1, 2. Teihea huru mauiui ta te taata e faaruru nei i teie mahana, a ui atu ai e rave rahi i teihea na uiraa?

I MURI a‘e i te hoê aroraa riaria roa i te hoê fenua tei amahamaha i te tama‘i, ua hunahia te mau tausani vahine e tamarii tivira pohe i roto i te hoê apoo rahi haaatihia e te mau satauro nainai. Ua papaihia i nia i te satauro taitahi: “No te aha?” I te tahi taime, tera te uiraa mauiui roa ’‘e. E ui te taata ma te peapea i tera uiraa ia haapohe te tama‘i, te ati, te ma‘i, aore ra te ohipa ino, i to ratou mau taata here hapa ore, ia vavahi te reira i to ratou fare, aore ra ia hopoi mai te reira i te mauiui eita e tia ia faataahia na roto i te tahi atu mau ravea. E hinaaro ratou e ite no te aha ratou e roohia ’i i taua mau ati ra.

² No te aha te Atua e faatia ’i i te mauiui? Mai te peu e mea puaihope, mea î i te here, mea paari e mea parau-tia te Atua ra o Iehova, no te aha te ao i î roa ’i i te riri e te parau-tia ore? Aita anei outou i ui a‘enei i teie mau mea ia outou iho?

3, 4. (a) Na te aha e faaite ra e e ere i te mea ino ia ui no te aha te Atua e faatia ’i i te mauiui? (b) Eaha to Iehova mana‘o i te ino e te mauiui?

³ Mea ino anei ia ui no te aha te Atua e faatia ’i i te mauiui? E taiâ vetahi i te ui a‘unei e mana‘ohia ’i e mea iti to ratou faaroo aore ra aita ratou e faatura ra i te Atua. Ia taio  râ outou i te Bibilia, e ite outou e i ui na vetahi feia haapao maitai e mǎta‘u ra i te Atua i tera atoa mau uiraa. Ei hi‘oraa, ua ui te peropheta Habakuka ia Iehova: “Eaha ra hoi oe i faaite mai ai i te ino, e ia hi‘o hoi au i te oto ra? te vai nei hoi te haru e te rave aroha ore i mua ia ’u nei: e te vai nei hoi te feia e faatupu i te mârô e te tama‘i.”—Habakuka 1:3.

⁴ Ua tama‘i anei Iehova i te peropheta haapao maitai ra o Habakuka no ta ’na uiraa? Aita. Ua haapapai râ te Atua i te mau parau haavare ore a Habakuka i roto i te Bibilia faaurua. Ua tauturu atoa te Atua ia ’na ia maramarama ’tu â i te mau mea e ia rahi atu â to ’na faaroo. Te hinaaro nei Iehova e na reira atoa i nia ia outou. A haamana‘o, te haapii ra te Bibilia e “te tiai” ra o ’na “ia outou.” (Petero 1, 5:7) Mea riri na te Atua te ino e te mauiui atoa ta te reira e faatupu ra hau a‘e i te taata atoa. (Isaia 55:8, 9) No te aha ïa te mauiui i rahi roa ’i i te ao nei?

5. Eaha te mau tumu i horoahia i te tahi taime no te faataa i te mauiui o te taata, eaha râ ta te Bibilia e haapii ra?

⁵ Ua ui te taata o te mau haapaoraa rau i ta ratou mau aratai e ta ratou mau orometua no te aha te mauiui i rahi  roa ’i. E pahono-pinepine-hia mai e o te hinaaro ïa o te Atua e mea maoro a‘enei to ’na faataaraa i te mau mea atoa e tupu, tae noa ’tu te mau ati. Ua parauhia i te taata e rave rahi e mea taa ore to te Atua mau e‘a aore ra e faatae mai o ’na i te pohe i nia i te taata—i nia atoa i te tamarii—ia nehenehe ratou e ora i nia i te ra‘i e o ’na. Mai ta outou râ i haapii, eita roa ’tu te Atua ra o Iehova e faatupu i te mea ino. Te na ô ra te Bibilia e: “Eiaha roa te parau ino ra e hurihia ’tu i te Atua! eiaha roa te Puaihope ia parauhia i te rave parau ino ra!”—Ioba 34:10.

6. No te aha e rave rahi taata e hape ai i te pari i te Atua e o ’na te tumu o te mauiui i te ao nei?

⁶ Ua ite anei outou no te aha te taata e hape ai i te pari i te Atua e o ’na te tumu o te mauiui atoa i te ao nei? E pinepine ratou i te pari i te Atua Puaihope no te mea te mana‘o ra ratou e o ’na te arii mau o teie nei ao. Aita ratou i ite i te hoê parau mau ohie, mea faufaa râ, ta te Bibilia e haapii ra. Ua ite outou i taua parau mau ra i roto i te pene 3 o teie buka. O te Diabolo ra o Satani te arii mau o teie nei ao.

