1, 2. (a) No te aha Hana i peapea ˈi a faaineine ai oia ia ˈna? (b) Eaha ta tatou e haapii mai i te aamu o Hana?

 TE FAAINEINE haere ra Hana ia ˈna, a tamata ˈi i te ore e manaˈonaˈo i to ˈna mau fifi. I te tanoraa, e taime oaoa teie. Pauroa te matahiti, e afai ta ˈna tane o Elikana i to ˈna utuafare taatoa i te sekene i Silo. Ia riro ïa tera mau oroa ei taime oaoa. Tera hoi to Iehova hinaaro. (A taio i te Deuteronomi 16:15.) Papu roa, mea au roa na Hana tera mau oroa mai to ˈna tamariiriiraa mai â. Tera râ, ua tupu aˈenei te tahi mau tauiraa i roto i to ˈna oraraa.

² Mea fanaˈo Hana, mea here hoi na ta ˈna tane ia ˈna. Tera noa râ, e vahine ê atu ta Elikana, o Penina te iˈoa. E au ra e ua faaoti Penina e haamauiui ia Hana. Ua itea atoa mai ia ˈna te tahi ravea e haamamae maitai ia Hana i tera mau oroa matahiti. Eaha ïa tera ravea? Te mea faufaa roa ˈtu â, mea nafea to Hana faaroo ia Iehova i tauturu ai ia ˈna ia faaruru te hoê fifi e au ra e eita e noaa faahou ia ˈna ia faaoromai? Ia faaruru oe i te mau fifi o te faaere i to oe oaoa, a taio i te aamu putapû mau o Hana.

3, 4. Eaha na fifi rahi o Hana, e no te aha mea mamae ai no ˈna tera tupuraa?

³ Te faaite ra te Bibilia e piti fifi rahi ta Hana e faaruru ra i roto i to ˈna oraraa. Aita rea ravea ta ˈna no te faaafaro i te fifi matamua, e aita roa ˈtu i nia i te piti. A tahi, e piti vahine ta Elikana, e mea riri roa na te tahi atu vahine ia Hana. Te piti, eita e noaa ta Hana tamarii. Mea au ore roa teie tupuraa no te mau vahine e hinaaro i te tamarii. I te tau o Hana e ia au i te peu tumu, mea mamae mau â te reira. E tiaturi hoi te utuafare taitahi i te huaai ia vai noa to ratou iˈoa. Mea haama roa ïa no te hoê vahine eita e noaa ta ˈna tamarii.

⁴ E noaa ia Hana ia faaoromai i tera tupuraa ahani aita o Penina. Aita iho â e auraa ia faaipoipo e rave rahi vahine. E pinepine roa e tupu mai te umeumeraa, te peapea e te oto. Aita roa  ˈtu teie peu e tuati ra i te ture aveia ta te Atua i haamau i te ô i Edene, oia hoi hoê noa apiti. (Gen. 2:24) I roto i te Bibilia, aita e parau maitai to te faaipoiporaa e rave rahi vahine. A hiˈo na i te utuafare o Elikana.

5. No te aha Penina i hinaaro ai e haamauiui ia Hana? Eaha ta ˈna i rave?

⁵ Mea here aˈe na Elikana ia Hana. Ia au i te tutuu ati Iuda, o Hana ta ˈna i faaipoipo na mua e o Penina tau matahiti i muri aˈe. Tera noa râ, no to ˈna pohehae rahi ia Hana, e imi Penina i te ravea atoa no te haamauiui ia Hana. Taa ê atu ia Hana, ua fanau mai Penina i te tamarii. Rahi noa ˈtu â o ˈna i te fanau i te tamarii, rahi noa ˈtu â o ˈna i te faaoru. Aita oia i aroha e i tamahanahana noa ˈˈe ia Hana, ua hauti râ i nia i te vahi e mauiui ai Hana. “Ua haamaaroaro roa mai to ˈna enemi ia ˈna ia mihi.” (Sam. 1, 1:6) Mea opuahia ta Penina i rave. Ua hinaaro o ˈna e haamauiui ia Hana e ua manuïa oia.

