Pene 49

Tere pororaa apî i Galilea

I MURI aˈe fatata e piti matahiti pororaa uˈana, eita anei o Iesu e faataupupu rii i ta ˈna ohipa no te haamâha i to ˈna rohirohi? Aita, tera râ, ua haapuai oia i ta ˈna ohipa pororaa ma te raveraa i te tahi atu tere, te toruraa ïa i Galilea. Ua haere oia na roto i te mau oire e te mau oire iti atoa o taua tuhaa fenua ra, ma te haapii i roto i te mau sunago e ma te poro i te parau apî maitai o te Basileia. Ua haapapu hau atu â te mea o ta ˈna i ite i roto i to ˈna tere i te faufaaraa ia tataipiti i te itoito i roto i te pororaa.

I te mau vahi atoa o ta ˈna i haere, ua ite aˈera o Iesu e te hinaaro ra te mau taata i te hoê faaoraraa e te hoê tamahanahanaraa i te pae varua. E au ra ratou i te mau mamoe aita e tiai, o tei eiâhia e o tei purara haere, e ua aroha aˈera oia ia ratou. Ua parau atura oia i ta ˈna mau pǐpǐ: “Te rahi mau nei te auhune, te iti nei râ te feia e rave: e teie nei, e pure outou i te Fatu o te ohipa ia tono â oia i te rave ohipa ei ooti.”

E tabula ohipa ta Iesu. Ua haaputu ihora oia i na aposetolo e 12 o ta ˈna i maiti fatata hoê matahiti i teie nei. Ua vahi aˈera ia ratou na roto e ono pǔpǔ, e piti taata poro i te pǔpǔ hoê, e ua horoa ˈtura i te tahi mau aˈoraa. Ua faataa ˈtu oia e: “Eiaha e haere noa ˈtu i te eˈa o te mau Etene ra, e eiaha atoa e tomo atu i te oire o to Samaria ra: e haere tia ˈtu râ i te mau mamoe i moe i te utuafare ra o Iseraela. E poro haere outou, e na ô atu, Te fatata mai nei te basileia o to ao.”

Taua Basileia ra te tia ia ratou ia poro, o te Basileia ïa ta Iesu i haapii ia ratou ia pure i roto i te pure o ta ˈna i horoa mai ei hohoˈa. Ua fatata mai te Basileia no te mea tei reira mau o Iesu Mesia, te Arii i maitihia e te Atua. No te haapapu e o ta ˈna mau pǐpǐ te mau tia o taua faatereraa ra, o tei teitei aˈe i ta te taata nei, ua horoa ˈtura Iesu i te mana no ratou no te faaora i te feia maˈi e no te faatia atoa mai i te feia pohe. Ua faaue aˈera oia ia ratou ia rave i taua mau ohipa ra ma te tamoni ore.

E ua parau atura ia ratou e eiaha e rave i te mau faaineineraa i te pae materia no to ratou tere pororaa. “Eiaha e tuu i te auro, e te ario, e te veo i roto i to outou tatia; eiaha ei pute no te tere e hopoihia, eiaha e tataipiti pereue, e te tamaa, e te raau: e au hoi te rave ohipa ra i ta ˈna utua.” E turaihia te feia o te farii i ta ratou poroi ia ohipa e ia horoa i te maa e te taotoraa na ratou. Mai ta Iesu i parau: “E te oire e te oire iti ta outou e tomo ra, e ui atu i to reira taata au, ei reira parahi ai e reva noa ˈtu outou.”

I muri aˈe, ua horoa aˈera Iesu i te mau aˈoraa no nia i te huru faaiteraa i te poroi o te Basileia i te feia e noho ra i te hoê fare. Ua faaue atura oia e: “E ia tomo atu outou i roto i te fare, a faaora ˈtu i taua fetii ra. E te au ra taua fetii ra, o te ora ta outou i hinaaro no ratou ra, e tae ïa i nia ia ratou: ia ore râ ia au, e hoˈi mai ïa ora i nia ia outou iho. E o te ore e ite mai ia outou, e aore e haapao i ta outou parau, ia haere ê outou i taua fare ra e i taua oire ra, e ueue atu i te repo o to outou avae.”

No nia i te hoê oire o tei patoi i ta ratou poroi, ua faaite aˈera o Iesu e e roohia oia i te haavaraa etaeta roa. Ua faataa maira oia e: “E huru tia ˈˈe i te fenua ra o Sodoma e Gomora ia haamahu ia tae i te mahana haavaraa i te reira oire.” Mataio 9:35–10:15; Mareko 6:6-12; Luka 9:1-5.

▪ Afea to Iesu haamataraa i te toruraa o to ˈna tere i Galilea, e eaha te haapapuraa o tei noaa ia ˈna?

▪ Eaha te mau faaueraa ta ˈna i horoa ˈtu i na aposetolo e 12 i to ˈna tonoraa ˈtu ia ratou ia poro haere?

▪ No te aha e mea tano ia haapii te mau pǐpǐ e ua fatata mai te Basileia?