Ua taui te Bibilia i to ˈu oraraa
Ua taui te Bibilia i to ˈu oraraa
Eaha ta te hoê taata no Écosse i faahiahia hau atu i ta ˈna ohipa tei manuïa maitai? Eaha tei tauturu i te hoê taata no Beresilia ia haapae i te hoê oraraa tia ore e ia faaea i te puhipuhi i te raau taero? Mea nafea te hoê taata no Slovénie i te haapaeraa i te inu-hua-raa i te ava? A taio i ta ratou i faatia.
“E au ra e oraraa oaoa to ˈu.”—JOHN RICKETTS
MATAHITI FANAURAA: 1958
FENUA: ÉCOSSE
AAMU: TAATA TEI MANUÏA I ROTO I TE OHIPA
NA MUA ˈˈE: E oraraa oaoa to ˈu i to ˈu tamariiriiraa. E raatira to ˈu papa i roto i te nuu Beretane, no reira ua taui pinepine matou i te vahi. Hau atu ia Écosse, ua faaea matou i Beretane, Heremani, Kenya, Malaisie, Irelane e Kupero. I te vaˈuraa o to ˈu matahiti, ua haere au i te fare haapiiraa e nohoraa to reira i Écosse. Ua noaa mai ta ˈu parau tuite i te fare haapiiraa teitei no Cambridge.
I te 20raa o to ˈu matahiti, ua ohipa vau i roto i te hoê taiete mori arahu e vaˈu matahiti. I te haamataraa, ua rave au i teie ohipa i Marite apatoa, i muri iho i Afirika e i te pae hopea i Auteralia. I muri iho i to ˈu haereraa i Auteralia, ua haamau vau i ta ˈu taiete o ta ˈu hoo atu i muri aˈe.
Maoti tera moni ta ˈu i noaa mai, ua nehenehe au e rave i ta ˈu faatuhaaraa i te 40raa o to ˈu matahiti. Ua nehenehe ïa vau e revareva. E piti taime to ˈu haaatiraa ia Auteralia na nia i to ˈu faurao e piti huira e ua ratere au na te mau fenua atoa. E au ra e oraraa oaoa to ˈu.
UA TAUI TE BIBILIA I TO ˈU ORARAA: Na mua ˈˈe ra vau a faatuhaahia ˈi, ua hinaaro vau e imi i te tahi ravea no te haamauruuru i te Atua no to ˈu oraraa fanaˈo. Ua haamata vau i te apiti i te haapaoraa Ekalesia Beretane, i apiti na vau i to ˈu nainairaa. Aita râ tera haapaoraa e horoa mai i te mau faaueraa no roto i te Bibilia. I muri iho, ua haapii au na muri i te mau Momoni, aita râ vau i anaanatae noa ˈˈe, no te mea aita to ratou e tiaturiraa no nia i te Bibilia.
I te hoê mahana, ua patoto mai te mau Ite no Iehova i to ˈu opani. E ua ite oioi au e ua niu noa ratou i ta ratou mau haapiiraa i nia i te Bibilia. Te irava ta ratou i faaite mai o te Timoteo 1, 2:3, 4. Te parau ra teie nau irava e te hinaaro ra te Atua “ia ora mai te mau huru taata atoa e ia noaa ia ratou te ite papu i te parau mau.” Ua maere roa vau, aita noa te mau Ite no Iehova i haafaufaa i te ite, ua haafaufaa atoa râ ratou i te ite papu o te Bibilia.
Ua tauturu mai te haapiiraa i te Bibilia e te mau Ite no Iehova ia ˈu ia noaa mai i te ite papu. Ei hiˈoraa, ua haapii au e ere te Atua e Iesu i te hoê tuhaa o te toru tahi. Mea taa ê râ te Atua ia Iesu. (Ioane 14:28; Korinetia 1, 11:3) Ua oaoa roa vau i te haapii i teie parau mau. Ua riri atoa râ vau i te haamâuˈaraa i to ˈu taime i te tamataraa i te taa i te hoê haapiiraa hape!
