1, 2. (a) Eaha ta Iona e ta te mau ihitai i nia i te pahi i faaû, e no te aha? (b) Eaha ta te aamu o Iona e haapii mai ra?

 EAHA râ te riaria tera mau maniania ta Iona e faaroo ra! No te puai o te mataˈi e farara mai ra, ua tô roa te mau taura o te pahi. E tiapai are atoa tei tairi mai i nia i te pahi, a paapaaina ˈtu ai te mau raau o te pahi. Te mea huehue roa ˈtu â râ ia faaroo, te mau tutuôraa ïa a te raatira e a te mau ihitai e tautoo ra i te faatere i te pahi. Ua papu roa ia Iona e e pohe ratou pauroa, no ˈna noa ˈˈe!

² Mea nahea Iona i te ûraa i teie ati? Ua hape roa o ˈna i te faaroo-ore-raa i to ˈna Atua ra o Iehova. Eaha hoi ta ˈna i rave? Ua mutu roa anei to ˈna taairaa e o Iehova? Mea rahi te haapiiraa e huti mai i te pahonoraa o teie nau uiraa. Ei hiˈoraa, te haapii mai ra te aamu o Iona e e nehenehe te feia e faaroo mau to ratou ia Iehova e hahi ê, e nehenehe atoa râ ratou e faaafaro i to ratou haerea.

3-5. (a) E pinepine te taata i te manaˈo i te aha no nia ia Iona? (b) Eaha ta tatou i ite no nia ia Iona? (A hiˈo atoa i te nota i raro i te api.) (c) No te aha e ere ai mea ohie to Iona taviniraa ei peropheta?

³ Ia puta mai te iˈoa o Iona, e pinepine te taata i te manaˈo i to ˈna mau huru paruparu, to ˈna faaroo-ore-raa e to ˈna oreraa e aroha hamani maitai. Teie râ, e huru maitatai nehenehe roa atoa to ˈna. A haamanaˈo, ua maiti Iehova ia ˈna ei peropheta na ˈna. No te aha? No te mea e taata haapao maitai o ˈna e te parau-tia.

⁴ Te horoa mai ra te Bibilia i te tahi noa haamaramaramaraa no nia ia Iona. (A taio i Te mau arii 2, 14:25.) No Gata-hephera  o ˈna. E maha noa kilometera te atea teie oire ia Nazareta, i reira Iesu Mesia i paari mai ai hau atu i te 800 matahiti i muri aˈe. a I tavini na Iona ei peropheta a arii ai Ieroboama II i nia i na ahuru opu o Iseraela. Ua oti ê na ïa te tau o Elia, e ua pohe Elisaia, tei mono ia Elia, i te tau a faatere ai te papa o Ieroboama. Ua faaohipa Iehova ia Elia raua Elisaia no te faaore i te haamoriraa a Baala. Ua hahi ê faahou râ te nunaa Iseraela. Ua pee hoi ratou i te hiˈoraa o te hoê arii ‘tei rave noa i te ohipa ino i te aro o Iehova.’ (Arii 2, 14:24) E ere ïa mea ohie to Iona taviniraa ei peropheta. Noa ˈtu râ, ua rave maite o ˈna i ta ˈna ohipa.

⁵ I te hoê râ mahana, e taui roa te oraraa o Iona. E faaue Iehova ia ˈna ia rave i te tahi ohipa ta ˈna i manaˈo e mea fifi roa. Eaha taua ohipa ra?

6. Eaha ta Iehova i faaue ia Iona e rave, e no te aha mea riaria ˈi?

⁶ Teie ta Iehova i parau ia Iona: “A tia, a haere i te oire rahi ra i Nineve, e tiaoro atu, ua tae roa mai to ratou ino i mua i tau aro nei.” (Iona 1:2) E taa oioi ia oe no te aha mea riaria ˈi teie ohipa. Tei te pae hitia o te râ Nineve, e 800 kilometera te atea i te oire o Iona. Fatata hoê avaˈe e tae ai oe i ǒ na raro. E ere râ tera te mea fifi roa ˈˈe. I Nineve, ia faaite Iona i te poroi faautuaraa a Iehova i to Asura, tei matau-maitai-hia ei feia ino roa e te aroha ore. Aita hoi te nunaa iho o te Atua i faaroo ia ˈna, o teie mau taata ěê ïa te faaroo mai? Eaha hoi ta te hoê noa tavini a Iehova e nehenehe e rave i roto i teie oire rahi piihia i muri aˈe “te oire i viivii i te toto”?—Nah. 3:1, 7.

7, 8. (a) Na te aha e haapapu mai ra i to Iona hinaaro mau e taie? (b) No te aha eiaha ˈi tatou e ru i te parau e e mǎtaˈu hanoa Iona?

