1, 2. Eaha te semeio ta Petero e Ioane i rave i pihai iho i te uputa o te hiero?

 TEI nia te hihi mahana o te avatea i te nahoa. Te tomo ra te ati Iuda taiva ore e te mau pǐpǐ a Iesu i roto i te hiero. E fatata te hora “no te pure.” a (Ohi. 2:46; 3:1) Tei rotopu Petero e Ioane i te nahoa, e te haere ra raua i te uputa o te hiero parauhia Nehenehe. Mea maniania roa no te rahi o te taata o te hahaere ra. Te vai atoa ra hoê taata pirioi mai to ˈna fanauraahia mai o te taparu ra i te moni. E ua hau atu 40 matahiti to ˈna.—Ohi. 3:2; 4:22.

² I to Petero e Ioane tapiriraa ˈtu i te taata pirioi, taparu ihora oia i te moni ma te tiaturi e horoa mai raua maa moni. Pahono atura Petero: “Aita ta ˈu e ario e te auro, te mea râ e vai ra ia ˈu, ta ˈu ïa e horoa ˈtu. I te iˈoa o Iesu Mesia no Nazareta, a tia e a haere!” A feruri na i to te nahoa iteraa ia Petero faatiaraa mai i te taata pirioi, e etaeta ihora to ˈna avae e haere atura! (Ohi. 3:6, 7) Te ite ra anei outou i teie taata o te hiˈo ra i to ˈna avae, a tamata ˈtu ai i te taahi no te taime matamua? E ere iho â i te mea maere i to ˈna ouˈauˈaraa ma te arue i te Atua!

3. Eaha te ô faufaa aˈe ta te taata tei faaorahia te maˈi e te nahoa i fanaˈo?

³ Ua maere roa te nahoa, e horo aˈera ia Petero e Ioane i te Anairaa pou a Solomona. I reira atoa Iesu i te tiaraa no te haapii, e ua faataa Petero ia ratou mea nafea teie semeio i te tupuraa. (Ioa. 10:23) Ua horoa Petero i te nahoa e te taata tei faaorahia te maˈi i te hoê ô mea faufaa aˈe i te ario e te auro. Mea hau aˈe teie ô i te faaoraraa i te maˈi. Teie te taime no te tatarahapa, ia faaorehia ta ratou mau hara na Iehova e ia riro ei pǐpǐ na Iesu Mesia ‘te Aratai rahi o te horoa i te ora’ ta Iehova i faatoroa.—Ohi. 3:15.

4. (1) A tupu ai te semeio, eaha ta te feia mana i tamata i te rave? (2) Eaha na uiraa e piti ta tatou e pahono mai?

⁴ Auê ïa mahana faahiahia mau! Ua faaorahia te maˈi o te hoê taata e  ua nehenehe oia e haere. Ua horoahia i na hau atu tausani taata te ravea ia taa i to te Atua hinaaro oia hoi ia nehenehe ratou e faaoaoa ia ˈna. (Kol. 1:9, 10) Hau atu â, no te ohipa i tupu i tera mahana, ua tamata te feia mana i te tapea i te mau pǐpǐ taiva ore ia rave i ta Iesu faaueraa e poro i te Faatereraa arii. (Ohi. 1:8) Eaha ta tatou e haapii mai i te mau ravea faaohipahia e te huru o Petero raua Ioane, noa ˈtu “aita raua i haere i te haapiiraa e aita to raua e tiaraa teitei,” a poro ai raua i te nahoa? b (Ohi. 4:13) E e nafea tatou e faaite ai i te itoito, mai ia Petero, Ioane e te tahi atu mau pǐpǐ i to ratou hamani-ino-raahia?