7, 8. (a) E nafea te ao e faaite ai i te huru o to ’na arii? (b) E nafea te huru tia ore o te taata e te tau e te tupuraa mana‘o-ore-hia e riro atoa ’i ei tumu o te mauiui?

⁷ Te parau maitai ra te Bibilia e: “Te vai noa nei to te ao atoa i raro a‘e i taua varua ino ra.” (Ioane 1, 5:19) Ia feruri outou, e ere anei i te parau tano teie? Te faaite ra teie nei ao i te huru o te varua itea ore o te “haavare [ra] i to te ao atoa nei.” (Apokalupo 12:9) Mea ino roa, mea haavarevare e mea aroha ore o Satani. No reira te ao i raro a‘e i to ’na mana i î ai i te riri, te huru haavare e te aroha ore. Tera hoê tumu i rahi roa ’i te mauiui.

⁸ Te piti o te tumu i rahi roa ’i te mauiui, mai tei tatarahia i roto i te pene 3, oia ïa ua topa te huitaata i roto i te huru tia ore e te hara mai te orureraa hau mai â i roto i te ô Edene. Mea au na te taata hara e titau i te faatereraa, e o te tama‘i, te haavîraa e te mauiui te faahopearaa. (Koheleta 4:1;  8:9) Te toru o te tumu o te mauiui, o te “tau [ïa] e te tiaia noa,” aore ra tupuraa mana‘o-ore-hia. (A taio i te Koheleta 9:11.) I roto i te hoê ao aita o Iehova ei Arii paruru, e nehenehe te taata e mauiui no te mea tei te hoê vahi tano ore ratou i te taime tano ore.

9. No te aha tatou e nehenehe ai e tiaturi e e tumu papu ta Iehova no te faatia i te mauiui ia tamau noa?

⁹ Mea tamahanahana no tatou ia ite e eita iho â te Atua e faatupu i te mauiui. E ere o ’na te tumu o te tama‘i, te ohipa ino, te haavîraa, aore ra atoa te ati natura o te haamauiui nei i te taata. E mea faufaa râ ia ite tatou, No te aha Iehova e faatia ’i i teie mauiui atoa? Mai te peu e o ’na te Puaihope, e puai ïa to ’na no te tapea i te reira. No te aha ïa o ’na e ore ai e na reira? E tumu papu iho â ïa ta te Atua î i te here ta tatou i haapii i te ite.—Ioane 1, 4:8.

10. Eaha ta Satani i mârô, e mea nafea?

¹⁰ No te ite no te aha te Atua e faatia ’i i te mauiui, e mea hinaarohia ia mana‘o faahou tatou i te tau i haamata ’i te mauiui. I to Satani turairaa ia Adamu raua Eva ia faaroo ore ia Iehova, e tumu parau faufaa tei hiti mai. Aita Satani i mârô i te puai o Iehova. Ua ite atoa Satani e aita e otia to te puai o Iehova. Teie râ, ua mârô Satani i to Iehova tiaraa e faatere. Ma te parau e e haavare te Atua o te faaere ra i to ’na mau taata i te maitai, ua pari Satani ia Iehova ei arii ino. (A taio i te Genese 3:2-5.) Ua faahua parau Satani e e maitai a‘e te huitaata aita ana‘e te faatereraa a te Atua. E patoiraa teie i to Iehova mana arii, to ’na tiaraa e faatere.

11. No te aha Iehova i ore noa ’i i haamou i na orure hau i Edene?

¹¹ Ua patoi Adamu raua Eva ia Iehova. Mai te huru ra e ua parau raua: ‘Eita mâua e hinaaro ia Iehova ei Arii no mâua. E nehenehe mâua e faaoti no mâua iho eaha te mea maitai e eaha te mea ino.’ E nafea Iehova e nehenehe ai e pahono i taua parau ra? E nafea o ’na e nehenehe ai e haapii i ta ’na  mau mea ora maramarama atoa i poiete e ua hape na orure hau e o ta ’na raveraa te mea maitai roa ’‘e? E parau paha te hoê taata e ahani te Atua i haamou i na orure hau, a rave atu ai i te hoê haamataraa apî. I parau na râ Iehova i ta ’na opuaraa e faaî i te fenua i te huaai o Adamu raua o Eva, e ua hinaaro o ’na ia ora ratou i roto i te hoê paradaiso fenua. (Genese 1:28) E faatupu noa Iehova i ta ’na mau opuaraa. (Isaia 55:10, 11) Hau atu â i te reira, eita te haamouraa i na orure hau i Edene e pahono i te tumu parau i faahitihia no nia i to Iehova tiaraa e faatere.

12, 13. A faataa no te aha Iehova i faatia ’i ia Satani ia riro ei arii o teie nei ao e no te aha te Atua i faatia ’i i te taata ia faatere ia ratou iho.

