1-3. (1) No te aha tatou e mauruuru ai ia Iehova? (2) Eaha ta Iehova e titau mai ra ia tatou?

 A FERURI na to nia oe i te hoê pahi e tomo ra. I te taime mau e manaˈo ai oe aita e ravea faahou, te tae mai nei te hoê taata no te tauturu ia oe. Topa te hau a na ô ai oia: “Eiaha e haapeapea faahou, ua ora oe i teie nei!” Ahani aita o ˈna, ua pohe oe! Eita anei oe e mauruuru i tera taata o tei tauturu ia oe?

² Te faahohoˈa maitai ra teie tupuraa i ta Iehova i rave no tatou. Papu roa te mauruuru mau nei tatou ia ˈna. Inaha hoi, ua horoa oia i te hoo ia nehenehe tatou ia faaorahia i te hara e te pohe.Te oaoa nei tatou i te ite ia faatupu tatou i te faaroo i te tusia o Iesu, e faaorehia ta tatou mau hara e e nehenehe tatou e tiaturi e ora e a muri noa ˈtu. (Ioane 1, 1:7; 4:9) Mai ta tatou i ite i roto i te pene 14, ua riro te hoo ei haapapuraa rahi roa ˈˈe e Atua parau-tia Iehova o te here ra ia tatou. E nafea tatou ia haamauruuru ia ˈna?

³ I te mea na Iehova i faaora ia tatou, mea tano ia feruri eaha ta ˈna e titau mai ra ia tatou. Te na ô ra Iehova na roto i te peropheta Mika: “Ua faaite o ˈna ia oe i te mea maitai, e te taata e. E eaha ta Iehova e titau mai ra ia oe maori râ ia faaohipa i te parau-tia, ia hinaaro i te taiva ore, e ia haere ma te aau faahaihai e to Atua?” (Mika 6:8) A tapao na, te ani mai ra Iehova ia “faaohipa i te parau-tia.” E nafea tatou e na reira ˈi?

4. E nafea tatou e ite ai te hinaaro ra Iehova ia ora tatou ia au i ta ˈna mau ture aveia tia?

⁴ Te hinaaro ra Iehova ia ora tatou ia au i ta ˈna mau ture  aveia no nia i te mea maitai e te mea ino. Ma te na reira, te tapi ra ïa tatou i te parau-tia no te mea mea tia anaˈe ta Iehova mau ture aveia. Te parau ra te Isaia 1:17: “A haapii i te rave i te mea maitai, a imi i te parau-tia.” Te faaitoito mai ra te Parau a te Atua ia “imi i te parau-tia” e ia “ahu mai i te huru taata apî tei poietehia ia au i te hinaaro o te Atua i te parau-tia.” (Zephania 2:3; Ephesia 4:24) Ia faahitihia te parau-tia, aita ïa e ino, e peu viivii e e peu taotoraa tia ore, e ere hoi teie mau mea i te mea moˈa.​—Salamo 11:5; Ephesia 5:3-5.

5, 6. (1) No te aha e ere i te mea teimaha ia haapao i te mau ture aveia a Iehova? (2) E nafea te Bibilia ia faaite e titauhia ia tutava tamau no te tapi i te parau-tia?

⁵ Mea teimaha anei no tatou ia haapao i te mau ture aveia tia a Iehova? E ere. Ia here tatou ia Iehova, e oaoa tatou i te haapao i ta ˈna mau titauraa i roto i to tatou oraraa. (Ioane 1, 5:3) A haamanaˈo na “mea au na ˈna te ohipa parau-tia.” (Salamo 11:7) No te tapi i te parau-tia, mea titauhia ia au tatou i ta Iehova e au ra e ia faufau i te mea ta ˈna e faufau ra.​—Salamo 97:10.

⁶ E ere i te mea ohie no te taata tia ore ia tapi i te parau-tia. Mea titauhia hoi ia tatara i te huru taata tahito e ta ˈna ra mau peu e ia ahu mai i te huru taata apî tei “faaapîhia na roto i te ite mau.” (Kolosa 3:9, 10) E titauhia ïa ia tutava tamau. E noa ˈtu ta tatou mau tutavaraa, e nehenehe iho â tatou e hape na roto i te manaˈo, te parau e ta tatou mau ohipa no te mea e taata hara tatou.​—Roma 7:14-20; Iakobo 3:2.

