1. No te aha e mea maitai ai ia hinaaro tatou e haapii no nia i te mau melahi?

NO TE matau i te hoê taata, e titauhia na ia ite i te tahi mea no nia i to ’na utuafare. Oia atoa no te matau i te Atua ra o Iehova, e titauhia ia matau maitai a‘e i to ’na utuafare melahi. Te parau ra te Bibilia e e “mau tamarii . . . a te Atua” te mau melahi. (Ioba 38:7) No reira, eaha ta ratou hopoia i roto i te opuaraa a te Atua? Ua haa na anei ratou i roto i te mau ohipa a te taata i tahito ra? E mana anei to te mau melahi i nia i to outou oraraa? Mai te peu e e, e nafea ïa?

2. Nohea mai te mau melahi, e ehia ratou?

² E mau hanere taime to te Bibilia faahitiraa i te mau melahi. E hi‘o mai tatou i te tahi o tera mau faahitiraa no te haapii atu â no nia ia ratou. Nohea mai te mau melahi? Te na ô ra te Kolosa 1:16 no nia ia Iesu Mesia: “Na [“roto i to ’na arai,” Traduction du monde nouveau] i hamani[hia ’i] te mau mea atoa nei, o to te ra‘i, e to te fenua nei.” No reira, e mea hamanihia te mau varua atoa parauhia melahi e te Atua ra o Iehova na roto i te arai o ta ’na Tamaiti fanau tahi. Ehia melahi? Ia au i te Bibilia, e mau hanere mirioni  melahi tei hamanihia, e mea puai ana‘e ratou.—Salamo 103:20. *

3. Eaha ta te Ioba 38:4-7 e faaite maira no nia i te mau melahi?

³ Te faaite maira te Parau a te Atua, te Bibilia, e a haamauhia ’i te fenua, “ua pii noa te mau tamarii atoa a te Atua i te oaoa.” (Ioba 38:4-7) Mea maoro ïa to te mau melahi vai-mau-raa hou te taata a hamanihia ’i, hou atoa te poieteraa o te fenua. Te faaite atoa ra tera irava Bibilia e e huru aau to te mau melahi, te parauhia ra hoi e e “fatu” amui ratou “i te himene” ma te oaoa. A tapao na e o “te mau tamarii atoa a te Atua” te oaoa amui ra. I taua taime ra, e melo ana‘e te mau melahi no te hoê utuafare tahoê e tavini ra i te Atua ra o Iehova.

4. E nafea te Bibilia e faaite ai e te anaanatae ra te mau melahi haapao maitai i te ohipa a te taata?

⁴ Mai to ratou iho â iteraa i te poieteraa o na taata matamua, ua anaanatae roa te mau varua haapao maitai i te aanoraa o te utuafare taata e i te tupuraa o te opuaraa a te Atua. (Maseli 8:30, 31; Petero 1, 1:11, 12) A mairi ai râ te tau, ua tapao te mau melahi e ua faaea te rahiraa o te fetii taata i te tavini i to ratou Atua poiete î i te here. Eita e ore e ua peapea te mau melahi haapao maitai. Ia ho‘i râ te hoê taata ia Iehova ra, e “[oaoa] te mau melahi.” (Luka 15:10) I te mea e mea tâu‘a roa na te mau melahi te maitai o te feia e tavini ra i te Atua, e ere i te mea maere ia faaohipa noa Iehova i te mau melahi no te faaitoito e no te paruru i ta ’na mau tavini haapao maitai i te fenua nei. (A taio i te Hebera 1:7, 14.) E rave tatou i te tahi mau hi‘oraa.

