1. Eaha ta te Atua opuaraa no te huitaata?

 E OPUARAA maitai roa ta te Atua no te huitaata. Ua poiete oia i te tane e te vahine matamua, Adamu e Eva, ia ora raua i roto i te hoê vahi nehenehe mau. Ua opua oia ia fanau raua i te tamarii, ia faariro i te taatoaraa o te fenua ei paradaiso e ia haapao i te animara.—Genese 1:28; 2:8, 9, 15; a hiˈo i te faataaraa hau 6 i te pae hopea o te buka.

2. (a) Eaha te haapapu ra e tupu ta te Atua i opua? (b) Eaha ta te Bibilia e parau ra no nia i te ora mure ore?

² I to oe manaˈo, e riro anei te fenua ei paradaiso i te hoê mahana? Te na ô mai ra o Iehova: “Tei opuahia e au ra, o ta ˈu ïa e rave.” (Isaia 46:9-11; 55:11) E tupu ta ˈna i opua, eita te hoê mea e nehenehe e tapea ia ˈna! Ua parau o Iehova e tumu o ˈna i poiete ai i te fenua. “Aitâ râ oia i hamani ia vaiiho-taata-ore-noa-hia.” (Isaia 45:18) Te hinaaro ra te Atua ia parahi te taata i nia i te fenua. Eaha te huru taata ta ˈna e hinaaro? No te hoê taime poto anei? Te na ô ra te Bibilia: “E parahi te feia parau-tia [aore ra auraro] i nia i te fenua, e parahi tamau â [aore ra e a muri noa ˈtu] ratou i reira.”—Salamo 37:29; Apokalupo 21:3, 4.

3. Te maˈihia ra e te pohe ra te taata, eaha te uiraa e hiti mai?

³ I teie râ mahana, te maˈihia ra e te pohe ra te taata. I te tahi mau vahi, te tupu ra te tamaˈi e te haapohehia ra te taata. Papu maitai, e ere tera ta te Atua i opua. Eaha  ïa tei tupu e no te aha mai tera ˈi? O te Bibilia anaˈe te faataa mai i te reira.

4, 5. (a) O vai tei paraparau ia Eva ma te faaohipa i te hoê ophi? (b) E nafea te hoê taata maitai e riro mai ai ei eiâ?

⁴ Te parau ra te Bibilia, e enemi to te Atua o “tei piihia te Diabolo e Satani.” Ua faaohipa Satani i te hoê ophi no te paraparau ia Eva i roto i te ô i Edene. (Apokalupo 12:9; Genese 3:1) Ua haa oia mai te huru o te ophi te paraparau ra.—A hiˈo i te faataaraa hau 7 i te pae hopea o te buka.

⁵ Na te Atua anei ïa i hamani i te Diabolo ra o Satani? E ere! I to ˈna faaineineraa i te fenua no Adamu raua Eva, tei te raˈi tera melahi, ua taui râ o ˈna e ua riro mai ei Diabolo. (Ioba 38:4, 7) E nehenehe anei? A feruri na i te hoê taata maitai ia taui e ia riro mai ei eiâ. Ua fanauhia anei o ˈna ei taata eiâ? Aita, ua faahinaaro râ o ˈna i te hoê mea e ere na ˈna. Ua manaˈonaˈo noa oia i te reira e puai roa aˈera tera hinaaro tia ore. Ua tiai oia i te taime tano e ua eiâ mai i te reira. Na ˈna iho i maiti e riro ei taata eiâ.—A taio i te Iakobo 1:13-15; a hiˈo i te faataaraa hau 8 i te pae hopea o te buka.

6. Mea nafea te tahi melahi i riro mai ai ei enemi no te Atua?

⁶ Tera tei tupu i nia i tera melahi. Ua poiete o Iehova ia Adamu raua Eva e i muri iho, ua parau atu ia fanau e ia “faaî i te fenua.” (Genese 1:27, 28) Feruri ihora tera melahi, ‘Ia haamori tera mau taata ia ˈu, eiaha râ ia Iehova!’ Rahi atu â o ˈna i te manaˈonaˈo i te reira, rahi atu â o ˈna i te faahinaaro i te mea e au anaˈe ia Iehova. Ua hinaaro tera melahi ia haamori te taata ia ˈna. Opua ˈtura e paraparau ia Eva e haavare ihora ia ˈna. (A taio i  te Genese 3:1-5.) Riro maira te Diabolo ra o Satani ei enemi no te Atua.

