1, 2. Eaha te rata ta Iehova i papai mai na tatou e no te aha o ˈna i na reira ˈi?

 UA PAPAI aˈenei te hoê taata herehia e faaea ra i te fenua atea i te hoê rata na oe? Eita e ore ua oaoa e ua putapû roa oe! Ua faaite mai o ˈna eaha to ˈna huru, te mau tupuraa ta ˈna i farerei e ta ˈna mau opuaraa no a muri aˈe. Noa ˈtu te atea, ua puai roa mai to orua here te tahi i te tahi.

² Eaha ˈtu â ïa tatou i te oaoa i te Bibilia, te rata ta to tatou Atua î i te here i papai mai! I roto, te faaite mai ra Iehova o vai o ˈna, eaha ta ˈna i rave, eaha ta ˈna e opua ra e rave e te vai ra ˈtu â. Ua horoa mai Iehova i ta ˈna Parau no te mea te hinaaro ra oia ia faafatata ˈtu tatou ia ˈna. Ua maiti to tatou Atua paari mau i te ravea maitai roa ˈˈe no te paraparau mai ia tatou. E itehia te paari hau ê o Iehova na roto i te ohipa ta ˈna i rave ia papaihia te Bibilia ia au i to ˈna mau manaˈo.

3. Mea nafea to Iehova horoaraa i te Ture ia Mose?

³ No te aha aita o Iehova i maiti i te paraparau tia roa mai i te taata mai te raˈi mai? Na mua ˈˈe, ua na reira iho â Iehova i te tahi taime ma te faaohipa i te mau melahi. O ta ˈna ïa i rave i to ˈna horoaraa i te Ture ia Iseraela. (Galatia 3:19) I te faarooraa te mau Iseraela i te reo puai mai te raˈi mai, ua riaria roa ratou e ani atura eiaha te Atua ia paraparau faahou ia ratou, ia faaohipa râ o ˈna ia Mose. (Exodo 20:18-20) Ua paraparau ïa Iehova ia Mose e ua horoa hoê hoê atu o ˈna hau atu i te 600 ture.

4. Eaha te nehenehe e tupu ahiri aita te Ture a te Atua i papaihia? A faataa.

⁴ Eaha te huru ahiri aita taua Ture ra i papaihia? E nehenehe  anei ta Mose e haamanaˈo e e faahiti ma te tano i te mau parau atoa o taua Ture i te nunaa? E tia anei ia ratou ia faahiti i te reira i ta ratou tamarii, mootua e hina? Ahani mea parau-vaha-noa-hia, eita te taatoaraa e papu maitai eaha mau na te mau ture a te Atua. A feruri na eaha te tupu mai ia faatia oe i te hoê aamu e na te tahi atu e faatia i te tahi atu e na reira noa ˈtu. I te hopearaa, mea ê roa ta te taata hopea e faaroo. Auaa aita i na reirahia no te mau ture a te Atua!

5, 6. Eaha ta Iehova i faaue ia Mose e no te aha e haamaitairaa no tatou ia fanaˈo i teie rata no ǒ mai ia Iehova?

⁵ Ma te paari, ua maiti Iehova i te haapapai i ta ˈna mau parau. Ua faaue oia ia Mose: “E papai oe i teie mau parau, no te mea te faaau nei au i te hoê faufaa ia oe e ia Iseraela ia au i teie mau parau.” (Exodo 34:27) I reira te haamataraahia i te papai i te Bibilia, oia hoi i te matahiti 1513 hou te tau o Iesu. E i te roaraa o na 1 610 matahiti i mairi i muri mai, i “paraparau na te Atua . . . e rave rahi taime e na roto i te ravea rau” i na 40 tiahapa feia papai Bibilia. (Hebera 1:1) Ua ara te mau papai parau aravihi e te haapao maitai eiaha te mau Papai ia tauihia, ia faahereherehia râ te reira i te roaraa o te tau ia fanaˈo tatou i teie mahana.​—Ezera 7:6; Salamo 45:1.