5. Eaha ta tatou e haapii mai i to Petero paraparauraa i te nahoa?

⁵ Ua paraparau Petero e Ioane i te nahoa. Ua ite raua tei roto atoa te tahi o te mau taata tei titau ia haapohehia Iesu. (Mar. 15:8-15; Ohi. 3:13-15) Papu maitai, ua faaite Petero i te itoito rahi a parau ai oia ua ora mai te taata pirioi ma te iˈoa o Iesu. Aita Petero i huna i te parau mau. Ua faaite papu oia e tuhaa ta ratou i roto i te poheraa o Iesu. Aita râ Petero i inoino i te nahoa, ua haa ratou no te mea ‘aita ratou i ite i ta ratou i rave na.’ (Ohi. 3:17) Ua pii oia ia ratou to ˈna mau taeae e ua poro i te parau apî oaoa o te Faatereraa arii. Ia tatarahapa ratou e ia faatupu ratou i te faaroo i te Mesia, e fanaˈo ratou “i te anotau haumârû” no ǒ mai ia Iehova ra. (Ohi. 3:19) Ia na reira atoa ïa tatou ia poro tatou i ta te Atua haavaraa. E i te hoê â taime, eiaha roa tatou ia etaeta aore ra ia haava i te taata. E poro râ tatou ia ratou ma te tiaturi e riro mai ratou ei taeae no tatou, e mai ia Petero, e tiatonu tatou i nia i te mau tuhaa faufaa o te poroi o te Faatereraa arii.

6. Mea nafea Petero e Ioane i te faaiteraa i te haehaa e te aau faahaihai?

⁶ Mea haehaa te mau aposetolo. Aita ratou i manaˈo auaˈe ratou i tupu ai te mau semeio. Ua parau Petero i te nahoa: “No te aha outou e maere roa ˈi, e no te aha outou e hiˈo noa mai ai ia mâua, mai te mea ra no mâua i haere ai teie taata aore ra no te mea te haamori nei mâua i te Atua?” (Ohi. 3:12) Ua ite Petero e te tahi atu mau aposetolo e ere ma to ratou puai maoti noa râ te puai o te Atua i nehenehe ai ratou e rave i te mea maitai i roto i ta ratou taviniraa. No reira ïa ratou i faaite ai i te haehaa e te aau faahaihai e i hinaaro ai ia arue te taata ia Iehova e ia Iesu.

7, 8. (1) Eaha te ô ta tatou e horoa i te taata? (2) Nafea te parau tohu o “te tau e faahoˈihia ˈi te mau mea atoa mai i te matamua ra” i tupu ai i teie mahana?

⁷ Titau-atoa-hia ia tatou ia faaite i te aau faahaihai ia rave tatou i te ohipa pororaa. Papu maitai, aita te varua moˈa o te Atua e horoa i te mau Kerisetiano i te puai no te faaora i te maˈi. Nehenehe râ tatou e tauturu  i te taata ia faatupu i te faaroo i te Atua e i te Mesia e ia fanaˈo atoa i te ô ta Petero i horoa, oia hoi, ia faaorehia ta ratou mau hara e ia tamahanahanahia ratou e Iehova. Pauroa te matahiti, e tausani taata tei farii i teie titauraa a riro mai ai ei pǐpǐ bapetizohia a te Mesia.

⁸ Oia mau, mai ta Petero i parau, te ora nei tatou “i te tau e faahoˈihia ˈi te mau mea atoa mai i te matamua ra.” Ua haamata te Faatereraa arii a te Atua i te faatere i 1914 i te raˈi, e ua tupu te mau parau tohu mai ta te ‘Atua i parau na roto i ta ˈna mau peropheta i tahito ra.’ (Ohi. 3:21; Sal. 110:1-3; Dan. 4:16, 17) I muri iti noa ˈˈe, ua tauturu te Mesia i ta ˈna mau pǐpǐ ia faahoˈi i te haamoriraa mau i te fenua nei. E ua riro mai ïa e mirioni taata ei mero o te Faatereraa arii a te Atua e te tavini nei ia Iehova. Ua faarue ratou i te huru taata tahito e ua “ahu mai i te huru taata apî tei poietehia ia au i te hinaaro o te Atua.” (Eph. 4:22-24) Maoti te varua moˈa o te Atua i ora ˈi te pirioi e e tauturu atoa te varua moˈa o te Atua i te taata ia taui e ia tavini i te Atua, eiaha râ ma te puai taata. Mai ia Petero, titauhia ia tatou te itoito e te aravihi no te faaohipa i te Parau a te Atua no te haapii i te tahi atu. Maoti noa te varua o te Atua e tauturu ai tatou i te tahi taata ia riro mai ei pǐpǐ na Iesu eiaha râ ma to tatou puai.