7. (a) No te aha Adamu raua Eva i pohe ai? (b) Eaha te tumu tatou e ruau ai e e pohe atoa ˈi?

⁷ Ua faaroo ore Adamu raua Eva i te Atua e ua amu i tei opanihia. (Genese 2:17; 3:6) Ua hara raua e i muri aˈe, ua pohe mai ta Iehova i parau. (Genese 3:17-19) Ua riro ta raua mau tamarii ei feia tia ore, aore ra hara, e no reira ratou i pohe atoa ˈi. (A taio i te Roma 5:12.) No te taa i tei tupu, e rave anaˈe i te hoê hiˈoraa. Te hoê farii eu faraoa o tei popoˈa. Mai te aha te huru o te mau faraoa o te euhia i roto? Mea popoˈa atoa ïa. I to Adamu faaroo-ore-raa i te Atua, ua riro mai oia ei taata hara. I te mea e tamarii atoa tatou na ˈna, ua naea-atoa-hia tatou i te huru tia ore, aore ra te popoˈa, o Adamu. Riro atura tatou paatoa ei taata tia ore, aore ra hara, e te tumu ïa tatou e ruau ai e e pohe atoa ˈi.—Roma 3:23; a hiˈo i te faataaraa hau 9 i te pae hopea o te buka.

8, 9. (a) Eaha ta Satani i hinaaro ia manaˈo Adamu e Eva? (b) No te aha o Iehova i ore ai i haapohe ia ratou i tera iho â taime?

⁸ Ua haamata Satani i te orure hau ia Iehova i to ˈna turairaa ia Adamu raua Eva ia faaroo ore i te Atua. Ua hinaaro ia manaˈo raua e Atua haavare o Iehova e ei faatere, eita o ˈna e hinaaro i to raua maitai. Ua parau Satani aita e faufaa na te Atua e faaue atu eaha te rave, mea au aˈe na raua iho e faaoti eaha te mea maitai e te mea ino. Eaha ïa ta Iehova e rave? E nehenehe o ˈna e haapohe ia Adamu e Eva ia faaea te orureraa hau. E faaite anei râ te reira o Satani tei haavare? Eita.

⁹ Ua faaoti o Iehova eiaha e haapohe ia ratou i tera iho â taime. Ua vaiiho râ i te taata ia faatere ia ratou iho. Na te tau e faaite papu o Satani tei haavare e o Iehova  tei ite i te mea e maitai ai te taata. E haapii atu â tatou no nia i te reira i roto i te pene 11. Eaha râ to oe manaˈo i te faaotiraa a Adamu raua Eva? Ua tano anei raua i te tiaturiraa ia Satani e te faaroo-ore-raa i te Atua? Na Iehova i horoa ia Adamu e Eva i te mau mea atoa ta raua e fanaˈo ra. Te ora tia roa, te tahi nohoraa nehenehe mau e  te hoê ohipa e mauruuru ai raua. E ohipa maitai anei ta Satani i horoa ˈtu? Ahiri o oe aˈe tera, eaha ta oe e rave?

10. Tei mua tatou paatoa i teihea faaotiraa faufaa?

¹⁰ I teie mahana, tei mua atoa tatou i te hoê â faaotiraa. O te ora te tiai mai ra ia maiti tatou i te auraro ia Iehova e te haapapu o Satani tei haavare. Ia maiti râ tatou i te Diabolo ei faatere, o te pohe ïa te hopearaa. (Salamo 73:28; a taio i te Maseli 27:11.) Mea iti roa te feia o te auraro ra i te Atua i teie mahana. E ere ïa te Atua te faatere o teie nei ao. O vai râ ïa?

11, 12. (a) Te faaite ra te pûpûraa a Satani ia Iesu i te aha? (b) Eaha te mau irava o te faaite ra o Satani te faatere ra i te ao?

