PENE MAHA
O vai Iesu Mesia?
1, 2. (a) E navai anei ia ite i te iˈoa o te tahi taata tuiroo no te parau, ua matau oe ia ˈna? A faataa. (b) No te taata, o vai o Iesu?
MEA rahi te taata tuiroo na te ao e ua ite paha oe te iˈoa o vetahi. E navai anei râ no te parau, ua matau oe ia ratou? Eita, e titau-atoa-hia ia ite oe mai te aha mau na to ratou oraraa e to ratou huru.
2 Ua faaroo paha oe i te parau no Iesu Mesia noa ˈtu ua ora oia i nia i te fenua a hau atu 2 000 matahiti i teie nei. E rave rahi râ o tei ore i ite o vai mau na Iesu. No vetahi, e taata maitai noa, no te tahi atu, e peropheta. Te vai atoa ra o te tiaturi o Iesu te Atua. Eaha to oe manaˈo?—A hiˈo i te faataaraa hau 12 i te pae hopea o te buka.
3. No te aha mea faufaa no oe ia ite o vai o Iehova e o Iesu?
3 No te aha mea faufaa no oe ia ite i te parau mau no nia ia Iesu? Te na ô mai ra te Bibilia: “No te fanaˈo i te ora mure ore, ia ite ïa ratou ia oe te Atua mau hoê roa e i ta oe i tono mai o Iesu Mesia e tia ˈi.” (Ioane 17:3) Ia ite oe te parau mau no nia ia Iehova e ia Iesu, e nehenehe oe e ora e a muri noa ˈtu i roto i te paradaiso i nia i te fenua nei. (Ioane 14:6) Hau atu â, e tauturu te hiˈoraa maitai roa o Iesu ia ite eaha te huru e faaite i nia ia vetahi ê. (Ioane 13:34, 35) I roto i te pene matamua, ua haapii tatou i te parau mau no nia i te Atua. I teie nei, e hiˈopoa anaˈe eaha ta te Bibilia e haapii mai no nia ia Iesu.
O TE MESIA OE!
4. Eaha te auraa o na parau e piti Mesia e Kirito?
4 E rave rahi matahiti hou a fanauhia ˈi Iesu, ua fafau Iehova i roto i te Bibilia e tono mai oia i te Mesia, aore ra Kirito. E hurihia te taˈo Hebera ei Mesia e te taˈo Heleni ei Kirito. Hoê â râ auraa o na parau e piti, e maiti te Atua i te Mesia fafauhia e e horoa ˈtu oia i te tiaraa taa ê. E faatupu te Mesia i te mau parau fafau atoa a te Atua. Na mua ˈˈe râ i to ˈna fanauraa, mea rahi tei uiui o vai te Mesia.
5. Ua papu anei i te mau pǐpǐ a Iesu o ˈna te Mesia?
5 Ua papu roa i te mau pǐpǐ a Iesu o ˈna te Mesia fafauhia. (Ioane 1:41) Ua parau Simona Petero ia Iesu: “O te Mesia oe.” (Mataio 16:16) Eaha te mau haapapuraa o Iesu te Mesia?
6. Eaha ta Iehova i rave no te tauturu i te feia aau tae ia ite o vai te Mesia?
6 Na mua ˈˈe roa i to Iesu fanauraa, ua papai te mau peropheta a te Atua e rave rahi parau o te tauturu i te taata ia ite o vai te Mesia. Ia anihia ia oe e haere e tii i te tahi taata ta oe i ore i farerei aˈenei. E ere anei i te mea ohie aˈe ia faaitehia ˈtu mai te aha te huru o tera taata? Ua faaohipa atoa o Iehova i ta ˈna mau peropheta no te faaite i ta te Mesia e rave e eaha te tupu i nia ia ˈna. E tauturu tera mau parau tohu atoa i te feia aau tae ia ite o Iesu te Mesia.
7. Eaha e piti o te mau parau tohu o te haapapu o Iesu te Mesia?
7 E hiˈo anaˈe e piti o tera mau parau tohu. A tahi, 700 matahiti hou Iesu a fanauhia ˈi, ua tohu te peropheta Mika e fanauhia te Mesia i te oire iti o Betelehema. (Mika 5:2) I reira mau Iesu i te fanauraahia! (Mataio 2:1, 3-9) Te piti, ua tohu te peropheta Daniela e tae mai te Mesia i te matahiti 29. (Daniela 9:25) E rave rahi atu â parau tohu o te haapapu ra o Iesu te Mesia fafauhia.—A hiˈo i te faataaraa hau 13 i te pae hopea o te buka.
