Pene 31

Ua huhutihia te sitona i te mahana Sabati

FATATA roa Iesu e ta ˈna mau pǐpǐ i te faarue mai ia Ierusalema no te hoˈi atu i Galilea. Tei te tau uaaraa tiare tatou, e i roto i te mau faaapu sitona, ua paari te sitona. Ua poia roa te mau pǐpǐ. No reira, ua huhuti aˈera ratou i te tahi maa sitona e ua amu atura. I te mea râ hoi e e mahana Sabati teie, eita ta ratou ohipa e ore e itehia mai.

I Ierusalema, ua imi na te mau upoo faatere haapaoraa i te taparahi ia Iesu ma te parau e aita oia i haapao i te mahana Sabati. Teie atura ïa ta te mau Pharisea pariraa ia Iesu: “Inaha! te rave nei ta oe mau pǐpǐ i te mea au ore i te ture ia rave i te sabati.”

Te parau nei hoi te mau Pharisea e ia ofati te hoê taata i te sitona, a uiui atu ai i roto i to ˈna rima no te amu, te ooti ra ïa oia e te tupai ra i te huero. Ua faariro mau â ta ratou huru faataaraa i te ohipa i te mahana Sabati ei hopoia teimaha mau, inaha e taime oaoa hoi te reira, o te faaitoito i te pae varua. No reira ˈtura o Iesu i rave ai i te mau hiˈoraa no roto mai i te mau Papai no te faaite e e ere roa ˈtu te opuaraa a te Atua ra o Iehova i teie faaohiparaa etaeta mau o Ta ˈna ture no nia i te sabati.

Ua parau aˈera o Iesu e, a poia ˈi o Davida e to ˈna mau taata, ua tapea aˈera ratou i te sekene e ua amu ihora i te pane e faaitehia ra. Ua iritihia mai teie mau pane mai mua ˈtu i te aro o Iehova e ua monohia mai i te pane apî, e ua faahereherehia hoi te reira na te mau tahuˈa. No reira, i roto i taua huru tupuraa nei, aita o Davida e to ˈna mau taata i faautuahia i te mea e ua amu ratou.

Ua horoa maira o Iesu i teie faahiˈoraa: “Aitâ outou i ite i roto i te ture e te faahapa nei te feia tahuˈa i te sabati i roto i te hiero, e aore i hara?” Oia mau, i te mahana Sabati atoa, e tamau na te mau tahuˈa i te taparahi i te animala e i te rave i te tahi atu ohipa i te hiero no te faaineine i te mau tusia animala! Te na ô nei râ o Iesu e: “E faaite papu atu râ vau ia outou, Tei ǒ nei te hoê, e rahi ïa oia i te hiero.”

Ma te aˈo atu i te mau Pharisea, ua na ô atura o Iesu e: “Ahiri outou i ite na i te auraa i teie nei maa parau, O te aroha ta ˈu i hinaaro eiaha te tusia, e ore ïa outou e faahapa mai i te feia hara ore.” E ua faaoti aˈera oia e: “O te Tamaiti a te taata nei hoi te Fatu o te sabati.” Eaha hoi ta Iesu e hinaaro ra e parau? Te faaau maira o Iesu i te parau no te faatereraa hoê tausani matahiti o ta ˈna Basileia no te hau ra.

E 6 000 matahiti i teie nei to te huitaata nei mauiui-noa-raa i raro aˈe i te faatîtîraa teimaha mau a te Diabolo ra o Satani, i raro aˈe i te haavîraa puai e te tamaˈi tei riro ei tuhaa no te oraraa i te mau mahana atoa. Taa ê atu, e faaore te Sabati rahi o te faatereraa a te Mesia i te mau mauiui e te mau haavîraa atoa. Mataio 12:1-8; Levitiko 24:5-9; Samuela 1, 21:1-6; Numera 28:9; Hosea 6:6.

▪ Eaha te pariraa i parihia i te mau pǐpǐ a Iesu, e mea nafea to Iesu pahonoraa ˈtu?

▪ Eaha te hape a te mau Pharisea ta Iesu i faaite mai?

▪ Ua riro Iesu ei “Fatu no te sabati” i roto i teihea auraa?