⁶ Ma te haapapai i ta ˈna Parau, ua haamaitai mau â Iehova ia tatou. Ua faatae ê mai na anei te tahi taata herehia i te hoê rata o tei tamahanahana mau ia oe i te taime hinaarohia? Eita e ore ua faaherehere e ua na nia iho e na nia iho noa oe i te taio i te reira! Hoê â atoa no te Parau a te Atua. E rata te reira no ǒ mai ia Iehova, ua haapapai oia i te reira ia nehenehe tatou ia taio e ia feruri tamau i ta ˈna mau parau ia noaa ia tatou “te tamahanahanaraa a te mau Papai.”​—Salamo 1:2; Roma 15:4.

7. E nafea te paari o Iehova e itehia ˈi i to ˈna maitiraa na te taata e papai i ta ˈna Parau?

⁷ Ma te paari, ua maiti Iehova na te taata e papai i ta ˈna Parau. A feruri na: Ahiri Iehova i horoa i tera tapura ohipa na te mau melahi, e putapû anei to tatou aau? Parau mau, ia au i ta ratou i ite no nia ia Iehova, e nehenehe te mau melahi e faataa i te huru o Iehova e te tumu e here ai ratou ia ˈna. E tia atoa ia ratou ia faatia i te aamu o te mau tavini haapao maitai a te Atua. Tera râ, mea taa ê roa te mau melahi. Mea tia roa e mea puai aˈe ratou, mea rahi aˈe to ratou ite e ua poiete-ê-na-hia ratou na mua ˈˈe ia tatou. I to oe manaˈo, mea ohie anei no tatou ia taa e ia putapû i ta ratou mau parau?​—Hebera 2:6, 7.

8. Eaha Iehova i rave ia fanaˈo tatou i te Bibilia? (A hiˈo atoa i te nota i raro i te api.)

⁸ Na roto i te maitiraa i te taata no te papai i ta ˈna Parau, ua horoa mai Iehova i ta tatou e hinaaro mau, oia hoi te hoê buka papaihia i “raro aˈe i te aratairaa a te varua o te Atua” o te nehenehe e haaputapû i te aau o te taata. (Timoteo 2, 3:16) Mea nafea to ˈna raveraa i te reira? I te rahiraa o te taime, e au ra e ua vaiiho oia ia faaohipa te feia papai i to ratou iho feruriraa no te maiti i “te mau parau au” e “te mau parau papu o te parau mau.” (Koheleta 12:10, 11) Ia hiˈopoa tatou i tera e tera buka Bibilia, ua tapao paha tatou mea taa ê te huru papairaa. No te aha mea tera ˈi? No te mea mea taa ê tera e tera taata papai Bibilia, e na reira atoa to ratou huru oraraa e tupuraa. a Tera râ, ua faahiti ratou i  “te mau parau no ǒ mai i te Atua a arataihia ˈi ratou e te varua moˈa.” (Petero 2, 1:21) No reira e nehenehe ai e parau o te Bibilia “te parau . . . a te Atua.”​—Tesalonia 1, 2:13.

9, 10. No te aha to tatou aau e putapû e e mahanahana ˈi a taio ai i te Bibilia?

⁹ Te putapû e te mahanahana ra anei to oe aau a taio ai i te Parau a te Atua? Auaa ïa Iehova i faaohipa i te taata no te papai i te Bibilia, e feia hoi ratou mai ia tatou te huru. Ei feia tia ore, ua faaû ratou i te fifi e te faateimaharaa mai ia tatou. I te tahi taime, ua aratai te varua o Iehova ia ratou ia papai no te faaite i to ratou huru. (Korinetia 2, 12:7-10) No reira ratou i papai ai ma te faahiti i ta ratou iho mau parau, eita te mau melahi e nehenehe e na reira.

¹⁰ E rave anaˈe i te hiˈoraa o te arii Iseraela o Davida. I muri aˈe i to ˈna raveraa i te hara ino mau, ua papai Davida i te hoê salamo ma te haamahora i to ˈna aau atoa e ma te taparuparu ia faaore te Atua i ta ˈna hara. Ua papai oia: “A tamâ ia ˈu i ta ˈu hara. Ua ite maitai hoi au i ta ˈu mau hapa, e tei mua noa ta ˈu hara ia ˈu. Inaha, ua fanauhia vau e te hapa, e taata hara vau mai te taime mai â i hapû ai to ˈu metua vahine ia ˈu. Eiaha e tiavaru ia ˈu mai mua mai ia oe. Eiaha e hopoi ê i to varua moˈa ia ˈu nei. Te tusia ta te Atua e au, o te huru aau tatarahapa ïa. Eita oe e patoi i te hoê aau tatarahapa e te haehaa, e te Atua e.” (Salamo 51:2, 3, 5, 11, 17) Na roto i teie mau parau, te taa ra anei ia oe te oto e te hepohepo o Davida? O te hoê anaˈe taata tia ore mai ia tatou te huru te nehenehe e faataa i te reira!

