1, 2. I teihea taime Iesu i te riri-roa-raa e no te aha?

 I TO ˈNA haereraa mai i te hiero, ua ite Iesu i te tahi mea i riri roa ˈi oia. I te mea e taata haehaa oia, mea fifi paha no oe ia feruri te riri ra Iesu. (Mataio 21:5) Ua haavî râ oia i to ˈna riri, e itoito hoi to ˈna no te mea tia. a No te aha râ teie riri to ˈna? No te hoê ïa ohipa tia ore roa.

² Mea faufaa roa te hiero i Ierusalema no Iesu. I tera tau, tera anaˈe te vahi moˈa i faataahia no te haamori i to ˈna Metua i te raˈi. Noa ˈtu te atea, e haere mai te ati Iuda no te mau fenua e rave rahi i reira no te haamori ia Iehova. Ua na reira atoa te feia no te mau nunaa ê o te mǎtaˈu i te Atua e e tomo ratou i roto i te aua o te hiero i faataahia no ratou. I te omuaraa râ o ta ˈna taviniraa, ua tomo Iesu i roto i te hiero e ua ite atu oia i te hoê ohipa tia ore mau. Ua riro taua vahi ra ei vahi hoohooraa, eiaha faahou râ ei fare no te haamori ia Iehova! Ua î te reira i te feia hoo animara e te feia taui moni. Eaha hoi te vahi ino? Ua faariro teie mau taata i te hiero o te Atua ei vahi taviriraa e eiâraa taata. Mea nafea?​—Ioane 2:14.

3, 4. Eaha te ohipa tia ore i ravehia i te fare o Iehova e eaha ta Iesu i rave?

³ Ua faaoti te mau aratai haapaoraa hoê noa huru moni te nehenehe e faaohipahia no te aufau i te tute i te hiero. Ua titauhia ia taui te feia o te ratere mai i Ierusalema i ta  ratou moni ia noaa mai taua huru moni ra. No reira, ua faatia te feia taui moni i ta ratou mau iri i roto roa i te hiero e ua faaaufau atoa i te tahi moni hau. Ua ona-roa-hia teie feia i te hooraa i te animara i roto i te hiero. E nehenehe te mau ratere o te hinaaro e pûpû i te tusia e hoo mai i te animara i te feia hoo atoa i roto i te oire, aita râ i papu e fariihia te reira. Area te hoohia mai i te hiero, mea papu ïa! I te mea e aita iho â ta te taata e ravea, e tuu te feia hoo i te moni o te animara i nia roa. b Ua taviri e ua eiâ mau ratou i te taata!

⁴ Aita Iesu i farii i teie ohipa tia ore! O te fare hoi tera o to ˈna iho Metua! Ua hamani oia i te hoê hui i te taura e ua tiahi i te mau puaatoro e te mau mamoe i rapae i te hiero. Haere vitiviti atura oia i te feia taui moni ra e huri atura i ta ratou mau iri. A feruri na i te moni atoa e topa haere ra i raro i nia i te tahua! Aˈo atura oia i te mau taata e hoo ra i te uupa: “A afai i teie mau mea i rapae!” (Ioane 2:15, 16) No te itoito rahi ta Iesu i faaite, aita i roaa i te taata ia parau i te tahi noa ˈˈe mea.

5-7. (1) A ora ˈi pihai iho i to ˈna Metua i te raˈi, eaha ta Iesu i haapii no nia i te parau-tia e eaha ta tatou e haapii mai na roto i to ˈna hiˈoraa? (2) Mea nafea Iesu i te haapapuraa ua hape ta Satani mau pariraa e eaha ta Iesu e rave a muri aˈe?

⁵ Ua hoˈi faahou mai te feia hoohoo. Fatata toru matahiti i muri aˈe, ua tiahi faahou Iesu ia ratou i rapae i te hiero  e ua faahiti i ta Iehova i parau no te faahapa i te feia tei faariro i to ˈna fare “ei ana no te eiâ.” (Ieremia 7:11; Mataio 21:13) I to Iesu iteraa mea nafea teie feia nounou rahi i te eiâraa i te taata e i te haaviiviiraa i te hiero o te Atua, ua rave atoa oia mai ta to ˈna Metua i rave. Ua haapii hoi Iesu e rave rahi mirioni matahiti e to ˈna Metua i te raˈi. Ua taa roa ia Iesu eaha to Iehova manaˈo no nia i te mea tia e te mea tia ore. No reira, ia hinaaro tatou e taa eaha te parau-tia no Iehova, e haapii ïa tatou na roto i te hiˈoraa o Iesu Mesia.​—Ioane 14:9, 10.

