1, 2. E nafea te mahana ia haapapu i te puai o Iehova?

 UA TIA aˈenei oe i mua i te hoê auahi i te hoê po toˈetoˈe? Peneiaˈe, ua toro oe i te rima no te tamahanahana ia oe. Ia piri roa oe, e nehenehe oe e paapaa. Ia atea roa, e toˈetoˈe roa ïa oe.

² E nehenehe tera auahi e faahohoˈahia i te mahana. Noa ˈtu fatata 150 mirioni kilometera to ˈna atea ia tatou, a mea puai te mahana! Ua tano noa te atearaa o te fenua i te mahana. Ahiri mea piri roa, e mǎrô te pape i nia i te fenua. Ahiri mea atea roa, e paari roa ïa te reira i te toˈetoˈe. Aita roa ïa e ora i nia i to tatou fenua. Mea faufaa te mahana no te maitai o te fenua e no te taata.​—Koheleta 11:7.

3. Eaha te parau mau faufaa ta te mahana e haapii mai?

³ Aita te rahiraa o te taata e tâuˈa rahi ra i te mahana noa ˈtu mea faufaa te reira no to ratou ora. No reira ratou e ore ai e taa i ta te mahana e haapii mai. Te na ô ra te Bibilia no Iehova: “Ua hamani oe i te maramarama e te mahana.” (Salamo 74:16) Oia, e faahanahana te mahana ia Iehova, “Tei hamani i te raˈi e te fenua.” (Salamo 19:1; 146:6) O te hoê noa tera o te mau mea o te raˈi o te haapii mai ua faaohipa Iehova i to ˈna puai rahi no te poiete. E hiˈopoa maite anaˈe i te tahi atu mau hiˈoraa, na reira atoa i te fenua e te mau mea e ora ra i nia iho.

4, 5. Mai te aha te puai e te rahi o te mahana, mai te aha râ to ˈna huru ia faaauhia i te tahi atu mau fetia?

⁴ Ua ite paha oe e e fetia te mahana. I te mea mea piri aˈe te mahana i te fenua, e au ra e mea rahi aˈe te reira i te mau fetia e itehia ra i te po. Mai te aha to ˈna puai? I te ropuraa o te mahana, fatata 15 000 000 teteri te âhu. Ahiri e e nehenehe ta oe e rave mai i te hoê tuhaa o te ropuraa o te mahana mai te upoo pine ra te rahi no te afai mai i nia i te fenua, e titauhia 140 kilometera i te atea no te paruru ia oe! I te mau tetoni atoa, e faatupu te mahana i te ito e au i te puai ia paaina anaˈe e rave rahi hanere mirioni paura atomi.

⁵ E nehenehe e tuu i roto i te mahana hau atu i te 1 300 000 paraneta hoê â faito e to tatou fenua. O te mahana anei te fetia rahi roa ˈˈe? E ere, ua parau te mau aivanaa ihi reva teitei e mea iti roa te mahana ia faaauhia i te tahi atu mau fetia. Ua papai te aposetolo Paulo: “E  anaana taa ê to te hoê fetia i to te tahi atu.” (Korinetia 1, 15:41) Mea nafea te aposetolo i te iteraa? Papu roa, na te varua moˈa i aratai ia ˈna ia papai i te reira. Te vai ra te hoê fetia rahi, ia tuuhia oia i te vairaa o te mahana, e ô roa to tatou paraneta i roto ia ˈna. Ia na reirahia no te tahi atu fetia rahi, e û roa te paraneta hopea roa, oia hoi o Saturne. No te tapae i taua paraneta atea ra, e titauhia ia tere e 40 taime vitiviti aˈe i te tere o te hoê ofai pupuhi e maha matahiti te maoro!