¹² E rave na tatou i te hoê faahoho‘araa. A feruri na e te parau ra te hoê orometua haapii i ta ’na mau piahi e nafea ia faaafaro i te hoê fifi paari. E parau te hoê piahi maramarama, orure hau râ, e mea hape ta te orometua haapii huru faaafaroraa i te fifi. No te faaite e mea maua te orometua haapii, e onoono te piahi orure hau i te parau e ua ite o ’na i te hoê ravea maitai a‘e no te faaafaro i te fifi. E mana‘o te tahi mau piahi e ua tano o ’na, e e riro atoa ratou ei orure hau. E nafea ïa te orometua haapii? Mai te peu e e tiahi  oia i te mau orure hau i rapaeau i te piha, eaha ïa te faahopearaa i nia i te tahi atu mau piahi? Eita anei ratou e mana‘o e ua tano to ratou hoa haapiiraa e te mau piahi i turu ia ’na? E nehenehe te tahi atu â mau piahi atoa e ore e faatura faahou i te orometua haapii, ma te mana‘o e te taiâ ra oia i te hape. A feruri na râ e e faatia te orometua haapii i te orure hau ia faaite i te piha haapiiraa e nafea oia e faaafaro ai i te fifi.

¹³ Ua haa atoa Iehova mai te orometua haapii ra. A haamana‘o e e ere o na orure hau i Edene ana‘e to roto i taua tupuraa ra. Te mataitai noa ra e mau mirioni melahi. (Ioba 38:7; Daniela 7:10) E faahopearaa rahi to ta Iehova huru faaafaroraa i te orureraa hau i nia i taua mau melahi atoa ra e i nia i te mau mea maramarama atoa i poietehia. No reira, ua aha Iehova? Ua faatia oia ia Satani ia faaite e nafea oia e faatere ai i te huitaata. Ua faatia atoa te Atua i te taata ia faatere ia ratou iho i raro a‘e i te aratairaa a Satani.

14. Eaha te maitai e fana‘ohia maoti te faaotiraa a Iehova e faatia i te taata ia faatere ia ratou iho?

¹⁴ Ua ite te orometua haapii o ta tatou faahoho‘araa e ua hape te orure hau e te mau piahi e turu ra ia ’na. Ua ite atoa râ oia e o te piha taatoa te faufaahia ia faatia oia ia ratou ia tamata i te haapapu i to ratou mana‘o. Ia patore te mau orure hau, e ite ïa te mau piahi haavare ore atoa e o te orometua haapii ana‘e te tano ia faatere i te piha haapiiraa. E taa ia ratou no te aha te orometua haapii e tiavaru ai i muri iho i te mau orure hau atoa i rapaeau i te piha haapiiraa. Oia atoa, ua ite Iehova e o te taatoaraa o te taata e o te melahi aau haavare ore te faufaahia i te iteraa e ua patore Satani e to ’na mau hoa orure hau e eita e tia i te taata ia faatere ia ratou iho. Mai ia Ieremia i tahito ra, e haapii ratou i teie parau mau faufaa roa: “Ua ite hoi au, e Iehova, e ere tei te taata iho to ’na haerea; e ere hoi tei taua taata e haere ra i te haapao i to ’na taahiraa.”—Ieremia 10:23.

15, 16. (a) No te aha Iehova e faatia ’i i te mauiui ia maoro roa? (b) No te aha Iehova i ore ai i arai i te mau ohipa ino riaria?

¹⁵ No te aha râ Iehova e faatia ’i i te mauiui ia maoro roa? E no te aha oia i ore ai i arai i te mau ohipa iino ia tupu? E hi‘o mai na tatou e piti mea aita te orometua haapii o ta tatou faahoho‘araa i rave. A tahi, aita oia i tapea i te piahi orure hau ia ore e faataa i ta ’na ravea. A piti, aita te orometua haapii i tauturu i te piahi orure hau ia faaohipa i ta ’na ravea. E hi‘o atoa mai tatou e piti mea aita Iehova i faaoti e rave. A tahi, aita oia i tapea ia Satani e to ’na mau hoa ia ore e tamata i te haapapu e ua tano ratou. E mea titauhia ïa ia vaiiho i te taime. I na tausani matahiti o te tuatapaparaa o te taata, ua nehenehe te huitaata e tamata i te mau huru faatereraa atoa. Ua haere rii te huitaata i mua i te pae o te ihi e te tahi atu, tera râ, ua u‘ana roa ’tu â te parau-tia ore, te veve, te ohipa ino e te tama‘i. Te itehia ra i teie nei e aita te faatereraa a te taata i manuïa.

