1-6. A horoa i te tahi mau tupuraa ta te mau Ite no Iehova i rave i roto i te pororaa.

 I TE fenua no Ghana, no Rebecca te hoê taurearea Ite no Iehova, ua riro te fare haapiiraa ei vahi pororaa na ˈna. E afai noa o ˈna na muri ia ˈna ta tatou mau papai Bibilia. I te taime faafaaearaa, e poro o ˈna i to ˈna mau hoa haapiiraa. Ua haamata ïa Rebecca i te haapiiraa Bibilia na muri e rave rahi o ratou.

² I te motu no Matetata piri i te pae hitia o te râ no Afirika, e haere pinepine e piti pionie i raro aˈe i te mahana, i nia e 25 kilometera te atea no te farerei i te taata i te hoê oire rii moˈemoˈe. I reira, ua faatere raua e rave rahi haapiiraa Bibilia i te feia o tei anaanatae.

³ No te poro i te feia e ora ra i pihai iho i na anavai o Paraguay e Paraná, ua hamani te mau taeae no Paraguay e na 15 rima tauturu no te tahi atu mau fenua i te hoê poti. E nehenehe teie poti e faauta 12 taata. Maoti te reira, ua nehenehe te feia poro e afai i te poroi o te parau apî oaoa i te mau vahi mea fifi ia haere e poro.

⁴ I te pae apatoerau i Alaska, i te tau veavea iho â ra, e haere mai te mau ratere no e rave rahi fenua. Ua faaohipa ïa te mau taeae i tera taime no te poro atu ia ratou, i te uahu e ta ratou mau papai Bibilia na roto e rave rau reo. I tera noa vahi, e faaohipa te mau taeae i te hoê manureva no te poro i te mau vahi atea, e nehenehe ïa te mau taata aléoute, athapascane, tsimshian e tlingit e faaroo i te parau apî oaoa.

⁵ I Texas, i Marite, e tuhaa fenua taa ê ta Larry, oia hoi, te hoê fare e aupuru i te feia maˈimaˈi i reira oia e faaea ˈi. Noa ˈtu tei nia o ˈna i te hoê parahiraa turairai, ua imi Larry i te mau ravea no te poro. E paraparau o ˈna i te taata no nia i te Faatereraa arii a te Atua e te tiaturiraa e ia tae i te hoê mahana, e nehenehe faahou oia e hahaere.

⁶ I Birmanie, e rave te mau Ite no Iehova i te hoê pahi i Mandalay no te hoê tere e toru mahana no te apiti i te hoê tairururaa. No to ratou hinaaro e poro, ua afai ratou i te mau papai Bibilia o ta ratou i pûpû atu i te mau horopatete. I te mau vahi atoa e tapae ai ratou, e pou oioi te mau taeae no te pûpû i te mau papai i te mau taata na te oire. I muri  aˈe, ia hoˈi mai te mau taeae i nia i te pahi, te vai ra te mau horopatete apî tei pauma mai, e nehenehe ïa te mau taeae e poro atu ia ratou.

7. Eaha te mau ravea ta te mau Ite no Iehova e faaohipa ra ia poro ratou no nia i te Faatereraa arii a te Atua, e eaha ta ratou fa?

⁷ Mai te hiˈoraa o te mau taeae e tuahine i faahitihia na mua ˈtu, te poro ra te mau tavini itoito a Iehova na te ao nei “i te parau o te Faatereraa arii a te Atua.” (Ohi. 28:23) E haere ratou i tera e tera fare, e paraparau ratou i te feia na te mau aroâ, e papai ratou i te mau rata e e paraparau ratou i te feia ta ratou e niuniu. E imi ratou i te mau ravea atoa no te poro i te taata no nia i te Faatereraa arii a te Atua, ei hiˈoraa, na nia i te mau pereoo mataeinaa, ia haere ratou i te mau aua faafaaearaa aore ra i te taime faafaaearaa i ta ratou vahi raveraa ohipa. Ua rau te mau ravea no te poro, hoê â râ fa: Te pororaa i te parau apî oaoa i te mau vahi atoa e farerei ai tatou i te taata.—Mat. 10:11.

8, 9. (1) No te aha mea faahiahia mau te ohipa pororaa no nia i te Faatereraa arii a te Atua? (2) Eaha te uiraa e puta mai i roto i to tatou feruriraa e eaha te rave no te ite i te pahonoraa?