6, 7. (a) I to Elikana tamahanahanaraa ia Hana, no te aha Hana i ore ai i faatia pauroa ˈtu? (b) No to Iehova anei mauruuru ore ia Hana i ore ai i noaa ta ˈna tamarii? A faataa. (A hiˈo i te nota i raro i te api.)

⁶ E au ra e mea au roa na Penina e haamamae ia Hana ia haere ratou i Silo pauroa te matahiti. E horoa hoi Elikana na te “mau tamarii tamaroa e te mau tamahine” a Penina i te tahi mau tuhaa o te mau animara pûpûhia ei tusia ia Iehova. Area na Hana herehia, te hoê ïa tuhaa taa ê. No to Penina pohehae ino rahi i nia ia Hana, ma te haamanaˈo noa ˈtu e eita e noaa ta ˈna tamarii, e taˈi Hana a ore atu ai e tamaa faahou. Ite ihora râ Elikana i te oto o ta ˈna vahine here o Hana, aita atoa e tamaa ra. Tamata ˈtura oia i te tamahanahana ia ˈna, a na ô ai: “E Hana, eaha oe i oto ai? e aha oe i ore i amu ai i te maa? eaha i inoino ai to aau? e ere anei i te maitai rahi to ˈu, i to te tamarii e ia tino ahuru noa ˈtu, ia oe ra?”—Sam. 1, 1:4-8.

⁷ Ua haroaroa Elikana e no te mea eita e noaa ta Hana tamarii e oto ai oia. a Mea papu, ua au roa Hana i te mau parau hamani maitai a ta ˈna tane, tei haapapu atu i to ˈna here ia ˈna. Aita râ Elikana i faahiti i te ino o Penina. Aita atoa hoi te Bibilia e parau ra e ua faaite atu Hana. Ua feruri paha Hana  e ia faaite o ˈna, e rahi roa ˈtu ïa te fifi. Eita paha teie fifi e afaro ia Elikana. E rahi roa ˈtu â paha to Penina ino i nia ia Hana, a na reira atoa ˈi ta ˈna mau tamarii e ta ˈna mau tavini. I te pae hopea, e tuu-roa-hia ˈtu â Hana i te hiti.

8. I mua i te ino aore ra te ohipa tano ore, no te aha mea mahanahana ˈi ia haamanaˈo e e Atua parau-tia Iehova?

⁸ Aita paha Elikana i ite e mea ino roa Penina i nia ia Hana. O Iehova râ, oia ïa. Ua haapapai oia i te reira i roto i ta ˈna Parau te Bibilia. E faaararaa ïa teie i te feia mea ino i nia ia vetahi ê no te pohehae aore ra no te riri, noa ˈtu e i to ratou manaˈo e ere roa ˈtu mea ino ta ratou peu. Area te feia hapa ore e te hau, mai ia Hana, e tamahanahanahia ïa e teie parau mau, e faaafaro te Atua parau-tia i te mau mea atoa i te taime ta ˈna i faaoti e mai ta ˈna i hinaaro. (A taio i te Deuteronomi 32:4.) Ua ite paha Hana i te reira, ua ani hoi oia i ta Iehova tauturu.

9. Eaha te haapiiraa e huti mai i to Hana haere-noa-raa ˈtu i Silo noa ˈtu eaha ta Penina e rave i nia ia ˈna?

⁹ I te poipoi aˈe, te ohipa ra to te fare. Te faaineine ra te utuafare e te tamarii atoa. E na roto atu ratou i te fenua aivi o Epheraima e tae atu ai i Silo. Hau atu i te 30 kilometera te atea, hoê aore ra e piti mahana haereraa na raro. b Ua ite Hana eaha ta Penina e rave. Noa ˈtu râ, aita oia i faaea i te fare. E hiˈoraa maitai ïa teie no tatou. Eiaha roa ˈtu e vaiiho i te haerea ino o vetahi ê ia haafifi i ta tatou haamoriraa ia Iehova! Ia faaea tatou i te fare, e ere ïa tatou i te mau haamaitairaa o te faaitoito hoi ia tatou ia faaoromai.

