Pene 48

Ua faarue oia i te fare o Iaeiro e ua hoˈi atu i Nazareta

I TEIE mahana, mea rahi roa te ohipa ta Iesu i rave—ua tere oia mai te Dekapoli mai na nia i te pahi, ua faaora oia i te vahine tei pohehia i te tapahi e ua faatia mai oia i te tamahine a Iaeiro. Aita râ te mahana i hope atura. I to ˈna faarueraa i te fare o Iaeiro, ua apee maira toopiti taata matapo ia ˈna ma te pii e: “E te Tamaiti a Davida ra, e aroha mai oe ia mâua.”

Ma te piiraa ia Iesu te “Tamaiti a Davida,” ua farii hua taua nau taata ra e o Iesu te fatu o te terono a Davida, e o ˈna te Mesia i tǎpǔhia mai. Tera râ, aita Iesu i haapao i ta raua mau piiraa i te tauturu, peneiaˈe paha no te tamata i to raua onoonoraa. Aita râ na taata toopiti ra i faaea. Ua apee aˈera raua ia Iesu i te vahi i reira oia e noho ai; i to ˈna tomoraa ˈtu i roto i te fare, tei muri noa raua ia ˈna.

I reira, ua ani atura Iesu e: “Te manaˈo na orua e e tia tena ia ˈu?”

Ua pahono ihora raua ma te tiaturi e: “E te Fatu, e.”

E, ma te faatiaia i to raua mata, ua na ô atura Iesu e: “Ta orua i manaˈo na, ia na reirahia orua.” E, i taua taime ra, araara aˈera to raua mata! Tera râ, ua aˈo hua ˈtura Iesu ia raua e: “Eiaha roa te hoê taata ia ite.” No te mea râ e ua î roa raua i te oaoa, aita raua i haapao i taua faaueraa a Iesu ra e ua parau aˈera raua no nia ia ˈna e ati roa ˈˈera te reira fenua.

A faarue mai ai teie na taata, ua hopoihia maira te hoê taata i uruhia i te hoê demoni o tei faaere ia ˈna i te parau. Ua tiavaru ihora Iesu i te demoni i rapae e ua paraparau ihora teie taata. Ua na ô atura te feia rahi tei maere roa i taua mau semeio ra e: “Aitâ teie i itea i Iseraela nei.”

Tei reira atoa te mau Pharisea. Aita ratou i nehenehe e parau e aita te mau semeio i tupu, tera râ, ma te tiaturi ore e te ino, ua faahapa faahou ratou i te tumu o te mana o Iesu, ma te parau e: “Te tiavaru nei oia i te demoni i te mana o te demoni rahi ra.”

I muri noa ˈˈe i taua mau ohipa ra, ua hoˈi atura Iesu i to ˈna vahi, i Nazareta, e i taua taime ra, ua apeehia oia e ta ˈna mau pǐpǐ. Fatata hoê matahiti na mua ˈtu, ua haere oia i roto i te sunago e ua haapii atura i reira. Noa ˈtu e, i te omuaraa, ua maere te taata i ta ˈna mau parau maitatai, i muri iho râ, ua riri roa ratou i ta ˈna haapiiraa e ua tamata aˈera i te haapohe ia ˈna. Noa ˈtu â te reira, ma te aroha, ua tamata faahou â o Iesu i te tauturu i te feia o taua oire ra, o to ˈna hoi oire i mutaa ihora.

Mai te peu e, i te tahi atu vahi, ua tairuru te feia rahi ia Iesu ra, e ere ïa mai te reira te huru i ǒ nei. No reira, i te sabati, haere ihora oia i roto i te sunago no te haapii. Ua maere roa te rahiraa o te feia i faaroo mai ia ˈna. Ua aniani aˈera ratou e: “No hea te paari e te ravea mana a teie nei taata? E ere anei teie te tamaiti a te tamuta ra? e ere anei o Maria to ˈna nei metua vahine? e ere anei o Iakobo, e o Iose[pha], e o Simona, e o Iuda, to ˈna mau taeae? E, e ere anei te parahi nei to ˈna atoa ra mau tuahine i roto ia tatou nei? Nohea râ hoi te mau peu atoa o teie nei taata?”

Ua parau aˈera ratou e: ‘E taata no ǒ nei noa hoi Iesu mai ia tatou atoa nei. Ua ite tatou ia ˈna i te paariraa mai e ua matau tatou i to ˈna utuafare fetii. Nafea oia e nehenehe ai e riro ei Mesia?’ Noa ˈtu te mau haapapuraa o to ˈna paari rahi e ta ˈna mau semeio, ua patoi ratou ia ˈna. No te mea ua matau maitai ratou ia ˈna, ua maheaitu te mau melo o to ˈna iho utuafare fetii ia ˈna, e no reira Iesu i faaoti ai e: “E ore te peropheta e ere i te tura, maori râ i to ˈna iho fenua mau, e i to ˈna iho fetii mau.”

Oia mau, ua maere roa Iesu no to ratou faaroo ore. No reira, aita oia i faatupu i te semeio i reira maoti râ te tuu-noa-raa i to ˈna rima i nia i te tahi feia maˈi no te faaora ia ratou. Mataio 9:27-34; 13:54-58; Mareko 6:1-6; Isaia 9:7.

▪ Ma te piiraa ia Iesu te “Tamaiti a Davida,” te faaite ra na taata matapo i to raua tiaturiraa i te aha?

▪ Mea nafea to te mau Pharisea faataaraa i te mau semeio a Iesu?

▪ No te aha Iesu i faaite ai i te aroha na roto i te hoˈi-faahou-raa ˈtu e tauturu i te feia no Nazareta?

▪ Mea nafea Iesu i te fariiraahia i Nazareta, e no te aha?