1, 2. No te aha e ô faahiahia mau te Bibilia no ǒ mai i te Atua?

 EAHA to oe huru ia horoa ˈtu te tahi hoa i te hoê ô na oe? Eita e ore, e hinaaro oioi oe e hiˈo i te reira. Ma te oaoa, e haamauruuru oe ia ˈna i te manaˈoraa ia oe.

² E ô te Bibilia no ǒ mai i te Atua. Eita roa ta ˈna e faaite mai e itehia i roto i te tahi atu buka. I roto e faataahia ˈi ua poiete te Atua i te raˈi, te fenua e na taata matamua. E horoa mai te reira i te mau aratairaa no te ite eaha te rave ia tupu te fifi. E haapii atoa mai e nafea te Atua e faatupu ai i ta ˈna opuaraa e faariro i te fenua ei vahi oaoa mau. E ere anei te Bibilia i te ô faahiahia mau?

3. Eaha ta oe e ite na roto i te haapiiraa Bibilia?

³ E ite oe na roto i te haapiiraa Bibilia, te hinaaro ra te Atua ia riro oe ei hoa no ˈna. Rahi atu â oe i te haapii no nia ia ˈna, rahi atu â oe i te piri i te Atua.

4. Eaha ta oe faahiahia no nia i te Bibilia?

⁴ Ehia miria Bibilia tei neneihia e ua hurihia te reira na roto hau atu 2 800 reo. E rave rahi miria taata na te ao o te nehenehe e taio i te Bibilia na roto i to ratou reo tumu. Hau atu i te hoê mirioni Bibilia te operehia i te mau hebedoma atoa! E buka taa ê roa te Bibilia, e ere anei?

5. No te aha e Parau na te Atua te Bibilia?

⁵ E Parau na te Atua te Bibilia. (A taio i te Timoteo 2,  3:16.) E na ô paha vetahi, ‘Na te taata i papai i te Bibilia, no te aha ïa e parau ai e buka no ǒ mai i te Atua?’ Te pahono ra te Petero 2, 1:21: “Ua faahiti râ te taata i te mau parau no ǒ mai i te Atua a arataihia ˈi ratou e te varua moˈa.” A feruri na i te tahi faatere taiete o te ani i ta ˈna papai parau ia hamani i te hoê rata. Na vai te rata? Na te faatere taiete, e ere na te papai parau! Hoê â atoa no te Atua, na ˈna te Bibilia, e ere na te feia papai ta ˈna i faaohipa. Ua aratai te Atua ia ratou ia papai i to ˈna mau manaˈo. E Parau râ na te Atua te Bibilia.—Tesalonia 1, 2:13; a hiˈo i te faataaraa hau 2 i te pae hopea o te buka.

6, 7. No te aha e parau ai mea au maite te taatoaraa o te Bibilia?

⁶ Ua papaihia te Bibilia i nia i te hoê maororaa 1 600 matahiti. Aita te feia papai atoa i ora i te hoê â tau. E taata vetahi ua haere i te haapiiraa teitei, area te tahi atu, aita roa ïa. E taote hoi hoê, area te tahi atu, e feia faaapu, taiˈa, tiai mamoe, peropheta, haava e e arii. Noa ˈtu râ, te tuati ra te mau tuhaa atoa o te Bibilia. Eita e parauhia te tahi mea i roto i te hoê pene e roto i te tahi atu, mea ê roa ïa. a

⁷ Te faataa ra te mau pene matamua o te Bibilia mea nafea te fifi i te haamataraa. Area te mau pene hopea, te faaite ra ïa e nafea te Atua e faaore ai i te reira ma te faariro i te fenua ei paradaiso. Te faatia ra te Bibilia i te aamu o te taata i te roaraa tausani matahiti e te haapapu atoa ra e tupu noa iho â te opuaraa a te Atua.