⁷ Aita tatou i ite e ua puta mai anei tera mau manaˈo i roto i te feruriraa o Iona. Ua ite râ tatou e ua taie o ˈna. Ua parau Iehova ia ˈna ia haere i te pae hitia o te râ. O ˈna râ, ua horo ïa i te pae tooa o te râ, i te vahi atea roa. Haere tia ˈtura oia i raro i Iopa, e uahu to teie oire. Ite atura oia i te hoê pahi e fano ra i Taresisa. Mai te peu e tei te fenua Paniora o Taresisa, mai ta vetahi feia ite i te Bibilia e manaˈo ra, mea atea ïa te vahi ta ˈna e taie  atu ra, e 3 500 kilometera ia Nineve. I tera tau, hoê matahiti e tae ai oe i tera roa ˈtu pae o te miti Mediteranea. Tera te hinaaro mau o Iona e taie!—A taio i te Iona 1:3.

⁸ Te auraa anei ïa e e mǎtaˈu hanoa Iona? Eiaha tatou e ru i te manaˈo mai tera. E ite mai tatou e e faaite o ˈna i te itoito faahiahia mau. Mai ia tatou pauroa râ o ˈna, e taata tia ore e mea rahi to ˈna mau paruparu. (Sal. 51:5) O vai hoi o tatou aita i mǎtaˈu aˈenei?

9. (a) Eaha paha to tatou manaˈo i te tahi taime? (b) Teihea parau mau mea faufaa ia haamanaˈo tatou i taua mau taime ra?

⁹ I te tahi taime, e manaˈo paha tatou e mea fifi ta te Atua e ani mai ra, eita atoa e maraa. E taiâ atoa paha tatou e rave i te ohipa i faauehia mai: e poro i te parau apî oaoa o te Basileia o te Atua. (Mat. 24:14) Eiaha ia moe ia tatou teie parau mau hohonu ta Iesu i faahiti: “E tia hoi te mau mea atoa nei i te Atua.” (Mar. 10:27) Ia moe noa ˈtu ia tatou teie parau mau, e taa paha ïa ia tatou te huru aau o Iona. Eaha râ te mau faahopearaa o to Iona taieraa?

10, 11. (a) A atea noa ˈtu â ˈi te pahi i tai, eaha paha ta Iona i manaˈo? (b) Eaha ta te pahi i faaû?

¹⁰ A feruri na ia Iona i nia i te pahi, papu roa e pahi hoo taoˈa no Phenicia. Te mataitai ra o ˈna i te raatira e te mau ihitai e ohipa haere ra, te faareva ra hoi ratou. A atea noa ˈtu â ˈi te pahi i tai, ua manaˈo paha Iona e ua ora ïa o ˈna. Teie râ, tupu taue ihora te vero.

¹¹ No te mataˈi rahi, era aˈe te teitei te mau are, nainai roa atoa te mau tiapai pahi no teie tau i pihai iho. Eaha ˈtu ïa tera pahi raau to nia iho Iona, hope roa ïa i te nainai e te parari hanoa, a faaû noa ˈi i te mau poopoo e te mau vavea o te moana mata are! Ua ite anei Iona i taua taime ra, mai ta ˈna i papai i muri iho, e na Iehova i tuu mai i tera mataˈi rahi i nia i taua tai ra? Aita tatou i ite. Ua ite râ o ˈna e e pau ta te mau ihitai taˈuraa i to ratou mau atua, eita taua mau atua ra e tauturu ia ratou. (Lev. 19:4) Ua papai Iona: “Manaˈohia ihora e parari taua pahi ra.” (Iona 1:4) E nahea hoi Iona e nehenehe ai e pure i te Atua ta ˈna e horo ê ra?

12. (a) No te aha paha Iona i varea roa ˈi i te taoto? (A hiˈo i te nota i raro i te api.) (b) Mea nafea to Iehova faaiteraa no vai i tupu ai te vero?

¹² I te mea aita ta ˈna e ravea no te tauturu atu, haere ihora  Iona i roto i te hati, tarava ihora e mairi roa ˈtura to ˈna taoto. b Itehia ˈtura oia e te raatira, o tei faaara ˈtu e tei faaue atu ia pure i to ˈna Atua. Te na reira atoa ra te toea. Tuu aˈera te mau ihitai i te kelero no te ite no vai i rotopu ia ratou i tupu ai te vero. Ua papu roa ia ratou e aita teie vero i tupu mai tera noa. Ua riaria noa ˈtu â paha Iona a haere noa ˈi te tuuraa kelero, no te mea aita â i itehia ˈtura o vai te tumu o to ratou ati. Aita i maoro, faatopa ˈtura Iehova i te kelero i nia ia Iona no te faaite e no to Iona faaroo ore i faatupu ai o ˈna i taua vero ra.—A taio i te Iona 1:5-7.

