Pene 37

Ua faaore o Iesu i te oto o te hoê vahine ivi

I MURI aˈe i to ˈna faaoraraa i te tavini a te hoê raatira faehau roma, ua haere atura o Iesu i Naina, te hoê oire e toru ahuru ma piti kilometera i te pae apatoa-tooa o te râ ia Kaperenaumi. Ua apee mai ta ˈna mau pǐpǐ e te feia rahi roa ia ˈna. I te ahiahi paha to ratou taeraa ˈtu i pihai iho ia Naina. I reira, ua farerei ratou i te hoê tiaa taata apee i te hoê taata pohe. Te hopoihia ra te tino pohe o te hoê taurearea tamaroa i rapae i te oire no te tanu ia ˈna.

Tei roto te metua vahine o te taata pohe i te peapea rahi, no te mea e vahine ivi oia e tera anaˈe ta ˈna tamaiti fanau tahi. I te poheraa o ta ˈna tane, e nehenehe hoi ta ˈna e tamahanahana ia ˈna iho i te mea e te vai ra ta ˈna tamaiti. Ua tuu oia i to ˈna mau tiaturiraa atoa, to ˈna mau hinaaro e ta ˈna mau opuaraa atoa i nia i te oraraa no a muri atu o ta ˈna tamaiti. I teie nei râ, aita e taata faahou i pihai iho ia ˈna no te tamahanahana ia ˈna. Ua rahi roa to ˈna oto a apee noa ˈi te feia o te oire ia ˈna i te tanuraa.

I to Iesu iteraa i taua vahine ra, ua putapû roa ˈˈera to ˈna mafatu i to ˈna mauiui rahi. Ua parau atura oia ia ˈna ma te mǎrû, e ma te hoê mana râ tei horoa mai i te tiaturiraa, e: “Eiaha e oto.” Ua huti maira to ˈna haerea e ta ˈna huru raveraa i te ara-maite-raa o te feia rahi. No reira te feia amo i faaea ˈi i to ˈna piriraa ˈtu e to ˈna tapearaa i te iri hopoi i reira te tino i tuuhia ˈi. Ua aniani aˈera paha ratou pauroa eaha râ ta ˈna e rave i teie nei.

Oia mau, ua ite aˈena te feia e apee ra ia Iesu i to ˈna faaora-semeio-raa i te feia maˈi. E au ra râ e aitâ ratou i ite atura ia ˈna i te faatiaraa mai i te taata pohe. E nehenehe anei ra ta ˈna e rave i te hoê ohipa mai te reira te huru? Ma te parau atu i te tino pohe, ua faaue ihora Iesu e: “E teie nei taata apî, a tia, te parau atu nei au ia oe!” Ua tia maira taua taata nei i taua iho taime ra! Ua haamata aˈera oia i te paraparau, e ua tuu atura Iesu ia ˈna i to ˈna metua vahine ra.

I to ratou iteraa e ua ora mau iho â te taurearea tamaroa, ua parau aˈera te tahi pae e: “E peropheta rahi teie i tupu iho nei i roto ia tatou nei.” Ua na ô ihora vetahi pae e: “Ua hiˈo aroha mai te Atua i to ˈna taata.” Parare oioi roa ˈtura te roo o taua ohipa maere ra e ati noa ˈˈera Iudea, e te mau fenua atoa i reira ra.

Tei roto noa râ o Ioane Bapetizo i te fare tapearaa, e te hinaaro ra oia e ite hau atu â no nia i te mau ohipa ta Iesu e nehenehe e faatupu. Ua faatia aˈera te mau pǐpǐ a Ioane ia ˈna i te parau no teie mau semeio. Eaha ïa ta ˈna i pahono atu? Luka 7:11-18.

▪ Eaha te ohipa i tupu a tae mai ai Iesu i pihai iho i te oire no Naina?

▪ Eaha te huru o Iesu i to ˈna iteraa i taua ohipa ra, e eaha ta ˈna ohipa i rave?

▪ Eaha te huru o te mau taata i mua i te semeio a Iesu?