TE TAA ra ia oe i te huru aau o Linda o tei mauiui roa i te mau ohipa i ravehia e te hoê hoa Kerisetiano? Te vahi peapea râ, ua huru ê roa vetahi ê no te haerea o te tahi atu taata, i fifihia ˈi ta ratou porotarama pae varua. Hoê â anei to oe tupuraa?

Mea papu, e nehenehe tatou e manaˈo e e mea fifi roa ia faaore i te hapa a te hoê hoa Kerisetiano o tei haamauiui mai. Inaha, mea titauhia ia here te mau Kerisetiano te tahi i te tahi. (Ioane 13:34, 35) Mai te peu e ua faainohia tatou e te hoê hoa Kerisetiano, e nehenehe te toaruaru e te oto e haaparuparu roa ia tatou.—Salamo 55:12.

Parau mau, te faataa ra te Bibilia e te vai ra te mau taime e hapa ˈi te mau Kerisetiano te tahi i te tahi. (Kolosa 3:13) Oia mau, ia tupu te reira i nia ia tatou iho, e ite tatou e e ere i te ohipa nainai ia faaruru i te reira. Eaha ïa te nehenehe e tauturu ia tatou? E hiˈo anaˈe e toru aratairaa Bibilia:

Ua taa i to tatou Metua i te raˈi i te mau mea atoa. Te hiˈo mai ra Iehova i te mau mea atoa e tupu ra, oia hoi i te mau ohipa tia ore ta tatou e faaruru ra e te mauiui o ta te reira e faatupu. (Hebera 4:13) Hau atu â, te taa mai ra ia Iehova i to tatou mauiui. (Isaia 63:9) Eita roa oia e vaiiho i “te ati,” “te ahoaho” aore ra te tahi atu mea, oia atoa te tahi atu tavini ia “faataa ê ia tatou i te here o te Atua.” (Roma 8:35, 38, 39) Eita anei tatou e na reira atoa, ma te ore e vaiiho i te hoê noa ˈˈe mea aore ra taata e faataa ê ia tatou ia Iehova?

Te faaoreraa i te hapa, e ere ïa i te auraa e e fariihia ta te tahi taata i rave. Ia faaore tatou i ta vetahi ê hapa, eita tatou e haafaufaa ore ia ratou, e imi ra i te otoheraa aore ra eita tatou e farii i ta ratou i rave. A haamanaˈo, aita roa ˈtu Iehova e farii ra i te hara, e faaore râ oia i te hara mai te peu e te vai ra te hoê tumu e na reira ˈi oia. (Salamo 103:12, 13; Habakuka 1:13) Ia faaitoito oia ia tatou ia faaore i ta te tahi hapa, te ani mai ra Iehova ia pee i to ˈna hiˈoraa. Eita oia “e vaiiho mârô i to ˈna riri e a muri noa ˈtu.”—Salamo 103:9; Mataio 6:14.

Ia haapae tatou i te inoino, e faufaahia ïa tatou. E nafea? A feruri na i teie tupuraa. E rave oe i te hoê ofai, eiaha râ i te mea teiaha. E toro oe i to oe rima a tapea noa ˈi i te ofai. Mea fifi paha no oe ia na reira no te hoê taime. Eaha râ te tupu ia tamata oe i te tapea maoro i te ofai? Ehia hora e nehenehe ta oe e tapea, tau minuti? hoê hora? aore ra hau atu â? Mea papu, e rohirohi roa to oe rima! Parau mau, aita te teiaha mau o te ofai i taui. Ia maoro noa ˈtu â oe i te tapea i te ofai, rahi noa ˈtu â te reira i te teiaha. Hoê â huru no te inoino. Ia tapea noa  ˈtu â tatou i te inoino, noa ˈtu mea iti roa te reira, rahi noa ˈtu â to tatou mauiui. Mea papu, ua faaitoito Iehova ia tatou ia haapae i te inoino. Oia mau, ma te haapae i te reira, e maitai ïa tatou.—Maseli 11:17.

Eaha tei tauturu ia Linda ia ore e tapea i te inoino no ta te hoê hoa Kerisetiano i rave i nia ia ˈna? Ua feruri maite oia i nia i te mau tumu Bibilia no te faaore i ta vetahi ê hapa. (Salamo 130:3, 4) Ua itoitohia Linda i te taaraa e ia faaore tatou i ta vetahi ê hapa, e faaore atoa ïa Iehova i ta tatou hapa. (Ephesia 4:32–5:2) Te parau ra oia no nia i ta te reira i faatupu i nia ia ˈna: “No ˈu, e au ra e te paraparau roa mai ra Iehova ia ˈu.”

I muri iho, ua nehenehe ta Linda e haapae i te inoino. Ua faaore ohie oia i te hapa a teie tuahine. I teie mahana, e hoa rahi roa raua. Ua maitai faahou mai o Linda i roto i ta ˈna taviniraa ia Iehova. Ia papu maitai ia tatou e te hinaaro ra Iehova ia na reira atoa oe.