⁶ To reira te Tamaiti otahi a Iehova i to Satani pari-haavare-raa ia Iehova e faahaparaa i ta ˈna huru faatereraa. Auê ïa parau haavare e! I muri aˈe, ua faaroo atoa te Tamaiti ia Satani i te parauraa eita te taata e tavini ia Iehova ma te aau taatoa e ma te here. Ua haamauiui mau teie mau pariraa i te aau o Iesu. I to ˈna râ iteraa e faaohipa to ˈna Metua ia ˈna no te haapapu mea hape ta Satani mau pariraa, ua oaoa roa oia! (Korinetia 2, 1:20) E nafea Iesu ia rave i te reira?

⁷ Mai ta tatou i haapii i roto i te pene 14, ua haapapu Iesu Mesia e ua hape ta Satani mau pariraa no nia i ta ˈna mau melahi e ta ˈna mau tavini i nia i te fenua. Na roto i to ˈna taiva ore, ua haamoˈa Iesu i te iˈoa o Iehova e ua haapapu atoa ta Iehova anaˈe te huru faatereraa maitai roa ˈˈe. A muri aˈe, ei Aratai rahi, e ara Iesu ia faatupu to te raˈi e to te fenua i te parau-tia a te Atua. (Ohipa 5:31) I te roaraa o to ˈna oraraa i nia i te fenua, ua haapao noa Iesu i te mea tia i te aro o Iehova. Ua parau Iehova no nia ia Iesu: “E tuu vau i to ˈu varua i nia ia ˈna, e na ˈna e faataa maitai i te feia o te mau nunaa ěê eaha te parau-tia.” (Mataio 12:18) Mea nafea to Iesu faatupuraa i taua mau parau ra?

8-10. (1) Mea nafea te mau ture a te mau aratai ati Iuda i te turairaa ia hae i te mau taata e ere i te ati Iuda e ia haafaufaa ore i te vahine? (2) Mea nafea ratou i te faateimaharaa i te taata na roto i ta Iehova ture no nia i te Sabati?

⁸ Mea faufaa roa no Iesu te Ture a Iehova e ua ora oia ia au i te reira. Ua taviri râ e ua faaohipa hape te mau aratai haapaoraa o to ˈna tau i taua Ture ra. Ua parau Iesu ia ratou: “Haavarevare ma, ua ati outou te mau papai parau e te mau Pharisea, . . . ua haapae râ outou i te mau mea faufaa aˈe o te Ture, oia hoi te parau-tia, te aroha hamani maitai e te taiva ore.” (Mataio 23:23) Aita iho â ïa taua mau orometua haapii ture i faataa maitai “eaha te parau-tia,” ua haapoiri râ ratou i te parau-tia a te Atua. Mea nafea hoi? Teie te tahi mau hiˈoraa.

⁹ Ua faaue Iehova i to ˈna nunaa ia faataa ê mai i te mau nunaa ěê e haaati ra ia ratou. (Te mau arii 1, 11:1, 2) Ua faaitoito râ te tahi mau aratai haapaoraa etaeta ia hae i te taata atoa e ere i te ati Iuda. I roto i te buka ture a te mau aratai ati Iuda, te vai atoa ra teie faaueraa: “Eiaha te animara faaamu ia vaiihohia i roto i te fare e farii i te mau ratere no te nunaa ê no te mea e nehenehe ratou e taoto i te animara.” E ere taua mau manaˈo ino ra i te feia e ere i te ati Iuda i te mea tano e aita roa ˈtu tera haapiiraa i roto i te ture ta Iehova i horoa ia Mose! (Levitiko 19:34) Ua haafaufaa ore te tahi mau ture a te mau aratai ati Iuda i te vahine. Ei hiˈoraa: A hahaere ai, e faaea noa te vahine i muri mai i ta ˈna tane, eiaha râ na te hiti mai. Eiaha te hoê tane ia paraparau i te hoê vahine i te vahi taata, tae noa ˈtu i ta ˈna iho vahine. Mai te mau tîtî, eita te mau vahine e faatiahia ia riro ei ite i mua i te tiripuna. Te vai atoa ra te hoê pure oti noa ta te mau tane e faahiti no te haamauruuru i te Atua e ere ratou i te vahine.

