1. Na vai i horoa mai i te ora?

 O IEHOVA te “Atua ora.” (Ieremia 10:10) O ˈna to tatou Atua Poiete e na ˈna i horoa mai i te ora. Te parau ra te Bibilia: “Na oe i poiete i te mau mea atoa e no to hinaaro i vai ai e i poietehia ˈi te reira.” (Apokalupo 4:11) Ua hinaaro o Iehova e horoa i te ora i te taata. E ô faufaa roa te ora no ǒ mai ia ˈna.—A taio i te Salamo 36:9.

2. Eaha te rave ia oaoa tatou?

² Te horoa mai ra Iehova i te mau mea e hinaarohia e tatou no te ora mai te maa e te pape. (Ohipa 17:28) E ere râ tera anaˈe, te hinaaro atoa ra o ˈna ia oaoa tatou. (Ohipa 14:15-17) E titauhia râ ia auraro i ta te Atua mau ture.—Isaia 48:17, 18.

3. Eaha ta Iehova i rave i to Kaina taparahi-pohe-raa ia Abela?

³ Te haapii ra te Bibilia ia tatou, mea faufaa roa no Iehova to tatou ora e to vetahi ê. Ei hiˈoraa, ua riri roa Kaina, te tamaiti a Adamu raua Eva, i to ˈna taeae apî ia Abela. Ua faaara Iehova ia Kaina ia haavî i to ˈna riri. Aita râ oia i faaroo, no to ˈna riri rahi “tei nia maira Kaina i tana teina ia Abela, taparahi pohe roa ihora.” (Genese 4:3-8) Ua faautua Iehova ia Kaina no ta ˈna i rave i nia ia Abela. (Genese 4:9-11) Mea atâta roa te riri e te ino, e nehenehe te reira e turai ia riro ei taparahi taata. Eita tei na reira e fanaˈo i te ora mure ore. (A taio i te Ioane 1, 3:15.) Ia auhia tatou e Iehova, e titauhia ia haapii i te here i te taata atoa.—Ioane 1, 3:11, 12.

4. Eaha hoê o na ture ahuru ta te Atua i horoa o te haapii mai e ô faufaa mau te ora?

 ⁴ Tau tausani matahiti i muri aˈe, ua faaite Iehova e mea faufaa te ora no ˈna i to ˈna horoaraa i na ture ahuru ia Mose. Te na ô ra hoê o teie ture: “Eiaha roa oe e taparahi.” (Deuteronomi 5:17) Ia taparahi pohe te hoê taata i te tahi atu ma te opuahia, e haapohehia o ˈna.

5. Eaha te manaˈo o te Atua no nia i te haamaruaraa tamarii?

⁵ Eaha te manaˈo o te Atua no nia i te haamaruaraa tamarii? Mea faufaa roa no Iehova te ora o te hoê pêpe. I roto i te ture ta ˈna i horoa ia Iseraela, ua parau Iehova ia pepe noa ˈtu te hoê vahine hapû e ia pohe te tamarii i roto i to ˈna opu, e haapohehia te taata o tei rave i te reira. (A taio i te Exodo 21:22, 23; Salamo 127:3.) Te auraa, mea ino roa te haamaruaraa tamarii.—A hiˈo i te faataaraa hau 28 i te pae hopea o te buka.

6, 7. Eaha te rave no te faaite ia Iehova e mea faufaa te ora no tatou?

⁶ Eaha te rave no te faaite ia Iehova e mea faufaa to tatou iho ora e to vetahi ê? Eita tatou e rave i te mau mea o te nehenehe e haafifi i to tatou ora e to vetahi ê. Eita tatou e puhipuhi i te avaava aore ra e rave i te raau taero, e tuino te reira i te tino e e pohe paha tatou.

⁷ Na te Atua i hamani i to tatou tino e na ˈna i horoa mai i te ora, e tia ia haapao i ta ˈna e faaue mai ia rave. E titauhia ïa ia aupuru maite i to tatou tino. Aita anaˈe, e riro tatou ei taata viivii i te aro o te Atua. (Roma 6:19; 12:1; Korinetia 2, 7:1) Eita o Iehova e farii i ta tatou haamoriraa eita anaˈe tatou e haafaufaa i te ora ta ˈna i horoa mai. Noa ˈtu e ere i te mea ohie ia faaea i te rave i te mau peu iino, ia tutava tatou i te haafaufaa i te ora, e tauturu mai Iehova.