11. No te aha Iehova i haapapai ai e rave rahi aamu Bibilia?

¹¹ Te vai ra te tahi atu tumu e putapû ai to tatou aau i te Bibilia. E rave rahi aamu Bibilia o te faatia ra i te tupuraa o te feia o tei tavini i te Atua e tei ore i tavini ia ˈna, eaha te  mau fifi ta ratou i faaruru e te mau haamaitairaa ta ratou i fanaˈo. E ite atoa tatou i te mau faahopearaa o ta ratou mau faaotiraa. Ua papaihia taua mau aamu ra “ei haapiiraa ia tatou.” (Roma 15:4) E ravea atoa tera no Iehova no te haaputapû i to tatou aau. E rave anaˈe i te tahi mau hiˈoraa.

12. E nafea te mau aamu Bibilia no nia i te feia taiva e tauturu mai ai ia tatou?

¹² Te faatia atoa ra te Bibilia i te aamu o te feia taiva e te ino, e na reira atoa to ratou hopearaa. Maoti tera mau aamu, e taa maitai ia tatou eaha te mau huru au ore ta ratou i faaite. Ei hiˈoraa, e nehenehe noa te Bibilia e parau mai mea ino ia taiva i te hoê hoa. Tera râ, e putapû aˈe to tatou aau ia taio tatou eaha ta Iuda Isakariota i rave no te taiva ia Iesu. (Mataio 26:14-16, 46-50; 27:3-10) E horuhoru te aau e mea ohie aˈe atoa ia taa eaha te mau huru e titauhia ia tatou ia haapae.

13. E nafea te Bibilia e tauturu ai ia tatou ia taa eaha te mau huru maitatai e titauhia ia faatupu?

¹³ E faatia atoa te Bibilia i te aamu o te mau tavini haapao maitai e rave rahi a te Atua. A ite ai i to ratou hiˈoraa taiva ore, e taa ia tatou eaha te mau huru maitatai e titauhia ia faatupu no te riro ei hoa no te Atua. E rave anaˈe i te hiˈoraa o te faaroo. Te faataa ra te Bibilia eaha te faaroo e no te aha mea faufaa roa te reira ia mauruuru mai te Atua ia tatou. (Hebera 11:1, 6) Tera râ, ua faatia-atoa-hia i roto i te Bibilia te aamu o te feia tei faaite i te faaroo puai i te Atua. A feruri na i te faaroo o Aberahama a pûpû ai ia Isaaka. (Genese, pene 22; Hebera 11:17-19) Na roto i taua mau aamu ra, e taa maitai atu â ia tatou eaha te faaroo. Aita Iehova i faaitoito noa mai ia faatupu i teie mau huru maitatai, ua horoa roa mai râ o ˈna i te hiˈoraa ia ite tatou e nafea ia faatupu i te reira. Auê Iehova i te paari e!

14, 15. Eaha ta te Bibilia e faatia ra no nia i te hoê vahine ivi tei haere i te hiero e eaha ta tatou e haapii no nia ia Iehova?

¹⁴ Pinepine te mau aamu Bibilia i te haapii mai no nia i te  huru o Iehova. A feruri na i te aamu o te vahine ivi ta Iesu i ite i roto i te hiero. A parahi noa ˈi Iesu i pihai iho i te mau afata ô, ua mataitai oia i te taata ia tuu atu i te moni i roto. Mea rahi te feia taoˈa rahi tei horoa i “ta ratou moni hau ei ô.” Ua mau râ te mata o Iesu i nia i te hoê vahine ivi veve o te tuu ra “e piti moni huˈa haihai roa.” b Tera anaˈe ta ˈna moni. Ua faahiti Iesu i to Iehova manaˈo: “Mea rahi aˈe ta teie vahine ivi veve i tuu i ta tera mau taata atoa.” No Iehova, mea rahi aˈe te ô a teie vahine ia amuihia te ô a te mau taata taoˈa rahi atoa.​—Mareko 12:41-44; Luka 21:1-4; Ioane 8:28.