7. Eaha to tatou huru ia ore tatou e rave i te mea tia i te aro o Iehova?

⁷ Eaha to tatou huru ia ore tatou e rave i te mea tia i te aro o Iehova? Parau mau, e hape tatou, eiaha râ te reira ia riro ei otoheraa no te rave i te ino. Eiaha atoa râ e haaparuparu a manaˈo atu ai eita e tano faahou ia tavini tatou ia Iehova. Ua rave to tatou Atua î i te here i te hoê faanahoraa no te  feia e tatarahapa ma te haavare ore. A hiˈo na i te mau parau a te aposetolo Ioane: “Te papai atu nei au i teie mau parau ia ore outou e rave i te hara.” I muri iho râ, teie te parau mahanahana ta ˈna i faahiti: “Ia rave noa ˈtu râ te tahi taata i te hara [no to ˈna huru tia ore], e tauturu to tatou tei te Metua ra, o Iesu Mesia te taata parau-tia.” (Ioane 1, 2:1) Oia, ua horoa Iehova i te tusia o Iesu ia nehenehe tatou e fanaˈo faahou i ta ˈna farii maitai no te tavini ia ˈna. Eita anei te reira e turai ia tatou ia tamau i te tutava no te faaoaoa ia Iehova?

8, 9. E nafea te pororaa i te parau apî oaoa e haapapu ai e Atua parau-tia Iehova?

⁸ E faaohipa tatou i te parau-tia a apiti ai i te ohipa pororaa o te parau apî oaoa o te Faatereraa arii a te Atua. E nafea?

⁹ Eita Iehova e haamou i teie ao ino ma te ore e faaara na mua i te taata. I roto i ta ˈna parau tohu no nia i te tupu i te anotau hopea, ua parau Iesu: “Na mua râ, ia porohia te parau apî oaoa i te mau nunaa atoa.” (Mareko 13:10; Mataio 24:3) Na roto i te parau “na mua râ,” te faaite ra Iesu e ohipa ê atu te tupu i muri aˈe i te ohipa pororaa e ravehia na te ao atoa. Oia mau, e tupu te hoê ati rahi e ia hope te reira, e haamouhia te feia ino e e itehia te parau-tia i nia i te fenua. (Mataio 24:14, 21, 22) Eita te hoê e nehenehe e parau aita ta Iehova ohipa i tano. Na roto hoi i te ohipa pororaa, ua faaara Iehova i te taata ia taui i to ratou haerea no te ora ˈtu i te haamouraa.​—Iona 3:1-10.

10, 11. E nafea ta tatou pororaa i te parau apî oaoa e faaite ai te rave ra tatou i te mea tia i te aro o Iehova?

¹⁰ E nafea ta tatou pororaa i te parau apî oaoa e faaite ai te rave ra tatou i te mea tia i te aro o Iehova? Na mua roa,  mea faufaa no Iehova ia tauturu tatou ia vetahi ê ia ora ˈtu. A feruri na o oe te taata i tauturuhia i roto i te faahohoˈaraa i nia roa. Tei nia oe i te pahi e te toe noa ra te taata i roto i te miti, eita anei oe e tauturu ia ratou? Oia atoa, e hopoia na tatou ia tauturu i te feia o te nehenehe e pohe ia haamouhia teie ao ino. Parau mau, mea rahi o te patoi ra i ta tatou poroi. Mea faaoromai râ Iehova, e hopoia ïa na tatou ia tauturu i te taata atoa ia “tatarahapa” e ia ora ˈtu i te haamouraa.​—Petero 2, 3:9.

¹¹ E faaite atoa tatou i te parau-tia ma te ore e maitiiti i te taata ta tatou e poro. A haamanaˈo “e ore te Atua e maitiiti i te taata, i roto râ i te mau nunaa atoa, e farii oia i te taata o te mǎtaˈu ia ˈna e o te rave i te mea tia.” (Ohipa 10:34, 35) Eiaha ïa tatou ia ru i te haava ia vetahi ê. E poro anaˈe râ i te taata atoa noa ˈtu eaha to ratou nunaa, to ratou tiaraa e ta ratou faufaa. E nehenehe ïa ratou e faaroo e e farii i te parau apî oaoa.​—Roma 10:11-13.