6. E nafea te Bibilia ia faaite e rave rahi roa fetia te vai nei?

⁶ Mea faahiahia ia ite mea rahi mau â te fetia. Oia mau, te na ô ra te Bibilia, mai “te one o te miti” te mau fetia, eita e roaa i te taata ia taio! (Ieremia 33:22) Mea rahi aˈe  ïa te fetia i ta to tatou mata e nehenehe e ite. Ahiri te hoê papai Bibilia mai ia Ieremia i taio i te mau fetia, e 3 000 anaˈe ta ˈna e nehenehe e ite i te hoê po mea ateatea maitai te raˈi. E nehenehe taua numera ra e faaauhia i te one e vai ra i roto noa i te hoê apu rima. Mai te one o te miti, e rave rahi e e rave rahi roa ïa fetia te vai nei. b E nehenehe anei te hoê e taio i te reira?

7. Ia au i te mau aivanaa, ehia rahiraa fetia e haapueraa fetia?

⁷ Te pahono ra te Isaia 40:26: “A fariu i to outou mata i te raˈi e a hiˈo. Na vai i poiete i teie mau mea? Na Tei aratai ra ia ratou mai te hoê nuu. E pii oia ia ratou pauroa i to ratou iˈoa.” Te na ô ra te Salamo 147:4: “Te taio ra [Iehova] i te mau fetia.” Ehia rahiraa fetia te vai nei? E ere i te mea ohie ia pahono. Te manaˈo ra te mau aivanaa ua hau atu i te 100 miria fetia i roto noa i to tatou haapueraa fetia, oia hoi Voie Lactée. c Mea rahi atu â râ te haapueraa fetia, e te rahiraa fetia atoa ïa! Ehia rahiraa haapueraa fetia? Ua manaˈo te tahi mau aivanaa e hanere e e hanere miria aore ra hau atu haapueraa fetia. Eita te taata e nehenehe e ite ehia rahiraa haapueraa fetia e fetia te vai nei. Area o Iehova, te taio ra oia i te mau fetia e te pii ra oia ia ratou tataitahi ma to ratou iˈoa!

8. (1) E nafea oe ia faataa i te aano o to tatou haapueraa fetia? (2) Mea nafea Iehova i te faanaho-maite-raa i te mau mea o te raˈi?

⁸ E rahi atu â tatou i te faahiahia i te puai o Iehova ia feruri tatou i te faito rahi o te mau haapueraa fetia. Ahiri e nehenehe tatou e tere vitiviti mai te maramarama o te mahana, e titauhia 100 000 matahiti no te tere mai te  tahi pae e tae atu i te tahi atu pae o to tatou haapueraa fetia. E te vai ra te tahi mau haapueraa fetia, mea rahi aˈe i to tatou! Te parau ra te Bibilia no Iehova: “E hohora oe i te mau raˈi mai te hoê tapoˈi fare ie.” (Salamo 104:2) Ua faanaho atoa oia i te tere o teie mau mea poietehia. Mai te huˈa repo nainai roa ˈˈe e tae noa ˈtu i te haapueraa fetia rahi roa ˈˈe, e tere maite te mau mea atoa ia au i te mau ture ta te Atua i haamau. (Ioba 38:31-33) No reira te mau aivanaa i faaau ai i te faanahoraa o teie mau mea o te raˈi i te hoê ori faahiahia roa! A feruri na ïa i te Atua tei poiete i teie mau mea! Aita anei oe e faahiahia ra i te Atua tei ia ˈna ra te puai no te poiete?

9, 10. E nafea te vairaa o te mahana, o Jupiter, o te fenua e te avaˈe e haapapu ai i te puai o Iehova?

⁹ Te ite-maitai-hia ra te puai poiete o Iehova i nia i to tatou nei nohoraa, te fenua. Ua tuu oia i te fenua i te vahi tano maitai. Te manaˈo ra te tahi mau aivanaa, eita e nehenehe e ora i nia i te hoê paraneta o te tahi atu mau haapueraa fetia. E aita e ora i te mau vahi atoa i roto i to tatou haapueraa fetia, Voie Lactée. I ropu i to tatou haapueraa fetia, mea rahi roa te fetia e mea atâta roa ia û te tahi i nia i te tahi atu. Na te hiti o to tatou haapueraa fetia, aita te mau mea faufaa no te ora. Tei te vahi tano maitai te mahana e te mau mea e haaati ra ia ˈna i roto i to tatou haapueraa fetia.