¹¹ Ua ite Iesu o vai mau te faatere ra i te ao. I te tahi mahana, “faaite maira [Satani] ia ˈna i te mau faatereraa arii atoa o te ao nei e to ratou hanahana.” I muri iho, teie ta Satani i parau ia Iesu: “Teie mau mea atoa e horoa vau na oe ia tipapa mai oe i raro a haamori mai ai ia ˈu.” (Mataio 4:8, 9; Luka 4:5, 6) A feruri na, e tia anei ia Satani ia horoa ia Iesu i tera mau faatereraa arii mai te peu e ere o ˈna te fatu? Eita. I ǒ nei râ, e tapao faaite ïa na Satani tera mau faatereraa atoa.

¹² E na ô paha oe, ‘E ere anei o Iehova te Atua Mana hope o tei poiete i te ao? No te aha ïa e parau ai o Satani te faatere o te ao?’ (Apokalupo 4:11) Ua tano oe, o Iehova iho â tei poiete i te reira, ua pii râ Iesu ia Satani mai “te arii o teie nei ao.” (Ioane 12:31; 14:30; 16:11) Ua parau atoa te aposetolo Paulo o Satani “te atua hoi o teie faanahoraa o te ao nei.” (Korinetia 2, 4:3, 4) Ua papai atoa te aposetolo Ioane, “te vai nei râ to te ao atoa i raro aˈe i te mana o te varua ino.”—Ioane 1, 5:19.

13. No te aha tatou e hinaaro ai i te hoê ao apî?

¹³ Te riro noa ˈtura teie nei ao ei mea atâta roa. Ati aˈe ia tatou, te vai ra te tamaˈi, te ohipa petaraa, te huru haavarevare e te ino. Noa ˈtu ta ratou tutavaraa, eita te taata e nehenehe e faaore i tera mau fifi. O te Atua râ, ua fatata roa ïa i te haamou i teie nei ao ino i ta ˈna tamaˈi ra o Aramagedo. I muri iho, e haamau oia i te hoê ao apî parau-tia.—Apokalupo 16:14-16; a hiˈo i te faataaraa hau 10 i te pae hopea o te buka.

14. O vai ta Iehova i maiti ei Arii no ta ˈna Faatereraa arii? Eaha ta te Bibilia i tohu no nia ia Iesu?

¹⁴ Ua maiti o Iehova ia Iesu Mesia ei Arii no ta ˈna Faatereraa arii, aore ra Basileia, i te raˈi. A tau tausani matahiti i teie nei, ua tohu te Bibilia e faatere Iesu ei “Arii no te hau” e e vai ta ˈna faatereraa e a muri noa ˈtu. (Isaia 9:6, 7) Ua haapii Iesu i ta ˈna mau pǐpǐ ia pure no tera faatereraa. Ua na ô atu hoi oia: “Ia tae mai ta oe Faatereraa arii. Ia tupu to oe hinaaro i te fenua nei, mai i te raˈi atoa na.” (Mataio 6:10) I te pene 8, e haapii atu â tatou e nafea te Faatereraa arii a te Atua e mono ai i te mau faatereraa o te ao. (A taio i te Daniela 2:44.) I muri iho, e faariro te Faatereraa arii a te Atua i te fenua ei paradaiso nehenehe mau.—A hiˈo i te faataaraa hau 11 i te pae hopea o te buka.

15. O vai te “fenua apî”?

¹⁵ Te fafau ra te Bibilia: “Te tiai nei râ tatou i te mau raˈi apî e te hoê fenua apî . . . e i reira e vai noa ˈi te parau-tia.” (Petero 2, 3:13; Isaia 65:17) I roto i te Bibilia, ua faaohipa-atoa-hia te parau “fenua” i te tahi taime no te mau taata e ora ra i nia i te fenua. (Paraleipomeno 1, 16:31) Te  “fenua apî,” o te feia atoa ïa o te auraro i te Atua e ta ˈna e haamaitai.

16. Eaha te ô faahiahia mau ta te Atua e horoa i te feia o te ora i roto i te ao apî? Eaha te tia ia rave no te fanaˈo i te reira?

¹⁶ Ua fafau Iesu e horoahia i te feia o te ora i roto i te ao apî “te ora mure ore.” (Mareko 10:30) Eaha te tia ia rave no te fanaˈo i tera ô? A taio na i te Ioane 3:16 e te 17:3 no te ite i te pahonoraa. I teie nei, e hiˈo anaˈe eaha ta te Bibilia e parau ra no nia i te oraraa i roto i te paradaiso i nia i te fenua nei.

