E oaoa aˈe ratou i teie nei
UA FAAOTI tau mirioni Kerisetiano eiaha e faatupu i te oroa Noela. Eaha to ratou huru a rave ai i teie faaotiraa? E manaˈo anei ratou ua ere ratou i te tahi mea faufaa i roto i to ratou oraraa? E manaˈo anei ta ratou mau tamarii e ua ere ratou i te tahi mea? A tapao na i ta te mau Ite no Iehova na te ao nei e parau nei no nia i te reira.
Eve
Haamanaˈo ia Iesu Mesia: Ua na ǒ Eve no Auteralia: “Hou a riro ai au ei Ite no Iehova, aita vau i haere pinepine i te pureraa. Ua haere noa vau i te pureraa no te oroa Noela aore ra i te Pakate. Noa ˈtu e ua haere au i te pureraa no teie na oroa e piti, aita vau i manaˈo ia Iesu Mesia. I teie nei, aita vau e faatupu faahou i te oroa Noela, te haere nei râ vau i te mau putuputuraa Kerisetiano e piti taime i te hebedoma taitahi e te haapii atoa nei au ia vetahi ê i ta te Bibilia e parau mai ra no nia ia Iesu!”
Reuben
Te oaoa ia horoa: Teie ta Ruben no Irelane no apatoa i parau: “E rahi roa to ˈu oaoa ia horoa mai vetahi ê i te hoê taoˈa na ˈu. Mea au na ˈu ia fanaˈo i te mau taoˈa. Mea au atoa na ˈu ia faaineine i te mau tareta aore ra ia peni i te mau hohoˈa no vetahi ê. E oaoa roa vau no te mea te faaoaoa nei te reira ia ratou.”
Emily
Tauturu i te feia o te hinaaro nei i te tauturu: Teie ta Emily no Auteralia i faataa: “Oaoa matou i te tunu i te maa no te feia maˈi. I te tahi taime, e afai matou i te mau tiare, i te mau faraoa monamona aore ra te tahi taoˈa iti no te tamahanahana ia ratou. Mea au roa na matou ia na reira no te mea e nehenehe matou e haere e hiˈo i tera mau taata i te roaraa o te matahiti.”
Wendy
Te tahoêraa o te utuafare fetii: Teie ta Wendy no te mau motu Caïmans i parau: “Ia putuputu mai to matou utuafare fetii taatoa, e haamatau, ma te oaoa, ta matou mau tamarii i te mau taeae e tuahine o to ratou mau metua, oia atoa i ta ratou papa ruau e mama ruau e i te tahi atu mau taeae fetii. I te mea e aita matou e faatupu i teie mau oroa i te mau mahana faataahia, aita ïa matou e faahepohia ia putuputu mai e to matou mau fetii. Ua ite iho â ratou e ia haere matou e hiˈo ia ratou, e na reira matou no to matou here ia ratou.”
Sandra
Te hau: Teie ta Sandra no te fenua Paniora i faataa: “I te tau o te oroa Noela, mea rahi roa te ohipa te titauhia ra no te faaineine i tera oroa. Mea iti ïa te mau taata o te manaˈo nei e nafea ia faatupu i te hau. Ua haapii au i ta te Bibilia e fafau ra no te mau taata. No reira e vai hau noa vau. Ua taa ia ˈu e e fanaˈo ta ˈu mau tamarii i te hoê a muri aˈe oaoa.”