1. No te aha te oire taatoa o Silo e oto ai?

 TE OTO atoa ra Samuela e to te oire taatoa o Silo. I roto e rave rahi fare, te faaroohia ra te vahine e te tamarii e auê ra, no te mea eita to ratou papa, ta ratou tane, ta ratou tamaiti aore ra to ratou taeae e hoˈi faahou mai. E 30 000 faehau Iseraela tei pohe i te rima o te Philiseti. E na mua rii noa ˈtu, e 4 000 ïa tei pohe i roto i te tahi atu aroraa.—Sam. 1, 4:1, 2, 10.

2, 3. Eaha te anairaa ati i tupu i nia ia Silo?

² E ere tera anaˈe te ati i tupu. Ua faarue mai Hophini raua Phinehasa, na tamaiti ino a Eli te tahuˈa rahi, ia Silo ma te rave i te afata faufaa. Teie afata tei vaiiho-noa-hia na i roto i te vahi moˈa roa o te sekene, e taipe ïa o te faaite ra e tei pihai iho Iehova i to ˈna nunaa. Afai aˈera te nunaa i taua afata faufaa ra i te vahi aroraa, ma te manaˈo paha e e paruruhia ratou, a upootia ˈtu ai. Teie râ, ua haru te Philiseti i te afata faufaa e haapohe atura ia Hophini raua Phinehasa.—Sam. 1, 4:3-11.

³ Ahia ˈtura hoi hanere matahiti te vai-noa-raa te afata faufaa i roto i te sekene. Mea fanaˈo ïa Silo. Aita faahou râ te afata faufaa. I to Eli, 98 matahiti, faarooraa i taua parau peapea ra, topa ofera ihora oia mai nia mai i to ˈna parahiraa e pohe atura. Pohe atoa ihora ta ˈna hunoa, te vahine a Phinehasa tei pohe atoa hoi i taua mahana ra, i to ˈna fanauraa mai i ta ˈna tamaiti. Hou râ oia a pohe ai, ua parau oia: “Ua ore te hinuhinu ia Iseraela nei.” E ere faahou atura ïa Silo i te oire fanaˈo.—Sam. 1, 4:12-22.

4. Eaha ta teie pene e faataa mai?

⁴ Eaha to Samuela huru i mua i teie mau tupuraa peapea mau? Mea puai maitai anei to ˈna faaroo no te tauturu i te nunaa Iseraela tei ere i te parururaa e te haamaitairaa a Iehova? I teie mahana, e farerei paha tatou pauroa i te mau fifi e te mau tupuraa faatoaruaru o te tamata i to tatou faaroo. E nehenehe râ tatou e huti mai i te haapiiraa ia Samuela.

5, 6. (a) Eaha te faatiahia mai ra i teie nei? (b) Eaha ta Samuela ohipa i te roaraa e 20 matahiti?

⁵ I teie nei, te faatiahia mai ra te parau o te afata faufaa. Te faaite mai ra te Bibilia e no to ratou haruraa i te afata faufaa, ua roohia te Philiseti i te ati mauiui. No reira ratou i faahoˈi mai ai i te afata. E faahitihia mai Samuela e 20 matahiti i muri aˈe. (Sam. 1, 7:2) Eaha ta ˈna i rave i tera roaraa? Te pahono mai ra te Bibilia.

⁶ E 20 matahiti na mua ˈtu, ‘tae noa maira te parau a Samuela ia Iseraela atoa.’ (Sam. 1, 4:1) I muri aˈe i taua tau ra, te faaite mai ra te faatiaraa e pauroa te matahiti e ratere Samuela na roto e toru oire i Iseraela no te faaafaro i te mau peapea e te mau fifi. Ia oti, e hoˈi oia i ǒ ˈna i Rama. (Sam. 1, 7:15-17) Mea papu ïa e ua ohipa noa na o ˈna, e i tera roaraa e 20 matahiti, mea rahi ta ˈna ohipa i rave.