¹⁶ A piti, aita Iehova i tauturu ia Satani ia faatere i teie nei ao. Ahiri te Atua i arai i te mau ohipa ino riaria, ei hi‘oraa, aita anei ïa oia e turu mau ra i te mau orure hau? Aita anei te Atua e turai ra i te taata ia mana‘o e peneia‘e e nehenehe te taata e faatere ia ratou iho ma te fifi ore i muri a‘e? Ahiri Iehova i na reira, ua turu ïa oia i te hoê parau haavare. Teie râ, e “ore e tia i te Atua ia haavare.”—Hebera 6:18.

17, 18. Eaha ta Iehova e rave i nia i te ino atoa i tupu mai no te faatereraa a te taata e te mana o Satani?

¹⁷ E te ino atoa ïa i ravehia i te roaraa o te orureraa hau maoro i te Atua? Mea maitai ia haamana‘o tatou e mea puaihope Iehova. No reira, e nehenehe ta ’na e faaore i te mau faahopearaa o te mauiui o te huitaata e e na reira iho â oia. Mai ta tatou i ite ê na, e monohia te tuinoraa o to tatou paraneta e te riroraa te fenua ei paradaiso. E faaorehia te mau faahopearaa o te hara maoti te faaroo i te tusia taraehara o  Iesu, e te mau faahopearaa o te pohe maoti te tia-faahou-raa. E faaohipa hoi te Atua ia Iesu no te “haamou . . . i te ohipa a te diabolo.” (Ioane 1, 3:8) E faatupu Iehova i teie mau mea atoa i te taime tano maitai. E nehenehe tatou e oaoa e aita oia i ohipa na mua ’‘e, no te mea maoti to ’na faaoromai i nehenehe ai tatou e ite i te parau mau e e tavini ia ’na. (A taio i te Petero 2, 3:9, 10.) A tiai noa râ, te imi maite ra te Atua i te feia haamori haavare ore e te tauturu ra ia ratou ia faaoromai i te mauiui atoa ta ratou e nehenehe e faaruru i roto i teie nei ao arepurepu.—Ioane 4:23; Korinetia 1, 10:13.

¹⁸ E ui paha vetahi, ‘E nehenehe anei teie mauiui atoa e araihia ahiri te Atua i poiete ia Adamu e ia Eva ma te hoê huru eita e tia ia raua ia orure hau?’ No te pahono i teie uiraa, e mea faufaa ia haamana‘o outou i te hoê ô faufaa roa ta Iehova i horoa na outou.

19. Eaha te ô faufaa roa ta Iehova i horoa mai, e no te aha e mea maitai ai ia haafaufaa tatou i te reira?

¹⁹ Mai tei tapaohia i roto i te pene 5, ua poietehia te taata ma te tiamâraa e maiti. Te taa ra anei ia oe te faufaaraa o taua ô ra? Ua hamani te Atua e rave rahi animara, o te arataihia e te paari, aore ra ite faataa-ê-na-hia. (Maseli 30:24) Ua hamani te taata i te tahi mau matini e nehenehe e porotaramahia no te rave i te mau faaueraa atoa. E oaoa anei tatou ahiri te Atua i hamani ia tatou mai tera? Eita ïa, te oaoa nei tatou i te fana‘oraa i te tiamâraa e maiti i te huru taata e riro mai, i te huru oraraa e tapi, i te auhoaraa e faatupu, e te vai ra ’tu â. Mea au na tatou  e fana‘o maa tiamâraa, e tera ta te Atua e hinaaro ra ia fana‘o tatou.

20, 21. E nafea tatou e nehenehe ai e faaohipa maitai roa ’i i te ô o te tiamâraa e maiti, e no te aha e mea maitai ai ia hinaaro tatou e na reira?

²⁰ Eita Iehova e mauruuru i te hoê taviniraa e ravehia i raro a‘e i te faaheporaa. (Korinetia 2, 9:7) Ei hi‘oraa: Eaha ta te hoê metua e au a‘e—ia parau ta ’na tamarii “Mea here na ’u ia oe” no te mea ua faauehia o ’na ia na reira i te parau aore ra no to ’na aau tae? Teie ïa te uiraa, E nafea oe e faaohipa ’i i te tiamâraa e maiti ta Iehova i horoa ’tu? Mea ino roa ta Satani, ta Adamu e ta Eva faaohiparaa i te tiamâraa e maiti. Ua faarue ratou i te Atua ra o Iehova. Eaha ta oe e rave?

²¹ E nehenehe oe e faaohipa maitai roa i te ô faahiahia o te tiamâraa e maiti. E nehenehe oe e apiti i te feia atoa e turu ra ia Iehova. Te faaoaoa ra ratou i te Atua no te mea te haa rahi ra ratou i te haapapu e e haavare o Satani e e arii manuïa ore mau â oia. (Maseli 27:11) E nehenehe oe atoa e na reira ma te maiti i te huru oraraa maitai. E faataahia te reira i roto i te pene i muri nei.