⁸ Tei rotopu atoa anei outou i na mirioni Ite no Iehova e poro ra i roto hau atu 235 fenua? Mai te peu e e, e oaoa outou i te hopoi i te parau apî oaoa i te mau taata e rave rahi ati aˈe teie nei ao! Mea faahiahia mau te ohipa ta te nunaa o Iehova e rave ra na te ao nei. Noa ˈtu te mau haafifiraa, oia atoa te opaniraa o ta tatou ohipa pororaa e te hamani-ino-raa, e tamau noa te mau Ite no Iehova i te poro i te mau taata no te mau nunaa atoa no nia i te Faatereraa arii a te Atua.

⁹ A feruri na: Noa ˈtu te mau fifi ta tatou e faaruru ra e te tamataraa a Satani ia faaea i te poro, no te aha te tamau noa ra te ohipa pororaa i te parare? No te pahono i tera uiraa, e hiˈo anaˈe i tei tupu i te senekele matamua. Inaha, te rave noa ra te mau Ite no Iehova i teie mahana i te ohipa pororaa mai tei ravehia i tahito ra.

10. Ua faaohipa Iesu i to ˈna taime i roto i te aha, e eaha ta ˈna i ite no nia i teie ohipa pororaa?

¹⁰ I te mea na Iesu i haamau i te amuiraa Kerisetiano, ua faaohipa o ˈna i to ˈna taime taatoa i nia i te fenua no te poro i te parau apî oaoa no nia i te Faatereraa arii a te Atua. Ua faataa oia: “Ia faaite atoa vau i te parau apî oaoa o te Faatereraa arii a te Atua i te tahi atu mau oire e tia ˈi, no reira hoi au i tonohia mai ai.” (Luka 4:43) Ua ite Iesu aita e oti ia ˈna te ohipa pororaa ta ˈna i haamata. Hou rii oia a pohe ai, ua tohu o ˈna e e porohia te poroi o te Faatereraa arii “i te mau nunaa atoa.” (Mar. 13:10) E nafea te reira e ravehia ˈi e e na vai?

11. Eaha te hopoia faufaa mau ta Iesu i horoa i ta ˈna mau pǐpǐ, e eaha te tauturu ta ratou e fanaˈo?

 ¹¹ I muri aˈe i to ˈna poheraa e tia-faahou-raa, ua fa mai Iesu i ta ˈna mau pǐpǐ e ua horoa ˈtu i teie hopoia faufaa mau: “A haere ïa e faariro i te taata o te mau nunaa atoa ei pǐpǐ ma te bapetizo ia ratou i te iˈoa o te Metua e o te Tamaiti e o te varua moˈa, ma te haapii ia ratou ia haapao i te mau mea atoa ta ˈu i faaue ia outou. E a haamanaˈo, tei pihai iho vau ia outou i te mau mahana atoa e tae noa ˈtu i te anotau hopea o te ao nei.” (Mat. 28:19, 20) Te faataa ra te parau “tei pihai iho vau ia outou” e e turu Iesu i ta ˈna mau pǐpǐ i roto i te ohipa pororaa e no te faariro i te taata ei pǐpǐ. E hinaaro ratou i teie turu, ua tohu hoi Iesu “e hae te mau nunaa atoa” ia ratou. (Mat. 24:9) Ua ite atoa te mau pǐpǐ e ua fafau Iesu e e horoa mai oia te tahi atu tauturu. Hou oia a hoˈi ai i te raˈi, ua parau Iesu ia ratou e e noaa ia ratou te puai ia tae mai te varua moˈa i nia iho ia ratou, e e riro ratou ei ite no ˈna “e tae noa ˈtu i te hopea o te fenua.”—Ohi. 1:8.