8. A horoa i te hiˈoraa o te haapapu ra mea tano te Bibilia.

⁸ E ere te Bibilia i te buka o te haapii mai ia rave i te mau maimiraa mai ta te aivanaa. Mea tano noa râ ta ˈna e parau ra i roto i tera tuhaa. E maere anei tatou no te hoê buka no ǒ mai i te Atua? Eita. A hiˈo na, te faaite ra te buka Levitiko i te mau faaueraa a te Atua i te mau Iseraela ia ore te maˈi ia parare. Ua papaihia te reira hou roa te taata a ite ai e nehenehe te tahi tirotiro e faatupu i te maˈi. Ua tano atoa ta te Bibilia e haapii ra tei roto te fenua i te aore. (Ioba 26:7) I te tau i manaˈo ai te taata mea parahurahu te fenua, ua na ô  aˈena te Bibilia, mea menemene te reira.—Isaia 40:22.

9. Aita te feia papai Bibilia i huna noa ˈˈe i te tahi mea, eaha ta te reira e haapapu ra?

⁹ Mea tano atoa te faatiaraa i roto i te Bibilia. I roto i te tahi atu mau buka, aita te feia papai i faaite i te tahi mau ohipa mai te mau taime a pau ai to ratou nunaa i te aroraa. Area te feia papai Bibilia, ua faaite i te parau mau noa ˈtu aita Iseraela i upootia. Ua faahiti atoa vetahi i ta ratou iho mau hape. I roto i te buka Numera, ua parau Mose ua rave o ˈna i te hoê hara ino mau e ua aˈo te Atua ia ˈna no te reira. (Numera 20:2-12) Aita te feia papai Bibilia i huna noa ˈˈe i te tahi mea. Eaha ta te reira e haapapu ra? E buka no ǒ mai i te Atua te Bibilia e e nehenehe mau tatou e tiaturi i te reira.

10. No te aha e faufaahia tatou ia haapao i te mau aˈoraa Bibilia i teie mahana?

¹⁰ Te Bibilia, “ua papaihia ïa i raro aˈe i te aratairaa a te varua o te Atua, e mea faufaa no te haapii atu, no te faaite atu i te hapa, no te faaafaro i te mau mea.” (Timoteo 2, 3:16) E faufaahia tatou ia haapao i te mau aˈoraa Bibilia i teie mahana. Na Iehova i hamani ia tatou, ua ite ïa o ˈna mai te aha to tatou mau manaˈo e huru. Mea ite aˈe o ˈna i to tatou huru ia tatou iho e ta ˈna e hinaaro ra, ia oaoa ïa te taata. Ua ite o Iehova eaha te mea e maitai ai tatou e eaha te haamauiui mai.

11, 12. (a) Eaha te mau aˈoraa maitai roa ta Iesu i horoa i roto i te Mataio pene 5 e tae atu 7? (b) Eaha ˈtu â ta te Bibilia e haapii mai?

¹¹ I roto i te Mataio pene 5 e tae atu 7, te vai ra te mau aˈoraa maitai roa ta Iesu i horoa ia ite tatou nafea  ia oaoa mau, eaha te huru e tia ia faaite i nia ia vetahi ê, nafea ia pure e eaha te manaˈo tano no nia i te moni. Noa ˈtu ua horoa mai oia i te reira a 2 000 matahiti i teie nei, mea tano e mea faufaa noa â te reira i teie tau.

¹² I roto i te Bibilia, ua haapii atoa mai o Iehova i te mau aratairaa o te faaoaoa ˈtu â i te oraraa utuafare, o te tauturu ia riro ei rave ohipa maitai e ia vai hau e vetahi ê. E faufaahia tatou i tera mau aratairaa Bibilia noa ˈtu no teihea nunaa e fenua tatou e noa ˈtu eaha te fifi.—A taio i te Isaia 48:17; a hiˈo i te faataaraa hau 3 i te pae hopea o te buka.

13. Eaha ta Isaia i tohu no nia i te oire Babulonia?

¹³ E rave rahi parau tohu Bibilia tei tupu aˈena. I tohu na Isaia e haamouhia Babulonia. (Isaia 13:19) Ua faaite roa atoa e nafea te oire e haruhia ˈi. Ua riro te mau opani rahi e te anavai ei parururaa no te oire. Ua tohu râ Isaia e haamǎrôhia te anavai e e matara noa te mau opani. Eita atoa te enemi e aro no te haru i te oire. Ua faaite atoa Isaia na Kuro e haru ia Babulonia.—A taio i te Isaia 44:27–45:2; a hiˈo i te faataaraa hau 4 i te pae hopea o te buka.