5. Eaha te tahi mau hi‘oraa o te turu a te melahi e vai ra i roto i te Bibilia?

 ⁵ E piti melahi tei tauturu i te taata parau-tia ra o Lota e ta ’na na tamahine ia ora ’tu i te haamouraa o na oire ino ra o Sodoma e o Gomora ma te aratai ia ratou i rapaeau i taua vahi ra. (Genese 19:15, 16) Tau senekele i muri a‘e, ua hurihia te peropheta Daniela i roto i te apoo o te liona, aita râ oia i amuhia, e teie ta ’na i parau: “Ua tono mai tau Atua i tana melahi, e ua opani oia i te vaha o te mau liona.” (Daniela 6:22) I te senekele matamua o to tatou tau, ua faaora te hoê melahi i te aposetolo Petero mai te fare tapearaa mai. (Ohipa 12:6-11) Hau atu â, ua faaitoito te mau melahi ia Iesu i te omuaraa o ta ’na taviniraa i te fenua nei. (Mareko 1:13) E hou rii i to Iesu poheraa, ua fa ’tu te hoê melahi ia Iesu ra e “ua faaitoito . . . ia ’na.” (Luka 22:43) Eaha râ paha Iesu i te tamahanahanahia i taua mau taime faufaa roa ra o to ’na oraraa!

6. (a) E nafea te mau melahi e paruru ai i te nunaa o te Atua i teie mahana? (b) Eaha na uiraa ta tatou e hi‘opoa i teie nei?

⁶ I teie mahana, aita te mau melahi e fa tino faahou atu ra i te nunaa o te Atua i te fenua nei. Noa ’tu e eita te taata e nehenehe e ite mata ia ratou, te paruru noa ra te mau melahi puai a te Atua i to ’na nunaa i te mau mea ino i te pae varua iho â râ. Te na ô ra te Bibilia e: “Te patia nei te melahi a Iehova i te puhapa e ati noa ’‘e i te feia i mǎta‘u ia ’na, e ua faaora ia ratou.” (Salamo 34:7) No te aha teie mau parau e tamahanahana rahi ai ia tatou? No te mea te vai ra te mau varua ino atâta o te hinaaro ra e faaino ia tatou! O vai ratou? Nohea mai ratou? E nafea ratou e tamata ’i i te faaino ia tatou? No te ite i te pahonoraa, e hi‘opoa poto mai tatou i te hoê ohipa i tupu i te omuaraa o te tuatapaparaa o te taata.

7. I nia i teihea faito i noaa ’i ia Satani i te haafariu ê i te taata i te Atua?

⁷ Mai ta tatou i haapii i roto i te pene 3 o teie buka, ua atuatu hoê o te mau melahi i te hinaaro e faatere i nia ia vetahi  ê e ua patoi atura i te Atua. I muri a‘e, ua riro mai tera melahi ei Diabolo ra o Satani. (Apokalupo 12:9) I te roaraa fatata 1 600 matahiti i muri a‘e i to ’na haavareraa ia Eva, ua noaa ia Satani i te haafariu ê fatata i te taata atoa i te Atua, eiaha râ te tahi mau taata haapao maitai, mai ia Abela, ia Enoha e ia Noa.—Hebera 11:4, 5, 7.

8. (a) Mea nafea vetahi mau melahi i te riroraa ei demoni? (b) No te ora ’tu i te diluvi i te tau o Noa, eaha ta te mau demoni i rave?

⁸ I te tau o Noa, ua patoi te tahi atu mau melahi ia Iehova. Ua faarue ratou i to ratou parahiraa i roto i te utuafare i te ra‘i o te Atua, ua pou mai i nia i te fenua e ua rave i te tino i‘o. No te aha? Te taio ra tatou i roto i te Genese 6:2 e: “Ua hi‘o a‘era te tamarii a te Atua ra i te mau tamahine a te taata nei, e te maitai ra; ua rave ihora ratou i ta ratou i hinaaro ra ei  vahine.” Aita râ te Atua ra o Iehova i vaiiho i te mau ohipa a teie mau melahi e te haerea pi‘o o te huitaata ia tamau noa. Ua haamairi mai oia i nia i te fenua i te hoê diluvi rahi o tei haamou i te feia ino atoa e ua faaora i ta ’na noa mau tavini haapao maitai. (Genese 7:17, 23) Ua faarue atura te mau melahi, aore ra demoni, orure hau i to ratou tino i‘o e ua ho‘i i nia i te ra‘i ei varua. Ua turu ïa ratou i te Diabolo, o tei riro hoi ei “demoni rahi.”—Mataio 9:34.

