Pene 34

Ua maiti oia i ta ˈna mau aposetolo

UA MATAHITI e te afa ˈtura to Ioane Bapetizo faaiteraa mai ia Iesu mai te Arenio a te Atua e to Iesu haamataraa i ta ˈna taviniraa i te vahi taata. Mai reira mai, ua riro maira o Anederea, o Simona Petero, o Ioane, e peneiaˈe atoa paha o Iakobo (te taeae o Ioane), e oia atoa o Philipa e o Nataniela (tei pii-atoa-hia o Baretolomea), ei mau pǐpǐ matamua na ˈna. I muri aˈe, e rave rahi tei apiti mai ia ratou no te pee atu i te Mesia.

I teie nei, ua ineine o Iesu no te maiti i ta ˈna mau aposetolo. E riro ratou ei mau hoa rave ohipa piri roa o te faaineine-taa-ê-hia. Hou râ oia e maiti ai ia ratou, ua haere atura o Iesu i nia i te mouˈa e ua pure ihora i te po taatoa, eita e ore e no te ani i te paari e te farii maitai o te Atua. I te poipoi aˈe, ua titau aˈera oia i ta ˈna mau pǐpǐ e maiti ihora e 12. Teie râ, i te mea e e feia haapii noâ ratou na Iesu, e tamau noâ ratou i te parauhia e e pǐpǐ.

E ono pǐpǐ ta Iesu i maiti, tei faahitihia to ratou iˈoa i nia ˈtu, o te feia ïa o tei riro ei mau pǐpǐ matamua na ˈna. Ua rave atoa oia ia Mataio, ta ˈna i haere e tii i ta ˈna piha ohipa haapao tute. Na taata e pae ê atu o ta ˈna i maiti o Iuda ïa (tei piihia o Tadaio), o Iuda Isakariota, o Simona Kanaana, o Toma e o Iakobo, te tamaiti a Alephaia. E pii-atoa-hia taua Iakobo nei, o Iakobo iti, peneiaˈe paha no te mea mea nainai aˈe oia aore ra mea apî aˈe oia i te tahi atu aposetolo Iakobo.

Mea maoro i teie nei to teie na taata e 12 apeeraa ˈtu ia Iesu, e ua matau maitai oia ia ratou. Inaha, e mau fetii vetahi pae no Iesu. Eita paha e ore e mau taetaeae fetii o Iakobo e to ˈna taeae o Ioane no Iesu. Mea papu e e taeae o Alephaia no Iosepha, te metua tane faaamu o Iesu. No reira, e tuaane fetii atoa ïa te aposetolo Iakobo, te tamaiti a Alephaia, no Iesu.

Mea ohie iho â ïa na Iesu ia haamanaˈo i te iˈoa o ta ˈna mau aposetolo. E o outou, te haamanaˈo ra anei outou i taua mau iˈoa nei? A haamanaˈo noa na e e piti Simona, e piti Iakobo e e piti Iuda, e taeae to Simona o Anederea te iˈoa, e e taeae atoa to Iakobo o Ioane te iˈoa. Tera ïa te hoê ravea no te haamanaˈo i te iˈoa o e vau mau aposetolo. I roto i na aposetolo e maha e toe ra, te vai te hoê telona (o Mataio), te hoê aposetolo tei ore i tiaturi a muri aˈe (o Toma), te tahi atu tei parahi na i raro aˈe i te hoê tumu raau i to Iesu piiraa ˈtu ia ˈna (o Nataniela) e to ˈna hoa, o Philipa.

Hoê ahuru ma hoê mau aposetolo, no Galilea mai ïa ratou, te fenua tumu o Iesu. No Kana mai o Nataniela. No Betesaida mai o Philipa, o Petero e o Anederea, ua haere aturâ o Petero raua o Anederea i Kaperenaumi i muri iho, i reira atoa hoi o Mataio e ora ˈi. E feia taiˈa o Iakobo raua o Ioane e e ora atoa na raua i Kaperenaumi aore ra i te tahi vahi fatata mai. O Iuda Isakariota anaˈe, tei hoo ia Iesu i muri aˈe, te aposetolo no Iudea mai. Mareko 3:13-19; Luka 6:12-16.

▪ O vai ma te mau aposetolo tei riro paha ei fetii no Iesu?

▪ O vai ma te mau aposetolo a Iesu, e nafea tatou ia haamanaˈo i to ratou iˈoa?

▪ Nohea mai te mau aposetolo?