13. (a) Eaha ta Iona i faatia i te mau ihitai? (b) Eaha ta Iona i faaue i te mau ihitai, e no te aha?

¹³ Faatia pauroa ˈtura Iona i te mau ihitai: e tavini o ˈna na te Atua mana hope ra o Iehova, ta ˈna e horo ê ra e ta ˈna i faaroo ore. No ˈna ïa i roohia ˈi ratou pauroa i teie ati. Ua huru ê roa te mau ihitai. Ua ite roa ˈtu Iona i te mehameha i roto i to ratou mata. Ani maira ratou e nahea ïa ratou ia ˈna ia ore to ratou pahi e parari, a ora mai ai ratou. Eaha ta Iona i parau? Ua hotaratara paha o ˈna i te putaraa mai te manaˈo e te paremo atu ra o ˈna i raro i te moana toetoe mata are. E nahea hoi o ˈna e nehenehe ai e vaiiho i tera mau taata atoa ia pohe? Ua ite o ˈna e e nehenehe ta ˈna e faaora ia ratou. Faaue atura oia: “E rave mai outou ia ˈu, e huri i raro i te tai; ei reira e mania ˈi te tai ia outou: ua ite hoi au e, no ˈu i roohia ˈi tatou i teie nei vero rahi.”—Iona 1:12.

14, 15. (a) E nafea tatou e pee ai i te faaroo o Iona? (b) Ua aha te mau ihitai i ta Iona i faaue atu?

¹⁴ Eita te hoê taata mǎtaˈu hanoa e paraparau mai teie, e ere anei? Eita e ore e ua oaoa roa Iehova i te iteraa i te itoito e te feruriraa haapae o Iona i roto i taua ati ra! Te ite ra ïa tatou i ǒ nei i te faaroo puai o Iona. E nehenehe tatou e pee i to ˈna hiˈoraa ma te tâuˈa na mua ia vetahi. (Ioa. 13:34, 35) Ia hinaaro te tahi taata i te tauturu i te pae materia, i te pae varua aore ra te oto ra o ˈna, e rohi anei tatou i te tauturu atu? E oaoa roa Iehova ia na reira tatou!

¹⁵ Ua putapû atoa paha te mau ihitai i ta Iona i parau atu, aita hoi ratou i farii oioi. Faaitoito aˈera râ ratou i te hôe ia tae te  pahi i uta, aita râ i haere. Ua uˈana roa ˈtu â te vero. Ite atura ratou e aita iho â ta ratou e ravea. Pii aˈera ratou ia Iehova, te Atua o Iona, ia aroha mai ia ratou, rave ihora ia Iona e huri atura i roto i te moana.—Iona 1:13-15.

16, 17. Eaha tei tupu i nia ia Iona i to ˈna huriraahia i roto i te moana? (A hiˈo atoa i te mau hohoˈa.)

¹⁶ I roto i tera moana mata are, eita e ore e ua ǎu noa Iona ia ore oia e paremo e ua ite atu i te pahi i te painu-mǎrû-noa-raa ˈtu. No te puai râ o te mau vavea e fati noa mai ra i nia iho ia ˈna, moe roa ˈtura o ˈna i raro i te moana, a manaˈo atu ai e ua oti iho â ïa no ˈna.

¹⁷ Ua faataa Iona i muri aˈe eaha to ˈna huru i taua taime ra. Ua puta mai te tahi mau hohoˈa. I to ˈna moeraa ˈtu i raro i te moana, mai te huru ra e te pou atu ra o ˈna i te hohonu-roa-raa o te moana, “i te tumu o te mau mouˈa,” i reira to ˈna tafifiraa i roto i te mau rimu. E au ra e i ǒ o ˈna e pohe ai.—A taio i te Iona 2:2-6.

18, 19. (a) Eaha tei tupu i nia ia Iona i raro i te moana? (b) Eaha te iˈa i horomii ia Iona, e na vai i tono mai i tera iˈa? (A hiˈo atoa i te nota i raro i te api.)

 ¹⁸ Haaati ihora râ te tahi mea maereere e te tiapai ia Iona, e tapiri roa maira. Afaro taue roa maira taua mea ra i nia ia Iona, haamâmâ aˈera i to ˈna vaha e horomii atura ia Iona!

¹⁹ Eita e ore e ua manaˈo Iona e e pohe o ˈna. E taa râ ia ˈna e te ora noa ra o ˈna. Aita o ˈna i perehu, aita atoa i huˈahuˈa e aita to ˈna aho i mure. Te huti noa ra o ˈna i te aho, noa ˈtu e to roto o ˈna i ta ˈna i manaˈo e e apoo no ˈna. Î riirii ihora Iona i te mǎtaˈu faatura. Papu roa, na to ˈna Atua ra o Iehova i tono mai i te hoê iˈa rahi no te horomii ia ˈna. c—Iona 1:17.