Ua riro Iesu ei Mesia, aore ra Kirito, i to ˈna bapetizoraa
8, 9. Eaha tei tupu i te bapetizoraa o Iesu o tei haapapu o ˈna te Mesia?
8 Ua haapapu maitai o Iehova, o Iesu te Mesia. Ua fafau te Atua e horoa oia i te tahi tapao ia Ioane Bapetizo no te ite o vai te Mesia. I to Iesu haereraa ia Ioane no te bapetizo ia ˈna i te anavai Ioridana i te matahiti 29, ua ite Ioane i tera tapao. Te faaite ra te Bibilia eaha tei tupu: “E oti aˈera Iesu i te bapetizohia, i reira iho, haere maira oia i nia mai raro mai i te pape. E inaha, matara aˈera te raˈi e ite aˈera Ioane i te varua o te Atua i te pouraa mai mai te uupa ra i nia ia Iesu. Inaha, e reo atoa tei faaroohia mai te raˈi mai i te na ôraa: ‘O ta ˈu Tamaiti teie, tei herehia, ta ˈu i mauruuru roa.’” (Mataio 3:16, 17) Ua ite e ua faaroo Ioane i te reira, papu aˈera ia ˈna o Iesu te Mesia. (Ioane 1:32-34) I tera taime, ua ninii o Iehova i to ˈna varua i nia ia Iesu, riro atura oia ei Mesia. O ˈna ta te Atua i maiti no te riro ei Aratai e ei Arii.—Isaia 55:4.
9 Te haapapu mai ra te mau parau tohu Bibilia, ta Iehova iho mau parau e te tapao ta ˈNa i horoa, o Iesu te Mesia. Nohea mai râ o Iesu e mai te aha to ˈna huru? E hiˈo anaˈe eaha ta te Bibilia e parau ra.
NOHEA MAI IESU?
10. Eaha ta te Bibilia e haapii ra no nia i te oraraa o Iesu hou a haere mai ai i te fenua nei?
10 Te haapii ra te Bibilia i ora na Iesu i te raˈi e rave rahi matahiti hou a haere mai ai i te fenua nei. Ua parau Mika “mai tahito mai â” te Mesia. (Mika 5:2) Ua faaite Iesu e rave rahi taime i ora na o ˈna i te raˈi hou a fanauhia ˈi ei taata. (A taio i te Ioane 3:13; 6:38, 62; 17:4, 5.) Hou Iesu a haere mai ai i te fenua, mea piri roa raua o Iehova.
11. No te aha mea here roa na Iehova ia Iesu?
11 Mea here roa na Iehova ia Iesu. Na ˈna hoi i poiete ia ˈna na mua ˈˈe te mau mea atoa. No reira o ˈna e piihia ˈi, “te matahiapo o te mau mea atoa i poietehia.” a (Kolosa 1:15) Mea faufaa roa atoa o ˈna no te Atua no te mea o Iesu anaˈe ta Iehova iho i hamani. Te tumu ïa e piihia ˈi o ˈna, te “Tamaiti otahi.” (Ioane 3:16) O Iesu anaˈe atoa ta Iehova i faaohipa no te hamani i te tahi atu mau mea. (Kolosa 1:16) O ˈna anaˈe atoa “te Parau” no te mea ua faaohipa o Iehova ia ˈna no te faaite i te mau poroi e faaueraa i te mau melahi e i te taata.—Ioane 1:14.
12. Eaha te haapapu mai ra mea taa ê Iesu e mea taa ê te Atua?
12 Te tiaturi nei vetahi o Iesu te Atua. E ere râ tera ta te Bibilia e haapii ra. Te na ô ra hoi te Parau a te Atua, mea hamanihia Iesu, e haamataraa ïa to ˈna. Area o Iehova tei hamani i te mau mea atoa, aore roa ïa! (Salamo 90:2) Ei Tamaiti na te Atua, aita roa Iesu i manaˈo noa ˈˈe e haru i te tiaraa o te Atua. Mea papu maitai ta te Bibilia e haapii ra, mea puai aˈe te Metua i te Tamaiti. (A taio i te Ioane 14:28; Korinetia 1, 11:3.) O Iehova anaˈe te “Atua mana hope.” (Genese 17:1) O ˈna te mea teitei roa ˈˈe e te mea puai roa ˈˈe i te ao.—A hiˈo i te faataaraa hau 14 i te pae hopea o te buka.