9. (a) Eaha tei tupu i nia i te mau demoni i to ratou ho‘iraa i nia i te ra‘i? (b) Eaha ta tatou e hi‘opoa no nia i te mau demoni?

⁹ I to te mau melahi faaroo ore ho‘iraa i nia i te ra‘i, ua tuuhia ratou i te hiti, mai to ratou arii ra o Satani. (Petero 2, 2:4) Noa ’tu e eita ta ratou e nehenehe e rave faahou i te tino taata, te faaohipa noa ra ratou i te mana ino roa i nia i te taata. Inaha, na roto i tera mau demoni e “haavare” ai Satani “i to te ao atoa nei.” (Apokalupo 12:9; Ioane 1, 5:19) E nafea? Na mua roa, e faaohipa te mau demoni i te mau ravea faataahia no te haavare i te taata. (A taio i te Korinetia 2, 2:11.) E hi‘opoa tatou vetahi o tera mau ravea.

10. Eaha te peu tahutahu?

¹⁰ No te haavare i te taata, e faaohipa te mau demoni i te peu tahutahu. Te peu tahutahu, o te apiti-roa-raa ’tu ïa te hoê taata i te mau demoni aore ra na roto atoa i te arai o te hoê tahutahu. Te faahapa ra te Bibilia i te peu tahutahu e te faaara maira ia ape i te mau mea atoa i taaihia i te reira. (Galatia 5:19-21) E faaohipa te mau demoni i te peu tahutahu mai ta te feia ravaai e faaohipa i te ainu. Ua rau te ainu ta te hoê taata ravaai e faaohipa ia noaa mai te i‘a e rave rau. Oia atoa, e faaohipa te mau varua ino e rave rau huru peu tahutahu no te faahema i te mau huru taata atoa.

11. Eaha te peu hi‘ohi‘o, e no te aha e mea maitai ai ia ape tatou i te reira?

¹¹ O te peu hi‘ohi‘o te hoê ainu ta te mau demoni e faaohipa. Eaha te peu hi‘ohi‘o? O te tamataraa ïa i te ite eaha to a  muri a‘e aore ra no nia i te hoê mea matau-ore-hia. Te vai ra te tohuraa tapao, te faaohiparaa i te mau pere tarot, te hi‘oraa i te pôro kerehe, te tohuraa maoti te mau reni o te rima e te maimiraa i te mau tapao, aore ra tohu, miterio i roto i te mau moemoeâ. Noa ’tu e te mana‘o ra e rave rahi taata e e ere te peu hi‘ohi‘o i te mea ino, te faaite ra te Bibilia e hoê â ohiparaa ta te feia hi‘ohi‘o e te mau varua ino. Ei hi‘oraa, te faahiti ra te Ohipa 16:16-18 i te hoê “varua tairoiro” tei faaohipa i te hoê potii no te “tairoiro,” aore ra tohu. Aita râ i tia faahou i taua potii ra i to te demoni tiavaruraahia i rapaeau ia ’na.