Ua haamata oioi au i te apiti i te mau putuputuraa a te mau Ite no Iehova. Ua maere roa vau i te farii maitai e te ture aveia teitei e itehia ra i reira. E au ra e feia mǎtaˈu i te Atua ratou. Ua haapapu to ratou here ia ˈu e ua itehia ia ˈu te haapaoraa mau.—Ioane 13:35.
TO ˈU FAUFAARAAHIA: I muri aˈe i to ˈu bapetizoraahia, ua haamatau vau i te hoê vahine o Diane te iˈoa. E Ite no Iehova o ˈna, e rave rahi huru maitatai to ˈna o ta ˈu i au roa. I muri iho, ua faaipoipo mâua. Ua riro te auhoaraa e te turu a Diane ei haamaitairaa mau no ǒ mai ia Iehova ra.
E hinaaro rahi to mâua Diane e haere i te vahi e hinaaro-rahi-hia te feia poro no te parau apî oaoa. I 2010, ua haere mâua i Bélize, i Marite i ropu. I ǒ nei, ua poro mâua i te taata o te here ra i te Atua e o te hinaaro ra e haapii atu â no nia ia ˈna.
Ua hopoi mai te reira i te hau o te feruriraa i te iteraa i te parau mau no nia i te Atua e ta ˈna Parau te Bibilia. Ei tavini taime taatoa, ua oaoa roa vau i te haapii i te Bibilia i te taata e rave rahi. Mea oaoa roa ia ite i te parau mau Bibilia ia haamaitai i te oraraa o te hoê taata, mai ia ˈu. No reira, ua itehia mai ia ˈu i te hoê ravea maitai no te haamauruuru i te Atua no to ˈu oraraa fanaˈo.
“Ua hamani maitai ratou ia ˈu.”—MAURÍCIO ARAÚJO
MATAHITI FANAURAA: 1967
FENUA: BERESILIA
AAMU: E ORARAA TIA ORE TO ˈU
NA MUA ˈˈE: Ua paari au i Avaré, te hoê oire iti no São Paulo. Te feia e ora ra i reira, e feia riirii anaˈe.
I muri aˈe i te poheraa to ˈu papa, ua hapû to ˈu mama ia ˈu. A paari mai ai au, ua oomo vau i te mau ahu a to ˈu mama ia haere o ˈna e ori haere. Ua haamata vau i te faaite i te haerea mai to te vahine e ua haamata te taata i te faariro ia ˈu ei mahu. I muri iho, ua haamata vau i te taoto i te mau tamaroa e tane.
I te paariraa mai au, e pinepine vau i te imi i te mau apiti (tane e vahine) i te mau vahi atoa e ite ai au ia ratou, mai te mau fare arearearaa e oia atoa i te mau fare pure. I te oroa taravanaraa, e oomo vau i te ahu o te vahine, e e porote au e te pǔpǔ ori samba. E taata matau-roa-hia vau.
I rotopu i to ˈu mau hoa, te vai ra te mau mahu, te feia taiata e te feia rave i te raau taero. Ua turai vetahi ia ˈu ia tamata i te raau taero e ua riro vau ei tîtî no te reira. I te tahi taime, e puhipuhi matau i tera po taatoa. E i te tahi atu taime, e haamoˈe vau ia ˈu e e puhipuhi au i te raau taero i tera mahana taatoa. No te mea ua pararai roa vau, ua parau te taata e maˈi heˈa mate to ˈu.
UA TAUI TE BIBILIA I TO ˈU ORARAA: I tera taime, ua farerei au i te mau Ite no Iehova. Ua hamani maitai ratou ia ˈu. Hoê o te mau irava Bibilia ta ratou i taio mai, o te Roma 10:13, o te parau ra: “E faaorahia te taata atoa o te tiaoro i te iˈoa o Iehova.” Ua haaferuri teie mau parau ia ˈu i te faufaaraa ia faaohipa i to Iehova iˈoa. E rave rahi taime i muri iho i te puhipuhiraa i te raau taero i tera po taatoa, e tatara vau i te haamaramarama, e hiˈo vau i te raˈi e pure au ia Iehova ma te taˈi a taparuparu ai ia ˈna ia tauturu mai ia ˈu.