13. No te aha te Bibilia e parau ai no Iesu, “o ˈna te hohoˈa o te Atua ite-ore-hia”?
13 Ua ohipa amui o Iehova e ta ˈna Tamaiti Iesu e miria matahiti hou a poietehia ˈi te raˈi e te fenua. Mea here roa raua i te tahi e te tahi! (Ioane 3:35; 14:31) Ua faaite Iesu i te mau huru maitatai o to ˈna Metua ma te tia roa i parau ai te Bibilia, “o ˈna te hohoˈa o te Atua ite-ore-hia.”—Kolosa 1:15.
14. Mea nafea te Tamaiti here a Iehova i fanauhia ˈi ei taata?
14 Ua farii te Tamaiti here roa a Iehova ia faarue i te raˈi e ia fanauhia ei taata i te fenua nei. Mea nafea ïa te reira i te tupuraa? Ua faatupu o Iehova i te hoê semeio, ua tuu i te ora o ta ˈna Tamaiti i roto i te opu o te hoê paretenia o Maria te iˈoa. Aita ïa i titauhia i te hoê tane. Ua fanau Maria i te hoê tamaiti tia roa e ua horoa ˈtu i te iˈoa Iesu.—Luka 1:30-35.
MAI TE AHA TE HURU O IESU?
15. E nafea oe ia ite atu â o vai o Iehova?
15 Ma te taio i te mau Evanelia a Mataio, Mareko, Luka e Ioane, e haapii atu â oe no nia ia Iesu, to ˈna oraraa e to ˈna mau huru maitatai. E tauturu te reira ia oe ia ite atu â o vai o Iehova i te mea ua faaite Iesu i te hoê â huru e to to ˈna Metua. No reira i tia ˈi ia ˈna ia parau: “O tei ite mai ia ˈu, ua ite atoa ïa i te Metua.”—Ioane 14:9.
16. Eaha ta Iesu i haapii? No ǒ mai ia vai te mau haapiiraa a Iesu?
16 E rave rahi tei pii ia Iesu, Orometua. (Ioane 1:38; 13:13) Hoê o ta ˈna mau haapiiraa faufaa roa ˈˈe, o “te parau apî oaoa o te Faatereraa arii.” Eaha tera Faatereraa arii? O te faatereraa a te Atua i te raˈi o te mana mai i nia i te fenua taatoa e te haamaitai i te feia o te auraro i te Atua. (Mataio 4:23) No ǒ mai ia Iehova te mau haapiiraa atoa a Iesu. Ua na ô hoi oia: “E ere na ˈu iho ta ˈu e haapii nei, na tei tono mai râ ia ˈu.” (Ioane 7:16) Ua ite Iesu te hinaaro ra o Iehova ia faaroo te taata atoa i te parau apî oaoa no nia i te Faatereraa arii a te Atua.
17. Ihea Iesu e haapii ai i te taata? Eaha te tumu oia i haa ˈi ma te itoito no te haapii ia vetahi ê?
17 Ua haapii Iesu i te taata i te mau vahi atoa. I te mau oire, te matete, te hiero, te mau sunago e i tera e tera fare. Aita Iesu i tiai na te taata e farerei atu ia ˈna, e pinepine, na ˈna i haere ia ratou. (Mareko 6:56; Luka 19:5, 6) Ua haa Iesu ma te itoito e ua horoa i to ˈna taime e puai no te haapii i te taata. Eaha te tumu? Ua ite Iesu tera te hinaaro o te Atua e mea faaroo roa na ˈna i to ˈna Metua. (Ioane 8:28, 29) Ua poro atoa Iesu no to ˈna aroha i te taata. (A taio i te Mataio 9:35, 36.) Ua ite Iesu aita te mau aratai haapaoraa i haapii i te parau mau no nia i te Atua e ta ˈna Faatereraa arii. Ua hinaaro oia ia faaroo e rave rahi i te parau apî oaoa.
18. Eaha te mau huru maitatai o Iesu ta oe e au roa ˈˈe?
18 Mea here na Iesu i te taata e mea tâuˈa atoa ia ratou. E taata maitai e te ohie ia tapiri atu. Mea au atoa na te mau tamarii e haere ia ˈna. (Mareko 10:13-16) Ua rave noa Iesu i te mea tia. Mea au ore na ˈna te ohipa taviri taata e te tano ore. (Mataio 21:12, 13) I tera tau, e haafaufaa-ore-hia te mau vahine e eita atoa e faaturahia. Area Iesu, ua faaite ïa i te maitai i nia i te mau vahine e ua faatura ˈtu. (Ioane 4:9, 27) E taata haehaa mau atoa Iesu. I te hoê po, ua rave oia i te ohipa a te hoê tavini, ua horoi i te avae o ta ˈna mau aposetolo.—Ioane 13:2-5, 12-17.
