1-3. Eaha te mau uiraa ta te taata e uiui nei e eaha te pahonoraa a te tahi mau haapaoraa?

 TE FAFAU ra te Bibilia ia tae i te hoê mahana, “e ore roa te pohe.” (Apokalupo 21:4) I roto i te pene 5, ua haapii tatou e nehenehe e tiaturi e fanaˈo i te ora mure ore maoti te hoo. Te pohe noa nei râ te taata. (Koheleta 9:5) Te vai ra ïa te tahi uiraa faufaa o te hiti mai, eaha te tupu ia pohe tatou?

² Mea faufaa roa ia ite i te pahonoraa ia pohe iho â râ tei herehia e tatou. E uiui paha tatou, ‘Eaha te tupu no ˈna? Te mauiui ra anei o ˈna? E nehenehe anei ta ˈna e tauturu mai? E farerei faahou anei tatou ia ˈna?’

³ Ua rau te pahonoraa a te mau haapaoraa. E haapii vetahi, e taata maitai anaˈe oe, e haere oe i te raˈi, e taata ino anaˈe, e haere i roto i te po auahi. E parau te tahi atu, ia pohe te hoê taata, e ora oia i roto i te ao varua e te mau fetii o tei pohe aˈena. Te vai atoa ra o te parau ra, e nehenehe tatou e ora faahou i roto i te hoê tino ê, tino taata anei aore ra tino animara.

4. Eaha te manaˈo e matara mai i roto i te mau haapiiraa a te mau haapaoraa no nia i te pohe?

⁴ E au ra mea taa ê ta tera e tera haapaoraa e parau ra. Te vai ra râ hoê manaˈo e matara mai i roto i ta ratou mau haapiiraa. E ora ˈtu te tahi mea ia pohe te taata. E parau mau anei râ?

5, 6. Eaha te tupu ia pohe tatou?

⁵ Ua ite o Iehova eaha te tupu ia pohe tatou e ua faaite mai oia ia pohe te taata, e faaea o ˈna i te ora. E pohe atoa ïa to ˈna mau huru e manaˈo. a Ia pohe tatou, eita tatou e ite, e faaroo e e feruri faahou.

⁶ Ua papai te arii Solomona, “aita . . . a te feia i pohe ra e parau itea.” Eita ratou e nehenehe e here aore ra e riri, “aore hoi e ohipa, aore e imiraa, aore hoi e ite, aore hoi e paari, i te apoo.”—A taio i te Koheleta 9:5, 6, 10.

7. Eaha ta Iesu i parau no nia i te pohe?

⁷ I te poheraa o to ˈna hoa Lazaro, ua na ô Iesu i ta ˈna mau pǐpǐ: “Te taoto nei to tatou hoa o Lazaro.” Aita Iesu i manaˈo te tamǎrû ra Lazaro ia ˈna. No reira oia i parau ai i muri aˈe: “Ua pohe Lazaro.” (Ioane 11:11-14) Ua faahohoˈa ïa Iesu i te pohe i te taoto. Aita oia i na ô ua haere Lazaro i te raˈi aore ra i roto i te ao varua e to ˈna fetii. Aita atoa i parau te haamauiuihia ra Lazaro i roto i te po auahi aore ra ua ora faahou i roto i te tahi atu tino taata aore ra animara. Ua parau râ, te taoto ra Lazaro i roto i te pohe. Te vai ra te tahi atu mau irava o te faahiti ra i te pohe mai te taotoraa. Te na ô ra te Bibilia a haapohehia ˈi Setephano, “taoto ihora oia i roto i te pohe.” (Ohipa 7:60) Ua papai atoa te aposetolo Paulo no te tahi mau Kerisetiano o tei pohe, “ua taoto ïa i roto i te pohe.”—Korinetia 1, 15:6.

8. Na te aha e faaite ra aita te Atua i poiete i te taata ia pohe ratou i muri aˈe?

 ⁸ Ua poiete anei te Atua ia Adamu e Eva ia pohe raua i muri aˈe? Aita! Ua hinaaro râ o Iehova ia oaoa raua e a muri noa ˈtu e te hoê tino oraora maitai. Ua poiete oia i te taata e te hinaaro ia ora e a muri noa ˈtu. A feruri na, e hinaaro anei te metua ia paari, ia ruau e ia pohe ta ˈna tamarii? Eita! Hoê â huru atoa no Iehova, eita roa ˈtu o ˈna e hinaaro ia pohe te taata. Teie nei râ, no te aha ïa tatou e pohe ai?