14, 15. Mea nafea te parau tohu a Isaia i te tupuraa?

¹⁴ E 200 matahiti i muri aˈe i te papairaahia te parau tohu, ua tia ˈtu te tahi nuu no te haru ia Babulonia. O vai te aratai o te nuu? Mai ta te parau tohu i faaite, o Kuro, te arii no Peresia. Ua ineine te mau mea atoa ia tupu te parau tohu.

¹⁵ I tera po, e oroa ta to Babulonia. I manaˈo na  ratou, e parururaa papu to ratou mau patu rahi e te anavai. I rapae mai râ i te oire, te heru ra Kuro e to ˈna mau taata i te tahi haereraa pape no te faatopa i te faito o te pape i roto i te anavai. E ere atura i te mea hohonu faahou e ua tia i te mau faehau no Peresia ia haere atu na roto. E nafea râ te nuu e tomo ai no te  mau patu rahi o Babulonia? Mai tei tohuhia, ua matara noa te mau opani, aita aˈera te mau faehau i aro no te haru i te oire.

16. (a) Eaha ˈtu â ta Isaia i tohu no nia ia Babulonia? (b) Ua tupu anei ta Isaia i tohu?

¹⁶ Ua tohu atoa Isaia eita roa te hoê e ora faahou i Babulonia. Teie ta ˈna i papai: “E ore roa e taata-faahou-hia; e ore e parahihia i tera ui i tera ui.” (Isaia 13:20) Ua tupu anei te reira? E toetoea anaˈe te itehia i te vahi i tia ˈi te oire o Babulonia, 80 kilometera i te pae apatoa o Bagdad i Irakia. Tae roa mai i teie mahana, aore e taata e ora ra i reira. Ua haamou roa o Iehova ia Babulonia.—Isaia 14:22, 23. b

17. No te aha tatou e tiaturi ai e tupu te mau parau fafau atoa a te Atua?

¹⁷ Ua tupu aˈena e rave rahi parau tohu Bibilia, e tapao faaite ïa e tupu iho â ta te Bibilia e parau ra no a muri aˈe. Mea papu, e tapea o Iehova i ta ˈna parau  fafau e faariro i te fenua ei paradaiso. (A taio i te Numera 23:19.) E nehenehe tatou e tiaturi e fanaˈo i “te ora mure ore ta te Atua, te ore e nehenehe e haavare, i fafau mai tahito mai â.”—Tito 1:2. c

18. Eaha ta Paulo i papai no nia i “te parau a te Atua”?

¹⁸ Ua haapii mai tatou e buka taa ê mau te Bibilia. Mea au maite ta ˈna e parau ra, mea tano i te pae o te mau maimiraa a te mau aivanaa, oia atoa i roto i ta ˈna mau faatiaraa. Te faaite atoa mai ra te reira i te mau aˈoraa paari e e rave rahi parau tohu Bibilia tei tupu aˈena. E ere râ tera anaˈe. Ua papai hoi te aposetolo Paulo: “E mea ora hoi te parau a te Atua e te puai rahi.” Eaha te auraa?—A taio i te Hebera 4:12.

19, 20. (a) E nafea te Bibilia e tauturu atu ai ia ite i to oe huru mau? (b) E nafea oe ia faaite i te mauruuru i te Bibilia?

¹⁹ E nehenehe te Bibilia e taui i to oe oraraa. E faaite atu hoi te reira i to oe huru mau, to oe mau manaˈo hohonu e to oe huru o roto roa. Te parau ra paha tatou, te here ra tatou i te Atua. No te haapapu râ i te reira, e titauhia ia haapao i ta te Bibilia e parau ra.

²⁰ E buka mau te Bibilia no ǒ mai i te Atua. Te hinaaro ra oia ia taio, ia haapii e ia haafaufaa tatou i te reira. A faaite i to oe mauruuru i tera ô e a tamau i te haapii i te Bibilia. E taa ïa ia oe i te opuaraa a te Atua no te huitaata. I roto i te pene i mua ˈtu, e haapii tatou no nia i te reira.