¹⁰ Ua huna te mau aratai haapaoraa i te Ture a te Atua i raro aˈe i ta ratou mau ture, eita ˈtu ra te taata e taa faahou  eaha ta Iehova e titau ra. Ei hiˈoraa, e opani te ture ia rave i te ohipa i te Sabati no te faataa i tera mahana no te haamori e no te faafatata ˈtu ia Iehova e no te faafaaea. Ua faateimaha râ te mau Pharisea i te taata. Na ratou noa hoi i faaoti eaha te ohipa e nehenehe e rave e te opanihia ia rave. E 39 ohipa e opanihia ia rave mai te ootiraa e te aˈuaˈuraa i te animara. Ua painu roa te taata, i uiui noa na hoi ratou: Ia haapohe te taata i te hoê manumanu i te Sabati, te aˈuaˈu ra anei oia i te animara? Ia hutihuti oia maa huero sitona a amu atu ai, te ooti ra anei oia? Ia faaora oia i te hoê taata maˈi, te rave ra anei oia i te ohipa? Aita râ te mau aratai haapaoraa i faaea noa i reira, ua haamau ratou i te mau ture etaeta roa ˈtu â.

11, 12. Mea nafea to Iesu patoiraa i te mau ture haamauhia e te mau Pharisea?

¹¹ Ua nafea Iesu no te tauturu i te taata ia taa eaha te parau-tia? Na roto i ta ˈna mau haapiiraa e to ˈna huru oraraa, ua patoi Iesu ma te mǎtaˈu ore i te mau aratai haapaoraa. Ei hiˈoraa, ua faahapa oia i ta ratou mau ture e rave rahi a na ô ai: “Te haafaufaa ore ra ïa outou i te parau a te Atua na roto i ta outou peu tumu ta outou i tuu atu.”​—Mareko 7:13.

¹² Ua haapapu maitai Iesu ua hape ta te mau Pharisea huru hiˈoraa i te ture o te Sabati. Ua faataa Iesu o te Mesia “te Fatu o te Sabati” e e tiaraa ïa to ˈna no te faaora i te taata i te Sabati. (Mataio 12:8) No te haapapu maitai i tera manaˈo, ua faaora semeio Iesu i te maˈi i te Sabati i mua i te taata e rave rahi. (Luka 6:7-10) Te faaite mai ra te reira e faaora atoa Iesu i te maˈi i nia i te fenua i te roaraa o na 1 000 matahiti e faatere ai oia. E riro tera tau ei Sabati rahi, eita te feia haapao maitai atoa e faateimaha-faahou-hia e te hara e te pohe. E tau faafaaearaa mau ïa!

13. Eaha te ture apî ta Iesu i haamau e no te aha mea taa ê i te ture i horoahia ia Mose?

¹³ Ua faataa atoa Iesu eaha te parau-tia ma te haamau i te hoê ture apî parauhia “te ture a te Mesia,” ta te mau pǐpǐ a Iesu i haapao i muri aˈe. (Galatia 6:2) Mea taa ê “te ture a te  Mesia,” e ere hoi i te hoê anairaa ture papaihia mai te ture i horoahia ia Mose, ua niuhia râ te reira i nia i te mau haapiiraa tumu no ǒ mai i te Atua. I roto i “te ture a te Mesia,” te vai atoa ra te tahi mau faaueraa taa maitai mai teie “faaueraa apî” ta Iesu i haapii i ta ˈna mau pǐpǐ, ia here te tahi i te tahi mai ia ˈna i here ia ratou. (Ioane 13:34, 35) Ia faaite tatou i tera here, te auraro ra ïa tatou i “te ture a te Mesia.”

14, 15. Mea nafea to Iesu faaiteraa aita oia i haru i te tiaraa o vetahi ê e no te aha mea mahanahana?

¹⁴ Aita noa Iesu i haapii ia here, ua ora roa râ oia ia au i “te ture a te Mesia.” E hiˈo anaˈe e toru tuhaa mea nafea Iesu i te faaiteraa i roto i to ˈna oraraa eaha te parau-tia.