12. No te aha e mea atâta ’i ia tamata i te paraparau i te feia pohe?

¹² Te tahi atu ravea e haavare ai te mau demoni i te taata, o te faaitoitoraa ïa ia ratou ia uiui i te feia pohe. E pinepine te feia e oto ra no te poheraa te hoê taata here, i te vare i te mau mana‘o hape no nia i te feia pohe. E horoa paha te hoê tahutahu i te tahi parau taa ê aore ra e paraparau paha oia ma te reo o te hoê taata pohe. Ei faahopearaa, mea rahi te taata e tiaturi ra e te ora mau ra te feia pohe e na roto i te paraparauraa ia ratou e nehenehe ai te feia ora e faaoromai i to ratou  oto. E “tamahanahanaraa” haavare mau râ tera e te atâta. No te aha? No te mea e nehenehe te mau demoni e rave i te reo o te hoê taata pohe e e faaite i te hoê tahutahu i te tahi parau no nia i te taata pohe. (Samuela 1, 28:3-19) Hau atu â, mai ta tatou i haapii i roto i te pene 6, ua faaea te feia pohe i te ora. (Salamo 115:17) Ua haavarehia ïa “te feia uiui i tei pohe” e te mau varua ino e aita ratou e haa ra ia au i te hinaaro o te Atua. (A taio i te Deuteronomi 18:10, 11; Isaia 8:19) No reira, e ara ana‘e i te patoi i teie ainu atâta faaohipahia e te mau demoni.

13. Ua tia i te taata e rave rahi i riaria na i te mau demoni ia aha?

¹³ Eita noa te mau varua ino e haavare i te taata, e faariaria atoa râ ratou. I teie mahana, ua ite Satani e ta ’na mau demoni e “e maa taime poto” noa to ratou e toe nei hou ratou a tapeahia ’i, e mea ino roa ’tu â ratou i teie nei. (Apokalupo 12:12, 17) Noa ’tu râ, ua tia i te mau tausani taata i ora na i te mau mahana atoa i roto i te riaria i te mau varua ino, ia tiamâ mai. Mea nafea ïa? Eaha ta te hoê taata e nehenehe e rave noa ’tu e ua rave ê na oia i te peu tahutahu?

14. Mai te mau Kerisetiano no te senekele matamua i Ephesia, e nafea e tia ’i ia tatou ia tiamâ mai i te mau varua ino?

¹⁴ Te faaite maira te Bibilia e nafea ia patoi i te mau varua ino e e nafea atoa ia tiamâ mai ia ratou. A hi‘o na i te mau Kerisetiano o te senekele matamua i te oire o Ephesia. I rave na vetahi o ratou i te peu tahutahu hou ratou a riro ai ei Kerisetiano. I to ratou faaotiraa e haapae i te peu tahutahu, ua aha ratou? Te parau ra te Bibilia e: “E rave rahi . . . to te feia peu huru ê i hopoi mai i ta ratou mau buka, ua tutui ihora i te auahi, i mua i te aro o te taata atoa.” (Ohipa 19:19) Na roto i te tutuiraa i ta ratou mau buka tahutahu i te auahi, ua vaiiho mai tera mau Kerisetiano apî i te hi‘oraa na te feia e hinaaro ra e patoi i te mau varua ino i teie mahana. E mea titauhia ia faarue te feia o te hinaaro ra e tavini ia Iehova, i te mau mea atoa i taaihia i te peu tahutahu, mai te mau buka, te mau  vea, te mau hoho‘a teata, te mau hoho‘a e te mau upaupa haruharuhia o te faaitoito ra i te peu tahutahu e o te faariro ra i te reira ei mea au e te anaanatae. Te vai atoa ra te mau taritoa aore ra te tahi atu mau mea e tuuhia i nia i te tino no te paruru i te taata i te ino.—Korinetia 1, 10:21.

15. No te patoi i te mau varua ino, ia aha tatou e tia ’i?

¹⁵ Tau matahiti i muri a‘e i to te mau Kerisetiano i Ephesia tutuiraa i ta ratou mau buka tahutahu i te auahi, ua papai te aposetolo Paulo ia ratou e: “Ta tatou e to nei o . . . te mau varua iino” ïa. (Ephesia 6:12) Aita te mau demoni i faaea. Te tamata noa ra ratou i te na nia ’‘e. Eaha ’tu â ïa ta taua mau Kerisetiano ra i rave e tia ’i? Ua parau Paulo e: “A rave . . . i te paruru ra o te faaroo, ei nia roa iho ïa, o te mea ïa e pohe ai te mau ihe auahi atoa a taua varua ino ra [o Satani].” (Ephesia 6:16) Ia puai noa ’tu â to tatou paruru o te faaroo, e puai noa ’tu â ïa ta tatou patoiraa i te mau varua ino.—Mataio 17:20.