12. Eaha te mau uiraa e hiti mai, e no te aha mea faufaa ia ite i te mau pahonoraa?

¹² E hiti mai ra te tahi mau uiraa faufaa: Ua haafaufaa anei te mau aposetolo a Iesu e te tahi mau pǐpǐ o te senekele matamua i ta ratou ohipa pororaa? Ua nehenehe anei te hoê pǔpǔ iti Kerisetiano e poro no nia i te Faatereraa arii a te Atua noa ˈtu te mau patoiraa uˈana? Ua fanaˈo anei ratou i te tauturu a Iehova e te turu a te varua moˈa i roto i ta ratou ohipa e faariro i te taata ei pǐpǐ? E pahonohia teie mau uiraa e te tahi atu i roto i te buka Ohipa. Mea faufaa ia ite i te mau pahonoraa. No te aha? No te mea ua fafau Iesu e e tamau noa tera ohipa i te ravehia “e tae noa ˈtu i te anotau hopea o te ao nei.” No reira, na te mau Kerisetiano mau atoa e te feia e ora ra i teie tau hopea tera hopoia e haere e poro. Tera te tumu e hinaaro ai tatou e haapii no nia i te mau aamu e faahitihia ra i roto i te buka Ohipa.

13, 14. (1) Na vai i papai i te buka Ohipa, e mea nafea oia i te iteraa mai i te tahi mau haamaramaramaraa? (2) Eaha te itehia i roto i te buka Ohipa?

¹³ Na vai i papai i te buka Ohipa? Aita te buka e faahiti ra i te iˈoa o te taata papai, tera râ, te faataa maitai ra te omuaraa parau e hoê â taata tei papai i te buka Ohipa e te evanelia a Luka. (Luka 1:1-4; Ohi. 1:1, 2) I te hoê râ tau, ua manaˈohia o Luka “te taote here” e ei taata tuatapapa, tei papai i te buka Ohipa. (Kol. 4:14) Te puohu ra te buka i te hoê roaraa 28 matahiti, mai te hoˈiraa Iesu i te raˈi i te matahiti 33 e tae roa mai i te tapearaahia Paulo i Roma i te matahiti 61. To reira atoa Luka i roto i te mau tupuraa o ta ˈna i papai. No reira oia i faaohipa ˈi i te taˈo “matou.” (Ohi. 16:8-10; 20:5; 27:1) No te mea ua hinaaro Luka e papai i tei tupu mau, ua ani ïa oia i te haamaramaramaraa ia Paulo, ia  Baranaba, ia Philipa e te tahi atu mau taata hou a papai ai i te buka Ohipa.

¹⁴ Eaha te itehia i roto i te buka Ohipa? I na mua ˈtu, i roto i ta ˈna buka, ua papai Luka i te mau mea o ta Iesu i parau e i rave. I roto râ i te buka Ohipa, te faataa ra Luka i ta te mau pǐpǐ a Iesu i parau e i rave. Te buka Ohipa, o te mau ohipa ïa ta te mau taata i rave ma te faahiahia, noa ˈtu aita vetahi o ratou i ‘haere i te haapiiraa aore ra aita e tiaraa teitei’ to ratou. (Ohi. 4:13) Ei haapotoraa, maoti te tauturu a te varua moˈa, te faataa ra Luka mea nafea te amuiraa Kerisetiano i te haamauraahia e mea nafea te reira i te rahiraa mai. Oia atoa mea nafea te mau Kerisetiano o te senekele matamua i te pororaa: Ta ratou huru raveraa e to ratou haerea. (Ohi. 4:31; 5:42) Te faaite ra te reira, mea nafea te varua moˈa i tauturu ai ia parare te parau apî oaoa. (Ohi. 8:29, 39, 40; 13:1-3; 16:6; 18:24, 25) Mai te toea o te mau buka Bibilia, te faahiti ra te buka Ohipa i te manaˈo tumu o te Bibilia, e nafea te Faatereraa a te Mesia e haamoˈa ˈi i te iˈoa o te Atua e mea nafea te mau pǐpǐ i te pororaa i te parau apî oaoa noa ˈtu ua patoi e rave rahi ia ratou.—Ohi. 8:12; 19:8; 28:30, 31.

15. E nafea tatou e faufaahia ˈi i te hiˈopoaraa i te buka Ohipa?

¹⁵ Mea faahiahia e mea faaitoito mau ia hiˈopoa i te buka Ohipa! Ia feruri tatou i te hiˈoraa o te mau pǐpǐ itoito mau a Iesu, e putapû roa to tatou aau e e turai atoa te reira ia tatou ia pee i to ratou faaroo. E nehenehe ïa tatou e rave maitai i ta tatou hopoia e ‘haere e faariro i te taata ei pǐpǐ.’ E tauturu mai teie buka ta outou e taio ra ia faahohonu atu â i ta outou haapiiraa i nia i te buka Ohipa.