9-11. (1) Mai te aha te huru o te mau aratai ati Iuda i te poroi a Petero e Ioane? (2) Eaha ta te mau aposetolo i faaoti i te rave?

⁹ Ua huehue roa te nahoa no te orero a Petero e te pirioi tei faaorahia. Ua haere oioi mai râ te raatira o te hiero, te taata o te vai ara ra i te hiero e te mau tahuˈa tiaau, no te hiˈo eaha te tupu ra. E pǔpǔ faaroo amaha rahi o te haapaoraa ati Iuda paha ratou, e feia tiaraa teitei e e taoˈa rahi ta ratou o te ohipa ra e to Roma. Taa ê atu i te mau Pharisea o tei auraro ra i te ture, e patoi te Sadukea i te reira e aita ratou e tiaturi ra i te tia-faahou-raa. c Ua riri roa ratou i te iteraa ia Petero e Ioane i roto i te hiero o te haapii ra e ua faatiahia mai Iesu!

¹⁰ Tuu aˈera te feia patoi ia Petero e Ioane i te fare tapearaa e i te mahana i muri iho afaihia raua i mua i te tiripuna teitei a te ati Iuda. No teie mau taata tiaraa teitei, “aita raua i haere i te haapiiraa e aita to raua e tiaraa teitei,” no te haapii i roto i te hiero. Aita Petero e Ioane i haere i te hoê fare haapiiraa faahiahia. Ua paraparau râ raua ma te mǎtaˈu ore e te aravihi e ua maere roa te tiripuna. Nohea mai to Petero e Ioane aravihi? Hoê tumu, ua ‘na muri raua ia Iesu.’ (Ohi. 4:13) Ua haapii to raua Fatu mai te hoê taata e mana to ˈna eiaha râ mai te mau papai parau.—Mat. 7:28, 29.

¹¹ Ua faaue te tiripuna i te mau aposetolo ia faaea i te poro. I tera ra tau, e mana to te feia e ohipa ra i te tiripuna. Tau hebedoma na mua ˈtu,  i to Iesu tiaraa i mua ia ratou, ua na ô ratou: “Ia pohe iho â oia.” (Mat. 26:59-66) Aita râ Petero e Ioane i mǎtaˈu. A tia noa ˈi raua i mua i teie feia taoˈa rahi, tiaraa teitei, ua parau Petero e Ioane ma te tura e te mǎtaˈu ore: “Mai te peu e mea tia i te aro o te Atua ia faaroo ia outou eiaha râ ia ˈna, na outou e hiˈo. Area mâua, eita ïa e tia ia ore e parau i te mau mea ta mâua i ite e i faaroo.”—Ohi. 4:19, 20.

12. Eaha te tauturu mai ia tatou ia faatupu i te itoito e te mǎtaˈu ore?

¹² E hinaaro atoa paha outou e faaite i te hoê â itoito. Tera râ e mǎtaˈu paha outou i te poro i te feia moni, te feia ite aore ra te feia e mana to ratou i to outou vahi. E peneiaˈe te mǎtaˈu ra outou e faaooohia outou e to outou fetii, hoa haapiiraa aore ra hoa ohipa no ta outou mau tiaturiraa. Ahani tera iho â, nehenehe outou e haapauma i te reira. A ora ˈi Iesu i te fenua nei, ua haapii oia i te mau aposetolo mea nafea ia paturu i ta ratou tiaturiraa ma te mǎtaˈu ore e te tura. (Mat. 10:11-18) A faatiahia ˈi oia, ua fafau Iesu i ta ˈna mau pǐpǐ e e vai noa oia ia ratou ra “i te mau mahana atoa e tae noa ˈtu i te anotau hopea o te ao nei.” (Mat. 28:20) I raro aˈe i ta Iesu aratairaa, e haapii mai “te tavini haapao maitai e te paari” e nafea ia paturu i ta tatou mau tiaturiraa. (Mat. 24:45-47; Pet. 1, 3:15) E fanaˈo tatou i te reira maoti te mau putuputuraa, mai te Oraraa e taviniraa Kerisetiano, e te mau papai Bibilia mai te mau tumu parau “Te pahono ra te Bibilia” i nia i te reni natirara jw.org. Te faaohipa maitai ra anei outou i teie mau faanahoraa? Mai te peu e e, e rahi mai to outou itoito e mǎtaˈu ore. E mai te mau aposetolo, eita outou e faaea i te faaite i te mau pue parau mau Bibilia faahiahia ta outou e ite e e faaroo ra.