¹⁰ Noa ˈtu to ˈna atea, e paruru te paraneta Jupiter i te fenua. Ua hau atu i te hoê tausani taime Jupiter i te rahi i te fenua, na ˈna e arato ra i te rahiraa o te mau taoˈa i roto i te reva teitei. Ia au i te mau aivanaa, ahiri aita o Jupiter, e tataitausini te mau taoˈa rarahi o te iri mai i nia i te fenua. Piri aˈe mai ia tatou, te vai ra te avaˈe. Ua riro atoa  te reira ei maitai no te fenua. Taa ê atu i to ˈna nehenehe, e horoa mai te avaˈe i te maramarama i te po e e faatano tamau atoa te reira i te oparaa o te fenua. Na taua oparaa ra e faatupu i te mau tau mai te tau auhune e te vai ra ˈtu â.

11. Mea nafea te reva mataˈi i te hamaniraahia no te paruru i te fenua?

¹¹ E ite-maitai-hia te puai o Iehova na roto i ta ˈna huru hamaniraa i te fenua. A rave na i te reva mataˈi o tei riro ei paruru no te fenua i mua i te mau hihi ino o te mahana. Ia û mai te mau hihi ino i nia i te reva teitei, e faarirohia te mataˈi ei mǎhu parauhia ozone. E riro teie mǎhu e haaati ra i te fenua taatoa mai te hoê vehî paruru. Oia mau, ua hamanihia to tatou paraneta ma to ˈna iho paruru!

12. E nafea te faanahoraa o te pape e haapapu ai i te puai o Iehova?

¹² Maoti te reva mataˈi e haaati ra i te fenua, e fanaˈo tatou i te mataˈi e e rave rahi atu â mea faufaa ia tupu te ora i nia i te fenua. I roto i te mau mea maere ta te reva mataˈi e faatupu, te vai ra te faanahoraa o te pape. I te matahiti hoê, no te âhu, hau atu i te 400 000 kilometera afata tuea pape no roto mai i te miti o te pihaa e o te riro mai ei ata pape. E taitaihia te reira e te mataˈi na te mau vahi atea. E topa mai teie pape tei titiahia e tei tamâhia ei ûa, ei hiona, ei pape paari no te maitai o te fenua. Mea tano roa ïa tei parauhia i roto i te Koheleta 1:7: “E tahe te mau tahora atoa i roto i te miti, aita râ te miti i î. I te vahi no reira te mau tahora i te taheraa mai, i reira ratou e hoˈi ai a tahe faahou atu ai.” O Iehova anaˈe te nehenehe e haamau i teie faanahoraa faahiahia mau!

13. E nafea te mau raau tupu e te repo fenua e haapapu ai i te puai o te Atua poiete?

¹³ Mai te tumu raau rahi roa mai te séquoia, o te nehenehe e naea hau atu i te 100 metera te teitei, e tae noa  ˈtu i te mau raau tupu nainai roa i roto i te moana, o te horoa mai i te mataˈi ora ta tatou e huti ra, e ite papu tatou i te puai o te Atua poiete. Ua î atoa te repo i te mau mea ora mai te toˈe, te rimu e te mau manumanu o te haa amui no te faatupu i te raau i nia i te fenua. Ma te tano, te parau ra te Bibilia e nehenehe te fenua, aore ra te repo, e horoa mai i to ˈna maa.​—Genese 4:12.

