Pene 112

Ua fatata roa te oroa Pasa hopea a Iesu

A HOPE ai te mahana piti 11 no Nisana, te hope atoa ra te haapiiraa a Iesu i ta ˈna mau aposetolo i nia i te Mouˈa i Oliveta ra. Auê ïa mahana î maitai i te ohipa e te rohirohi atoa e! I teie nei, peneiaˈe paha i to ˈna hoˈiraa ˈtu i Betania no te po, ua parau atura Iesu i ta ˈna mau aposetolo e: “Ua ite outou e e piti mahana toe i te pasa ra; ei reira te Tamaiti a te taata nei e tuuhia ˈi [i nia i te pou haamauiuiraa].”

E au ra e, i te poipoi aˈe, i te mahana toru 12 no Nisana, ua faaea o Iesu e ta ˈna mau aposetolo ma te hau i te hoê vahi moemoe. I te mahana na mua ˈtu, ua faahapa tahaa ˈtu oia i te mau raatira haapaoraa, e ua ite oia e te imi ra ratou i te ravea no te taparahi ia ˈna. No reira, i te mahana toru, aita o ˈna i tia ˈtu i mua i te taata, no te mea aita o ˈna e hinaaro ra ia haafifihia ta ˈna faatupuraa i te oroa Pasa e ta ˈna mau aposetolo i te arui i muri aˈe.

I te reira atoa taime, ua haaputuputu te mau tahuˈa rarahi e te feia paari o te nunaa i roto i te aua o te tahuˈa rahi ra o Kaiapha. E riri rahi to ratou i te mau faahaparaa a Iesu i te mahana na mua ˈtu, e te faaineine ra ratou i te tahi opuaraa no te haru ia ˈna na roto i te hoê ravea haavarevare e no te taparahi haapohe ia ˈna. Te parau noa nei râ ratou e: “Eiaha i te oroa nei, o te nane noa hoi te taata.” Te mǎtaˈu nei ratou i te nunaa, no te mea e mea farii-maitai-hia o Iesu e ratou.

A faaineine ai te mau raatira haapaoraa i te tahi opuaraa ino no te haapohe ia Iesu, ua haere maira te hoê manihini. Ua maere roa ratou i te iteraa ˈtu i te hoê o te mau aposetolo iho a Iesu, o Iuda Isakariota, te taata ta Satani i maiti no te tuu atu i te manaˈo ra e hoo i to ˈna Fatu i roto ia ˈna! E oaoa rahi to ratou a ani mai ai o Iuda e: “Eaha ta outou e horoa mai na ˈu, e na ˈu oia e tuu atu ia outou?” Ua oaoa roa ratou i te parauraa ˈtu e e aufau atu ratou e 30 moni ario na ˈna, te moni e aufauhia no te hoê tavini ia au i te faufaa a te Ture a Mose. Mai reira mai, ua imi aˈera o Iuda i te taime e tano maitai no te tuu atu ia Iesu ia ratou ra i te hoê vahi taata ore.

E haamata te 13 no Nisana i te mahana toru i te taperaa mahana. Ua tae mai o Iesu na Ieriko mai i te mahana pae, o te onoraa ïa e te arui hopea ta ˈna e faaea i Betania. I te poipoi aˈe, oia hoi i te mahana maha, e tia ïa ia ravehia te mau faaineineraa hopea no te oroa Pasa, o te haamata i te taperaa mahana. I reira te arenio o te Pasa e taparahihia ˈi e e eˈû-taatoa-hia ˈi. Ihea roa ratou e faatupu ai i te oroa amuraa maa, e na vai e faaineine i te reira?

Aitâ o Iesu i faataa ˈtura i teie mau faanahoraa, ia ore paha o Iuda ia faaara ˈtu i te mau tahuˈa rarahi e ia haere mai ratou e haru ia Iesu i te taime o te oroa Pasa. I teie nei râ, peneiaˈe paha i te omuaraa o te avatea o te mahana maha, ua tono atura o Iesu ia Petero raua o Ioane mai Betania mai, i te na ôraa ˈtu: “A haere, a faanahonaho i te pasa ia amu tatou.”

“Eihea mâua faanahonaho ai?” ta raua ïa i ani atu.

Ua parau atura Iesu: “Ua ô anaˈe orua i roto i te oire, e farerei mai ai te hoê taata ia orua ma te farii pape i te hopoiraa, e pee atu orua ia ˈna e i roto i te fare ta ˈna e tomo ra, a parau atu ai orua i te taata utuafare ra, Te ui maira te Orometua ia oe, Teihea to te manihini piha ia amu vau i te pasa e tau mau pǐpǐ atoa? E na ˈna e faaite mai ia orua i te hoê piha rahi atuatu tei nia; ei reira faanahonaho ai.”

Eita e ore e teie fatu fare, o te hoê ïa pǐpǐ a Iesu, o te tiai ra paha ia ani mai Iesu i to ˈna fare no te faatupu i teie oroa taa ê ra. Area ra, ia tae atu o Petero raua o Ioane i Ierusalema, ua ineine pauroa te mau ohipa mai ta Iesu i faaite mai. No reira, ua ara raua ia ineine te arenio e ia ravehia te mau faanahoraa atoa no te farii i na feia e 13 o te faatupu i te oroa Pasa, oia hoi o Iesu e ta ˈna na aposetolo e 12. Mataio 26:1-5, 14-19; Mareko 14:1, 2, 10-16; Luka 22:1-13; Exodo 21:32.

▪ Eaha ta Iesu i rave i te mahana toru, e no te aha?

▪ Eaha te putuputuraa i tupu i te fare o te tahuˈa rahi, e eaha te tumu o Iuda i haere ai e farerei i te mau raatira haapaoraa?

▪ O vai ta Iesu i tono atu i Ierusalema i te mahana maha, e eaha te tumu?

▪ Eaha ta te feia i tonohia i ite o tei haapapu faahou mai i te mana semeio a Iesu?