8. Eaha te rave no te haapao maitai i to tatou iho ora e to vetahi ê?

 ⁸ Ua haapii tatou e ô faufaa mau te ora. Te titau mai ra ïa o Iehova ia haapao maitai i to tatou iho ora e to vetahi ê. Peneiaˈe, na roto i ta tatou huru faahororaa i te pereoo aore ra te tahi atu faurao. E haapae atoa tatou i te mau tuaro atâta e te ino. (Maseli 3:31) E ara maitai atoa eiaha vetahi ê ia pepe i te tahi mea i to tatou fare. Ua faaue o Iehova i te mau Iseraela: “Ia patu oe i te fare apî ra, ei paruru ta oe e hamani no nia iho; o te taa mai te hoê taata i raro, o te viivii to fare ia oe i te toto.”—Maseli 3:31; Deuteronomi 22:8.

9. Eaha te huru e tia ia faaite i nia i te animara?

⁹ No Iehova, mea faufaa atoa to tatou huru i nia i te animara. E faatia o ˈna ia haapohe i te animara no te tamaa e no te hamani i te ahu, oia atoa mea atâta anaˈe te reira no tatou. (Genese 3:21; 9:3; Exodo 21:28) Eiaha râ tatou e hamani ino, e haapohe e aore ra e faataputô ia ratou no te faaanaanatae noa.—Maseli 12:10.

10. Eaha te faaite mai ra te toto o te ora ïa?

¹⁰ Mea moˈa te toto no Iehova no te mea te toto o te ora ïa. I muri aˈe i te haapoheraahia o Abela, ua na ô o Iehova ia Kaina: “Te pii maira te reo ra o te toto o to taeae mai te repo maira ia ˈu.” (Genese 4:10) Te faahohoˈa ra te toto o Abela i to ˈna ora e ua faautua o Iehova ia Kaina i te taparahi-pohe-raa i to ˈna taeae. I muri aˈe i te diluvi, ua haapapu faahou o Iehova, te toto o te ora ïa. Ua faatia oia ia Noa e to ˈna utuafare ia amu i te iˈo animara. Ua na ô oia: “Te mau mea ora atoa e haere nei, ei maa ïa na outou, mai te mau raau maa atoa ra: ua horoa-atoa-hia ˈtu e au na outou.” Ua faaite râ o Iehova eaha ta ratou e ore e amu na roto i teie faaueraa: “O te  iˈo râ ma te ora atoa i roto ra, oia te toto, eiaha outou e amu i te reira.”—Genese 1:29; 9:3, 4.

11. Eaha ta te Atua i faaue i te nunaa Iseraela no nia i te toto?

¹¹ Hau atu i te 800 matahiti i muri aˈe i to Iehova parauraa ia Noa eiaha e amu i te toto, teie ta ˈna i faaue i to ˈna nunaa: “To te tamarii a Iseraela, e to te feia e purutia i roto ia outou, ia imi e ia auau i te manu avae maha e te manu pererau e tia ia amu ra, e noaa ihora, e faatahe oia i te toto i raro a tapoˈi ai i te repo.” E ua na ô â oia: “Eiaha outou e amu i te toto.” (Levitiko 17:13, 14) Ua hinaaro noa â o Iehova ia riro te toto ei mea moˈa no to ˈna nunaa. E nehenehe ratou e amu i te iˈo animara, eiaha râ te toto. Ia haapohe ratou i te animara no te amu, e faatahe ratou i te toto i raro i te repo.

12. Eaha te manaˈo o te mau Kerisetiano i te toto?

¹² Tau matahiti i muri aˈe i te pohe o Iesu, ua putuputu te mau aposetolo e matahiapo o te amuiraa Kerisetiano i Ierusalema. Ua faaoti ratou eaha te mau tuhaa o te ture a Mose ta te mau Kerisetiano e tia â ia haapao. (A taio i te Ohipa 15:28, 29; 21:25.) Ua tauturu o Iehova ia ratou ia taa e mea faufaa noa â te toto no ˈna e e tia ia tamau ratou i te faariro i te reira ei mea moˈa. Eiaha ïa te mau Kerisetiano matamua ia inu e ia amu i te toto, oia atoa ia amu i te animara aita te toto i faatahehia. Ia ore ratou ia haapao i tera mau tuhaa, e au ta ratou hara mai te haamori idolo aore ra te peu taotoraa tia ore. Mai reira mai, ua faaoti te mau Kerisetiano mau i te ore e amu aore ra e inu i te toto. E no tatou i teie mahana? Te hinaaro noa ra o Iehova ia riro te toto ei mea moˈa no tatou.

13. Eaha te tumu eita te mau Kerisetiano e farii i te pâmuraa toto?

¹³ E tano atoa anei tera ture no te pâmuraa toto? E. Ua faaue o Iehova eiaha ia amu aore ra ia inu i te toto.  A hiˈo na, ia parau atu te taote eiaha ia inu i te ava, te auraa anei e nehenehe ta oe e pâmu i te reira i roto i to oe tino? Eita roa ˈtu! Hoê â huru no te toto, ia faauehia eiaha ia amu aore ra ia inu i te reira, eiaha atoa ïa te toto ia pâmuhia i roto i te tino.—A hiˈo i te faataaraa hau 29 i te pae hopea o te buka.