10, 11. (a) No te aha Hana i haere oioi ai i te sekene? (b) Eaha ta Hana i faaite i to ˈna Metua i te raˈi?

¹⁰ I muri aˈe i to Elikana e to ˈna utuafare haere-noa-raa i tera mahana na nia i te mau purumu mouˈa tioioi, te piri atu ra ratou ia Silo. To mua te oire ia ratou i nia i te hoê aivi tei haaatihia e te tahi atu mau aivi teitei aˈe. A haere noa ˈi ratou, te feruri noa ra Hana i ta ˈna e parau ia Iehova i roto i te pure. I to ratou taeraa ˈtu, tamaa aˈera te utuafare. I to ˈna iho â neheneheraa, faaatea ˈtura Hana e haere atura i te sekene. To reira te tahuˈa rahi Eli, te parahi noa ra i te pae uputa o te aua o te sekene. Aita râ Hana i ite atu ia ˈna, no te mea te feruri noa ra oia i ta ˈna e parau  i te Atua i roto i te pure. Ua papu ia ˈna e e faaroohia mai o ˈna i te sekene. Eita paha e taa i te taata to ˈna mauiui rahi. To ˈna râ Metua i te raˈi, oia ïa. No te rahi o to ˈna oto, taˈi ihora oia.

¹¹ A taˈi noa ˈi, ua paraparau Hana ia Iehova i roto i ‘to ˈna aau.’ To ˈna vaha noa tei hautiuti, a horuhoru noa ˈi to ˈna aau. Ua pure maoro oia a haamahora ˈi o ˈna i to ˈna aau i to ˈna Metua. Ua hinaaro iho â oia i ta ˈna haamaitairaa. Tera râ, aita noa Hana i ani ia tupu to ˈna hinaaro iti rahi i te hoê tamarii, ua hinaaro atoa râ e pûpû ia Iehova i ta ˈna e nehenehe e horoa. Euhe ihora Hana e ia noaa ta ˈna tamaiti, e horoa oia i taua tamaiti ra na Iehova ei tavini na ˈna i te roaraa o to ˈna oraraa.—Sam. 1, 1:9-11.

12. Eaha te haamanaˈo no nia i te pure?

¹² No nia i te pure, e hiˈoraa maitai ta Hana i vaiiho mai. Ei Atua hamani maitai, te ani mai ra Iehova ia paraparau noa ˈtu ia ˈna ma te taiâ ore, ia huri i nia ia ˈna i to tatou mau ahoaho mai te hoê tamarii e tiaturi ra i to ˈna metua î i te here. (A taio i te Salamo 62:8; Tesalonia 1, 5:17.) I raro aˈe i te aratairaa a te varua o te Atua, ua papai te aposetolo Petero i teie mau parau tamǎrû: “E huri i to outou ahoaho atoa i nia ia [Iehova]; oia hoi te tiai mai ia outou.”—Pet. 1, 5:7.

13, 14. (a) Eaha ta Eli i manaˈo oioi no nia ia Hana? (b) No te aha e hiˈoraa maitai ai te faaroo o Hana?

¹³ E ere râ te taata i te mea aumihi roa mai ia Iehova. A taˈi e a pure noa ˈi Hana, hitimahuta ihora oia i te faarooraa i te hoê reo. O Eli tahuˈa rahi te na ô mai ra: “A fea râ . . . e pee ai to taero? e haapae ê atu i ta oe uaina.” I ite na Eli i te vaha o Hana e hautiuti ra, a taˈi noa ˈi no te oto. Aita oia i ui atu eaha to ˈna, ua manaˈo oioi râ e ua taero Hana.—Sam. 1, 1:12-14.

¹⁴ Eaha paha Hana, o te ahoaho ê na ra, i te mauiui no teie pariraa hape a te hoê taata e tiaraa faahiahia to ˈna! Teie râ, ua faaite faahou o ˈna i te hiˈoraa maitai o te faaroo. Aita oia i vaiiho i te huru tia ore o te hoê taata ia haafifi i ta ˈna haamoriraa ia Iehova. Ua pahono oia ia Eli ma te faatura e ua faataa i to ˈna ahoaho. I to Eli iteraa e ua hape oia, na ô atura oia ma te reo mǎrû aˈe paha: “Ia ora na oe i te haerea; e ia faatia mai hoi te Atua no Iseraela i ta oe i ani atu ia ˈna.”—Sam. 1, 1:15-17.