7, 8. (a) Eaha ta Samuela i poroi ia Iseraela i muri aˈe i to ˈna tauturu-noa-raa ia ratou i te pae varua e 20 matahiti? (b) Ua aha te nunaa?

⁷ No te ohipa taiata e te piˈo a na tamaiti a Eli, ua paruparu te faaroo o te nunaa. Tera paha te tumu i haamori ai e rave rahi i te idolo. I muri aˈe i to ˈna tauturu-noa-raa ia Iseraela i te pae varua e 20 matahiti, teie ta Samuela i poroi ia ratou: “Ia fariu mai outou ia Iehova ma to outou aau atoa ra, a tuu ê atu ai i te mau atua ěê ra, e te mau Asetarota i roto ia outou na, e ia tano maite to outou aau ia Iehova ra, a haamori ai ia ˈna anaˈe ra: e faaora oia ia outou i te rima o te Philiseti.”—Sam. 1, 7:3.

⁸ Ua teiaha roa “te rima o te Philiseti” i nia i te nunaa. I te pauraa te nuu Iseraela, ua manaˈo te Philiseti e e nehenehe ratou e haavî i te nunaa o te Atua ma te ore e faautuahia. Ua haapapu râ Samuela e e taui te reira ia fariu mai Iseraela ia Iehova ra. Ua farii anei ratou? Oaoa roa Samuela i te iteraa e ua faarue ratou i ta ratou mau idolo e ua ‘haamori ia Iehova anaˈe ra.’ Titau atura oia ia ratou ia putuputu mai i te oire o Mizepe, i te pae apatoerau o te tuhaa fenua mouˈa o Ierusalema. Ua putuputu mai te nunaa, ua haapae i te maa e ua tatarahapa i ta ratou ohipa haamoriraa idolo e rave rahi.—A taio i te Samuela 1, 7:4-6.

9. Eaha ta te Philiseti i opua e rave, e ua aha te nunaa o te Atua?

⁹ Faarooroo aˈera râ te Philiseti i teie putuputuraa rahi i Mizepe  e opua ˈtura e haere i ǒ e tairi i te feia e haamori ra ia Iehova. Tono atura ïa ratou i ta ratou nuu. Faaroo aˈera Iseraela e te haere mai ra te enemi, riaria aˈera e ani atura ia Samuela ia pure no ratou. Ta Samuela ïa i rave, ma te pûpû atoa i te hoê tusia. I taua taime moˈa ra, te haere mai ra te nuu Philiseti i Mizepe. I reira ïa to Iehova faaiteraa mai i to ˈna riri. ‘Faaharuru maira oia i te patiri rahi i nia i te Philiseti i taua mahana ra.’—Sam. 1, 7:7-10.

10, 11. (a) Eita e ore e mea ê roa te patiri ta Iehova i faaharuru i nia i te nuu Philiseti, no te aha? (b) Eaha tei tupu i muri aˈe i te aroraa i Mizepe?

¹⁰ E au paha ïa tera mau Philiseti i te tamarii rii e horo riaria ra i muri mai i to ratou mama ia haruru te patiri! E ere roa ˈtu, e faehau pautuutu teie ua tehu i te aroraa. Eita e ore e mea ê roa tera patiri rahi, no te ‘haruru’ paha, no te ateatea o te raˈi, aore ra no te mea e faaroohia te haruru na te mau aivi. Ta tatou noa i ite, ua riaria roa tera mau Philiseti. Ei feia aro, oioi roa ratou i te riroraa ei feia arohia. Inaha, faarue maira to Iseraela ia Mizepe, auau aˈera i taua nuu Philiseti ra ta ratou i tairi e tae roa i te pae apatoa tooa o te râ o Ierusalema.—Sam. 1, 7:11.

¹¹ Ua tupu te hoê tauiraa rahi no te nunaa o te Atua no taua aroraa ra. Ua faarue noa mai te Philiseti i te fenua o Iseraela i te toea o te oraraa o Samuela ei haava. Te mau oire tei riro na i te Philiseti, ua hoˈi mai ïa i te nunaa o te Atua ra.—Sam. 1, 7:13, 14.

