Pene 38

Ua erehia anei o Ioane i te faaroo?

UA matahiti i teie nei to Ioane Bapetizo vairaa i roto i te fare tapearaa, e ua faaroo oia e ua faatia o Iesu mai te pohe mai i te tamaiti a te vahine ivi no Naina. Teie nei râ, te hinaaro nei o Ioane e na Iesu iho e haapapu mai i te auraa o taua semeio ra, no reira, tono atura o ˈna e piti o ta ˈna mau pǐpǐ no te ani atu ia ˈna e: “O oe anei te tae mai? e e tiai atu anei tatou ia vetahi ê?”

E riro taua uiraa ra i te mea huru ê inaha hoi, a bapetizo atu ai oia ia Iesu fatata e piti matahiti na mua ˈtu, ua ite o Ioane i te varua o te Atua i te pouraa mai i nia ia Iesu e ua faaroo oia i te reo o te Atua i te fariiraa mai ia ˈna. Na roto i te uiraa a Ioane e manaˈo paha vetahi pae e ua toaruaru to ˈna faaroo. Aita roa ˈtu râ. Eita paha ïa o Iesu e faahiti i te parau maitai no Ioane, mai ta ˈna hoi i rave i taua taime ra, mai te peu e ua feaa te manaˈo o Ioane. No te aha ïa o Ioane i ui ai i taua uiraa ra?

Peneiaˈe paha te hinaaro ra oia e ia haapapu o Iesu e O ˈna iho te Mesia. E faaitoito hoi te reira ia Ioane o te faaea noa ra i roto i te fare tapearaa. Teie râ, e au ra e te titau ra te uiraa a Ioane i te tahi atu mea. Mea papu e te hinaaro ra oia e ite e mai te peu e e haere faahou mai te tahi atu taata, mai te hoê mono o te faaoti roa i te mau mea atoa tei tohuhia mai e na te Mesia e faatupu.

Ia au i te mau parau tohu a te Bibilia, ta Ioane hoi i ite maitai, e riro te Taata ta te Atua e faatavai, ei arii e ei faaora. Teie râ, tei roto noâ Ioane i te fare tapearaa, e rave rahi mau avaˈe i muri aˈe i te bapetizoraa o Iesu. Mea maramarama ˈtura ïa te aniraa a Ioane e: ‘Na oe mau anei e haamau papu i te Basileia o te Atua, aore ra e tia anei ia matou ia tiai i te tahi atu, i te hoê mono, ia faatupu oia i te mau parau tohu faahiahia atoa no nia i te hanahana o te Mesia?’

Maoti i te pahono i te mau pǐpǐ a Ioane e: ‘Oia mau, o vau te haere mai!’ ua horoa ihora Iesu i te hoê haapapuraa faahiahia roa i taua iho â taime ra na roto i te faaoraraa e rave rahi taata i te mau maˈi e te mau mauiui huru rau. I muri iho, ua parau atura oia i te mau pǐpǐ e: “A haere, a parau atu ia Ioane i ta orua i faaroo e ta orua i ite iho nei; e te roaa nei te ite i te matapo, te haere nei te pirioi, te tamâhia nei te lepera, te faaroo nei te turi, te faatiahia nei te pohe, e te parauhia nei te evanelia i te taata rii.”

Oia hoi, te titau ra paha te uiraa a Ioane e e rave o Iesu i te mau ohipa ê atu, e e riro atoa paha oia i te faaora ia Ioane iho. Teie râ, te parau atura o Iesu ia Ioane e eiaha o ˈna ia tiai hau atu â i te mau semeio o ta ˈna e rave ra.

I to te mau pǐpǐ a Ioane revaraa ˈtu, ua huri tia ˈtura o Iesu i nia i te tiaa rahi taata e ua parau atura e, o Ioane te “vea” a Iehova i faaite-atea-hia mai i roto i te Malaki 3:1 e oia atoa te peropheta Elia i faaite-atea-hia i roto i te Malaki 4:5, 6. Ua haafaahiahia aˈera oia ia Ioane ma te faaau ia ˈna i te mau peropheta atoa i ora na na mua ˈtu ia ˈna, ma te faataa e: “E parau mau ta ˈu e parau atu ia outou nei, i ta te vahine i fanau nei aita ˈtu ïa peropheta rahi i itea ia Ioane Bapetizo nei, o tei iti roa râ i te basileia o te ao ra, e rahi ïa ia ˈna. Mai te itearaa mai o Ioane Bapetizo ra, e tae roa aˈenei i teie nei, te mârôhia nei te basileia o te [raˈi] ra, e te titau nei te feia mârô ia noaa i te haru.”

Te faaite nei Iesu i ǒ nei e eita o Ioane e ô i roto i te Basileia o te raˈi, no te mea o tei iti roa ra i te Basileia o te Atua ra, e rahi aˈe ïa ia Ioane. Ua faaineine o Ioane i te eˈa no Iesu, ua pohe râ oia hou te Mesia i faaau ai i te hoê faufaa, aore ra faaauraa parau, e ta ˈna mau pǐpǐ ia nehenehe ratou e faatere atu e o ˈna i roto i to ˈna Basileia. Te tumu ïa te reira Iesu e haapapu ai e eita o Ioane e ô i roto i te Basileia o te raˈi. E riro râ oia ei tavini no te Basileia o te Atua i nia i te fenua nei. Luka 7:18-30; Mataio 11:2-15.

▪ No te aha Ioane e ani ai e o Iesu anei tei tae mai aore ra e tia anei ia tiai i te tahi atu taata?

▪ Ia au i te parau a Iesu, eaha te mau parau tohu ta Ioane i faatupu?

▪ No te aha o Ioane Bapetizo e ore ai e ora i nia i te raˈi e o Iesu?