17, 18. E nafea ia papu e itehia te hau i te mau vahi atoa i nia i te fenua, e aore e taata faahou no te haapeapea mai?

¹⁷ E ore te ino, te tamaˈi, te mau ohipa iino e te taparahiraa taata. Aore faahou taata ino i nia i te fenua. (Salamo 37:10, 11) E faaore te Atua “te tamaˈi e tae roa aˈenei i te hopea fenua!” (Salamo 46:9; Isaia 2:4) O te feia anaˈe o te here i te Atua e te auraro ia ˈna te parahi i nia i te fenua. E vai te hau e a muri noa ˈtu.—Salamo 72:7.

¹⁸ E vai hau noa te nunaa o Iehova. Na mua ˈˈe, ia faaroo te mau Iseraela i te Atua, e ora ratou ma te peapea ore no ta ˈna parururaa. (Levitiko 25:18, 19) I roto i te paradaiso, eita te tahi ohipa aore ra taata e haapeapea mai ia tatou. E vai hau noa tatou paatoa!—A taio i te Isaia 32:18; Mika 4:4.

19. Na te aha e haapapu mai eita tatou e ere i te maa i roto i te ao apî a te Atua?

¹⁹ E auhune te maa. “E riro hoi e maa sitona tei te fenua i nia i te tupuai o te mau mouˈa ra.” (Salamo 72:16) “Na to tatou iho Atua [o Iehova], e haamaitai mai ia tatou” e “e hotu rahi mai ai te fenua.”—Salamo 67:6.

20. Eaha te faaite mai ra e riro te fenua ei paradaiso?

²⁰ E riro te fenua taatoa ei paradaiso. E fanaˈo te taata atoa i te hoê fare e te aua nehenehe mau. (A taio i te  Isaia 65:21-24; Apokalupo 11:18.) E nehenehe roa te fenua taatoa mai te ô i Edene ra. E haamâha o Iehova i to tatou mau hinaaro atoa. Te na ô ra te Bibilia no ˈna: “Te heheu nei oe i to rima, e te haamâha nei i te hiaai o te mau mea ora atoa nei.”—Salamo 145:16.

21. E nafea tatou e ite ai e tupu te hau i rotopu i te taata e te animara?

²¹ E tupu te hau i rotopu i te taata e te animara. Eita te animara e amu faahou i te taata. Eita tatou e riaria no ta tatou tamarii noa ˈtu tei pihai iho ratou i te animara atâta i teie mahana.—A taio i te Isaia 11:6-9; 65:25.

22. Eaha ta Iesu e rave no tei maˈihia?

²² E ore roa te maˈi. I to Iesu haereraa mai i te fenua nei, e rave rahi taata ta ˈna i faaora. (Mataio 9:35; Mareko 1:40-42; Ioane 5:5-9) Ei Arii râ o te Faatereraa arii a te Atua, e faaore o ˈna i te maˈi o te taata atoa. E ore roa te hoê e parau faahou: “Ua paruparu vau i te maˈi.”—Isaia 33:24; 35:5, 6.

23. Eaha ta te Atua e rave no tei pohe?

²³ E tia faahou mai tei pohe. Te fafau ra te Atua e faatia mai oia i te ora e mirioni taata tei pohe. “E tia-faahou-raa to te feia parau-tia e to te feia parau-tia ore.”—A taio i te Ioane 5:28, 29; Ohipa 24:15.

24. Eaha to oe huru i mua i te oraraa i roto i te paradaiso?

²⁴ Tei ia tatou atura te faaotiraa. E maiti i te haapii o vai o Iehova e e tavini ia ˈna e aore ra e rave mai ta tatou e hinaaro. Ia faaoti râ tatou i te tavini ia Iehova, e fanaˈo tatou i te hoê oraraa oaoa a muri aˈe. Ua ani te tahi taata ia Iesu ia haamanaˈo ia ˈna i muri aˈe i to ˈna pohe, ua haapapu atura Iesu ia ˈna: “Ei te paradaiso oe e o vau atoa.” (Luka 23:43) E haapii atu â tatou no nia ia Iesu Mesia e e nafea oia e faatupu ai i ta te Atua mau parau fafau.