AROHA ihora oe i te taata e faaea ra i pihai iho noa mai i ǒ oe. I mataitai aˈenei oia ia oe e to oe utuafare. Aroha, tarape e na ô maira oia: “E uiraa ta ˈu. No te aha mea taa ê roa ˈi outou?” “Eaha ta oe e hinaaro ra e parau?” ta oe ïa e ui atu. Pahono maira oia: “E Ite no Iehova outou. E ere outou mai te tahi atu mau taata. Eita outou e amui i te tahi atu mau haapaoraa, eita e faatupu i te tahi mau oroa, eita e faaô i roto i te poritita e te tamaˈi. Aita e taata puhipuhi avaava i ǒ outou. Mea maitai roa atoa te haerea o to outou utuafare i te pae morare. Mea taa ê roa outou, e te hinaaro nei au e ite no te aha.”

Mea ohie roa te pahonoraa: Te auraro nei tatou i te Basileia o te Atua. Te tamâ noa nei te Arii ra o Iesu ia tatou. Te tauturu nei oia ia tatou ia pee i to ˈna mau taahiraa avae, a taa ê mai ai tatou i teie nei ao ino. I teie tuhaa, e ite mai tatou e nafea te Basileia faaterehia e te Mesia e tamâ ˈi i te nunaa o te Atua i te pae varua, te pae morare, e te pae faanahonahoraa, ia faahanahanahia Iehova.