14. Mai te aha te puai o te hoê atomi nainai roa?

¹⁴ Ma te feaa ore, na Iehova i “hamani i te fenua i to ˈna puai.” (Ieremia 10:12) E ite-maitai-hia te puai o te Atua i roto atoa i te mau mea iti haihai roa ta ˈna i poiete mai te atomi. Mai te peu e tapirihia 1 000 000 atomi te tahi i pihai iho i te tahi, eita te reira e raea i te meumeu o te rouru o te taata. Ia feruri tatou i te huero e vai ra i roto i te hoê atomi, mea nainai roa ˈtu â ïa! Teie râ, o tera huero iti haihai atomi te faaohipahia no te hamani i te paura atomi riaria mau!

15. Eaha te haapiiraa ta Iehova i horoa ia Ioba na roto i te mau animara oviri?

¹⁵ Te tahi atu haapapuraa o te puai o Iehova no te poiete, o te rahiraa animara ïa e ora ra i nia i te fenua. Te faaite ra te Salamo 148 e rave rahi mea o te arue ra ia Iehova. I te Salamo 148:10, te vai ra “te mau animara oviri e te mau animara rata.” No te faaite i te faufaaraa ia faatura i te Atua poiete, ua paraparau Iehova ia Ioba no nia i te mau animara mai te liona, te asini oviri, te puaatoro oviri, te Behemota, eita e ore e puaa pape, e te Leviatana, eita e ore e moo taehae. Eaha te haapiiraa? Mai te peu e e mǎtaˈu te taata i teie mau animara puai, riaria e te taehae, e ere anei ïa i te mea tano ia faatura te taata i tei poiete i teie mau animara?​—Ioba pene 38-41.

16. Eaha te mea ta oe e maere ra no nia i te tahi mau manu ta Iehova i poiete?

 ¹⁶ Te faahiti atoa ra te Salamo 148:10 i “te mau manu pererau.” A feruri na i te rau o to ratou huru! Te vai ra te ione o te “ata . . . i te puaahorofenua e to ˈna taata faahoro.” Oia mau, noa ˈtu eita teie manu e piti metera e te afa i te teitei e rere, e nehenehe o ˈna e horo e 65 kilometera i te hora e e maha metera e te afa te hoê noa o to ˈna taahiraa avae! (Ioba 39:13, 18) Area te albatros, e manu ïa teie o te rere noa i te rahiraa o te taime i nia i te miti. E toru metera te roa o to ˈna na pererau e e nehenehe oia e rere maoro ma te ore e tairiiri i to ˈna na pererau. O te colibri te manu nainai roa ˈˈe i te ao nei, e pae noa hoi tenetimetera to ˈna roa. E nehenehe ta ˈna e tairiiri i to ˈna na pererau e 80 taime i te tetoni! E nehenehe te colibri e faaea noa i roto i te aore mai te manureva tautau e e tairiiri i to ˈna pererau no te haere i muri.

17. Mai te aha te rahi o te tohora ninamu e eaha to tatou huru ia feruri tatou i te mau animara ta Iehova i poiete?

¹⁷ Te parau ra te Salamo 148:7 e arue atoa “te mau animara rarahi o te miti” ia Iehova. A feruri na i te animara rahi roa ˈˈe, te tohora ninamu. E tia i teie animara o te nehenehe e naea e 30 metera te roa aore ra hau atu ia hopu i roto i “te mau pape hohonu.” E nehenehe to ˈna faito kilo e tuea e to te hoê nǎnǎ e 30 elephani paari. To ˈna noa arero, hoê â ïa teiaharaa e to te hoê elephani. Hoê â rahi to ˈna mafatu e to te hoê pereoo nainai. E tupaipai te reira e iva noa taime i te minuti. Area te mafatu o te colibri, e tupaipai ïa fatata 1 200 taime i te minuti. Mea aano te uaua toto o te tohora ninamu, e nehenehe roa te tamarii e ˈau i roto. Eita e ore, te tu ra to tatou manaˈo i tei papaihia i roto i te Salamo 150:6: “Ia aruehia Ia e te mau mea atoa e huti ra i te aho.”