12. (a) Ua ‘rave Samuela i te parau-tia’ i roto i teihea auraa? (b) Eaha te mau huru maitatai ta Samuela i faatupu?

¹² E rave rahi hanere matahiti i muri aˈe, e faahiti te aposetolo Paulo ia Samuela i rotopu i te mau haava e peropheta taiva ore tei “rave i te parau-tia.” (Heb. 11:32, 33) Ua rave iho â Samuela i te mea maitai e te mea tia i te aro o te Atua e ua faaitoito ia vetahi ê ia na reira atoa. Na te aha i tauturu ia ˈna? Ua turui o ˈna i nia ia Iehova ma te faaoromai, e ua rave noa i ta ˈna ohipa ma te haapao maitai, noa ˈtu te mau tupuraa faatoaruaru. Ua faaite atoa o ˈna i to ˈna mauruuru i te Atua. I muri aˈe i to ratou upootiaraa i Mizepe, ua faatia o ˈna i te hoê ofai haamanaˈoraa i ta Iehova i rave no to ˈna nunaa.—Sam. 1, 7:12.

13. (a) Ia pee tatou i teihea mau huru maitatai o Samuela? (b) I to oe manaˈo, eaha te taime tano e haamata ˈi i te faatupu i te mau huru maitatai mai to Samuela?

¹³ E hinaaro anei oe atoa e “rave i te parau-tia”? Mai te peu e  e, a pee ïa i te faaoromai o Samuela, to ˈna haehaa e to ˈna aau mauruuru. (A taio i te Petero 1, 5:6.) O vai hoi o tatou e ore e hinaaro i tera mau huru maitatai? Auaˈe Samuela i faatupu i te reira i to ˈna apîraa i nehenehe ai o ˈna e faaruru i te mau tupuraa faatoaruaru atu â i to ˈna ruhiruhiaraa.

14, 15. (a) Eaha te tupuraa peapea ta Samuela i faaruru i to ˈna ruhiruhiaraa? (b) Eaha ta Samuela i rave, taa ê atu ia Eli?

¹⁴ E “ruhiruhia” Samuela i to te Bibilia faahiti-faahou-raa ia ˈna. I taua taime ra, e piti tamaiti paari ta ˈna, Ioela raua Abia. Te hopoia ta ˈna i horoa na raua, e tauturu ïa ia ˈna i roto i te ohipa haavaraa. Tera râ, ua hape roa Samuela i te tiaturiraa ia raua. Noa ˈtu e e taata afaro Samuela e te parau-tia, ua faaohipa raua i to raua tiaraa ma te miimii, a haapiˈo ai i te haavaraa e a farii ai i te moni peta.—Sam. 1, 8:1-3.

¹⁵ I te hoê mahana, haere maira te feia rahi o Iseraela e autâ i te peropheta ruhiruhia ra, a na ô ai: “Aore ta oe pue tamarii i haapao i ta oe parau.” (Sam. 1, 8:4, 5) Aita te faatiaraa e parau ra e ua ite anei Samuela i taua fifi ra. Mea papu râ e ua amo maite iho â  Samuela i ta ˈna hopoia metua tane, eiaha mai ia Eli ta Iehova i tamaˈi e i faautua no te oreraa e aˈo i ta ˈna na tamaiti ohipa ino. Ua rahi aˈe hoi to Eli faatura i ta ˈna na tamaiti, i te Atua. (Sam. 1, 2:27-29) Aita roa ˈtu Iehova i faahapa ia Samuela mai tera.

16. (a) Eaha te huru o te mau metua mea patoi ta ratou mau tamarii? (b) E nafea to Samuela hiˈoraa e tauturu ai i te mau metua?

