei matou e te mau Pharisea i te maa, eaha ta oe nei mau pǐpǐ i ore i haapae ai i te maa?” E haapae na hoi te mau Pharisea i te maa e piti taime i te hebedoma ei peu titauhia e ta ratou haapaoraa. Ua pee atoa paha te mau pǐpǐ a Ioane i teie peu. Aore ra, e haapae atoa na paha ratou i te maa no te faaite i to ratou oto i te tapearaahia o Ioane, e te aniani ra ratou e no te aha râ te mau pǐpǐ a Iesu e ore ai e faaite i to ratou peapea mai ia ratou.

Ei pahonoraa, ua faataa ˈtura Iesu e: “E oto anei te mau hoa o te tane apî i te vai-atoa-raa o te tane apî i roto ia ratou ra? Te vai atura râ te tau e hopoi-ê-hia ˈi te tane apî ra, ei reira ratou e haapae ai i te maa.”

E riro paha e te haamanaˈo ra te mau pǐpǐ a Ioane e ua faataa ˈtu o Ioane iho ia ratou e o Iesu te Tane apî. No reira, tei pihai iho noâ o Iesu ia ratou, eita roa ˈtu ïa o Ioane e manaˈo e mea tano mau â ia haapae i te maa, e te mau pǐpǐ atoa hoi a Iesu. I muri aˈe, ia pohe o Iesu, i reira ïa ta ˈna mau pǐpǐ e heva ˈi e e haapae ai i te maa. Ia faatiahia mai râ oia e ia haere atu oia i nia i te raˈi, aita ˈtura ïa e tumu faahou no te heva ma te haapae i te maa.

Ua faahiti maira o Iesu i muri iho i teie mau parabole: “Aore e taata e tifai i te ahu tahito i te ahu apî; i na reira, e rahi roa ïa te motu o taua ahu ra i taua tifai apî ra. E ore hoi te taata e tuu i te uaina apî i roto i te farii tahito, i na reira, e amaha te farii; manii atura te uaina, e ino roa ˈtura te farii: e tuu râ ratou i te uaina apî i roto i te farii apî.” Eaha hoi te auraa e vai ra i rotopu i taua mau parabole ra e te haapaeraa maa?

Te tauturu ra o Iesu i te mau pǐpǐ a Ioane Bapetizo ia papu maitai e eiaha roa ˈtu te taata e manaˈo e e faaau ta ˈna mau pǐpǐ ia ratou i te mau peu tahito a te haapaoraa ati Iuda, mai te peu haapaeraa maa. Aita oia i haere mai no te tifai e no te rave e ia maoro roa ˈtu â te mau huru faanahoraa tahito fatata roa hoi i te faaruehia. Eita te kerisetianoraa e faaauhia i nia i te haapaoraa ati Iuda o taua tau ra e ta ˈna mau parau tutuu a te taata nei. Eita, eita oia e au i te hoê ahu apî i tifaihia i nia i te hoê ahu tahito, aore ra i te uaina apî i tuuhia i roto i te hoê farii tahito. Mataio 9:14-17; Mareko 2:18-22; Luka 5:33-39; Ioane 3:27-29.

▪ O vai te haapae na i te maa, e no te aha?

▪ No te aha te mau pǐpǐ a Iesu i ore ai e haapae i te maa a vai noa mai ai oia ia ratou ra, e na te aha i muri iho e faaore i te haapaeraa maa?

▪ Eaha te mau parabole ta Iesu i faahiti mai, e eaha te auraa o teie mau parabole?