9. No te aha e ere te faaueraa ta Iehova i horoa ia Adamu e Eva i te mea fifi ia haapao?

⁹ I roto i te ô Edene, ua parau o Iehova ia Adamu: “E amu noa oe i to te mau raau atoa o te ô nei; area i to te raau e ite ai i te maitai e te ino, eiaha oe e amu i te reira; ei te mahana e amu ai oe i te reira, e pohe ïa oe.” (Genese 2:9, 16, 17) E ere tera faaueraa papu i te mea fifi ia haapao. E tiaraa atoa to Iehova no te parau ia Adamu e Eva eaha te mea maitai e eaha te mea ino. Ma te faaroo ia Iehova, e faaite raua i te auraro i to ˈna tiaraa, oia atoa i to raua mauruuru no te mau mea atoa ta ˈna i horoa ˈtu.

10, 11. (a) Mea nafea Satani i te turairaa ia Adamu e Eva ia faaroo ore i te Atua? (b) No te aha eita Adamu e Eva e nehenehe e imi i te otoheraa?

¹⁰ Ma te peapea, ua maiti Adamu e Eva i te faaroo ore ia Iehova. Ua parau Satani ia Eva: “Oia ïa, ua parau mai te Atua e, Eiaha orua e amu i to te mau raau atoa o te ô nei?” Pahono atura Eva: “E amu mâua i to te mau raau atoa o te ô nei; maori râ o to taua raau i ropu i te ô nei, ua parau mai ïa te Atua e, Eiaha orua e amu i to reira; eiaha hoi orua e rave noa ˈtu; a pohe orua.”—Genese 3:1-3.

¹¹ I muri iho, na ô atura Satani: “E ore roa orua e pohe: ua ite hoi te Atua e, ua amu anaˈe orua i to reira, e araara ïa to orua mata, e e riro orua mai te atua ra te huru, i te ite i te maitai e te ino.” (Genese 3:4-6) Ua hinaaro Satani ia manaˈo Eva e nehenehe ta ˈna e faaoti no ˈna iho eaha te mea maitai e eaha te mea ino. Aita atoa Satani i faaite i te parau mau no nia i te tupu ia faaroo ore Eva. Ua parau hoi, eita Eva e pohe, amu ihora te vahine i to te raau e hopoi atura te tahi na ta ˈna tane.  Ua ite Adamu e Eva ua parau o Iehova eiaha e amu i te reira. Aita raua i faaroo, ua maiti râ i te ofati i te hoê faaueraa papu e te au noa. Ua faaite raua i te faatura ore i to raua Metua î i te here i te raˈi. Eita roa raua e nehenehe e imi i te otoheraa ia faaorehia ta raua hara!

12. Ua faaroo ore Adamu e Eva ia Iehova, no te aha mea peapea mau?

¹² Auê te peapea ua faaite to tatou na metua matamua i te faatura ore i to raua Atua poiete! Eaha to oe huru ia orure hau te tahi tamarii ta oe i aupuru e ia rave o ˈna i ta oe i parau atu eiaha e rave? Eita anei oe e mauiui?

13. Eaha te auraa o ta Iehova parau “e hoˈi faahou atu â oe i te repo”?

¹³ I to raua faaroo-ore-raa, ua ere Adamu e Eva i te tiaturiraa e ora e a muri noa ˈtu. Ua na ô o Iehova ia Adamu: “E repo hoi oe, e e hoˈi faahou atu â oe i te repo.” (A taio i te Genese 3:19.) Te auraa, e riro faahou Adamu ei repo mai na mua ˈˈe hou o ˈna a poietehia ˈi. (Genese 2:7) Ua hara Adamu e i muri aˈe, ua pohe, riro atura ei repo, eiaha râ ei varua.

14. Eaha te tumu e pohe ai tatou?

¹⁴ Ahiri Adamu e Eva i faaroo i te Atua, te ora noa ra raua i teie mahana. I to raua râ faaroo-ore-raa, ua hara raua e pohe atura i muri aˈe. E au te hara i te hoê maˈi tupuna ino mau no ǒ mai i to tatou na metua matamua. Ua fanauhia tatou paatoa ei  feia hara e tera te tumu e pohe ai tatou. (Roma 5:12) E ere râ tera ta te Atua i opua no te huitaata. Aita roa te Atua i hinaaro ia pohe te taata e te parau ra te Bibilia, e “enemi” te pohe no tatou.—Korinetia 1, 15:26.