¹⁶ Ua pohe anei Samuela i te haama, i te hepohepo aore ra i te inoino i to ˈna faarooraa i te haerea ino o ta ˈna na tamaiti? Aita te Bibilia e parau ra. Mea rahi râ te metua e taa oioi i to Samuela huru aau. I teie tau peapea mau, mea rahi o te patoi i te aˈoraa e te tiaraa upoo o te metua. (A taio i te Timoteo 2, 3:1-5.) E nehenehe te mau metua e mauiui nei no teie fifi e ite maa tamahanahanaraa e maa aratairaa i roto i te hiˈoraa o Samuela. Noa ˈtu e ua maiti ta ˈna na tamaiti i te taiva ia Iehova, ua tapea noa Samuela i to ˈna haapao maitai. Outou te mau metua, a haamanaˈo e ia ore te aau etaeta o te tamarii e putapû i te parau e te aˈoraa, te toe ra te hoê ravea puai, to outou ïa hiˈoraa. E nehenehe noa iho â outou e faaoaoa i to outou Metua, te Atua ra o Iehova, mai ia Samuela.

17. Eaha ta te feia rahi o Iseraela i titau ia Samuela, e ua aha Samuela?

¹⁷ Aita na tamaiti a Samuela i ite e e faahopearaa te tupu mai no to raua nounou e to raua miimii. Ua na ô te feia rahi o Iseraela ia Samuela: “E teie nei, e faataa na oe i te tahi arii no matou ei haava ia matou, mai te mau fenua atoa ra.” Ua manaˈo anei Samuela e te faarue ra te nunaa ia ˈna? Parau mau, ahia ˈtura matahiti to Samuela haavaraa i taua nunaa ra i te iˈoa o Iehova. Aita râ ratou i hinaaro faahou e na te tahi noa peropheta mai ia Samuela e haava ia ratou, na te hoê râ arii. E arii ta te mau nunaa tapiri, hinaaro atoa ˈtura Iseraela i te tahi na ratou! Ua aha Samuela? Ua riri.—Sam. 1, 8:5, 6.

18. Eaha ta Iehova i parau i mahanahana ˈi to Samuela aau, tei faaite atoa râ i te hara rahi a Iseraela?

¹⁸ Pure ihora Samuela ia Iehova no nia i teie ohipa. Pahono maira Iehova: “E faaroo noa ˈtu oe i te parau a te mau taata na, ta ratou i parau mai ia oe ra: e ere hoi o oe ta ratou i faarue, ua faarue râ ratou ia ˈu, eiaha vau ei arii [faahou] i nia iho ia ratou.” Mahanahana ihora to Samuela aau. Mea tuhi iho â ta Iseraela i te Atua Mana hope. Parau atura Iehova ia Samuela ia faaara ia ratou i te mau faahopearaa e tae mai i nia ia ratou no to ratou aniraa i te hoê arii taata. Ua faaara ˈtu Samuela. Parau onoono maira râ te  nunaa: “Eiaha; ei arii â to matou i nia iho ia matou.” Ma te auraro noa i to ˈna Atua, haere atura Samuela e faatahinu i te arii ta Iehova i maiti.—Sam. 1, 8:7-19.

19, 20. (a) Mai te aha te huru auraro o Samuela i ta Iehova faaueraa e faatahinu ia Saula ei arii no Iseraela? (b) Mea nafea to Samuela tauturu-noa-raa i te nunaa o te Atua?

¹⁹ Mai te aha râ te huru auraro o Samuela i to ˈna Atua? Ma te faatia ture noa anei? Ma te riri anei? Ua vaiiho anei o ˈna i to ˈna aau ia taero i te inoino, e ia aˈa te reira i roto i to ˈna aau? Mea rahi te na reira, aita râ Samuela. Ua faatahinu o ˈna ia Saula e ua farii iho â e na Iehova i maiti ia ˈna. Hôˈi atura oia ia Saula ei tapao maevaraa e auraroraa i te arii apî. Na ô atura oia i te nunaa: “Aita outou ite i tei haapaohia e Iehova ra, e aita o ˈna e faito i te mau taata atoa ra?”—Sam. 1, 10:1, 24.