Ua peapea roa vau i te hepohepo rahi o to ˈu mama, tei ite ia ˈu te ino noa ˈtu ra i te raau taero. Ua faaea ïa vau i te rave i te reira. I muri noa ˈˈe, ua farii au i te hoê haapiiraa Bibilia. Ua haapapu mai ratou e haapuai te haapiiraa i ta ˈu faaotiraa e faaea i te raau taero, e ua manuïa te reira!
A tamau noa ˈi au i te haapii i te Bibilia, ua taa ia ˈu e mea titauhia ia ˈu ia taui i to ˈu huru oraraa. Mea fifi iho â ra no ˈu ia faarue i te peu mahu, ua matau noa vau i tera huru oraraa. Te tahi mea tei tauturu ia ˈu, o te haapaeraa ïa i te mau tamataraa ino i roto i to ˈu oraraa. Ua faaea ïa vau i te amuimui i to ˈu mau hoa e ua faaea vau i te haere i roto i te mau fare inuinuraa e te mau fare arearearaa.
Noa ˈtu e ere i te mea ohie ia rave i teie mau tauiraa, ua tamahanahanahia vau i to ˈu haapiiraa e te tâuˈa mai ra Iehova ia ˈu e te taa ra ia ˈna i to ˈu mau fifi. (Ioane 1, 3:19, 20) I 2002, ua faaea roa vau i te peu mahu, e i tera matahiti, ua bapetizohia vau ei Ite no Iehova.
TO ˈU FAUFAARAAHIA: Ua maere roa to ˈu mama i te mau tauiraa ta ˈu i rave i haamata atoa ˈi oia i te haapii i te Bibilia. Te vahi peapea râ, e maˈi i roto i te roro to ˈna. Noa ˈtu te reira, ua tamau noa oia i te faatupu i te here ia Iehova e i te haafaufaa i te parau mau Bibilia.
A vaˈu matahiti i teie nei, tei roto vau i te taviniraa taime taatoa, ua rahi aˈe to ˈu taime i te haapii i te Bibilia ia vetahi ê. Parau mau, i te tahi mau taime, e titauhia ia ˈu ia aro i to ˈu mau hinaaro tano ore. Tera râ, ua itoitohia vau i te iteraa e e faaoaoa vau ia Iehova ma te maitiraa eiaha e rave i teie mau peu.
Ma te faafatata ˈtu ia Iehova, e ma te faaoaoa ia ˈna, ua rahi aˈe to ˈu faatura ia ˈu iho. I teie mahana, ua oaoa roa vau.
“Mai te hoê paero puta ra vau.”—LUKA ŠUC
MATAHITI FANAURAA: 1975
FENUA: SLOVÉNIE
AAMU: E TAATA INU AVA VAU
NA MUA ˈˈE: ua fanauhia vau i Ljubljana, te oire pu o Slovénie. Ei tamarii, e oraraa oaoa to ˈu tae roa i te maharaa o to ˈu matahiti. Tera râ, ua haapohe to ˈu papa ia ˈna. I muri aˈe i teie tupuraa peapea mau, ua ohipa noa to ˈu mama no te faaamu ia mâua, to ˈu taeae e o vau.
I te 15raa o to ˈu matahiti, ua ora vau i pihaiiho i to ˈu mama ruau. Ua oaoa roa vau i te ora i ǒ ˈna, no te mea e rave rahi hoa to ˈu e ora ra i roto i to ˈu tuhaa oire. E rave atoa vau mai ta ˈu i hinaaro e ere ra hoê â huru a ora ˈi au i te fare. I te 16raa o to ˈu matahiti, ua haamata vau i te amuimui i te feia o tei inu i te mau hebedoma atoa. Ua haamata vau i te faaroroa i to ˈu rouru, i te oomo i te mau ahu e faaite ra i te hoê haerea orure hau e i muri iho, ua haamata vau i te puhipuhi i te avaava.