16. E nafea tatou e nehenehe ai e haapuai i to tatou faaroo?

¹⁶ E nafea ïa tatou e nehenehe ai e haapuai i to tatou faaroo? Na roto ïa i te haapiiraa i te Bibilia. Ua taai-rahi-hia te paari o te hoê patu i te paari o to ’na niu. Oia atoa, ua taai-rahi-hia te aueue ore o to tatou faaroo i te paari o to ’na niu, oia hoi te ite mau i te Parau a te Atua, te Bibilia. Ia taio e ia haapii tatou i te Bibilia i te mau mahana atoa, e puai mai ïa to tatou faaroo. Mai te hoê patu paari, e paruru tera faaroo ia tatou i te mana o te mau varua ino.—Ioane 1, 5:5.

17. Eaha ’tu â te titauhia no te patoi i te mau varua ino?

¹⁷ Eaha ’tu â ta tera mau Kerisetiano i Ephesia i rave e tia ’i? Ua hinaaro atu â ratou i te parururaa no te mea te faaea ra ratou i roto i te hoê oire î i te peu demoni. No reira Paulo i parau ai ia ratou e: “Ma te pure tuutuu ore i te mau pure atoa ra, e te ani a te [v]arua ra.” (Ephesia 6:18) I te mea e te ora atoa nei tatou i roto i te hoê ao î i te peu demoni, e mea faufaa roa ia pure tatou ma te tuutuu ore ia Iehova no te ani i ta ’na parururaa faufaa roa no te patoi i te mau varua ino. Parau mau, e mea tia ia faaohipa tatou i te i‘oa o Iehova ia  pure tatou. (A taio i te Maseli 18:10.) No reira, e mea maitai ia tamau tatou i te pure i te Atua ia “faaora” ia tatou “i te [varua] ino,” te Diabolo ra o Satani. (Mataio 6:13) E pahono Iehova i tera mau pure tuutuu ore.—Salamo 145:19.

18, 19. (a) No te aha tatou e nehenehe ai e tiaturi e e upootia tatou i roto i ta tatou aroraa i te mau varua ino? (b) Eaha te uiraa e pahonohia i roto i te pene i muri nei?

¹⁸ Mea atâta te mau varua ino, eiaha râ tatou e riaria ia ratou ia patoi tatou i te Diabolo e ia haafatata ’tu tatou i te Atua na roto i te raveraa i to ’Na hinaaro. (A taio i te Iakobo 4:7, 8.) Mea taotiahia te mana o te mau varua ino. Ua faautuahia ratou i te tau o Noa, e e haava-mau-hia ratou i te pae hopea a muri a‘e. (Iuda 6) A haamana‘o atoa e e paruru te mau melahi puai a Iehova ia tatou. (Te mau arii 2, 6:15-17) Te hinaaro roa nei ratou ia manuïa tatou i te patoi i te mau varua ino. Te faaitoito nei te mau melahi parau-tia ia tatou, ei auraa parau. No reira, e faaea noa ana‘e i pihai iho ia Iehova e to ’na utuafare varua haapao maitai. E ape atoa ana‘e i te mau peu tahutahu atoa e e faaohipa noa ana‘e i te mau a‘oraa o te Parau a te Atua. (Petero 1, 5:6, 7; Petero 2, 2:9) E nehenehe ïa tatou e tiaturi e e upootia tatou i roto i ta tatou aroraa i te mau varua ino.

¹⁹ No te aha râ te Atua i faatia ’i i te mau varua ino e te ino o te haamauiui rahi ra i te taata? E pahonohia teie uiraa i roto i te pene i muri nei.