E NAFEA outou e faahoho‘a ’i i te Mahana Haavaraa? Mea rahi te mana‘o ra e e tia ’tu te mau miria taata, te tahi i muri i te tahi, i mua i te terono o te Atua. I reira te taata taitahi e haavahia ’i. E haamaitaihia vetahi i te paradaiso i nia i te ra‘i, e te tahi atu e faautuahia ïa i te haamauiuiraa mure ore. E hoho‘a ê râ ta te Bibilia e horoa ra no nia i taua tau ra. Te faataa ra te Parau a te Atua i te hoê tau tiaturiraa e te faaapîraa, eiaha râ i te hoê tau riaria.

I roto i te Apokalupo 20:11, 12, te taio nei tatou i te faataaraa a te aposetolo Ioane i te Mahana Haavaraa: “Ite atura hoi au i te hoê terono rahi teatea, e tei parahi i nia ihora, pee ê atura hoi te fenua e te ra‘i i to ’na mata, e aita ’tura o raua e vairaa i itea. E ite atura hoi au i tei pohe ra, o te taata rii, e te feia rarahi, i te tiaraa i mua i te Atua ra; e heua ihora na buka ra: e heua ihora hoi te tahi buka, oia te buka ora ra: e haavahia ihora taua feia i pohe ra i te mau parau i papaihia i roto i taua na buka ra, i ta ratou ra mau ohipa.” O vai te Haava e faataahia ra i ǒ nei?

O te Atua ra o Iehova te Haava hau ê o te huitaata. E horoa râ oia i taua noâ ohipa haavaraa ra i te tahi atu taata. Ia au i te  Ohipa 17:31, ua parau te aposetolo Paulo e “ua haapaohia e [te Atua] te mahana e haava mai ai oia i to te ao atoa nei ma te parau-tia, i te taata i haapaohia e ana ra.” O Iesu Mesia tei faatiahia mai teie Haava i haapaohia. (Ioane 5:22) Afea râ te Mahana Haavaraa e haamata ’i? Mai te aha te maoro?

Te faaite ra te buka Apokalupo e e haamata te Mahana Haavaraa i muri a‘e i te tama‘i o Aramagedo, ia mou te faanahoraa a Satani i te fenua nei. * (Apokalupo 16:14, 16; 19:19–20:3) I muri a‘e ia Aramagedo, e tapeahia Satani e ta ’na mau demoni i roto i te hoê abuso hoê tausani matahiti i te maoro. I taua tau ra, e riro na feia tufaa i te ra‘i 144 000 ei haava e e faatere ratou e “te Mesia ra ma te hau atoa, e hoê a‘era tausani i te matahiti.” (Apokalupo 14:1-3; 20:1-4; Roma 8:17) E ere te Mahana Haavaraa i te tahi tupuraa ru e 24 hora noa i te maoro. Hoê râ tausani matahiti.

I te roaraa o tera tau hoê tausani matahiti, e “haava” Iesu Mesia “i tei ora ra e tei pohe.” (Timoteo 2, 4:1) “Tei ora ra,” o te “feia rahi roa” ïa o te ora ’tu ia Aramagedo. (Apokalupo 7:9-17) Ua ite atoa te aposetolo Ioane i “tei pohe ra . . . i te tiaraa i mua” i te terono haavaraa. Mai ta Iesu i fafau, “e faaroo ai te feia atoa i roto i te apoo ra i tana [to te Mesia] reo, e e haere mai i rapae” maoti te tia-faahou-raa. (Ioane 5:28, 29; Ohipa 24:15) Ia au râ i te aha e haavahia ’i te taatoaraa?

Ia au i te orama a te aposetolo Ioane, “e heua ihora na buka ra,” e “e haavahia ihora taua feia i pohe ra i te mau parau i papaihia i roto i taua na buka ra, i ta ratou ra mau ohipa.” (Apokalupo 20:12) Ua papaihia anei te mau ohipa tahito a te taata i roto i tera na buka? Aita, eita te taata e haavahia ia au i ta ratou i rave na mua ’‘e ratou a pohe ai. Mea nafea to tatou iteraa i te reira? Te na ô ra te Bibilia e: “O te taata hoi i pohe ra, ua matara ïa oia i te ino [“ta ’na hara,” Traduction du monde nouveau] nei.” (Roma 6:7) E ho‘i mai ïa te feia e faatiahia mai i te ora ma te faaorehia ta ratou mau hara tahito. Te faataipe  ra ïa na buka i te tahi atu â mau titauraa a te Atua. No te ora e a muri noa ’tu, e mea tia ia auraro te feia e ora ’tu ia Aramagedo e te feia atoa e faatiahia mai i te mau faaueraa a te Atua, tae noa ’tu te mau titauraa apî atoa ta Iehova e faaite mai i te roaraa o na matahiti hoê tausani. No reira, e haavahia te taata ia au i ta ratou e rave i te roaraa o te Mahana Haavaraa.

I te roaraa o te Mahana Haavaraa, a tahi ra ïa te mau miria taata e fana‘o ai i te ravea e ite i te hinaaro o te Atua e e haapao i te reira. Te auraa, e tupu te hoê ohipa haapiiraa rahi. Oia mau, e “haapii . . . to te ao nei i te parau-tia i reira.” (Isaia 26:9) E ere râ o te taatoaraa te hinaaro e haapao i te hinaaro o te Atua. Te na ô ra te Isaia 26:10 e: “Faaherehere noâ i te taata paieti ore ra, e ore â oia e haapii i te parau-tia; ei te fenua parau-tia ra oia e rave ai i te parau-tia ore, e ore hoi e haapao i te hanahana o Iehova.” E haapohehia tera mau taata paieti ore e a muri noa ’tu i te roaraa o te Mahana Haavaraa.—Isaia 65:20.

Ia hope te Mahana Haavaraa, e “ora” roa te feia e ora ’tu ei taata tia roa. (Apokalupo 20:5) I te roaraa o te Mahana Haavaraa, e faaho‘ihia te huitaata i to ratou huru tia roa matamua ra. (Korinetia 1, 15:24-28) I muri a‘e, e tupu te hoê tamataraa hopea. E tuuhia mai Satani i to ’na tapearaa e e faatiahia oia ia haavare haere i te taata no te taime hopea. (Apokalupo 20:3, 7-10) E ite te feia e patoi ia ’na i te tupuraa hope roa o te parau fafau Bibilia e: “E parahi te feia parau-tia i nia i te fenua, e parahi tamau â ratou i reira.” (Salamo 37:29) Oia, e riro te Mahana Haavaraa ei haamaitairaa no te huitaata faaroo atoa!