12, 13. (1) No te aha eiaha tatou ia ru i te haava ia vetahi ê? (2) Eaha te auraa o te aˈoraa a Iesu ia “faaea i te haava” e ia “faaea i te faahapa”? (A hiˈo atoa i te nota i raro i te api.)

¹² E faaohipa atoa tatou i te parau-tia ma te pee i to Iehova huru i nia ia tatou. Mea ohie roa ia haava, ia faahapa e ia manaˈo ino ia vetahi ê. O vai i rotopu ia tatou o te hinaaro ia na reira mai Iehova? E ere râ Iehova mai tera. Ua na ô hoi te papai salamo: “Ahani oe e tapaopao i te mau hapa, e Ia, o vai te taata e mau, e Iehova?” (Salamo 130:3) Eita anei tatou e mauruuru eita to tatou Atua parau-tia e te aroha hamani maitai e tiatonu i nia i ta tatou mau hape? (Salamo 103:8-10) Eaha to tatou huru i nia ia vetahi ê e tia ˈi?

¹³ Mai te peu ua taa ia tatou mea aroha hamani maitai to  tatou Atua parau-tia, eita tatou e ru i te haava ia vetahi ê no te tahi mea e ere i te ohipa na tatou aore ra no te tahi hapa rii. I roto i ta ˈna Aˈoraa i nia i te mouˈa, ua faaara Iesu: “A faaea i te haava ia ore outou ia haavahia.” (Mataio 7:1) Area i roto i ta Luka faatiaraa, ua parau Iesu: “A faaea i te faahapa, e ore roa ïa outou e faahapahia.” a (Luka 6:37) Ua taa ia Iesu pinepine te taata tia ore i te haava e i te faahapa ia vetahi ê. E titauhia ïa i te taata atoa e na reira ra ia faaea i te haava.

14. No te aha e titauhia ia tatou ia “faaea i te haava” ia vetahi ê?

¹⁴ No te aha e titauhia ia tatou ia “faaea i te haava” ia vetahi ê? Te tahi tumu, e ere no tatou tera tiaraa. Te haamanaˈo mai ra te pǐpǐ ra o Iakobo: “Hoê noa Iriti ture e Haava,” oia hoi o Iehova. No reira Iakobo i haaferuri ai ia tatou na roto i teie mau parau: “O oe râ, o vai ïa oe no te haava i to oe taata tupu?” (Iakobo 4:12; Roma 14:1-4) Hau atu â, no to tatou huru tia ore, e hape ohie noa tatou a haava ˈi ia vetahi ê. E nehenehe te manaˈo oti noa, te teoteo, te pohehae e te manaˈo mea maitai aˈe tatou ia vetahi ê e taui i ta tatou huru hiˈoraa i to tatou taata tupu. Eaha ˈtu â te tahi tumu no te “faaea i te haava”? Oia hoi, eita tatou e nehenehe e ite eaha to roto i te aau o te taata, aita atoa tatou i ite i te huru mau e te tupuraa ta ratou e faaruru ra. O vai hoi ïa tatou no te haava e no te faahapa i to tatou mau taeae e tuahine i roto i ta ratou taviniraa i te Atua? Mea maitai aˈe ia pee tatou i te hiˈoraa o Iehova ma te tiatonu i nia i te mau huru maitatai o te mau taeae e tuahine, eiaha râ i nia i to ratou mau paruparu!