20. Na roto i ta ˈna pure i roto i te iˈa, eaha ta tatou e taa no nia ia Iona?

²⁰ A mairi ïa minuti, a mairi ïa hora. I roto i te poiri iti rahi, feruri ihora Iona e pure atura ia Iehova. Na roto i ta ˈna pure, tei papaihia i roto i te pene piti o ta ˈna buka, e taa ia tatou e ua ite maitai oia i te mau Papai. E pinepine hoi ta ˈna buka i te faahiti i te mau Salamo. E taa atoa ia tatou te hoê huru putapû to ˈna: te mauruuru. Ua parau Iona: “E hopoi râ vau i te tusia na oe ma te haamaitai; ta ˈu hoi i euhe ra, o ta ˈu ïa e hopoi. Tei ia Iehova te ora.”—Iona 2:9.

21. (a) Eaha ta Iona i haapii mai no nia i te faaoraraa? (b) Ia haamanaˈo noa ïa tatou i te aha?

²¹ Ua haapii mai Iona e e nehenehe iho â ta Iehova e faaora i ta ˈna mau tavini aita e hiˈoraa i te vahi e te huru tupuraa. ‘I roto roa hoi i te opu o te iˈa’ to ˈna iteraahia mai e to ˈna faaoraraahia e Iehova. (Iona 1:17) O Iehova anaˈe te nehenehe e paruru i te hoê taata e toru rui, e toru ao i roto i te opu o te hoê iˈa rahi. E haamanaˈo noa anaˈe ïa e ‘to roto i te rima o te Atua to tatou aho.’ (Dan. 5:23) Na ˈna to tatou aho e to tatou ora. E faaite anaˈe ïa i to tatou mauruuru ma te auraro ia ˈna.

22, 23. (a) Mea nafea to Iona mauruuru i te tamataraahia? (b) E nafea ia pee ia Iona ia hape tatou?

 ²² E o Iona? Ua haapii anei oia i te faaite i to ˈna mauruuru ia Iehova ma te auraro atu? E. E toru rui, e toru ao i muri iho, tapiri ihora te iˈa i uta e pihaˈe atura ia Iona i tatahi. (Iona 2:10) A hiˈo na, aita Iona i ǎu noa ˈˈe e tae roa ˈtu i tatahi. Ta ˈna noa i rave i to ˈna afairaahia i tatahi, te imiraa ïa i to ˈna eˈa. Aita râ i maoro, ua tamatahia to ˈna mauruuru ia Iehova. Te na ô ra te Iona 3:1, 2: “E [t]apiti maira te parau a Iehova ia Iona ra, na ô maira, A tia, a haere i taua oire rahi ra i Nineve, a tiaoro atu ai i ta ˈu i faaue atu ia oe.” Ua nahea Iona?

²³ Aita o ˈna i haamarirau. Te taio nei tatou: “Tia aˈera Iona i nia, haere atura i Nineve, i ta Iehova i parau maira.” (Iona 3:3) Ua auraro o ˈna. Papu roa, ua huti mai o ˈna i te haapiiraa i ta ˈna mau hape. Ia pee atoa tatou i te faaroo o Iona i roto i teie tuhaa. E hara tatou pauroa. E hape tatou pauroa. (Roma 3:23) E nahea râ tatou? E taora anei i te tauera, aore ra e huti mai i te haapiiraa i ta tatou mau hape, a tavini atu ai i te Atua ma te auraro?

24, 25. (a) Eaha te haamaitairaa ta Iona i fanaˈo? (b) Eaha te haamaitairaa e tiai mai ra ia Iona?

²⁴ Ua haamaitai anei Iehova ia Iona no to ˈna auraro? E. E au ra e ua faaroo Iona i muri iho e ua ora mai te mau ihitai. I muri rii aˈe i to ratou huriraa ia Iona i roto i te miti, pohe ihora te vero. “Mǎtaˈu roa ˈtura taua mau taata ra ia Iehova” e pûpû atura i te tahi tusia ia Iehova, eiaha râ i to ratou mau atua haavare.—Iona 1:15, 16.

²⁵ E haamaitairaa rahi atu â ta Iehova i horoa mai i muri aˈe. Ua faaohipa Iesu i to Iona vairaa e toru rui, e toru ao i roto i te iˈa rahi ei hohoˈa parau tohu o to ˈna vairaa i roto i te apoo, aore ra ia hade. (A taio i te Mataio 12:38-40.) E oaoa roa Iona ia faaroo o ˈna i teie haamaitairaa ia faatia-faahou-hia mai oia i nia i te fenua! (Ioa. 5:28, 29) E hinaaro Iehova e haamaitai ia oe atoa. E huti mai anei oe, mai ia Iona, i te haapiiraa i ta oe mau hape, e auraro anei oe i te Atua, a faaite atu ai i te here ia vetahi ê?