Ua poro Iesu i te taata i te mau vahi atoa
19. A horoa na i te tahi hiˈoraa o te haapapu ua ite Iesu i te hinaaro mau o te taata e ua tauturu atoa ia ratou.
19 Ua ite Iesu i te hinaaro mau o te taata e ua tauturu atoa ia ratou. Ua faaohipa hoi o ˈna i te mana o te Atua no te faaora i te taata na roto i te mau semeio. (Mataio 14:14) I te hoê mahana, ua na ô atu te tahi lepera ia ˈna: “Ia tia ia oe, e nehenehe oe e tamâ ia ˈu.” Ua taa roa ia Iesu i te mauiui ta tera taata e faaoromai ra. Aroha aˈera Iesu ia ˈna e ua tauturu atu. Ua toro i to ˈna rima, ua tapea i tera lepera e ua na ô: “E tia ia ˈu! Ia mâ oe.” Ora ihora to ˈna maˈi! (Mareko 1:40-42) A feruri na i te huru o tera taata!
AITA I TAIVA NOA ˈˈE I TO ˈNA METUA
20, 21. No te aha o Iesu te hiˈoraa maitai roa ˈˈe no te auraro i te Atua?
20 O Iesu te hiˈoraa maitai roa ˈˈe no te auraro i te Atua. Aita roa oia i taiva i to ˈna Metua i roto i te mau tupuraa atoa e noa ˈtu eaha ta to ˈna mau enemi i rave. Aita Iesu i hara i to Satani faahemaraa ia ˈna. (Mataio 4:1-11) Aita atoa vetahi mero o to Iesu utuafare i tiaturi o ˈna te Mesia e ua parau “ua maamaahia oia.” Ua faaea anei râ Iesu i te rave i te ohipa a te Atua? Aita roa ˈtu! (Mareko 3:21) Noa ˈtu te ino rahi o to ˈna mau enemi i nia ia ˈna, ua tapea Iesu i to ˈna taiva ore i te Atua e aita roa i tamata i te tahoo atu.—Petero 1, 2:21-23.
21 Aita atoa oia i taiva ia Iehova noa ˈtu ua haamauiuihia o ˈna e ua pohe ma te ino mau. (A taio i te Philipi 2:8.) A feruri na i ta ˈna i faaruru i te mahana o to ˈna poheraa. Ua tapeahia, ua pari-haavare-hia ua faaino oia i te Atua, ua faautuahia e te mau haava o tei petahia, ua faaooo te taata ia ˈna, ua hamani-ino-hia e te mau faehau e ua patiti ia ˈna i nia i te raau. Ma te autâ, ua auê oia hou a pohe ai: “Ua hope ia ˈu i te rave i ta oe i ani mai!” (Ioane 19:30) Toru mahana i muri iho, ua faatia mai o Iehova ia Iesu i te ora e ua horoa ˈtu i te hoê tino varua. (Petero 1, 3:18) E 40 mahana i muri aˈe, ua hoˈi Iesu i te raˈi, “e ua parahi i te rima atau o te Atua” e ua tiai i te taime e faariro ai te Atua ia ˈna ei Arii.—Hebera 10:12, 13.
22. E nehenehe tatou e fanaˈo i te aha maoti te taiva ore o Iesu i to ˈna Metua?
22 Maoti te taiva ore o Iesu i to ˈna Metua, e nehenehe tatou e fanaˈo faahou i te ora mure ore i roto i te paradaiso i nia i te fenua mai ta Iehova i opua. I roto i te pene i mua ˈtu, e hiˈopoa anaˈe e nafea tatou e fanaˈo ai i te reira maoti te pohe o Iesu.
a O Iehova te Metua no te mea na ˈna i hamani i te mau mea atoa. (Isaia 64:8) E Tamaiti Iesu na te Atua no te mea na Iehova i poiete ia ˈna. E tamarii atoa te mau melahi e o Adamu na te Atua.—Ioba 1:6; Luka 3:38.
E au atoa outou . . .
TE PARE TIAIRAA
O vai mau Iesu Mesia?
A hiˈo mea nafea Iesu i te ohiparaa i roto i te aamu o te taata nei.
