Ua paari au i Warialda, te hoê oire iti no Nouvelle-Galles du Sud. I Warialda, e vahi teie e faaamuhia ˈi te mamoe e te puaatoro e e faaapuhia ˈi te mau maa tupu. Mea maitai te oraraa e mea iti te ohipa ino i reira.

O vau te matahiapo o na 10 tamarii. I te 13raa o to ˈu matahiti, ua haamata vau i te rave i te ohipa no te aupuru i te utuafare. No te mea aita vau i maoro i te haereraa i te haapiiraa, ua ohipa vau i roto i fare faaamuraa animara. I te 15raa o to ˈu matahiti, e taata haapao puaahorofenua vau.

Ia ohipa anaˈe au i roto i te fare faaamuraa animara, te tahi taime mea au, te tahi taime aita. I te tahi pae, mea au roa na ˈu ta ˈu ohipa e te vahi o ta ˈu ohipa. I te po, e parahi vau i pihaiiho i te hoê auahi no te hiˈo i te avaˈe e te fetia a hauˈa noa ˈi i te noˈanoˈa e vai ra i roto i te natura o tera vahi. Te haamanaˈo ra vau i to ˈu manaˈoraa e te vai ra hoê tei poiete pauroa teie mau mea faahiahia. I te tahi râ pae, ua ohipa atoa te haerea tano ore o vetahi i nia ia ˈu. E pinepine vau i te faaroo i te parau ino, e mea ohie ia noaa mai te avaava. Ua riro oioi te puhipuhiraa i te avaava e te parau ino ei peu matauhia i roto i to ˈu oraraa.

I te 18raa o to ˈu matahiti, ua haere au i Sydney. Ua tamata vau i te faaô i roto i te nuu faehau, aita râ vau i fariihia no te mea aita vau i maoro i te haereraa i te haapiiraa. Ua itehia mai ia ˈu te hoê ohipa e ua faaea vau 1 matahiti i Sydney. I tera atoa tau vau i te farereiraa no te taime matamua i te mau Ite no Iehova. Ua farii vau i te hoê titau-manihini-raa no te apiti hoê o ta ratou putuputuraa e ua taa oioi ia ˈu e mea mau ta ratou e haapii ra.

Tau taime râ i muri iho, ua faaoti au e hoˈi i to ˈu fenua. Ua faaea vau i Goondiwidi, i Queensland. Ua itehia mai ia ˈu te hoê ohipa, e ua faaipoipo vau, tera râ, ua haamata atoa vau i te inu i te ava.

E piti tamarii ta mâua. I muri aˈe i te fanauraa mai ta ˈu nau tamaiti, ua haamata vau i te feruri papu i to ˈu oraraa. Ua haamanaˈo vau i ta ˈu i faaroo i te putuputuraa a te mau Ite no Iehova i Sydney e ua faaoti vau i te faaohipa i ta ˈu i faaroo.

Ua itehia mai ia ˈu te hoê vea tahito Te Pare Tiairaa, i roto e itehia ˈi te vahi nohoraa o te amaa a te mau Ite no Iehova i Auteralia. Ua hapono vau i te hoê rata no te ani i te tauturu. Ua haere mai ïa te hoê Ite hamani maitai e te here e farerei ia ˈu. Aita i maoro, ua haapii o ˈna ia ˈu i te Bibilia.

I to ˈu haapiiraa i te Bibilia, ua taa ia ˈu e mea titauhia ia ˈu ia rave i te mau tauiraa rahi i roto i to ˈu oraraa. Te hoê irava Bibilia o tei haaferuri ia ˈu, o te Korinetia 2, 7:1. Te faaitoito ra teie irava ia “tamâ . . . ia tatou iho i te mau viivii atoa o te tino.”

Ua faaoti au e faaea i te puhipuhi i te avaava e i te inu i te ava. E ere i te mea ohie ia rave i teie mau tauiraa, no te mea ua riro te reira ei peu matau i roto i to ˈu oraraa. Ua faaoti râ vau e ora no te faaoaoa i te Atua. Teie tautururaa rahi, o te faaohiparaa ïa i te mau faaueraa tumu i roto i te Roma 12:2: “Eiaha atoa outou ia faaau faahou i to outou haerea i to teie nei ao, ia taui râ outou a faaapî ai i to outou feruriraa.” E no te taui i ta ˈu mau peu, ua taa ia ˈu e mea titauhia ia taui i to ˈu huru feruriraa e ia hiˈo i ta ˈu mau peu mai Atua, oia hoi ei mea ino. Maoti ta ˈna tauturu, ua nehenehe au e faaea i te puhipuhi i te avaava e i te inu i te ava.

Te mea fifi roa ˈtu â, o te faaearaa ïa i te parau ino. Ua ite au i te aˈoraa Bibilia e itehia i roto i te Ephesia 4:29: “Eiaha ei parau hairiiri no roto mai i to outou vaha.” Aita râ i manuïa ia ˈu ia faaea i te parau ino. Ua tauturu maira te feruri-maite-raa i te mau parau o te Isaia 40:26. No nia i te mau fetia, te na ô ra teie irava: “A fariu i to outou mata i te raˈi e a hiˈo. Na vai i poiete i teie mau mea? Na Tei aratai ra ia ratou mai te hoê nuu. E pii oia ia ratou pauroa i to ratou iˈoa. No to ˈna mana rahi mau e to ˈna puai faahiahia, aita hoê o ratou i moˈe.” Ua feruri au, mai te peu e mana to te Atua e poiete i te ao nui, o ta ˈu e au roa e mataitai, e nehenehe ïa ta ˈna e horoa mai i te puai no te rave i te mau tauiraa no te faaoaoa ia ˈna. Maoti e rave rahi pure e te mau tutavaraa, ua vî mǎrû noa ta ˈu huru paraparau.

I te tau a ohipa ˈi au i roto i fare faaamuraa animara, aita i rahi te taata no te paraparau atu, no te mea aita vau e farerei nei i te taata. Maoti râ te faaineineraa i haapiihia i te mau putuputuraa a te mau Ite no Iehova, ua haapii au e nafea ia paraparau maitai. Ua tauturu mai ïa teie faaineineraa ia ˈu ia paraparau ia vetahi no nia i te parau apî oaoa o te faatereraa arii a te Atua.—Mataio 6:9, 10; 24:14.

E rave rahi matahiti i teie nei, ua oaoa vau i te tavini ei matahiapo i roto i te amuiraa. E fanaˈoraa taa ê no ˈu ia tauturu i to ˈu mau taeae e tuahine.

Te haamauruuru nei au ia Iehova, te vaiihoraa ia ˈu, ei taata aita i maoro i te haereraa i te haapiiraa, ia haapiihia e ana. (Isaia 54:13) No ˈu, ua tano roa te mau parau o te Maseli 10:22: “I te haamaitairaa a Iehova e taoˈahia ˈi te tahi taata.”