Pene 79

Ua erehia te hoê nunaa, eiaha râ te taatoaraa

I MURI noa ˈˈe i te paraparauraa a Iesu e te feia i haaputuputu i rapae au i te fare o te hoê Pharisea, ua parau maira vetahi no “te mau taata i Galilea, tei anoihia e [te raatira roma ra o Ponatio] Pilato to ratou toto i te toto o ta ratou mau tusia ra.” Ua taparahihia paha taua mau taata no Galilea ra i te taime a patoi ai tau tausani ati Iuda i to Pilato faaohiparaa i te moni no roto mai i te faufaa o te hiero no te patu i te hoê eˈaturu no te afai mai i te pape i roto ia Ierusalema. Te parau ra paha te feia e faatia ˈtura i teie ohipa ia Iesu e ua roohia te mau taata no Galilea i te ati no ta ratou iho mau ohipa iino ra.

Tera râ, ua faaafaro aˈera Iesu i to ratou manaˈo i te uiraa ˈtu e: “Te manaˈo na outou e, e feia hara rahi taua mau taata Galilea ra i to Galilea atoa ra, o ratou i na reirahia?” Ua pahono atura o Iesu e: “Aore.” Ua faaohipa ˈtura oia i teie ohipa no te faaara i te mau ati Iuda: “Ia ore râ outou ia tatarahapa, mai te reira atoa ïa to outou pohe.”

Ua faatia ˈtura o Iesu i te tahi atu ati i tupu i roto i taua tuhaa fenua ra, peneiaˈe paha i te taime atoa i patuhia ˈi te eˈaturu ra. Ua ani ihora oia e: “E na taata tino ahuru ma vau i mairihia e te fare rahi i Siloama ra, e pohe ihora, te manaˈo na outou e, e feia hara rahi ratou i to Ierusalema atoa ra?” Aore roa, aita taua mau taata ra i pohe no to ratou iho ino, o ta Iesu ïa e parau ra. Teie râ, mea pinepine e o ‘te tau e te tupuraa manaˈo-ore-hia,’ te tumu o taua mau ati ra. Tera râ, ua faaohipa faahou o Iesu i teie taime no te faaara ˈtu e: “Ia ore râ outou ia tatarahapa, mai te reira atoa ïa to outou pohe.”

Ua horoa ˈtura Iesu i te hoê parabole tano maitai i te na ôraa e: “E suke ta te hoê taata i tanuhia i roto i ta ˈna ra ô vine, e haere atura oia e hiˈo i te maa i nia iho e aore, ua parau atura oia i te faaapu i taua ô vine ra, Inaha, o te toru teie to ˈu matahiti i te haerea mai e hiˈo i te maa i teie nei suke, e aita roâ: e tâpû atu, eaha oia i faaapǐ ai i te ô? Ua parau maira oia ia ˈna, na ô maira, E tau fatu, e vaiiho noa ˈˈe na ia hoê aˈe matahiti toe, ia utaruhia e au ia tuuhia te para; peneiaˈe o te hotu, e aore ra, a tâpû atu ai oe i muri aˈe.”

Ua hau atu i te toru matahiti to Iesu tamataraa i te atuatu i te faaroo i rotopu i te nunaa ati Iuda. Tera râ, tau hanere pǐpǐ anaˈe te nehenehe e taiohia ei hotu no ta ˈna mau tutavaraa. I teie nei, i roto i te maharaa o ta ˈna matahiti taviniraa, ua haapuai oia i ta ˈna mau tutavaraa e, ia au i te auraa taipe, ua utaru oia e ua tuu atu i te para e ati aˈe te suke ati Iuda na roto i te pororaa e te haapiiraa ma te itoito i Iudea e i Perea. Aita râ e faufaa! Aita te nunaa i tatarahapa e no reira ïa oia e taeahia ˈi i te haamouraa. Hoê anaˈe toea o te nunaa o tei farii mai.

I muri noa ˈˈe, te haapii ra o Iesu i roto i te sunago i te mahana sabati. Ite atura oia i te hoê vahine o tei fefe roa i raro e 18 matahiti no te mea te haamauiui ra te hoê demoni ia ˈna. Ma te aroha rahi, ua parau atura Iesu ia ˈna e: “E teie nei vahine, ua ora oe i to oe maˈi.” I reira, ua tuu atura oia i to ˈna rima i nia ia ˈna e afaro mai nei oia e haamaitai ihora i te Atua.

Ua riri roa ˈˈera te auvaha o te sunago ra. Ua patoi maira oia e: “E ono mahana raveraa ohipa; o ta outou ïa e haere mai ia faaorahia outou, eiaha te mahana sabati.” Ua farii teie auvaha i te mana o Iesu no te faaora i te maˈi teie râ ua faahapa oia i te taata i to ratou haereraa mai e faaora ia ratou i te mahana sabati!

Ua pahono atura Iesu e: “E te mau haavare e! o vai to outou e ore e tatara i tana puaatoro e tana asini i te vairaa maa ra a putô ai i te pape i te sabati? E eiaha teie nei vahine, te huaai o Aberahama, i tapeahia e Satani nei, e inaha ahuru aˈenei matahiti e vau tiahapa, eiaha e tatarahia i taua tapearaa nei i te mahana sabati?”

I to ratou faarooraa i te reira, ua haama roa ˈˈera te feia i patoi ia Iesu. Area te feia rahi ra, ua oaoa ïa i te mau mea faahiahia atoa ta Iesu i rave i mua ia ratou. Ei pahonoraa, ua faahiti faahou atura o Iesu e piti parabole tei riro ei parau tohu no nia i te Basileia o te Atua, o ta ˈna hoi i faataa na mai nia mai i te hoê pahi i nia i te Miti o Galilea fatata hoê matahiti na mua ˈtu. Luka 13:1-21; Koheleta 9:11; Mataio 13:31-33.

▪ Eaha te mau ati e faahitihia ra i ǒ nei, e eaha te haapiiraa ta Iesu i haamatara mai?

▪ Eaha te faaohiparaa e nehenehe e ravehia no nia i te suke hotu ore, e no nia atoa i te mau tutavaraa no te faahotu ia ˈna?

▪ Mea nafea to te auvaha o te sunago fariiraa i te mana o Iesu no te faaora i te maˈi, mea nafea râ to Iesu haapapuraa i te huru haavare o teie nei taata?