14, 15. Eaha ta te Kerisetiano e faaoti i te rave no te haafaufaa i te ora e no te auraro ia Iehova?

¹⁴ Eaha te huru ia parau atu te taote e pohe oe ia ore e pâmuhia te toto? Na te taata taitahi e faaoti e auraro anei oia i ta te Atua ture no nia i te toto. No te mau Kerisetiano, mea faufaa te ora ta te Atua i horoa mai. E imi ratou i te tahi atu mau ravea rapaauraa, eita râ e farii i te pâmuraa toto.

¹⁵ Eita iho â tatou e hinaaro e pohe. I te mea râ, e mea faufaa te ora no te Atua, eita tatou e farii i te pâmuraa toto. Mea faufaa aˈe ia auraro ia Iehova i te faaherehere ia tatou ma te ofati i ta ˈna ture. Ua parau Iesu: “O tei tapea hoi i to ˈna ora, e ere ïa oia i te reira. O tei ere râ i to ˈna ora no ˈu nei, e noaa faahou mai ïa ia ˈna te reira.” (Mataio 16:25) Na to tatou here ia Iehova e turai mai ia auraro ia ˈna. Ua ite o ˈna eaha te mea maitai aˈe no tatou. E mai ia Iehova, e faariro tatou i te ora ei mea moˈa e te faufaa mau.—Hebera 11:6.

16. Eaha te tumu e auraro ai te mau tavini o te Atua ia ˈna?

¹⁶ Ua faaoti papu te mau tavini taiva ore o te Atua i te auraro i ta ˈna ture no nia i te toto. Eita ratou e amu e e inu i te reira, eita atoa e farii i te ravea rapaauraa o te faaohipa i te toto. a E imi râ ratou i te tahi atu mau rapaauraa  no te aupuru i to ratou ora. Ua papu ia ratou ua ite te Atua poiete eaha te mea maitai aˈe no ratou. Na ˈna hoi i horoa mai i te ora e i hamani i te toto. E oe, te tiaturi ra anei oe o ˈna te mea ite aˈe eaha te mea maitai no oe?

17. I Iseraela, eaha te faanahoraa hoê roa ta Iehova i farii no te faaohipa i te toto?

¹⁷ I roto i te ture ta te Atua i horoa ia Mose, ua parau o Iehova i te mau Iseraela: “Tei te toto hoi te maa ora e ora ˈi te mau mea atoa ra, i haapao ai au i te reira e o ta outou ïa e hopoi i nia i te fata ei taraehara [aore ra no te ani i te faaoreraa hara] na outou iho, o te toto hoi tei riro ei taraehara no te taata.” (Levitiko 17:11) Ia hara te mau Iseraela, e nehenehe ratou e haere i te hiero no te taparu ia Iehova ia faaore i ta ratou hara. E pûpû ratou i te hoê animara ei tusia e e ani i te tahuˈa ia ninii maa toto i nia i te fata. Tera anaˈe te faanahoraa hoê roa ta Iehova i farii ia faaohipa te mau Iseraela i te toto.

18. Maoti te tusia o Iesu, eaha ta tatou e nehenehe e fanaˈo?

¹⁸ I to Iesu haereraa mai i nia i te fenua, ua faaore oia i te ture no nia i te tusia animara ma te horoa i to ˈna ora, aore ra toto, no te faaore i ta tatou hara. (Mataio 20:28; Hebera 10:1) I muri aˈe i te tia-faahou-raa o Iesu, ua hoˈi o ˈna i te raˈi e ua faaite i te faufaa rahi o to ˈna ora. Ua nehenehe o Iehova e faaohipa i te reira ia fanaˈo faahou te taata atoa i te tiaturiraa e ora e a muri noa ˈtu.—Ioane 3:16; Hebera 9:11, 12; Petero 1, 1:18, 19.

19. Eaha te tia ia rave ia nehenehe tatou e parau “e ere no ˈu te hape ia ore te taata e faaorahia”?

¹⁹ Auê tatou i te mauruuru ia Iehova no te ô faahiahia  mau o te ora! E hinaaro tatou e faaite i te taata ia faatupu ratou i te faaroo ia Iesu, e nehenehe ratou e ora e a muri noa ˈtu. Mea here na tatou i te taata, e imi anaˈe i te mau ravea atoa no te faaite atu eaha te rave ia ora ratou. (Ezekiela 3:17-21) Mai te aposetolo Paulo, e nehenehe ïa tatou e parau: “E ere no ˈu te hape ia ore te taata e faaorahia, inaha ua faaite iho â vau ia outou i te mau mea atoa no nia i te hinaaro o te Atua.” (Ohipa 20:26, 27) E haafaufaa mau tatou i te ora e te toto ia faaite tatou ia vetahi ê o vai o Iehova e eaha to ˈna manaˈo no nia i te ora.