15. Eaha te mau parau e te ohipa eiaha ia itehia i roto i te utuafare o te mau tavini a te Atua e no te aha?

 ¹⁵ Mai tera atoa anei tatou i nia i te mau mero o to tatou utuafare? Mea faufaa te tiaturi e te hau i roto i te utuafare. Te mea peapea râ i teie mahana, i reira mau te mau parau faahapa e te mauiui e faahitihia ˈi. Mea pinepine tatou i te faaroo ua parau iria, ua hamani ino, ua tupai te tahi tane, vahine aore ra metua i te hoê mero o to ratou utuafare. Eiaha roa râ ei parau ino, ei parau faahaama aore ra faahaehaa e te hamani ino i roto i te utuafare o te mau tavini a te Atua! (Ephesia 4:29, 31; 5:33; 6:4) E titauhia ia haapao i te aˈoraa ia “faaea i te haava” e ia “faaea i te faahapa” i roto atoa i te utuafare. A haamanaˈo, no te faaohipa i te parau-tia, mea titauhia ia haa tatou i nia ia vetahi ê mai ia Iehova e haa ra i nia ia tatou. E “Atua here rahi Iehova,” eita o ˈna  e haamauiui i te feia e here ra ia ˈna na roto i te parau e te ohipa! (Iakobo 5:11) Auê ïa hiˈoraa faahiahia mau no tatou!

16, 17. (1) Eaha ta Iehova e titau ra i te mau matahiapo? (2) Eaha te titauhia ia rave ia ore te taata i hara e tatarahapa e no te aha?

¹⁶ E hopoia na tatou paatoa ia faaohipa i te parau-tia, area te mau matahiapo, e tavini ratou i roto i te amuiraa no te faatupu i te parau-tia a Iehova. A tapao na i te parau tohu no nia i te “huiarii” i roto i te Isaia: “Inaha, e faatere te hoê arii no te parau-tia, e e mana mai te huiarii no te ohipa afaro.” (Isaia 32:1) Oia, te titau ra Iehova ia rave te mau matahiapo i te mea tia i to ˈna aro. E nafea ratou e na reira ˈi?

¹⁷ Ua ite maitai teie mau taeae faatoroahia paari i te pae varua, e titauhia ia haapao i te mea tia i te aro o Iehova ia vai viivii ore noa te amuiraa. I te tahi taime, mea titauhia ia haava te mau matahiapo ia rave te hoê i te hara. Tera râ, e haamanaˈo ratou e Atua aroha hamani maitai Iehova, e tutava ïa ratou i te tauturu i tei rave i te hara ia tatarahapa. Eaha râ te tupu ia ore te taata i hara e na reira? E faaohipa te mau matahiapo i te parau-tia a Iehova ma te haapao i teie faaueraa Bibilia: “A tiavaru atu i te taata ino i rapae i te amuiraa.” (Korinetia 1, 5:11-13; Ioane 2, 9-11) E peapea te mau matahiapo ia rave ratou i taua faaotiraa ra, ua ite râ ratou mea titauhia te reira ia moˈa noa te amuiraa. E tamau ratou i te tiaturi ia tae i te hoê mahana, e nehenehe te taata i hara e tatarahapa a hoˈi mai atu ai i te amuiraa.​—Luka 15:17, 18.

18. Eaha ta te mau matahiapo e haamanaˈo ia horoa ratou i te aˈoraa Bibilia ia vetahi ê?

¹⁸ E faatupu atoa te mau matahiapo i te parau-tia a Iehova ma te horoa i te aˈoraa Bibilia. E ere te auraa e moemoe  te mau matahiapo i ta vetahi ê hapa no te aˈo atu, eita atoa ratou e ru i te faatitiaifaro i te taime iho â e hapa ˈi te tahi. Tera râ, “ia haere te tahi taata na te eˈa e hapa ˈi oia hou oia a haroˈaroˈa ˈi,” e tamata te mau matahiapo i te “faatitiaifaro ia ˈna ma te mǎrû.” (Galatia 6:1) Eaha te tumu? Te haamanaˈo ra ratou e ere hoi Iehova i te Atua etaeta e te ino. No reira, eita ratou e paraparau ma te iria aore ra e faahiti i te parau teimaha i te hoê taata o tei hape. E horoa râ ratou i te aˈoraa ma te here ia farii e ia faaitoito te reira ia ˈna. Mai te peu noa ˈtu e titauhia ia faaite tia te matahiapo mea hape te haerea o te tahi taeae aore ra tuahine, e haamanaˈo ratou e mamoe teie o te nǎnǎ a Iehova. b (Luka 15:7) Ia taa-maitai-hia na te here i turai i te matahiapo ia aˈo e ia faatitiaifaro, e farii ohie aˈe tei hapa i ta ratou tauturu.

