Pene 3

Ua fanauhia te taata e faaineine i te eˈa

UA TAEAHIA te taime e fanau ai o Elisabeta. Ua faaea o Maria i pihai iho ia ˈna i roto i na avaˈe e toru i mairi aˈenei. Teie râ, ua tae i te taime no Maria ia faarue mai e ia rave i te tere roa no te hoˈi atu i to ˈna fare i Nazareta. I roto e ono avaˈe, e fanau atoa o ˈna.

I muri noa ˈˈe i te revaraa o Maria, ua fanau o Elisabeta. Auê te oaoa e inaha ua fanau maitai oia e mea maitai roa o Elisabeta e te aiû iti! I to Elisabeta faaiteraa ˈtu i te tamaiti iti i te feia tapiri mai e to ˈna mau fetii, ua oaoa ratou paatoa.

I te vau o te mahana i muri aˈe i te fanauraa, ia au i te Ture a te Atua, e peritomehia te tamarii tamaroa Iseraela. I taua taime ra, ua haere mai te mau hoa e te mau fetii. Ua parau ratou e e tia ia mairihia te tamaiti i te iˈoa o to ˈna metua tane, o Zakaria. Teie râ, ua parau maira o Elisabeta. Ua na ô aˈera: “Eiaha; e mairi râ ia ˈna ia Ioane.” A haamanaˈo na, o te iˈoa ïa ta te melahi o Gaberiela i horoa mai na te tamaiti.

Ua patoi mai râ to raua mau hoa, i te na ôraa mai e: “Aore roa o to oe fetii i mairihia i te reira iˈoa.” I muri iho, na roto i te aparaa rima, ua ani atura ratou i to ˈna metua tane e eaha te iˈoa o ta ˈna e hinaaro ra e horoa na ta ˈna tamaiti. Ua ani aˈera o Zakaria i te hoê iri papairaa, e ma te maere rahi o te taatoaraa, ua papai ihora oia e: “O Ioane to ˈna iˈoa.”

I reira, ua matara aˈera to ˈna arero na roto i te hoê semeio. A haamanaˈo na e ua erehia oia i te parau no te mea aita o ˈna i tiaturi i te parau a te melahi e e hapu o Elisabeta. Inaha, i to Zakaria paraparauraa, ua maere roa te mau taata atoa e ora ra i reira e ua na ô aˈera ratou ratou iho: “E riro ra ei aha teie tamaiti a muri atu?”

Ua î aˈera o Zakaria i te varua moˈa, e ua arue ihora oia: “Ia haamaitaihia [Iehova] te Atua no Iseraela; ua haapao mai hoi oia, e ua faaora i to ˈna taata; e ua faatupu i te tahi tara faaora no tatou, i te fetii o tana tavini ra o Davida.” O te Fatu ra o Iesu mau â ïa teie “tara faaora,” tei fatata roa i te fanauhia. Na roto i to ˈna arai, o ta Zakaria ïa e parau ra, e haamaitai mai te Atua ia “tatou i faaorahia i te rima o to tatou mau enemi, ia haamori tatou ia ˈna, ma te viivii ore e te parau-tia i mua i tana aro e hope roa ˈˈe o tatou pue mahana.”

I muri iho, ua faaite atea maira o Zakaria no nia i ta ˈna tamaiti o Ioane e: “E o oe hoi, e teie nei tamaiti, e parauhia oe, e peropheta na te Teitei; e na mua hoi oe i te mata o [Iehova] i te haere, ei haamaitai i to ˈna haerea; i te faaiteraa i to ˈna taata i te ora, i ta ratou hara i matara, i te aroha rahi o to tatou Atua, i taea mai ai tatou e te maramarama no nia mai; ei haamaramarama i te feia e parahi i te pouri, i roto i te mǎrû pohe; ei aratai hoi i to tatou avae na te eˈa hau.”

I taua taime ra, aitâ ïa o Maria i faaipoipohia ˈtura, e ua tae oia i to ˈna fare i Nazareta. Eaha te ohipa e tupu i nia ia ˈna ia ite-anaˈe-hia e ua hapu oia? Luka 1:56-80; Levitiko 12:2, 3.

▪ Ehia avaˈe hau to Ioane i nia ia Iesu?

▪ Eaha te mau ohipa i tupu i te vauraa o te mahana o Ioane?

▪ Mea nafea to te Atua huriraa i to ˈna manaˈo i nia i to ˈna nunaa?

▪ Eaha te ohipa a Ioane a muri aˈe tei faaite-atea-hia mai?