¹⁵ A tahi, aita roa ˈtu Iesu i rave i te tahi ohipa tia ore. Ua tapao paha oe e na te teoteo e turai i te taata ia haru i te ohipa eita e faatiahia ia ratou ia rave. Aita Iesu i na reira. I te hoê taime, ua ani te hoê taata ia ˈna: “Orometua, a parau na oe i to ˈu tuaana ia tufa oia i ta mâua faufaa.” Eaha ta Iesu i pahono? Ua na ô oia: “Na vai i faatoroa ia ˈu ei haava ia orua aore ra ei arai i rotopu ia orua?” (Luka 12:13, 14) Eaha ta tatou e haapii mai? Ua horoa Iehova ia Iesu i te maramarama, te paari e te mana aita i horoahia i te hoê noa ˈˈe taata i nia i te fenua. Noa ˈtu râ, aita Iesu i faaô atu i roto i teie ohipa, e ere hoi tera te tapura ohipa ta Iehova i horoa ia ˈna. Ua haa noa Iesu ma te haehaa, aita o ˈna i haru i te tiaraa o vetahi ê a ora ˈi i nia i te raˈi anei aore ra i nia i te fenua. (Iuda 9) Ma te haehaa, ua farii Iesu na Iehova e faaoti eaha te mea tia. Mea faahiahia roa to ˈna hiˈoraa!

16, 17. (1) Mea nafea to Iesu faaiteraa eaha te parau-tia a poro ai i te parau apî oaoa o te Faatereraa arii a te Atua? (2) A faaite ai Iesu eaha te parau-tia, mea nafea atoa o ˈna i te faaiteraa i te aroha hamani maitai?

¹⁶ A piti, ua faaite oia eaha te parau-tia a poro ai i te parau  apî oaoa o te Faatereraa arii a te Atua i te mau huru taata atoa, te feia taoˈa rahi e te feia veve. Aita roa ˈtu oia i maitiiti i te taata mai te mau Pharisea o tei vahavaha i te taata veve e te feia tei ore i ite te Ture. Ua pee mau Iesu i te huru o te Atua parau-tia o te hinaaro ia ora mai “te mau huru taata atoa.” c (Timoteo 1, 2:4) Mea nafea? Ua poro Iesu i te taata, ua tamaa e o ratou, ua faatamaa, ua faaora e ua faatia faahou mai atoa i te mau huru taata.

¹⁷ A toru, ua faaite Iesu eaha te parau-tia ma te aroha hamani maitai. Ua haa oia no te tauturu i te feia hara. (Mataio 9:11-13) Ua ineine noa oia i te hamani maitai i te feia e hinaaro i te tauturu. Ei hiˈoraa, aita Iesu i turai i te taata ia hiˈo ino i te feia nunaa ê mai ta te mau aratai haapaoraa i haapii na. Ma te aroha hamani maitai, ua tauturu e ua haapii oia i te tahi feia nunaa ê noa ˈtu e ua tono-na-mua-hia oia i te nunaa ati Iuda ra. Ua faaora oia i te maˈi o te hoê tavini a te tahi raatira faehau Roma ma te parau: “Aita vau i ite aˈenei i te faaroo rahi mai teie i Iseraela.”​—Mataio 8:5-13.

18, 19. (1) Mea nafea Iesu i te faaturaraa i te mau vahine? (2) Mea nafea Iesu i te faaiteraa e titauhia te itoito no te rave i te mea tia?

¹⁸ Aita atoa Iesu i paturu i te mau manaˈo hape no nia i te mau vahine. Ua rave râ oia ma te mǎtaˈu ore i te mea tia. I tiaturihia na hoê â tiaraa to te mau vahine Samaria e to te feia nunaa ê. Noa ˈtu râ, ua poro Iesu i te hoê vahine Samaria i te apoo pape no Sikara. Oia mau, i teie vahine to Iesu faaiteraa na mua roa o ˈna te Mesia fafauhia. (Ioane 4:6, 25, 26) I parau na te mau Pharisea eiaha te Ture a te Atua ia haapiihia i te mau vahine, area Iesu, ua rave ïa i te taime no te haapii maite ia ratou. (Luka 10:38-42) Hau atu â, i matau na  te taata i te haafaufaa ore i te parau aore ra i te faatiaraa a te hoê vahine, area i muri aˈe i to ˈna tia-faahou-raa, ua fa na mua Iesu i te tahi mau vahine. O ratou atoa ta ˈna i faaue ia haere e faaite i ta ˈna mau pǐpǐ ua tia faahou mai oia!​—Mataio 28:1-10.