¹⁵ E ere anei i te mea faahiahia? I rotopu i te mau taata atoa tei haere mai i te hiero i taua mahana ra, o te hiˈoraa o teie vahine ivi tei haafaufaahia! Na roto i teie hiˈoraa, te haapii mai ra Iehova e Atua oia o te mauruuru i te mau ô horoahia ma te aau tae, noa ˈtu mea iti te reira ia faaauhia i ta vetahi ê. E ere anei i te mea mahanahana ta Iehova huru haapiiraa ia tatou?

16, 17. E nafea te paari o Iehova e itehia ˈi na roto i ta ˈna i maiti i te ore e faaite i roto i ta ˈna Parau?

¹⁶ Ia papai oe i te hoê rata na te hoê taata herehia, eita oe e nehenehe e faatia pauroa. E feruri maite ïa oe eaha ta oe e papai. Ua maiti atoa Iehova i te faatia i te aamu e te tupuraa o te tahi noa mau taata i roto i ta ˈna Parau. Eita râ te Bibilia e faaite pauroa i te mau mea rii atoa. (Ioane 21:25) Ei hiˈoraa, aita paha tatou i maramarama maitai no te aha Iehova i faautua ˈi i te tahi taata. E ite-atoa-hia ïa te paari o  Iehova na roto i ta ˈna i maiti i te faatia, oia atoa râ na roto i ta ˈna i maiti i te ore e faaite i roto i ta ˈna Parau.

¹⁷ Ua papaihia te Bibilia no te tauturu ia tatou ia ite i to tatou huru o roto. Te na ô ra te Hebera 4:12: “E mea ora hoi te parau [aore ra te poroi] a te Atua e te puai rahi, e mea oi aˈe i te mau ˈoˈe ua oi na pae e piti. E ô te reira i roto roa i te taata, a taa ê atu ai to ˈna rapaeauraa e to ˈna rotoraa . . . e faaite mai te reira i te mau manaˈo e opuaraa o te aau.” E turai te Bibilia ia tatou ia ite i to tatou mau paruparu, ia hiˈopoa i to tatou mau manaˈo hohonu e te tumu e rave ai tatou i te tahi ohipa. Pinepine te feia o te taio i te Bibilia ma te hoê feruriraa faahapahapa i te turori i te mau aamu aita te mau haamaramaramaraa atoa ta ratou e hinaaro. Eita paha ratou e tiaturi e Atua î i te here, te paari e te parau-tia o Iehova.

18, 19. (1) No te aha eiaha tatou ia turori ia ore tatou e maramarama maitai no nia i te hoê aamu Bibilia? (2) Eaha te titauhia no te taa i te Parau a te Atua e e nafea te reira e haapapu ai i te paari rahi o Iehova?

¹⁸ Ia ore tatou e maramarama maitai no nia i te hoê aamu Bibilia, eita tatou e turori mai te peu e hiˈopoa maite tatou i te Bibilia ma te aau tae. Ei hiˈoraa: Ia faanaho tatou i te mau tuhaa o te hoê hohoˈa rahi tâpûpûhia, eita paha tatou e ite oioi mai i te tahi tuhaa taa maitai aore ra aita tatou e ite ra e nafea te hoê tuhaa e ô ai i roto. Teie râ, ua navai noa paha te mau tuhaa i tapiripiri-aˈena-hia ia taa ia tatou mai te aha te huru o te hohoˈa i te pae hopea. Oia atoa, ia haapii tatou i te Bibilia, e ite mǎrû noa mai tatou i te huru mau o Iehova. Noa ˈtu eita tatou e taa oioi i te hoê aamu aore ra aita tatou e ite ra e nafea te reira e tuati ai i te huru o te Atua, e navai noa ta tatou i haapii aˈena no nia ia Iehova no te papu e Atua î i te here e te parau-tia oia.

¹⁹ No te taa i te Parau a te Atua, e titauhia ia taio e ia haapii i te reira ma te aau tae e te hoê feruriraa tano. E nehenehe te taata e papai i te buka o “te feia paari e te maramarama”  anaˈe te taa. No te papai râ i te hoê buka o te feia aau tae anaˈe te taa, e titauhia ïa te paari, e ere anei? O te Atua anaˈe te nehenehe e rave i te reira!​—Mataio 11:25.

