Pene 9

To Iesu vai-tamarii-rii-raa

I TO Iesu paariraa i Nazareta, e oire iti nainai roa ïa oia. Tei nia teie oire i te hoê vahi mouˈa o te hoê fenua i parauhia Galilea, aita i atea roa i te Peho nehenehe mau no lezereela.

I to Iesu afairaahia mai i Nazareta mai Aiphiti mai na Iosepha raua o Maria, fatata e piti paha matahiti to ˈna, o ˈna anaˈe ïa te tamarii a Maria. Eiaha râ no te hoê taime maoro roa. I muri iho, ua fanauhia mai o Iakobo, o Iosepha, o Simona e o Iuda, e ua noaa atoa ta Maria raua o Iosepha i te tahi mau tamahine. E i te pae hopea, e ono, e peneiaˈe hau atu, to Iesu taeae e tuahine apî aˈe ia ˈna.

E fetii â to Iesu. Ua matau aˈena tatou ia Ioane, to ˈna tuaane fetii tei paari aˈe ia ˈna, e ora ra i Iudea, tau kilometera atea ˈtu i reira. I pihai iho noa ˈˈe râ, i Galilea, te vai ra o Salome, te tuahine paha o Maria. E vahine o Salome na Zebedaio, e ta raua na tamaiti e piti, o Iakobo e o Ioane, e mau tuaane fetii ïa raua no Iesu. Aita tatou i ite mai te peu e ua amui rahi atu o Iesu i teie mau tamaroa i to ˈna paariraa mai, teie râ, e riro mai raua a muri aˈe, ei mau hoa piri roa no Iesu.

No te faaamu i to ˈna utuafare o te rahi noa ˈtura, e tia ia Iosepha ia rave i te ohipa ma te itoito. E tamuta oia. Ua faaamu oia ia Iesu mai ta ˈna iho tamaiti, no reira ïa o Iesu i parauhia ˈi e “te tamaiti a te tamuta ra.” Ua haapii o Iosepha i te toroa tamuta ia Iesu, e ua riro oia ei rave ohipa aravihi. No reira hoi te taata e parau ai i muri aˈe no nia ia Iesu e, “Teie te tamuta.”

Ua niuhia te oraraa o te utuafare o Iosepha i nia i te haamoriraa i te Atua ra o Iehova. Ma te haapao i te Ture a te Atua, ua horoa o Iosepha e o Maria i te hoê haapiiraa i te pae varua i ta raua mau tamarii ‘ia parahi noa ratou i roto i te fare, e ia haere noa ratou na te eˈatia ra, e ia taoto noa ratou ra, e ia tia ratou i nia ra.’ Te vai ra te hoê sunago i Nazareta, e eita e ore e, ua aratai tamau atu o Iosepha i to ˈna utuafare i reira no te haamoriraa. To ratou râ oaoa rahi, ia haere tamau anaˈe ïa ratou i te hiero o Iehova i Ierusalema. Mataio 13:55, 56; 27:56; Mareko 15:40; 6:3; Deuteronomi 6:6-9.

▪ Ehia paha taeae e tuahine apî aˈe to Iesu, e o vai te iˈoa o vetahi o ratou?

▪ O vai na tuaane fetii matau-maitai-hia e toru a Iesu?

▪ Eaha te toroa ta Iesu i haapii, e no te aha?

▪ Eaha te haapiiraa faufaa roa ta Iosepha i horoa ˈtu na to ˈna utuafare?