15, 16. (a) Eaha to Hana huru i muri aˈe i to ˈna haamahoraraa i to ˈna aau ia Iehova e haamoriraa ia ˈna i te sekene? (b) E nafea ia pee i to Hana hiˈoraa ia ô mai te manaˈo faatoaruaru?

¹⁵ Eaha to Hana huru i muri aˈe i to ˈna haamahoraraa i to ˈna aau ia Iehova e haamoriraa ia ˈna i to ˈna sekene? Te na ô mai ra te faatiaraa: “Ua haere ihora taua vahine ra, e ua amu ihora  i te maa, e aita ˈtura to ˈna mata i hana,” aore ra i oto faahou. (Sam. 1, 1:18) Ua topa te hau o Hana. Mâmâ maira oia i to ˈna tuuraa ˈtu i to ˈna ahoaho ia Iehova ra to ˈna Metua i te raˈi, tei hau aˈe i te puai ia ˈna. (A taio i te Salamo 55:22.) Te vai ra anei te tahi fifi eita e maraa ia ˈna ia amo? Aita hoê aˈe mai te tau e te tau mai â e a muri noa ˈtu!

¹⁶ Ia teimaha, ia toaruaru e ia oto tatou, e pee anaˈe i te hiˈoraa o Hana ma te paraparau noa ˈtu i “Tei faaroo i te pure.” (Sal. 65:2) Ia pure tatou ma te faaroo, e ite ïa tatou atoa i te hau o te Atua tei hau aˈe i te manaˈo taata, a ore atu ai to tatou oto.—Phil. 4:6, 7.

17, 18. (a) Ua aha Elikana i to ˈna iteraa e ua euhe Hana? (b) Eaha ta Penina e taa oioi?

¹⁷ I te poipoi aˈe, ua haere faahou Hana i te sekene raua Elikana. Ua faaite atu paha oia i ta ˈna i ani e i euhe ia Iehova. Ia au hoi i te ture a Mose, e nehenehe te hoê tane e faaore i te euhe ta ta ˈna vahine i rave aita o ˈna i horoa i te parau faatia. (Num. 30:10-15) Aita Elikana taata faaroo i na reira. Ua haere râ raua Hana i te sekene e haamori ia Iehova hou a hoˈi ai i ǒ raua.

¹⁸ I teihea taime to Penina iteraa e aita Hana e mauiui faahou ra no to ˈna ino i nia ia ˈna? Aita tatou i ite. Ta te faatiaraa noa e parau mai ra, aita ˈtura te mata o Hana i oto faahou. Te auraa ïa e ua oaoa faahou mai oia. E taa oioi râ ia Penina e pau ta ˈna rave ino ia Hana, te oaoa noa ra Hana. Aita te Bibilia i faahiti faahou ia Penina.

19. (a) Eaha te haamaitairaa ta Hana i fanaˈo? (b) Mea nafea to Hana faaiteraa e aita i moe ia ˈna na vai teie haamaitairaa?

¹⁹ A mairi ai te mau avaˈe, taui aˈera te hau o te feruriraa o Hana ei oaoa iti rahi. Ua hapû oia! Ua oaoa roa Hana, aita roa ˈtu râ i moe ia ˈna na vai teie haamaitairaa. I to ˈna fanauraa mai i ta ˈna tamaiti, ua maiti oia i te iˈoa ra Samuela, “Iˈoa o te Atua” te auraa, tei taaihia i te tiaororaa i te iˈoa o te Atua, mai ta Hana i rave. I taua matahiti ra, aita oia i haere i Silo na muri ia Elikana e te utuafare. Ua faaea noa râ raua ta ˈna aiû i te fare e toru â matahiti e mairi noa ˈtura ta ˈna û. Faaineine atura oia ia ˈna ma te itoito mau no te mahana e taa ê ai raua ta ˈna tamaiti here.