18, 19. Ehia mea ora huru rau ta Iehova i hamani e eaha ta te mau mea i poietehia e haapii mai ra?

¹⁸ Ua faahiahia roa tatou mea nafea Iehova i te faaohiparaa i to ˈna puai no te poiete i te mau mea huru rau. Ua na ô te hoê papai salamo: “Mea rahi ta oe ohipa, e Iehova! . . . Ua î te fenua i te mau mea ta oe i hamani.” (Salamo 104:24) Ua faataa te mau aivanaa ua hau atu i te 1 000 000 mea ora huru rau i te fenua nei. Tera râ, te manaˈo ra vetahi ua hau atu te reira i tera numera. I te tahi taime, e nehenehe te hoê taata rimaî e ore e taa faahou eaha te taoˈa apî ta ˈna e hamani. Area o Iehova, ua ite noa iho â o ˈna i te faaohipa i to ˈna puai no te hamani i te mau mea apî e te huru rau!

¹⁹ Te haapii mai ra te mau mea i poietehia o Iehova te Arii hau ê. O Iehova anaˈe hoi te Atua poiete, te toea o te mau mea atoa, mea “poietehia” ïa. Tae noa ˈtu i ta ˈna Tamaiti otahi tei haa ei “rave ohipa aravihi” no te poiete i te mau mea atoa, eita e tano ia parauhia oia Atua poiete, no Iehova anaˈe hoi tera tiaraa. (Maseli 8:30; Mataio 19:4) E piihia râ te Tamaiti a te Atua, “te matahiapo o te mau mea atoa i poietehia.” (Kolosa 1:15) No to ˈna tiaraa  Atua poiete, mea tano roa na Iehova e faatere i to te ao taatoa.​—Roma 1:20; Apokalupo 4:11.

20. Ua “faafaaea” anei Iehova i te rave i te ohipa? A faataa.

²⁰ Ua faaea anei Iehova i te faaohipa i to ˈna puai no te poiete? Ia au i te Bibilia, i te otiraa Iehova i te hamani i te mau mea atoa i te ono o te mahana, “haamata ihora oia i te faafaaea i ta ˈna mau ohipa atoa i rave.” (Genese 2:2) Ua faaite te aposetolo Paulo tei ora ehia tausani matahiti i muri aˈe, aita â “te hitu o te mahana” i hope atu ra i to ˈna tau. (Hebera 4:3-6) Te auraa anei ua “faafaaea” Iehova i te rave i te ohipa? Aita. (Salamo 92:4; Ioane 5:17) Ua faaea Iehova i te hamani i te mau mea atoa, ua ohipa noa râ oia e te ohipa noa nei â no te faatupu i ta ˈna opuaraa. Ei hiˈoraa, ua ohipa oia no te aratai i te papairaa o ta ˈna Parau e no te faatupu i te hoê nunaa “taata hamani-apî-hia.” E hiˈopoa ˈtu â tatou i te reira i roto i te pene 19.​—Korinetia 2, 5:17.

21. Ia fanaˈo tatou i te ora mure ore, eaha to tatou huru a ite ai ia Iehova ia faaohipa i to ˈna puai no te poiete?

²¹ Ia hope te mahana faafaaearaa a Iehova, e ite o ˈna i te mau mea atoa ta ˈna i rave a parau atu ai mai ta ˈna i parau i te ono o te mahana poieteraa, “mea maitai roa.” (Genese 1:31) E nafea oia ia faaohipa i to ˈna puai no te poiete a muri aˈe? I tera taime tatou e ite atu ai. Ta tatou râ i papu, e tamau noa tatou i te faahiahia i to Iehova puai. Ia fanaˈo tatou i te ora mure ore, e haapii noa ˈtu â tatou no nia ia Iehova na roto i te mau mea ta ˈna i poiete. (Koheleta 3:11) Rahi atu â tatou i te haapii no nia ia ˈna, rahi atu â tatou i te faatura, i te faahiahia e i te faafatata i to tatou Atua poiete rahi!