¹⁹ Oia, ua haapapu Iesu i te mau nunaa eaha te parau-tia noa ˈtu mea atâta i te tahi taime. Te tauturu mai ra te hiˈoraa o Iesu ia ite e titauhia te itoito no te rave i te mea tia. Ma te tano, ua parauhia oia te “Liona o te opu o Iuda.” (Apokalupo 5:5) A haamanaˈo e ua faahohoˈahia te liona i te itoito e titauhia no te rave i te mea tia. I mua nei, e haamau roa Iesu i “te parau-tia i nia i te fenua” taatoa.​—Isaia 42:4.

20, 21. I to tatou nei tau, mea nafea to tatou Arii e haa ˈi no te haamau i te parau-tia i te fenua nei e i roto i te amuiraa?

²⁰ I to ˈna riroraa mai ei Arii i te matahiti 1914, ua haa Iesu no te haamau i te parau-tia i te fenua nei. Mea nafea? Ua ara noa oia ia tupu iho â te parau tohu e vai ra i roto i te Mataio 24:14. Ua haapii te mau pǐpǐ a Iesu i te parau mau no nia i te Faatereraa arii i te mau nunaa atoa. Mai ia Iesu, ua poro ratou i te mau huru taata atoa, te feia apî e te feia ruhiruhia, te feia taoˈa rahi e te feia veve, te tane e te vahine, ia ite hoi ratou o vai te Atua parau-tia ra o Iehova.

²¹ Ei Upoo o te amuiraa, te ara atoa ra Iesu ia rave te mau Kerisetiano i te mea tia. Mai tei tohuhia, te horoa ra oia i “te taata ei ô,” oia hoi te mau matahiapo, no te aratai i te amuiraa. (Ephesia 4:8-12) E pee ratou i te hiˈoraa o Iesu Mesia no te tiaau i te nǎnǎ a te Atua ma te rave i te mea tia. E haamanaˈo noa te mau matahiapo te hinaaro ra Iesu ia haa ratou ma te tia i nia i ta ˈna mau mamoe noa ˈtu eaha to ratou tupuraa.

22. Eaha to Iehova huru i mua i te rahi o te mau ohipa tia ore e ua maiti oia i ta ˈna Tamaiti no te rave i te aha?

²² Fatata roa Iesu i te haamau i te parau-tia i nia i te fenua  taatoa. Ua rahi roa te ohipa tia ore i roto i teie nei ao piˈo. E ohipa tia ore mau ia pohe te tamarii i te poia, ia feruri iho â râ tatou i te moni e haamâuˈahia no te hamani i te mauhaa tamaˈi e no te haamâha i te hinaaro o te feia e haapao noa ia ratou. E mirioni taata o te pohe faufaa ore nei i te mau matahiti atoa no te ohipa tia ore a vetahi ê e mea riri roa na Iehova te reira. Ua maiti oia i ta ˈna Tamaiti no te aratai i te tamaˈi parau-tia o te haamou roa i teie ao ino e te mau ohipa tia ore atoa.​—Apokalupo 16:14, 16; 19:11-15.

23. I muri aˈe Aramagedo, e nafea te Mesia ia paturu i te parau-tia e a muri noa ˈtu?

²³ Tera râ, eita te parau-tia a Iehova e itehia na roto noa i te haamouraa o te feia ino. Ua maiti atoa hoi oia i ta ˈna Tamaiti ei “Huiarii o te hau.” I muri aˈe i te tamaˈi Aramagedo, e haamau Iesu i te hau i nia i te fenua taatoa e e faatere oia “na roto i te parau-tia.” (Isaia 9:6, 7) E oaoa roa Iesu i te faatitiaifaro i te mau ohipa tia ore atoa tei faatupu i te oto e te mauiui rahi. E paturu oia i te parau-tia a Iehova ma te haapao maitai e a muri noa ˈtu. Mea faufaa roa ïa ia rave tatou i te mea tia i te aro o Iehova i teie nei â. E hiˈo anaˈe e nafea tatou ia na reira.