15. Maoti te parau mau, eita tatou e haavarehia e teihea mau haapiiraa hape?

¹⁵ Ua ite tatou i te parau mau no nia i te tupu ia pohe te taata. Te haapii mai ra te Bibilia, eita te feia pohe e mauiui. Eita tatou e nehenehe e paraparau atu e eita atoa ta ratou e nehenehe e na reira mai. Eita tatou e nehenehe e tauturu atu e eita atoa e tia ia ratou ia na reira no tatou. Eita tei pohe e nehenehe e haamauiui mai, eiaha ïa e mǎtaˈu ia ratou. E rave rahi râ haapaoraa o te haapii ra te ora ra tei pohe i te tahi vahi. E e nehenehe ta tatou e tauturu atu ma te aufau i te mau perepitero, aore ra te tahi atu mau tia haapaoraa, no te faaoti i te pure no ratou. I te mea râ ua ite tatou i teie nei i te parau mau no nia i te tupu ia pohe te taata, eita tatou e haavarehia!

16. Eaha te haapiiraa hape a te mau haapaoraa no nia i te tupu ia pohe te taata?

¹⁶ Te faaohipa ra Satani i te haapaoraa hape no te haavare i te taata e ia manaˈo ratou e ora ˈtu te tahi mea ia pohe tatou. Te haapii ra anei ta oe haapaoraa i te reira aore ra i ta te Bibilia e parau ra? Te haavare ra Satani i te taata ia ore ratou ia haafatata ˈtu ia Iehova.

17. No te aha te haapiiraa o te po auahi i riro ai ei faainoraa ia Iehova?

¹⁷ Mea ino roa ta te mau haapaoraa e haapii ra. Te vai ra o te parau ra e haamauiuihia te feia iino i roto i  te po auahi e a muri noa ˈtu. Ua riro tera haapiiraa ei faainoraa ia Iehova. Eita roa hoi oia e haamauiui i te taata mai tera! (A taio i te Ioane 1, 4:8.) Eaha to oe manaˈo i te taata o te faautua i te tamarii ma te tuu i to ˈna rima i roto i te auahi? Eita anei oe e manaˈo e taata ino mau oia? E hinaaro anei oe e riro ei hoa no tera taata? Tera mau ta Satani e hinaaro ia manaˈo tatou no Iehova na roto i tera haapiiraa!

18. No te aha eiaha tatou ia riaria i tei pohe?

¹⁸ Te parau atoa ra te tahi mau haapaoraa, e riro te feia pohe ei varua. Te haapii ra ratou e tia ia faatura e ia riaria atoa i te varua o tei pohe no te mea e nehenehe ratou e tauturu mai e aore ra e haamauiui mai. E rave rahi o tei vare i tera haapiiraa. No to ratou riaria, o te feia pohe ta ratou e haamori, eiaha râ o Iehova. A haamanaˈo na, ua pohe anaˈe te taata, ua pohe atoa to ˈna mau huru e manaˈo. Eiaha ïa e riaria, eita ratou e nehenehe e haamauiui mai. O Iehova te Atua mau e na ˈna i poiete ia tatou, o ˈna anaˈe ïa te tia ia haamori.—Apokalupo 4:11.

19. E faahiahia tatou i te aha maoti te ite papu no nia i te tupu ia pohe te taata?

¹⁹ Ua ite anaˈe tatou i te parau mau no nia i te tupu ia pohe te taata, eita tatou e haavarehia e te mau haapiiraa hape a te mau haapaoraa. E tauturu atoa mai tera ite papu ia faahiahia i te mau parau fafau a Iehova no to tatou oraraa a muri aˈe.

20. Eaha ta tatou e hiˈopoa i roto i te pene i mua ˈtu?

²⁰ Ua ani Ioba, te tahi tavini o te Atua i tahito ra: “Ia pohe te taata nei, e ora faahou anei?” (Ioba 14:14) E nehenehe mau anei tei pohe e ora faahou? Mea faahiahia mau te pahonoraa ta te Atua i horoa mai na roto i te Bibilia. E hiˈopoa tatou i te reira i te pene i mua ˈtu.