13, 14. Ia faaû tatou i te patoiraa, eaha te tia ia tatou ia rave e no te aha?

¹³ I muri noa mai i to Petero e Ioane tuuraahia mai, haere atura raua e farerei i te toea o te amuiraa. E “pure aˈera ratou pauroa i te Atua” ia noaa mai te itoito no te tamau i te poro. (Ohi. 4:24) Ua ite maitai Petero ia tamata tatou i te rave i to te Atua hinaaro, eiaha tatou e tiaturi i to  tatou iho puai. Tau hebedoma na mua ˈtu, ua parau hoi o ˈna ia Iesu: “Noa ˈtu e e faarue ratou paatoa ia oe no ta oe e faaruru, eita roa vau e faarue ia oe!” Tera râ, mai ta Iesu i tohu, ua mǎtaˈu roa Petero i te taata e ua haavare ite i to ˈna hoa e taata haapii. Ua huti mai râ Petero i te haapiiraa no ta ˈna hape.—Mat. 26:33, 34, 69-75.

¹⁴ Ia hinaaro outou e auraro i te faaueraa e poro no nia i te Mesia, titauhia hau atu i te poro noa. Ia tamata te feia patoi i te haafifi i to outou faaroo aore ra i te tapea i ta outou pororaa, a pee i te hiˈoraa o Petero e Ioane. A ani ia Iehova i te itoito. A imi i te tauturu a te amuiraa. A paraparau i te mau matahiapo e te tahi atu mau Kerisetiano paari i te pae varua i ta outou e faaruru ra. Nehenehe te mau pure a te tahi atu e riro ei puai papu no outou.—Eph. 6:18; Iak. 5:16.

15. No te aha eiaha e toaruaru mai te peu ua faaea outou i te poro tau taime noa?

¹⁵ Mai te peu, ua hema e ua faaea outou i te poro tau taime noa, eiaha e toaruaru. A haamanaˈo, ua faaea pauroa te mau aposetolo i te poro tau taime noa i muri iho i to Iesu poheraa. Ua poro faahou râ ratou i muri aˈe. (Mat. 26:56; 28:10, 16-20) Eiaha ïa outou e vaiiho i te mau hape e faatoaruaru ia outou. A faaohipa râ i ta outou i haapii no te haapuai ia outou.

16, 17. Eaha ta tatou e haapii mai i te pure ta te mau pǐpǐ a Iesu i pûpû i Ierusalema?

¹⁶ No te aha ia pure tatou no te feia mana o te hamani ino ra ia tatou? A tapao na, aita te mau pǐpǐ i ani ia paruru Iehova ia ratou i mua i te hamani-ino-raa. Ua haamanaˈo ratou i ta Iesu i parau: “Ua hamani ino ratou ia ˈu, e hamani ino atoa ïa ratou ia outou.” (Ioa. 15:20) Ua ani râ teie mau pǐpǐ taiva ore ia Iehova ia “haapao” i te mau haamǎtaˈuraa a te feia patoi. (Ohi. 4:29) Ua ite te mau pǐpǐ e mea faufaa aˈe to te Atua hinaaro, e ua taa ia ratou, ia hamani-ino-hia ratou e faatupu te reira i te mau parau tohu. Ua ite ratou, mai ia Iesu i haapii ia ratou ia pure, e ‘tupu to te Atua hinaaro i te fenua nei’ noa ˈtu te mau mea ta te feia mana e rave.—Mat. 6:9, 10.