20. Mea nafea Hana raua Elikana i te tapearaa i ta raua euhe ia Iehova?

²⁰ E ere iho â mea ohie no Hana ia vaiiho i ta ˈna tamaiti i Silo. Parau mau, ua ite o ˈna e e haapao-maitai-hia Samuela i ǒ, peneiaˈe e te tahi mau vahine e tavini ra i te sekene. Tera râ, mea  apî roa Samuela, e o vai ïa mama e hinaaro ia taa ê raua ta ˈna tamarii? Noa ˈtu râ, ua afai Hana raua Elikana i ta raua tamaiti i te fare o te Atua ma te aau tae e te mauruuru. Ua pûpû raua i reira i te tusia e ua faaite atu ia Samuela ia Eli. Haamanaˈo atura Hana ia Eli i ta ˈna i euhe i taua vahi ra tau matahiti aˈenei.

21. Mea nafea te pure a Hana i faaite ai i te hohonuraa o to ˈna faaroo? (A hiˈo atoa i te tumu parau “ Piti pure faahiahia mau.”)

²¹ Ua faaoti Hana i te hoê pure ta te Atua i manaˈo e mea tano ia tuu i roto i ta ˈna Parau. A taio ai oe i tera pure i roto i te Samuela 1, 2:1-10, e ite oe i roto i te mau pereota atoa i te hohonuraa o te faaroo o Hana. Ua arue oia ia Iehova no to ˈna faaohiparaa i to ˈna puai ma te faahiahia mau. Taa ê atu i te taata, e nehenehe ta ˈna e faahaehaa i te feia teoteo, e haamaitai i te feia e ahoaho ra, e rave i te ora aore ra e faaora i te taata i te pohe. Ua arue oia i to ˈna Metua no to ˈna moˈaraa faito ore, ta ˈna parau-tia e to ˈna taiva ore. Tano roa Hana i te parauraa: “Aore te hoê pare [aore ra mato] e au i to tatou Atua.” E nehenehe iho â tatou e tiaturi i te Atua ra o Iehova o te ore roa e taui. E haapuraa oia no te feia atoa e ahoaho ra o te ani i ta ˈna tauturu.

22, 23. (a) Na te aha e haapapu mai ra e ua paari mai Samuela ma te ite e mea here na to ˈna na metua ia ˈna? (b) Mea nafea Iehova i te haamaitairaa ia Hana?

²² Mea fanaˈo mau â Samuela iti, e mama faaroo roa to ˈna ia Iehova. Papu roa, ua mihi o ˈna i to ˈna mama a paari mai ai oia. Aita râ oia i manaˈo noa ˈˈe e ua haamoehia o ˈna. Pauroa hoi te matahiti, e haere Hana i Silo no te afai i te tahi ahu aita e rima ahu no Samuela no ta ˈna taviniraa i te sekene. Na ˈna iho i nira  i tera ahu no ta ˈna tamaiti. Tera te here mau. (A taio i te Samuela 1, 2:19.) A feruri na ia Hana e faaoomo ra i ta ˈna tamaiti i te ahu apî, a faatano atu ai i nia iho ia ˈna, a hiˈo noa ˈi ia ˈna ma te oaoa e a faahiti atu ai i te mau parau mǎrû e te faaitoito. E haamaitairaa mau â te hoê mama mai tera no Samuela. A paari mai ai oia, o ˈna ïa tei riro ei haamaitairaa no to ˈna na metua e no Iseraela taatoa.

²³ Aita atoa Hana i haamoehia. Ua haamaitai Iehova ia ˈna, ua fanau mai â oia e pae tamarii na Elikana. (Sam. 1, 2:21) Ta Hana râ haamaitairaa rahi, to ˈna paha ïa taairaa e to ˈna Metua ra o Iehova o tei piri noa ˈtu â a mairi ai te mau matahiti. Ia piri atoa ïa to oe taairaa e o Iehova a pee noa ˈi oe i to Hana faaroo.