Noa ˈtu ua tamata vau e rave rahi raau taero, aita roa ˈtu vau i faaea i te inu e mea au roa na ˈu te reira. I te omuaraa, e piti noa hapaina uaina, i muri aˈe ra, e mohina ïa. Ua aravihi roa vau i te huna i to ˈu taero. E pinepine na te hauˈa uaina noa e faaite e ua inu vau. I tera atoa taime, aita te taata i ite ehia litera uaina aore ra pia anoihia e te vodka ta ˈu i inu!
E rave rahi taime, ua tauturu vau i to ˈu mau hoa i te hoê po i te vahi oriraa, noa ˈtu ua rahi aˈe ta ˈu i inu i ta ratou. I te hoê mahana, ua faaroo vau i te hoê hoa i te parauraa, mai te hoê paero puta ra vau, e parau faaooo teie i Slovénie no te feia o tei inu rahi aˈe i te tahi atu. Ua inoino roa vau i teie mau parau.
Ua haamata vau i te feruri no nia i ta ˈu i rave i roto i to ˈu oraraa. E manaˈo haafaufaa ore to ˈu. No ˈu, aita hoê auraa to to ˈu oraraa.
UA TAUI TE BIBILIA I TO ˈU ORARAA: I tera tau, ua tapao vau i te tauiraa hoê o to ˈu hoa haapiiraa, ua mǎrû mai o ˈna. Ua maere roa vau i tera tauiraa i nia ia ˈna. Ua titau manihini vau ia ˈna no te inu i te taofe. I te roaraa o ta maua aparauraa, ua faataa mai oia e ua haamata oia i te haapii i te Bibilia na muri i te mau Ite no Iehova. Ua faaite mai oia i te tahi mau mea ta ˈna i haapii, e mea apî te reira no ˈu. Aita hoi au i haapiihia no nia i te haapaoraa. Ua haamata vau i te apiti i te mau putuputuraa a te mau Ite no Iehova e ua haapii au i te Bibilia na muri ia ratou.
Ua haamaramarama mai te Bibilia ia ˈu no nia i te puai o te parau mau Bibilia o tei turai ia ˈu ia haa. Ei hiˈoraa, ua haapii au e te ora nei tatou mai ta te Bibilia e parau ra “i te mau mahana hopea.” (Timoteo 2, 3:1-5) Ua haapii atoa vau e fatata te Atua i te faaore i te feia ino i nia i te feia e i te horoa i te ora mure ore no te feia maitai i roto i te paradaiso. (Salamo 37:29) E titauhia ia ˈu ia rave i te mau tauiraa rahi i roto i to ˈu oraraa ia nehenehe au e fanaˈo i ta Iehova i fafau.
Ua haamata vau i te paraparau i to ˈu mau hoa no nia i te parau mau Bibilia o ta ˈu i haapii. E rave rahi o tei faaooo ia ˈu no ta ˈu i faaite ia ratou, tera râ, ua tauturu to ratou huru ia ite e ere ratou i te mau hoa mau. Ua taa ia ˈu e no ta ˈu mau amuimuiraa iino i topa ˈi au i roto i te ohipa inu. Pauroa te hebedoma, e tiai ratou i te hopea hebedoma no te haere faahou e inu.
Ua faaea roa vau i te amuimui e o ratou, e ua mono vau ia ratou ma te amuimui e te mau Ite no Iehova. Ua faaitoito rahi mau ratou ia ˈu. E mau taata teie o tei here mau ra ia Iehova e o te tamata ra i te ora ia au i ta ˈna mau ture aveia. Ua haapae mǎrû noa vau i te inu-hua-raa i te ava.
TO ˈU FAUFAARAAHIA: Te haamauruuru nei au ia Iehova no te mea aita e faufaa ia inu i te ava no te ite i te oaoa. Teihea ra ïa vau i teie mahana ahani te rave noa ra vau i tera mau peu. Ua papu râ ia ˈu e ua maitai mai to ˈu oraraa i teie nei.
I na hitu matahiti i mairi, ua tavini au i te amaa a te mau Ite no Iehova i Slovénie. E oraraa maitai to ˈu i to ˈu iteraa o vai Iehova e i te tavini ia ˈna.