²⁰ Aita Samuela i tiatonu i te mau huru paruparu o Saula, i te mea maitai râ o taua taata ra ta Iehova i maiti. Aita atoa o ˈna i imi i te farii maitai a taua nunaa ra e taui hanoa te manaˈo. Ua tapea râ oia i to ˈna taiva ore i te Atua. (Sam. 1, 12:1-4) Ua rave maite atoa o ˈna i ta ˈna ohipa i faauehia mai: e aˈo i te nunaa o te Atua i nia i te mau tupuraa e fifi ai to ratou taairaa e o Iehova, e faaitoito atoa ia ratou ia tapea i to ratou taiva ore ia Iehova. Putapû aˈera te aau o te nunaa i ta ˈna aˈoraa e ani atura ia Samuela ia pure no ratou. Horoa maira oia i teie pahonoraa nehenehe: “Eiaha roa vau e faarue i te pure [no] outou a hara ˈi au ia Iehova ra: e haapii â vau ia outou i te eˈa maitai, e te tia.”—Sam. 1, 12:21-24.

21. Eaha ta te hiˈoraa o Samuela e haamanaˈo mai ra ia inoino noa ˈtu oe ia maitihia te tahi atu taata no te hoê hopoia aore ra haamaitairaa?

²¹ I inoino atoa na paha oe i te maitiraahia te tahi atu taata no te hoê hopoia aore ra haamaitairaa. Te haamanaˈo papu mai ra to Samuela hiˈoraa e eiaha roa ˈtu tatou e vaiiho i te pohehae aore ra te inoino ia aˈa i roto i to tatou aau. (A taio i te Maseli 14:30.) Mea rahi hoi ta te Atua ohipa au maitai na ta ˈna mau tavini taiva ore atoa.

22. No te aha Samuela i tano ai i te hiˈoraa i te mea maitai o Saula?

²² Ua tano Samuela i te hiˈoraa i te mea maitai o Saula, e taata faahiahia hoi o ˈna. Noa ˈtu e e tiapai taata, mea itoito, mea  maramarama, e taata aau faahaihai oia i te omuaraa. (Sam. 1, 10:22, 23, 27) Hau atu â, e tiamâraa to ˈna e maiti. E nehenehe ïa o ˈna e maiti i to ˈna iho eˈa e e rave i ta ˈna iho faaotiraa. (Deut. 30:19) Ua faaohipa maitai anei o ˈna i taua ô faufaa roa ra?

23. (a) Eaha te huru maitai faufaa roa ta Saula i ere na mua? (b) Mea nafea to ˈna faaiteraa i te teoteo?

²³ Mea peapea ia parau e ia noaa mai i te hoê taata te mana, e pinepine o te aau faahaihai ta ˈna e ere na mua. Aita i maoro to Saula teoteoraa mai. Ua faaoti oia e faaroo ore i ta Iehova i faaue ia ˈna na roto ia Samuela. I te hoê mahana, no to ˈna fiu i te tiairaa ia Samuela, ua pûpû oia i te hoê tusia. Aˈo etaeta ihora Samuela ia ˈna e tohu atura e eita te toroa arii e vai noa mai i roto i to ˈna utuafare. Aita râ Saula i farii i te aˈoraa, rave atura râ i te mea ino roa ˈtu â.—Sam. 1, 13:8, 9, 13, 14.

24. (a) Ua faaroo anei Saula i ta Iehova faaueraa no nia i te ati Amaleka? (b) Eaha to Saula huru i to ˈna aˈoraahia, e eaha ta Iehova i faaoti e rave?

²⁴ Na roto ia Samuela, ua faaue Iehova ia Saula e aro i te ati Amaleka. Ua parau iho â râ o ˈna ia haapohe i to ratou arii ino o Agaga. Ua faaherehere râ Saula ia Agaga, te mau animara maitatai e te mau mea maitai atoa ta Iehova hoi i faaue e faaore pauroa. I to Samuela aˈoraa ia ˈna, faaite maira Saula e ua taui roa o ˈna. Aita Saula i farii i te aˈoraa ma te aau faahaihai. Ua parau atu râ e ua faaroo iho â o ˈna i te parau a Iehova, ua imi i te otoheraa, ua haavare ite i te fifi e ua pari i te nunaa. Imi ihora o ˈna i te ora, ma te parau e ua faataahia te tahi tuhaa o ta ratou i haru mai no te pûpû ei tusia ia Iehova. Eaha râ ta Samuela i pahono atu? Ua matau maitai tatou i teie parau: Mea maitai aˈe te auraro i te tusia. Ma te itoito, tamaˈi ihora Samuela ia Saula e faaite atura i ta Iehova faaotiraa: e iriti-ê-hia te toroa arii o Saula e e horoahia ˈtu i te tahi atu taata maitai aˈe. a—Sam. 1, 15:1-33.