16. Eaha na toru fa o teie buka?

¹⁶ Eaha te fa o teie buka? (1) Ia haapuai i to tatou tiaturiraa e e turu mai Iehova maoti to ˈna varua moˈa, i te pororaa i te Faatereraa arii e i te faariroraa i te taata ei pǐpǐ, (2) ia itoitohia tatou i roto i ta tatou taviniraa ma te hiˈopoa i te hiˈoraa o te mau pǐpǐ a te Mesia e te (3) ia faaite i te faatura rahi no ta Iehova faanahonahoraa e te mau taeae e tiaau ra i te ohipa pororaa e te mau amuiraa.

17, 18. Mea nafea teie buka i te faanahoraahia, e eaha te tahi mau tuhaa mea faufaa no ta tatou iho haapiiraa Bibilia?

¹⁷ Mea nafea teie buka i te faanahoraahia? E vaˈu tuhaa to teie buka, e puohu te mau tuhaa tataitahi i te hoê tuhaa o te buka Ohipa. Te fa o te mau pene, e ere no te faahuˈahuˈa i te mau irava o te buka Ohipa, no te huti mai râ i te haapiiraa no te mau tupuraa o tei faahitihia i roto i teie buka e e nafea tatou e faaohipa ˈi i ta tatou i haapii. I te omuaraa o te mau pene, e horoahia te manaˈo faufaa o te pene e te hoê irava o te faaite ra i te tuhaa o te buka Ohipa e aparauhia ra.

 ¹⁸ E itehia hau atu â faataaraa i roto i teie buka e te faufaa no ta tatou iho haapiiraa Bibilia. Ia hiˈo tatou i te mau hohoˈa i roto i teie buka, e tauturu mai te reira ia feruri i tei papaihia i roto i te buka Ohipa. I roto e rave rahi pene, e itehia te mau tumu parau tarenihia o tei horoa mai i te tahi atu faataaraa hau. Oia atoa te mau hiˈoraa o te mau taata ta tatou e nehenehe e pee. E ite-atoa-hia te tahi atu â tuhaa no nia i te mau vahi, te mau tupuraa, te mau peu tumu aore ra te mau taata tei faahitihia i roto i te buka Ohipa.

19. Eaha te titauhia i te taata poro ia rave?

¹⁹ E tauturu mai teie buka ia outou ia feruri maite i nia i ta outou taviniraa ia Iehova. Noa ˈtu e rave rahi matahiti outou i te riroraa ei taata poro, mea maitai ia rave i te taime no te hiˈopoa eaha te mea faufaa no outou e ta outou huru hiˈoraa i ta outou taviniraa Kerisetiano. (Kor. 2, 13:5) A uiui ia outou iho: ‘Te haafaufaa noa ra anei au i ta ˈu taviniraa? (Kor. 1, 7:29-31) Te poro ra anei au i te parau apî oaoa ma te tiaturi e te itoito? (Tes. 1, 1:5, 6) Te apiti rahi ra anei au i roto i te ohipa pororaa e te faariroraa i te taata ei pǐpǐ?’—Kol. 3:23.

20, 21. No te aha mea ru ta tatou ohipa pororaa, e eaha te tia ia tatou ia rave?

²⁰ Eiaha roa ˈtu tatou e haamoˈe i te hopoia faufaa te titauhia ia tatou ia rave, oia hoi, te ohipa pororaa e te faariroraa i te taata ei pǐpǐ. A nuu noa ˈi te mau mahana, rahi roa atoa mai te ru o teie ohipa. Te piri roa mai ra te hopea o teie nei ao. No reira, mea titauhia ia faaroo te taata eaha te rave no te ora mai i Aramagedo. (Ohi. 13:48) Na tatou râ teie hopoia e tauturu i te taata ia ora atoa mai ratou.—Tim. 1, 4:16.

²¹ No reira, mea faufaa roa ia pee tatou i te hiˈoraa o te feia poro itoito o te Faatereraa arii o te senekele matamua. Ia turai ta outou haapiiraa o teie buka ia poro ma te itoito rahi. E ia puai noa ˈtu â to outou hinaaro e ‘faataa maitai i te parau o te Faatereraa arii a te Atua.’—Ohi. 28:23.