¹⁷ No te rave i te hinaaro o te Atua, ua pure te mau pǐpǐ ia Iehova: “Faatia mai na oe i to mau tavini ia faaite i ta oe parau ma te mǎtaˈu ore.” Oioi Iehova i te pahonoraa! “Aueue ihora te vahi i reira ratou i  te putuputuraa, î ihora ratou pauroa i te varua moˈa e faaite atura i te parau a te Atua ma te mǎtaˈu ore.” (Ohi. 4:29-31) Aita hoê aˈe mea e nehenehe e tapea i to te Atua hinaaro ia tupu. (Isa. 55:11) Noa ˈtu e manaˈohia aita to te Atua hinaaro e tupu, e noa ˈtu mea puai aˈe to tatou mau enemi. Ia pure tatou i te Atua ia horoa mai te puai, e na reira iho â o ˈna ia nehenehe tatou e poro ma te mǎtaˈu ore.

18. Eaha ta te mau mero o te amuiraa no Ierusalema i rave no te tahi i te tahi?

¹⁸ Oioi te amuiraa apî i Ierusalema i te rahi mai e ua hau atu 5 000 mero i roto. d Noa ˈtu to ratou tupuraa, “e aau e e manaˈo hoê” to te mau pǐpǐ. (Ohi. 4:32; Kor. 1, 1:10) Ua rave ratou hau atu i te pure noa ia Iehova e haamaitai mai i ta ratou mau tutavaraa. Ua turu ratou te tahi i te tahi i te pae varua e materia atoa. (Ioa. 1, 3:16-18) Ei hiˈoraa, ua hoo te pǐpǐ Iosepha pii-atoa-hia Baranaba, i to ˈna iho fenua e ua pûpû ma te aau horoa noa i te taatoaraa o te moni no te tauturu i te feia tei haere mai na te fenua atea no te faaea maoro i Ierusalema ia nehenehe ratou e haapuai i to ratou faaroo.

19. No te aha Iehova i haapohe ai ia Anania e Saphira?

¹⁹ Ua hoo atoa o Anania e Saphira i to raua fenua e ua horoa i te moni i te mau aposetolo. Ua hinaaro raua ia manaˈo ratou e ua horoa raua te taatoaraa o te moni i noaa mai. Ua ‘tapea omoˈe raua i te hoê tuhaa o te moni.’ (Ohi. 5:2) Haapohe ihora Iehova ia raua, eiaha no te moni ta raua i ore i horoa, no te mea râ mea ino ta raua i rave e ua haavare raua. ‘E ere te taata ta raua i haavare, o te Atua râ.’ (Ohi. 5:4) Mai te feia haavarevare ta Iesu i faautua, ua imi Anania e Saphira i te hanahana a te taata eiaha râ te farii maitai a te Atua.—Mat. 6:1-3.

20. Eaha te huti mai ia horoa tatou na Iehova ma te aau horoa noa?

²⁰ I te tau o te mau aposetolo, ua faaite te mau pǐpǐ taiva ore i Ierusalema i te aau horoa noa. I teie mahana, e mirioni Ite no Iehova o te faaite atoa ra i te aau horoa noa e o te horoa ra i te ô no te turu i te ohipa pororaa na te ao nei. Aita te tahi e faahepohia ia horoa i to ˈna taime e ta ˈna moni no te turu i teie ohipa. Oia mau, aita Iehova e hinaaro ra ia tavini tatou ia ˈna ma te hinaaro ore aore ra ma te faahepohia. (Kor. 2, 9:7) A haamanaˈo, te mea faufaa aˈe no Iehova e ere te tino moni ta tatou e horoa, te tumu râ e horoa ˈi tatou i te reira. (Mar. 12:41-44) Eiaha tatou e pee ia Anania e Saphira. Eiaha atoa tatou e tavini i te Atua ia noaa mai te hanahana aore ra te haamaitairaa. Mai ia Petero, Ioane e Baranaba râ, ia tavini noa tatou ia Iehova ma te here mau ia ˈna e i to tatou taata tupu.—Mat. 22:37-40.