20. No te aha o Iehova anaˈe te nehenehe e faaite mai eaha te huru oraraa o te faaoaoa ia tatou e eaha ta tatou e ite mai i roto i te Bibilia?

²⁰ I roto i ta ˈna Parau, te faaite mai ra Iehova eaha te huru oraraa o te faaoaoa ia tatou. Na ˈna i poiete ia tatou, mea ite aˈe iho â ïa oia i to tatou mau hinaaro, oia hoi ia herehia tatou, ia oaoa i te oraraa e ia fanaˈo tatou i te hoa mau. Tera te hinaaro o te mau taata atoa. I roto i te Bibilia, e ite mai tatou i te mau aˈoraa “paari mau” o te tauturu mai ia ora ma te oaoa. (Maseli 2:7) E faataa te pene hopea o te tuhaa tataitahi o teie buka e nafea ia faaohipa i te mau aˈoraa paari e vai ra i roto i te Bibilia. E rave anaˈe i te tahi hiˈoraa.

21-23. Eaha te mau aˈoraa paari o te tauturu ia tatou ia faaea i te riri e te inoino?

²¹ Ua tapao aˈenei oe pinepine eita te feia o te inoino noa e oaoa? Mea teimaha roa ia tapea noa i te inoino, e rohirohi te feruriraa, eita e topa te hau e eita atoa tatou e oaoa. Te faaite ra te mau maimiraa a te mau taote e nehenehe te inoino e te riri e faatupu i te maˈi mafatu e te tahi atu mau maˈi tamau. Ua papai-ê-na-hia i roto i te Bibilia teie parau paari: “A tuu i te riri e a faarue i te riri rahi.” (Salamo 37:8) E nafea râ tatou e na reira ˈi?

²² Te horoa mai ra te Parau a te Atua i teie aˈoraa paari: “I te feruriraa haroˈaroˈa e ore ai te hoê taata e riri hanoa, e mea nehenehe ia ore oia ia tâuˈa i te hara.” (Maseli 19:11) Te hoê taata e feruriraa haroˈaroˈa to ˈna, eita o ˈna e tâuˈa noa i te parau aore ra te ohipa a vetahi ê, e feruri râ o ˈna i te tumu i na reira ˈi ratou. Ia tutava tatou i te feruri i te huru e te tupuraa o te taata, e tauturu te reira ia ore e manaˈo ino e e riri ia vetahi ê.

 ²³ Teie te tahi atu aˈoraa Bibilia: “A faaoromai noa i te tahi e te tahi, . . . a faaore noa ˈtu ïa i ta ˈna hapa.” (Kolosa 3:13) Ma te “faaoromai noa i te tahi e te tahi,” eita ïa tatou e riri aore ra e inoino ia rave vetahi ê i te tahi ohipa mea au ore na tatou. Eita atoa tatou e apeape ia ratou. Ia faaore tatou i te hapa, te maiti ra tatou i te faaea i te riri e i te manaˈonaˈo i te ohipa ta ratou i rave. Ua ite to tatou Atua paari mea titauhia ia faaore tatou i ta vetahi ê hapa, hau roa ˈtu â e tumu papu anaˈe te vai ra no te na reira. E ere noa no te maitai o vetahi ê, no tatou atoa râ, ia vai hau noa to tatou feruriraa e aau. (Luka 17:3, 4) E aˈoraa paari mau te itehia i roto i te Parau a te Atua!

24. Eaha te tupu ia haapao tatou i te mau aˈoraa paari a Iehova?

²⁴ No to Iehova here rahi ia tatou, ua faaohipa o ˈna i te taata maoti te aratairaa a te varua moˈa no te papai i ta ˈna rata ia tatou. E “nehenehe iho â e tiaturi” i te mau aˈoraa Bibilia no ǒ mai ia Iehova ra. (Salamo 93:5) Ia haapao tatou i te reira ma te faaite atoa ˈtu ia vetahi ê, e piri atu â tatou i to tatou Atua paari mau. I roto i te pene i muri nei, e tauaparau tatou i te tahi atu tuhaa o te paari o Iehova, oia hoi e nehenehe o ˈna e ite atea eaha te tupu a muri aˈe ia manuïa ta ˈna opuaraa.