25, 26. (a) No te aha Samuela i oto ai ia Saula, e eaha ta Iehova i aˈo mǎrû ia ˈna? (b) I to Samuela taeraa ˈtu i ǒ Iese, eaha ta Iehova i parau ia ˈna?

²⁵ E ere to Samuela i te inoino nainai no ta Saula mau hara. I  tera po taatoa, ua tiaoro noa o ˈna ia Iehova. Ua oto roa atoa o ˈna ia Saula. I ite na o ˈna i ta Saula e nehenehe e rave e to ˈna maitai rahi. Ua ore râ teie mau tiaturiraa to ˈna. Ua taui roa taua taata ra ta ˈna i matau, ua ere oia i to ˈna mau huru maitatai e ua faarue ia Iehova. Aita Samuela i haere faahou e hiˈo ia Saula. I muri iho râ, ua aˈo mǎrû noa ˈtu Iehova ia ˈna: “E oto â oe ia Saula, tei faaruehia oia e au eiaha oia ei arii [faahou] no Iseraela? A faaî na i to farii i te monoˈi, e haere ia Iese i Bete-lehema ra, te tono nei hoi au ia oe; ua noaa hoi te tahi arii na ˈu i roto i te mau tamarii na ˈna ra.”—Sam. 1, 15:34, 35; 16:1.

²⁶ E ere tei te haapao maitai o te mau taata tia ore e tupu ai te opuaraa a Iehova. Ia taiva te hoê, e itea mai iho â ia Iehova te tahi atu no te rave i to ˈNa hinaaro. Faaea ˈtura Samuela ruhiruhia i te oto ia Saula. Ma te faauehia e Iehova, haere ihora Samuela i Betelehema i te fare o Iese. E tiapai taata vetahi mau tamaiti a Iese. I to Samuela râ iteraa ˈtu i te matahiapo, parau ihora Iehova ia ˈna e eiaha e hiˈo i to ˈna tino. (A taio i te Samuela 1, 16:7.) Farerei atura Samuela i te hopea, o ˈna ta Iehova i maiti. O Davida ïa.

27. (a) Eaha ta Samuela i ite roa i puai noa ˈtu â ˈi to ˈna faaroo? (b) Eaha ta oe e au roa i roto i te hiˈoraa ta Samuela i vaiiho mai?

²⁷ I te mau matahiti hopea o to ˈna oraraa, ua taa ˈtu â ia Samuela e ua tano iho â Iehova i te monoraa ia Saula na roto ia Davida. Ua rahi noa ˈtu to Saula pohehae a hinaaro atu ai e haapohe ia Davida. Ua riro atoa mai o ˈna ei apotata. O Davida râ, ua faaite ïa i te mau huru nehenehe mau: te itoito, te hapa ore, te faaroo e te taiva ore. A fatata ˈi Samuela i te pohe, ua puai noa ˈtu â to ˈna faaroo. Ua ite roa o ˈna e e nehenehe ta Iehova e tamǎrû, e faaafaro aore ra e taui i te tupuraa faatoaruaru roa ino ei haamaitairaa. Pohe atura Samuela, a vaiiho mai ai i te aamu o te hoê taata faaroo faahiahia mau tei ora fatata 100 matahiti. Pauroa te Iseraela tei oto i te faarueraa mai teie peropheta taiva ore, eaha e ore ai! Mea maitai ïa ia ui te mau tavini a Iehova i teie mahana: ‘E pee anei au i te faaroo o Samuela?’