19. Eaha te mau faaotiraa e titauhia i te mau matahiapo ia rave e eaha ta ratou e haapao a rave ai i te faaotiraa?

¹⁹ Pinepine te mau matahiapo i te rave i te faaotiraa o te nehenehe e taui i te oraraa o te mau taeae e tuahine. Ei hiˈoraa, i te tahi taime, e hiˈopoa te mau matahiapo ua faaî anei te tahi taeae i te mau titauraa Bibilia no te riro ei matahiapo aore ra ei tavini tauturu. E vaiiho ratou na te manaˈo o te Atua e aratai ia ratou i roto i ta ratou mau faaotiraa, eita râ ratou e haapao noa i to ratou iho manaˈo. E faaohipa ïa ratou i te parau-tia “ma te ore e faahapa ru noa e ma te ore e maitiiti i te taata.”​—Timoteo 1, 5:21.

20, 21. (1) Ia au i te Isaia 32:1, 2, eaha ta te mau matahiapo e tutava i te riro e no te aha ratou e na reira ˈi? (2) Eaha ta te mau matahiapo e nehenehe e rave no te tauturu i “te feia e hepohepo ra”?

²⁰ E faaohipa te mau matahiapo i te parau-tia a te Atua na  roto atoa i te tahi atu ravea. I muri aˈe i to ˈna tohuraa e tavini te mau matahiapo no “te ohipa afaro,” ua na ô Isaia: “E riro ratou tataitahi ei tapuniraa i te mataˈi, ei haapuraa i te vero ûa, mai te taheraa pape i te fenua pape ore, mai te marumaru o te tahi mato rahi i te tahi fenua mǎrô.” (Isaia 32:1, 2) E tutava ïa te mau matahiapo i te riro ei tamahanahanaraa e ei faaitoitoraa no to ratou mau hoa faaroo.

²¹ I teie mahana, mea rahi te mau fifi e hepohepo ai te mau tavini a Iehova, e hinaaro ïa ratou i te faaitoitoraa. E te mau matahiapo, eaha ta outou e nehenehe e rave no te tauturu i “te feia e hepohepo ra”? (Tesalonia 1, 5:14) A faaroo atu ia ratou ma te aumauiui. (Iakobo 1:19) Ia teimaha to ratou aau no te ahoaho, e hinaaro paha ratou e paraparau i te hoê hoa ta ratou e tiaturi. (Maseli 12:25) A haamanaˈo ia ratou mea here-rahi-hia ratou e Iehova e to  ratou mau taeae e tuahine. (Petero 1, 1:22; 5:6, 7) E nehenehe atoa outou e pure e o ratou e no ratou, mea mahanahana roa hoi ia faaroo i te hoê matahiapo o te pure ma te aau tae. (Iakobo 5:14, 15) No te Atua parau-tia, mea faufaa ta outou mau tutavaraa î i te here no te tauturu i tei hepohepo.

22. E nafea tatou ia faaohipa i te parau-tia a Iehova e eaha te faahopearaa?

²² Oia mau, e faafatata ˈtu â tatou ia Iehova ia faaohipa tatou i ta ˈna parau-tia! Ia ora tatou ia au i ta ˈna mau ture aveia tia, ia poro tatou i te parau apî oaoa o te faaora ia vetahi ê e ia imi tatou i te mea maitai i roto i te taata, te faaohipa ra tatou i te parau-tia a te Atua. E te mau matahiapo, ia haapao outou i te mea tia i te aro o te Atua ia moˈa noa te amuiraa, ia horoa outou i te aˈoraa Bibilia faaitoito mau, ia rave outou i te mau faaotiraa ma te ore e maitiiti i te taata e ia tauturu outou i te feia o te hepohepo ra, te faaohipa ra outou i te parau-tia a te Atua. Auê Iehova i te oaoa a ite ai mai nia mai i te raˈi i to ˈna nunaa e tutava ra i te “faaohipa i te parau-tia” a haere noa ˈi e to ratou Atua!